Ibrani 9:15 - Abun Scripture

¹⁵ Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

Ibrani 9:15 Referans Kwoze

Roma 8:30

Sane Yefun Allah kendo ye gato An dakai fro suga nyim tuya ne. Ye gato Yefun Allah kendo sok mo An bi rus-i ré, Yefun Allah ki mo yé ne do, yé ne sa, tep wa Yefun nai yé ne gum sok mo An bi rus-i ne. Ye gato Yefun Allah nai gum sok mo bi rus-i yo, Yefun bes yé ne gum kok sye wai tepsu Yefun o re.

Roma 8:28

Men yé gato bi sukjimnut sye kas subot Yefun Allah ne, men jam do, mo suk mwa ne sino gato bor mo men, bere kom mo rut, Yefun Allah fro suk mwa ne ndo wa men yé gato simo os ndo gato An fro ne.

Ibrani 9:12

An sok mo Yefun Allah dakai bi gumwak fo mo nu ne mit mo gu re. Kristus sok mone An ben suk wa men wam dik sor re, tep it, wam dik ne tep wa kapyo mato kapyo. An yo sok mone o nde. An sok mone sa, An yo gwat suge sato kambing si sapi gan ne dé-i nde, wo An gwat An dakai dé-i. An gwat An dé-i mone anato An tot suktot mo sukibit gato men yetu ben ne wé re, sane sukibit ne yo ut mo men o nde sor to kapyo mato kapyo.

Ibrani 10:36

Nin jom Yefun Allah bi sukdu-i ne pe sor, subere nin nggiwa ben suk tepsu Yefun Allah mit. Nin werwa nin ben suk tepsu Yefun Allah mit petok sor subere nin ku suk mwa gato An tom su nin ne.

1 Timotius 2:5

Yefun Allah ne ka dik sor. Ye gato tepsu yegweswai wa men si Yefun Allah ne ka dik sor. Yegweswai ne gum do Yesus Kristus.

Ibrani 12:24

Mone nin ku Yefun Yesus gato dé sye wa kak os be tepsu yegweswai wa men yetu. Yefun Yesus dé-i ne sa, ben sato ye dar mo nin mo sukibit gato nin ben ne subere tot sukibit ne or wé kadit nin re. Yefun Yesus dé-i gato sye wa kak os gato be ne sa, bi sukdu-i gato Yefun Allah tom su men ndo wai kadit sukdu subot Habel dé-i ne o re. Sane nin yo ku sukye tepsu ye Israel nde, wo ben sato nin ku suk mwa gato ndo mo gu ne it.

Ibrani 7:22

Sane men jam do, sangge, os be gato Yefun Yesus tepsu yegweswai wa ne anato ndo wai kadit os rok mo Musa bi sukduno-i ne o re.

1 Petrus 3:18

Ndo sa, men ku sukye mo sukndo gato men ben ne, we Kristus dom ku sukye mo sukndo gato An ben ne re. Kristus kwop wam dik sor, tep wa tot sukibit mwa gato men ben ne wé re. Kristus yo ben sukibit mo nde. An kwop wa men yé gato ben sukibit, subere An kak os wa men ma sok mo Yefun Allah bi rus-i. An da kridek kwop, wo Yefun Allah Gen sun An kaim gesyos satu kadit sukkwop ne o re.

Ibrani 13:20

Yefun Yesus kwop, An dé sye anato An kak os be gato gesyos, os be ne kem su men kadit kam ne sor to kapyo mato kapyo. Sane Yefun Allah sun men bi Yekwesu Yesus Kristus satu kadit sukkwop, ete An bes Yesus Kristus gum kok wai wa mewa men yé gato sibot os be ne. Kristus mewa men tepsu yetu mewa bi suksi sato domba ne sisu ndo.

Roma 5:6

Tepsu kam gato Yefun Allah fro ne, men yo ku os mo nde tó, Kristus ma kwop win men yetu gato bariket Yefun Allah ne.

Ibrani 9:28

Sane dom, Kristus bi nggwa kwop wam dik wa men yetu mwa ne tepsu suktot wa tot sukibit gato men ben or wé re. Or o, bere Kristus ma wam kedowe o. An ma o yo, An kwop wa tot men bi sukibit ne o nde, wo bere An ma wa nai men yé gato eswa An ma ne, ete An gwat men mu sok mo An bi nat-i.

Ibrani 6:13

Yefun Allah tom su Abraham, An syo An syim ete An ki An gum su do, ”Bere Ji benbot suk gato Ji tom su nan ne sor.” Ye yo gum kok wai kadit Yefun Allah yo mo nde, sane An dakai tom su Abraham sa, An dakai ki An gum mó.

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

Ibrani 2:14

Pa mwa ne tepsu yetu gato da kridek. Sane anato Yefun Yesus dakai ben nggwa tepsu yetu gato da kridek mó dom. An ben nggwa tepsu yetu subere An kwop sa, An ku os wa An nai biris bi yekwesu bi suktinggi gato gwat sukkwop ma wa men yetu ne wé. Yefun Yesus ben biris bi yekwesu ibit it anare, Yefun syat suktinggi ibit ne wé re.

