Ibrani 5:9 - Abun Scripture

⁹ Sane An ben suk mwa gato Yefun Allah fro wa An ben ne or sa, An kak os wa men yetu gato jammo An muket, subere An nai men wé kadit bot gesyos, subere men kem ndo to kapyo mato kapyo.

Ibrani 5:9 Referans Kwoze

Ibrani 9:15

Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

Ibrani 2:10

Yefun Allah sa, ben bi suk-i tep sino. Yefun gato ut suk mwa ne sino wa An dakai, An misyar yé ben sukye mwa nai Yefun Yesus subere kadum do, Yefun Yesus gum ndo wai o re, kwa yo gwet mo nde, sane Yefun Allah bes Kristus wa kak os ndo wa men yetu. Yefun Yesus ku sukye ket kwayo-kwayo ete An bi An nggwa subere An kak os wa Yefun Allah kar bi pa mwa si Yefun Yesus sino kem mo bi nat-i gato ndo wai o re.

Ibrani 12:2

Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.

Ibrani 9:12

An sok mo Yefun Allah dakai bi gumwak fo mo nu ne mit mo gu re. Kristus sok mone An ben suk wa men wam dik sor re, tep it, wam dik ne tep wa kapyo mato kapyo. An yo sok mone o nde. An sok mone sa, An yo gwat suge sato kambing si sapi gan ne dé-i nde, wo An gwat An dakai dé-i. An gwat An dé-i mone anato An tot suktot mo sukibit gato men yetu ben ne wé re, sane sukibit ne yo ut mo men o nde sor to kapyo mato kapyo.

Suk Gato Yerasul Ben Ne 5:32

Sukdu gato men ki subot ne, men dakai me su men gro it, anato men kibot ne. Yefun Allah Gen me su An gro dom, sane An ki sukdu subot Yefun Yesus mo men yetu mit si men onyar. Yefun Allah Gen ne, Yefun Allah syo nai men yé gato jammo An.”

1 Petrus 1:22

Nin benbot Yefun Allah bi sukdu gato sangge it, sane anato nin bare sukibit gato ben nin ne wé kadit nin re, nin onyar kwo re. Sane dom, ye yi gato onyar kem mo Yefun Allah ne, nin mewa sisu sangge re. Sane nin mewa yu su nin mit dik si nin onyar dik sisu ndo wai o et.

Ibrani 11:8

Yenggras Abraham onyar kem mo Yefun Allah, sane anato Yefun Allah do kendo Abraham ete syogat Abraham mu mo bur yi sa, Abraham mu sor, an jam nde pe gato an mu mone, wo an mu sor. Abraham mu mo bur yi gato Yefun tom su do, bere Yefun syo bur det mone nai Abraham re.

2 Tesalonika 1:8

Bere Yefun Yesus si malaikat ne is ma, án gwat bot gato ru sye kadit gu ne ma wa án ben sukye nai yé ne. Án syo sukye nai yé gato misyar Yefun Allah. Án syo sukye nai yé gato bariwa simo os ndo gato men bi Yekwesu Yesus Kristus kak ne.

Roma 2:8

Wo ye gato iwa ben bi suk-i daret ket an í e, ye gato bariwa jammo sukdu gato sangge e, ye gato iwa jammo sukdu gato ibit e ne yo, bere Yefun Allah on sa ket yé gane wai o re.

Roma 1:5

Yefun Allah syogat Yesus Kristus ma mo bur ré anato ji ku suktinggi wa ji ben suk tepsu yerasul. Sane ji iwa bes Yesus Kristus gum kok mone. Ji iwa bes Yesus Kristus gum kok, sane anato ji mu ben Kristus bi suk-i. Ji mu duno yewis ye Yahudi nde, wo ji mu duno yewis yi mwa ne sino mo bur ré, subere án onyar brek ete kem pe mo Yesus Kristus, orete án benbot sukdu gato Yesus Kristus ki ne.

2 Korintus 10:5

Sukdu gato ye bes kok e, sukduno gato ye ki e ne duyawa Yefun Allah bi sukjimnut-i ne yo, men syat wé su Yefun bi sukmise-i ne. Men gwat Yefun Allah bi sukmise-i tepsu suktinggi wa men ki Yefun bi sukdu-i nai nje, subere yé ne win bi sukjimnut-i gato nyim ne wé, ete yé ne brek ma ete jammo Kristus et.

Roma 15:18

Ji yo nggiwa ki subot suk yi neya nde, wo ji ki subot suk gato Kristus ben bor mo ji sor. Ji ki sukdu subot Kristus, ji ben suk tepsu Kristus mit. Sane anato Kristus tik yewis yi neya mit wa jammo Yefun Allah mo suk gato ji ben si suk gato ji ki ne re.

