Lukas 1:77 - Abun Scripture

⁷⁷ Bere nan ki nai men yé gato sok mo Yefun Allah bi rus-i subot os ndo gato Yefun Allah fro subere nai men wé kadit sukye, ete men kem ndo to kapyo mato kapyo. Bere nan ki rer nai men subere men jam do, Yefun Allah yo maskwa men mo sukibit gato men ben ne o nde, Yefun yo nutbot o nde, anato An ós men kem gesyos.

Lukas 1:77 Referans Kwoze

Suk Gato Yerasul Ben Ne 10:43

Yenabi mwa ne sino ki sukdu subot Yefun Yesus nai nje jam. Án ki do, ye gato onyar kem mo Yefun Yesus, bere ku os mone subere Yefun Allah yo maskwa ye ne mo sukibit gato an ben ne o nde, Yefun Allah yo nutbot sukibit ne o nde.”

Suk Gato Yerasul Ben Ne 5:31

Yefun Allah bes Yefun Yesus gum Yekwesu gato nggiwa jowa men yetu. Yefun Allah bes Yefun Yesus gum Yekwesu gato An syogat ma kak os ndo wa men yetu subere men ku os wa men kem ndo to kapyo mato kapyo. Yefun Allah bes Yefun Yesus gum Yekwesu subere men ye Israel ku os wa men kwet kadit sukibit gato men ben ne, ete men jammo Yefun, subere Yefun Allah yo maskwa men mo sukibit gato men ben ne o nde, tepsu An tot sukibit ne wé kadit men re.

Suk Gato Yerasul Ben Ne 2:38

Petrus ki do, ”Nin kadik-kadik nai sukjimnut do, nin kwet kadit sukibit gato nin ben ne, ete nin jammo Yefun et. Orete nin ma, nin bi nggwa wa men ras nin kadik-kadik mo syur sisu Yesus Kristus gum, tepsu nin gum sok mo Yesus Kristus bi nje-i mone it. Sane bere Yefun Allah yo maskwa nin mo sukibit mwa gato nin ben ne o nde, wo An tot sukibit ne wé kadit nin re. Orete Yefun Allah syo An Gen bok nggwa mo nin.

Suk Gato Yerasul Ben Ne 3:19

Sane nin kwet, nin brek kadit os ibit, ete nin jammo Yefun Allah et. Nin kwet subere Yefun Allah yo maskwa nin mo sukibit gato nin ben ne o nde, wo ben sato Yefun rus sukibit gato nin ben ne wé re.

Yohanes 1:34

Ji dakai me suk ne bor su ji gro mó re. Sane ji ki rer wa yé mwa ne sino jam do, Ye ne anato Yefun Allah bi Gan.”

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Lukas 3:6

Yetu mwa mo bur ré sino, bere án me Yekwesu gato Yefun Allah syogat ma wa nai men wé kadit sukye subere men kem ndo to kapyo mato kapyo.’ ”

Lukas 3:3

Sane Yohanes mubot nat mwa mo Syur Yordan ne sino. Yohanes kibot Yefun Allah bi suktaru mone, an ki nai nje gato ma mo an do, ”Nin kwet kadit sukibit gato nin ben ne, nin jammo Yefun, ete nin ma wa ji ras nin mo syur subere Yefun Allah yo maskwa nin mo sukibit mwa gato nin ben ne o nde, tepsu An tot sukibit ne wé kadit nin re.”

Efesus 1:7

Yefun Allah syo An bi Gan, Yesus Kristus ne ma kwop. Yefun Yesus dé sye wa men, An bi An nggwa wa tot suktot mo sukibit gato men ben ne wé. Sane anato Yefun Allah yo maskwa ket men mo sukibit ne o nde, An yo nutbot o nde. Sane men me mone do, Yefun Allah bi sukjimnut sye kas subot men ndo nde, men yo ben suk yo nyim wa An nde, wo

Roma 3:25

Yefun Allah bi Yesus Kristus ma kwop, An dé sye wa men, An dé sye win men mo sukibit gato men ben ne. Sane men yé gato onyar kem mo suk gato Kristus ben ne bere Yefun Allah iwa nai men sok mo An bi rus-i it. Yefun Allah fro os gare wa kadum do, Yefun Allah ben An bi suk-i ne ri-roi su men sor, we sugato nyim tuya Kristus ma nde tó, yetu da ben sukibit mwa, sarewo Yefun Allah yo maskwa án mo nde tó, Yefun misyar yei.

Suk Gato Yerasul Ben Ne 19:4

Sane, Paulus ki do, ”Yohanes duno nje subere án kwet kadit sukibit gato án ben ne, orete Yohanes ras án mo syur. Yohanes waii duno án o subere án ben sukibit o nde, wo án jammo Ye gato boribot Yohanes. Ye gane gum do Yesus.”