Ibrani 7:25 - Abun Scripture

²⁵ Sane anato Yefun Yesus nggiwa ben suk tepsu yegweswai wa ós men yé gato iwa ma mo Yefun Allah bi nat-i sor to kapyo mato kapyo. Yefun Yesus kem gesyos, An ós wa ki suk su Yefun Allah tepsu yegweswai wa men petok sor.

Ibrani 7:25 Referans Kwoze

Roma 8:34

Ye yo ku os wa ki men gum ibit ne mó e? Yo mo nde, we Yesus Kristus gato kwop wa men ete mbau satu o, Yesus Kristus ne kem tak Yefun Allah de syim ge, anato Kristus gwa yawa men gum mo sukdu gato ye kiket men daret re.

1 Timotius 2:5

Yefun Allah ne ka dik sor. Ye gato tepsu yegweswai wa men si Yefun Allah ne ka dik sor. Yegweswai ne gum do Yesus Kristus.

Yudas 1:24

Yesus Kristus ete nggiwa mewa nin kadit nin ges mo os ibit. An ete nggiwa gwat nin ma kem mo Yefun Allah gato gum kok ne gwem. Mo An bi nat-i gato ndo wai ne sukibit yo ut mo nin o nde, bere nin mit at wa sor.

Yohanes 14:6

Yefun Yesus ki nai an do, ”Ji dakai anato tepsu os gato mu mo Yefun Allah. Ji anato tepsu os gato sangge. Ji anato kak os wa yetu kem ndo mone. Yetu yo ku os wa an mu kom mo Ji bi Ai nde, wo an sibot os gato Ji kak ne sa, bere an kom mo Ji bi Ai re.

Efesus 2:18

Yefun Allah Gen ka dik ne gwat men subot os gato Yesus Kristus kak wa men sino, ye Yahudi si yewis yi ne, subere men sino karowa men bi Ai, Yefun Allah ne.

Roma 5:2

Men onyar kem mo Yesus Kristus sane Yesus Kristus kak os wa men dakai yi anato men si Yefun Allah kem ndo su yu. Men jam do, sangge, bere men kem ndo wai tepsu Yefun Allah kem ndo wai o re, sane men mit at wa.

Ibrani 11:6

Ye gato yo onyar kem mo Yefun Allah nde tó yo, bere ye ne yo ku os wa ben suk tepsu Yefun Allah mit nde. We, ye gato ma mo Yefun Allah it yo, an onyar kem mo sukdu sare do, Yefun Allah ne sa, mó re, ete Yefun ben sukndo su ye gato meret An.

Efesus 3:20

Yefun Allah bi suktinggi bere nggiwa ben suk mo men mit, sane bere An ben suk mwa mo men mit wai kadit suk gato men ndekwa An ben ne o re. Bere An ben suk mwa wai kadit men jimnutbot ne re, men bi sukjimnut yo kom mo pe ne nde.

Ibrani 9:24

Kristus dé anato win suge dé mo nu mo gu ne re. Sane anato Kristus yo sok mo nu kemah gato yetu nggo mo bur ré nde. Nu mo bur ré tepsu sukkran subot nu gato sangge mo gu ne sor re. Sane Kristus yo sok mo nu mo bur ré nde, wo Kristus dakai sok mo nu mo gu ne, anato su ré, An ki suk tepsu yegweswai su Yefun Allah wa men yetu mone.

Ibrani 7:19

Sukduno ne yo ós ben suk yo ndo mo nde. Sane su ré Yefun Allah fro os gato ndo wai wa men o re. Men kwabom kam mo Yefun Allah do, sukduno be gato An fro ne anato kak os wa men subere men karowa Yefun Allah it.

Yohanes 14:13

Suk to nin ndek mo Ji bi Ai yo, nin ki Ji gum mo suk ne, bere Ji syo nai nin. Ji syo suk ne nai nin subere yé bes Ji bi Ai gum kok mo suk gato Ji syo nai nin ne.

Ibrani 5:7

Yefun Yesus kem mo bur ré tó sa, An ki suk su Yefun Allah, An benadi, ete An wo su. An ki suk nggi su Yefun Allah gato nggiwa nai An wé kadit yé gato iwa gu An kwop ne. Yefun Yesus iwa jammo Yefun Allah, sane anato Yefun Allah iwa jam suk gato An ki nai Yefun Allah ne.