Wahyu 5:9

Án sino ba sukbadek be yo sare do, ”Domba ga gum kok ne o, Domba ga sye wai ne o, Nan sa, gum kok tep wa Nan nai buku ne o, tep wa Nan kak lilin gum wé ne o. Nan gum kok a we, Nan gum sye wai a we, Ye gu Nan, Nan dé sye wa yetu ne o, Nan bi nggwa tepsu suktot wa ne o. Nan dé sye wa yetu o, Nan tepsu suktot wa yetu o, Nan dé sye wa yeyo-yeyo gato sok mo Yefun bi rus-i ne o, Yetu mwa ne mo buryo-buryo sino o. Nan dé sye wa yetu o, Nan tepsu suktot wa yetu o, Nan dé sye wa yetu wisyo-wisyo sino ne o, Yetu mwa gato ki ayo-ayo sino o.

Ibrani 8:13

Mo sukdu ne Yefun Allah ki do, ”Ji frot Ji bi os gato be su yewis ye Israel.” Yefun Allah ki do, os ne anato os be. Sane os gato An tom su ye Israel suga nyim tuya ne, Yefun ki do, os gato rok ne yo ndo wa men sibot o nde, bergan os ne yo mó o nde. {Sane men sibot os gato be ne sor.}

Titus 3:7

Yefun Yesus dakai ben sukndo su men yi, men yo ben suk yo nyim wa An nde, anato An yo ben sukye nai men tepsu sukibit gato men ben ne nde, wo An ki do, men sa, tep wa sok mo Yefun Allah bi rus-i. Sane anato suk gato men bi sukjimnut kem pe mone do, bere men kem ndo to kapyo mato kapyo ne yo, men jam men ku it.

Titus 1:2

Án jammo Yefun Allah, we án kwabom kam mo Yefun Allah do, bere Yefun nai án gum sok mo Yefun bi rus-i, bere án si Yefun kem ndo to kapyo mato kapyo, tepsu Yefun Allah tom su men sugato An ut bur ré nde tó. Suk gato Yefun Allah tom su men ne, bere An benbot sor, An yo kidar nde.

2 Timotius 2:10

Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o re.

Yohanes 10:28

Ji mewa domba ne subere domba mbau to kapyo mato kapyo, domba ne yo ges mo bot gesyos nde. Ye yi yo nggiwa nai Ji bi domba wé kadit Ji nde.

Matius 19:29

Yé mwa ne sino gato misyar bi nu e, bi nji e, bi nyanggon e, bi yenggras e, bi pa e, bi bur det e ne subere an mu ben Ji bi suk-i yo, bere Yefun Allah win suk mwa gato an misyar ne mu kom mo wam wotin dik yo, ete bere án kem ndo to kapyo mato kapyo.

1 Yohanes 2:25

Sane Yesus Kristus dakai tom su men do, bere men kem ndo to kapyo mato kapyo.

1 Petrus 5:10

Nin ku sukye mone bergan sor re, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o re. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

Yakobus 1:12

Ye to ku sukye, ete an yo misyar Yefun Allah nde, wo an jom Yefun Allah bi sukdu-i ne krat sor, bere an mit at wa, we án jam do, sukye ne or kadit an yo, bere Yefun Allah syo suk gato ndo nai an mone, bere Yefun ós an kem ndo tepsu Yefun Allah tom su ye gato bi sukjimnut sye kas subot Yefun Allah ne.

Ibrani 11:13

Yenggras bok gato men krombot more onyar kem mo suk gato Yefun ki sane sor, án yo ku tepsu Yefun tom ne nde tó, án kwop kadit re, wo án dakai jam do, ri ma, suk mwa ne bere bor mone tó. Yenggras bok ne yo me suk mwa ne sino su án gro nde, wo án bi sukjimnut sor ete kom mone re. Án ki subot bur ré do, bur ré yo tepsu án bi nat-i nde, án tepsu yemabe gato muya-muma, án tepsu yedamok gato bergan sor ete mu kadit bur ré re.

2 Tesalonika 2:14

Men ba ku nin, ete men ki sukdu subot os ndo gato Yesus Kristus kak ne. Nin jammo sukdu ne anato nin kem ndo to kapyo mato kapyo. Sane mo sukdu gato men ki ne ben sato Yefun Allah kendo nin mone, subere nin si men sino ku suk gato ndo wai mo Yefun Allah bi nat-i tepsu men bi Yekwesu Yesus Kristus ku suk gato ndo wai mone.

Roma 6:23

Sane men do jammo sukjimnut ibit yo, bere men ges mo bot gesyos mo koirut sor. Sarewo suk gato Yefun Allah syo yi nai men anato An syo men bi Yekwesu Yesus Kristus ma kak os ndo wa men kem ndo to kapyo mato kapyo.

