Kolose 4:3 - Abun Scripture

³ Nin do ki suk su Yefun yo, nin ki suk su Yefun wa men more dom, subere Yefun Allah kak os ndo wa men ki sukdu subot Kristus ne frek subot ye yi neya. Sukdu ne, suga nyim neya Yefun Allah gurik re. Ji kibot sukdu ne anato ye sok ji mo sel.

Kolose 4:3 Referans Kwoze

Suk Gato Yerasul Ben Ne 14:27

An we mu kom mone, or an we kendo ye gato onyar kem mo Yefun Yesus sum sino, orge an we ki subot suk mwa gato Yefun Allah ben su an we mo pe bok yo gato an we mu mone. An we ki do, ”Yefun Allah ben men ka we nggiwa men ka we ki subot An bi sukdu, Yefun Allah ben men ka we nggiwa ben sukye gato ben nje yeket. Yefun Allah kak os wa men ka we ki An bi sukdu nai yewis yi, ete yewis yi mwa ne nai sukjimnut do, án onyar kem mo Yefun Yesus mone dom.”

Kolose 1:26

An syogat ji ki subot sukdu gato kam nyim tuya Yefun Allah gurik kadit yetu mwa ne sino, wo su ré, An ki An bi sukdu ne rer nai yé gato onyar kem mo Yefun Yesus ne jam it.

2 Korintus 2:12

Ji mu mo kota Troas wa ji kibot os ndo gato Kristus kak wa men yetu ne. Ji mu kom mone sa, Yefun Yesus kak os wa ji kibot sukdu mone.

2 Timotius 2:9

anato ji ku sukye re. Ye rai ji su rantai tepsu ye rai ye gato ben sukibit. Sarewo ye yo bi os wa ye rai Yefun Allah bi sukdu ne su rantai nde.

Filipi 1:7

Ji mit at wa nin, ji jimnutbot nin anato ndo, we ji gen ne kem pe su nin mone re. Sane dom, ji jimnotku nin, we yé bok ji mo sel more yo, ji duno nje su sukdu subot os ndo gato Yesus Kristus kak ne yo, ji ki rer subot sukdu ne nai ye gato duwer ji mo sukdu ne yo, nin si ji tepsu dik wa ben suk gato Yefun Allah fro wa ji ben ne sino.

Efesus 4:1

Sane, ji gato gum do Paulus ré, gato yé bok mo sel, we ji ben Yefun bi suk-i, ji ki sare do, Yefun Allah nai nin wa nin sok mo An bi rus-i tepsu An bi pá-i. Sane nin ben suk tepsu Yefun bi pá-i ne et. Nin jammo suk gato ji ki ré et.

1 Korintus 16:9

we, kapre yé mwa duwer ji, Yefun kak os wa ji ben An bi suk-i gato ós nje more tó.

1 Korintus 4:1

Sane yé nut subot men yerasul do, men anato tepsu Kristus bi pakwerut sor. Yefun Allah bes men wa men mu ki subot An bi sukdu-i. An grem An bi sukdu-i su men. Suga nyim tuya Yefun Allah bi sukdu ne yo bor wa yé mwa jam nde, wo su ré men ki sukdu ne rer wa yé mwa jam it.

1 Tesalonika 5:25

Men bi nji, men bi nyanggon, nin ki suk su Yefun Allah wa men petok sor.

Matius 13:11

Yefun Yesus ki do, ”Sukdu gato Yefun Allah gurik suga nyim subot os ndo gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit, sarewo ye yi neya yo jam sukdu ne rer kom mo mit nde tó.

Filemon 1:22

Ji ndekwa nan fro gumwak dik yo wa ji dom et, we ji kwabom kam mo Yefun Allah do, bere Yefun jam suk gato nin sino ki nai An, ete An kak os wa ji satu ba ku nin sino mone.

Filipi 1:19

we ji jam do, bere yepasye sombok ji kadit sukye gato ji ku mo sel ré. Nin ki suk su Yefun wa ji, sane bere Yefun Gen ós ji dom anato ji jam do, bere yé sombok ji re.

2 Timotius 1:16

Sarewo Onesiforus si bi rus ma ku ji, án ma ben ji mit ndo wam bok yo re. Kapre ji kem mo sel, an yo damen wa an ma ku ji more nde. Yefun ete dakai ben sukndo su án sor.

Efesus 3:1

Sane ji, gato gum do Paulus ré, ji werwa duno nin yewis yi subere nin onyar kem mo Yesus Kristus anato ye sok ji mo sel ne.

Roma 16:25

Men bes Yefun Allah gum kok et. Ji ki sukdu subot os ndo gato Yefun Allah fro wa men yetu, ji ki subot Yesus Kristus gato kak os ne, orete nin jammo sukdu ne. Sane Yefun Allah ós nin anato nin onyar kem mo Yefun nggi wai kadit nyim ne o re. Kadit nyim tuya kom more, Yefun yo kadum sukdu ne rer wa ye jam nde, Yefun gurik sukdu subot os ne re,

Efesus 3:3

Suktaru gato Yefun Allah fro wa ji ki ne, An yo kadum rer wa yetu jam nde tó, An ki rer nai ji jam nyim wé re. (Ji krom subot suktaru ne napyo nai nin jam mó re.

Efesus 3:4

Nin dakai baca sukdu ne sa, bere nin jam rer do, sukdu mwa subot Kristus gato Yefun Allah gurik suga nyim tuya, su ré ji jam kom mo mit re.)

Efesus 3:9

Ji mu ji ki subot os ndo ne sor nde, wo Yefun Allah bes ji wa ji ki subot suk gato Yefun ben subere An bi os-i ne kas sisu ndo mo bur ré, ji kibot rer wa yé mwa jam. Suga nyim tuya, Yefun Allah, gato ut suk mwa mo bur ré, An gurik sukdu ne kadit men, wo su ré, os gato An fro wa men ne An kadum bor it, orete ji mu ki subot sukdu ne rer wa yé jam o re.

Kolose 4:18

Ji, gato gum do Paulus ré, ki ndo mo nin sor. Ji dakai krom sukdu kwa gato wari ré su ji syim. Ji kem mo sel tó, nin mbrinket ji nde. Yefun Allah ete mewa nin sino sor.

2 Timotius 4:2

Nan ki subot os ndo gato Yefun Allah fro wa yé mwa jam sisu ndo et. Nan duno nje gat, ye bari o, ye iwa o, nan duno nje gat sor. Nan me ye gato ben sukibit yo, nan ki mo án, nan ndantom án subere án kwet kadit sukibit gato án ben ne, ete án ben suk gato ndo. Nan wergat nje subere án benbot sukduno gato nan duno án su ne. Nan duno nje sisu njep sor. Kapre ye yo jammo nan bi sukduno kekro nde, nan maskwa wokgan dom nde, wo nan werwa kom-kem petok sor.