Ibrani 13:15

Yefun Yesus kak os wa men sane it yo, men un Yefun Allah mone petok sor. Tepsu suga nyim ne, ye gwat suge ma wa som Yefun Allah su ne, su ré men bes Yefun Allah gum kok, men un Yefun gum su sukdu gato men ki nai An ne sor. Sane su ré men yo gwat suge ma wa men som Yefun Allah su o nde, wo men ki sukdu gato ndo wa som An su ne sor.

Ibrani 7:16

Yesus Kristus kem gesyos tepsu Melkisedek, sane Yefun Allah bes Yesus Kristus tepsu Yekwesu mo Yefun Allah bi nu, kadit An sok mo Lewi bi yewis-i tepsu Musa bi sukduno-i nde, wo Yefun Allah bes An tepsu Yekwesu, we Yesus Kristus nggiwa kem to kapyo mato kapyo, yo or nde.

Ibrani 2:18

Biris bi yekwesu meret os wa Yefun Yesus subere Yefun ges mo os ibit mó re. Yefun ku sukye mone, wo An yo ges mo os ibit nde. Sane anato An nggiwa os men yé gato biris bi yekwesu werwa ben kidar ges mo os ibit ne dom. Yefun Yesus sa, nggiwa mewa men kadit sukye gato men ku mone.

Filipi 3:21

Yesus Kristus nggi wai o re. Suk mwa mo gu nim ne si bur ré jammo An it. Sane bere Yesus Kristus win men kaim-i gato budat ré tepsu An dakai kaim-i gato gesyos, gato ndo wai ne o re.

Yohanes 14:16

Bere Ji ndek mo Ji bi Ai subere An bi An Gen ma win Ji. An Gen ne tepsu yegweswai gato ós nin, ete sisu nin pe to kapyo mato kapyo.

2 Timotius 1:12

Ji ki subot sukdu ne anato ji ku sukye mwa ré, sarewo suk yo nde, ji yo damen nde, we Yefun Yesus gato ji onyar kem mó, ji jam kom mo mit re. Sukdu gato Yefun Yesus bes ji wa ji ki subot ne, bere An mewa sukdu ne sor, sukdu ne yo ges nde. Bere An mewa sor, kom mo kam gato An satu ma mo bur ré, ji jamwa re.

Ibrani 7:24

Sarewo Yefun Yesus kem gesyos. Sane Yefun Yesus ben suk tepsu yegweswai sane petok sor, yo or nde, Yefun Allah yo win An nde.

Efesus 3:12

Yesus Kristus kak os wa men anato men yé gato onyar kem mo An, men yo damen wa ki suk su Yefun Allah o nde, wo men jam rer do, suk gato men ki nai An, bere An iwa An jam.

Ibrani 7:8

Yesu gato ben suk mo Yefun Allah bi nu mo Lewi bi yewis-i ne, ye syo suk napyo nai án, sarewo yo nam nde ge, án kwop re, wo Melkisedek sa, Abraham syo suk napyo nai Melkisedek gato kem gesyos, tepsu ye krom mo Yefun Allah bi sukdu ne.

Roma 5:10

Suga nyim men bariket Yefun Allah, sarewo Yefun Allah syo An bi Gan ma kwop kak os wa men si Yefun Allah kem ndo su yu. Sane su ré, Kristus mbau, ete men si Yefun Allah kem ndo su yu it, sane bere Kristus kak os wa men kem ndo mo Yefun Allah bi nat-i ne o re.

1 Korintus 1:21

Yefun Allah gato bi sukjimnut ne ko wai o re anato fro os subere men jam An sisu ndo. Men jam An kadit men yetu bi sukjimnut mwa gato kru nde, wo men jam An kadit sukdu gato men kibot Yesus Kristus. Sukdu ne, ye yi ki do, men dakai ki daret kaii, sarewo kadit sukdu gato ndaf ne, Yefun Allah fro os wa nai men yé gato onyar kem mo sukdu ne kadit sukye mo bot gesyos, subere men kem ndo to kapyo mato kapyo.

Ibrani 2:9

Sarewo men me do, Yefun Yesus sa, jom suk mwa ne sino it. Yefun Allah is Yefun Yesus gum-i ga wokgan mo bur kadit malaikat gum-i ne bergan sor re, subere Yefun Allah bi sukjimnut sye dakai kas subot men yetu anato An syogat Yefun Yesus ma ku sukye ete kwop wa men yetu sino. Sane su ré Yefun Allah bes An gum kok tepsu Yekwesu, ete yé mwa un Yefun Yesus or re.