Ibrani 9:16

Sato yetu ge dik yo, an kwop nde tó, an duno pa dik yo su an bi sukrok do, ri ma an do kwop it yo, bere pa ne wat an bi sukrok subot yé gato an tom su ne tepsu sukdu gato an ki ne. Sane yé jam do, an kwop it yo, sukdu ne kem su nje wa yé benbot it anane.

2 Korintus 3:6

Yefun Allah anato ben men nggiwa men gwat sukdu subot os be gato Kristus kak wa men ne. Os be bi sukduno-i yo tepsu sukduno gato kam nyim Musa krom ne nde, wo sukduno be ne ma kadit Yefun Allah Gen. Sukduno nyim ne gwat sukkwop wa men, wo sukduno be gato men jam kadit Yefun Allah Gen ne sa, bere kak os wa men mbau to kapyo mato kapyo.

Roma 9:24

Men ré anato yé gato Yefun Allah fro wa ku suk gato ndo yé ne, men ye Yahudi sor nde, wo yewis yi neya dom re.

Roma 5:10

Suga nyim men bariket Yefun Allah, sarewo Yefun Allah syo An bi Gan ma kwop kak os wa men si Yefun Allah kem ndo su yu. Sane su ré, Kristus mbau, ete men si Yefun Allah kem ndo su yu it, sane bere Kristus kak os wa men kem ndo mo Yefun Allah bi nat-i ne o re.

Roma 5:8

Sarewo men ben men bi suk-i siri kadit Yefun Allah mit tó, sugane Yesus Kristus ma bi nggwa kwop win men. Sane anato men jam mone do, Yefun Allah bi sukjimnut sye kas subot men ndo nde.

Lukas 18:18

Ye Yahudi bi yekwesu dik yo ndo mo Yefun Yesus do, ”Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?”

Markus 10:17

Yefun Yesus do mu o kadit nat ne sa, yetu ge dik yo kas ma. An tu an umsu mo Yefun Yesus gwem, ete an ndo mo Yefun Yesus do, ”Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?”

Matius 25:36

Ji yewa san, ete nin syo san wa Ji it. Ji i, ete nin mewa Ji. Yé bok Ji mo sel, ete nin ma ku Ji mone.’

Matius 25:34

Sugane Ji, gato Yekwesu mone bere Ji ki nai nje gato tak Ji de syim ge do, ’Nin ma, nin yé gato Ji bi Ai ben sukndo su. Nin ma nin nai suk gato Yefun Allah fro wa nin ne. Yefun fro nat wa nin si An gum yekwesu mone sino, An fro nat ne ndek kadit kam gato An ut bur ré re.

Efesus 1:7

Yefun Allah syo An bi Gan, Yesus Kristus ne ma kwop. Yefun Yesus dé sye wa men, An bi An nggwa wa tot suktot mo sukibit gato men ben ne wé. Sane anato Yefun Allah yo maskwa ket men mo sukibit ne o nde, An yo nutbot o nde. Sane men me mone do, Yefun Allah bi sukjimnut sye kas subot men ndo nde, men yo ben suk yo nyim wa An nde, wo

Matius 22:3

Yeraja ne syogat an bi pakwerut ge bok yo mubot nje wa kendo yé mwa ne ma, sarewo yé mwa ne bariwa re.

Lukas 22:20

Sane dom, án sino git sugit, or Yefun Yesus nai sukbo su nau anggur, ete An ki do, ”Nau gato ji sye wa nin ré anato tepsu Ji dé gato bere sye ne subere Ji kak os gato be wa Yefun Allah nai nin gum sok mo An bi rus-i sagato An tom ne.”]

Suk Gato Yerasul Ben Ne 20:32

Sane, ji syo nin mo Yefun Allah syim-i, bere An mewa nin tepsu sukdu gato An ki ne. Nin jammo An bi sukdu ne sa, bere sukdu ne ós nin onyar kem mo Yefun Yesus nggi wai o, ete bere An syo sukndo nai nin si yé mwa ne sino gato sok mo An bi rus-i ne.

Galatia 3:20

Yegweswai sagana gwat sukdu kadit yetu ge dik yo, ete ki nai yetu ge dik yo o. Sarewo suk gato Yefun Allah tom su Abraham, yegweswai yo mo nde, wo Yefun Allah wadigan tom suk su Abraham sor re.

Ibrani 6:15

Sane Abraham kem ete eswa suk gato Yefun Allah tom su an, an eswa sane sane sor, suk gato Yefun tom su an bor mone, Abraham ku it.

Ibrani 10:34

Nin nutbot yé gato yé bok mo sel ndo nde, nin baoku yé mo sel ne ndo nde. Kapre yé nai nin bi suk mwa kadit nin o, nin yo maskwa nde, wo nin iwa, nin mit at wa sor, we nin jam do, nin bi suk mwa gato ndo wai mó re. Suk mwa ne anato tepsu suk mwa gato Yefun Allah tom su nin. Suk ne kem ndo to kapyo mato kapyo, ye yo ku os wa nai suk gato Yefun Allah fro wa nin ne wé kadit nin nde.