Ibrani 8:13 - Abun Scripture

¹³ Mo sukdu ne Yefun Allah ki do, ”Ji frot Ji bi os gato be su yewis ye Israel.” Yefun Allah ki do, os ne anato os be. Sane os gato An tom su ye Israel suga nyim tuya ne, Yefun ki do, os gato rok ne yo ndo wa men sibot o nde, bergan os ne yo mó o nde. {Sane men sibot os gato be ne sor.}

Ibrani 8:13 Referans Kwoze

2 Korintus 5:17

Sane men si Yesus Kristus tepsu dik it yo, men anato ye gato be o re. Men yo simo os ibit saga nyim ne o nde, wo men simo os be mo suk mwa ne sino o re.

Ibrani 9:15

Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

1 Korintus 13:8

Men bi sukjimnut sye kas subot ye yi sor kom mo kapyo mato kapyo. Su ré yé deyo duno nje su Yefun Allah bi suktaru, sarewo kam yo tak, bere yé yo duno nje su suktaru ne o nde. Su ré yé deyo jam ki suk su a yi gato án dakai jam nde, sarewo kam yo tak, bere yé yo ben sane o nde. Su ré yé deyo jam suk mwa, sarewo kam yo tak, bere sukjimnut gane or kadit men yetu re.

Matius 24:35

Gu nim ne si bur ré bere kru re, wo Ji bi sukdu ne kem sor to kapyo mato kapyo.”

Lukas 22:20

Sane dom, án sino git sugit, or Yefun Yesus nai sukbo su nau anggur, ete An ki do, ”Nau gato ji sye wa nin ré anato tepsu Ji dé gato bere sye ne subere Ji kak os gato be wa Yefun Allah nai nin gum sok mo An bi rus-i sagato An tom ne.”]

2 Korintus 3:6

Yefun Allah anato ben men nggiwa men gwat sukdu subot os be gato Kristus kak wa men ne. Os be bi sukduno-i yo tepsu sukduno gato kam nyim Musa krom ne nde, wo sukduno be ne ma kadit Yefun Allah Gen. Sukduno nyim ne gwat sukkwop wa men, wo sukduno be gato men jam kadit Yefun Allah Gen ne sa, bere kak os wa men mbau to kapyo mato kapyo.

Ibrani 1:11

Suk mwa mo bur ré si gu nim ne sino bere ibit or re, wo Nan dakai sor ete kem pe. Suk mwa mo bur ré si gu nim ne sino bere ibit tepsu san bere ibit or re.

Ibrani 7:22

Sane men jam do, sangge, os be gato Yefun Yesus tepsu yegweswai wa ne anato ndo wai kadit os rok mo Musa bi sukduno-i ne o re.

Ibrani 8:6

Sarewo su ré, Yefun Allah bes Yefun Yesus tepsu yegweswai wa men yetu si Yefun Allah. Yefun Yesus ben An bi suk-i tepsu Yekwesu ne ndo wai kadit yekwesu mwa gato nyim neya o re, we os be gato Yefun Yesus gwat ma ne ndo wai kadit os nyim ne. Os be ne ndo wai, we os be ne i-ke mo suk gato Yefun tom su men gato ndo wai kadit suk gato Yefun tom mo os nyim ne o re.

Ibrani 8:8

sarewo Yefun Allah me do, ye Israel ben bi suk-i siri kadit os nyim ne. Sane Yefun Allah ki nai án do, ”Bere bi kam gato tep wa os be ne bor, Bere Ji frot Ji bi os gato be ne su yewis ye Israel sisu yewis ye Yehuda ne sino.

Ibrani 12:24

Mone nin ku Yefun Yesus gato dé sye wa kak os be tepsu yegweswai wa men yetu. Yefun Yesus dé-i ne sa, ben sato ye dar mo nin mo sukibit gato nin ben ne subere tot sukibit ne or wé kadit nin re. Yefun Yesus dé-i gato sye wa kak os gato be ne sa, bi sukdu-i gato Yefun Allah tom su men ndo wai kadit sukdu subot Habel dé-i ne o re. Sane nin yo ku sukye tepsu ye Israel nde, wo ben sato nin ku suk mwa gato ndo mo gu ne it.