2 Timotius 2:10

Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o re.

Roma 10:16

Sarewo yé mwa ne sino yo mit iwa jambot sukdu subot os ndo gato Yefun Allah fro ne nde, tepsu Yesaya ki do, ”Men bi Yekwesu o! Je u anato onyar kem mo sukdu gato men ki ré ne?”

Roma 6:17

Suga nyim ne nin gum kwerut wa nin ben sukibit, ben sato sukibit jom nin re, wo su ré sa, nin jom sukduno gato ye duno nin su ne. Sukduno gato sangge ne, gato Yefun Allah grem kem su nin, nin jom, ete nin benbot sisu nin mit dik si nin onyar dik it. Sane men ki ndo mo Yefun Allah sor.

Ibrani 2:3

Sane men misyar suktaru be gato ndo wai ne te, bere men titi fro kadit sukye mo bot gesyos sa u ne? Bere men yo ku os nde go! Ketke Yefun Yesus dakai ma kom mo bur ré sa, An kibot suktaru ne nai nje jam. Or o ye gato jam sukdu gato Yefun Yesus ki ne, yé ne waii ki nai men jam o, ete men jam rer do, sukdu ne sangge it.

Yohanes 19:30

Yefun Yesus da nau rom or sa, An ki do, ”Tut more it.” Orete An su e mo bur, An mas bok it.

Matius 17:5

Petrus ki suk saresa, duk gato rer-rik is ma kewa án sino, ete án jam Yefun Allah ki sukdu kadit duk mit ne do, ”Ji bi Gan gato Ji jimnotku anare. Suk gato An ben ne Ji mit iwa. Nin jammo An ne sor.”

Yudas 1:21

Nin eswa men bi Yekwesu Yesus Kristus ma ben bi suk-i ne ndo bor su nin sor. Bere An yo ben suk su nin tepsu sukibit gato nin ben ne nde, wo bere An gwat nin mu mo pe gato ndo wa nin si An kem ndo mone to kapyo mato kapyo. Nin eswa suk ne bor yo, nin ben nin bi suk-i, nin napawa pe do, Yefun Allah bi sukjimnut sye kas subot nin sor.

1 Yohanes 5:20

Men jam o do, Yefun Allah bi Gan ma mo bur ré re, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus ne tepsu dik it. An sor anato Yefun gato sangge re. An sor anato ós men kem ndo to kapyo mato kapyo re.

Ibrani 11:40

Án yo ku nde tó, we Yefun Allah fro os gato ndo wai wa men si án sino. Yefun Allah fro os subere án si men sino si Yefun kem ndo sino tepsu dik mo pe gato Yefun Allah fro ne.

2 Tesalonika 2:16

Men bi Yekwesu Yesus Kristus, An dakai si men bi Ai, Yefun Allah gato bi sukjimnut sye kas subot men ne, Yefun dakai bi sukjimnut sye kas subot men anato An ós men kem ndo to kapyo mato kapyo. An kak men bi sukjimnut anato men kwabom kam mo An do, sangge, bere An ben sukndo su men sino.

Suk Gato Yerasul Ben Ne 3:15

Sane nin dom si nje tepsu dik wa gu Yefun Yesus kwop wé anane. Nin gu Yefun Yesus gato ós men yetu kem ndo ne. Sarewo Yefun Allah sun Yefun Yesus kadit sukkwop o re. Men dakai me su men gro it.

Lukas 13:32

Yefun Yesus ki nai ye Farisi ne do, ”Nan mu ki nai ye gato meret os mwa tepsu ndar krok ne do, ’Su ré it yo, Ji ben ye gato i ne ge, Ji syun semda wé kadit ye gato semda ben ne, Ji ben suk ne tó, wo kam we rek o ete suk gato Ji ben ré tut mone.’

Suk Gato Yerasul Ben Ne 4:12

Yefun Yesus ka dik sor anato kak os ndo wa nai men wé kadit bot gesyos, subere men kem ndo to kapyo mato kapyo. Yetu yi yo mo nde, kadit yetu mwa ne sino, Yefun Yesus An ka dik sor anato nggiwa kak os ndo wa men kem gesyos.”

Filipi 2:12

Sane yo, nin, ji bi yesyim gato ji jimnotku, nin benbot ji bi sukduno gato ji ki ré et. Yefun Allah anato nai nin sok mo An bi rus-i wé kadit bot gesyos it, sane nin ben nin bi suk-i tepsu yé gato jammo An et. Suga ji kem su nin tó yo, nin benbot ji bi sukdu petok sor. Sarewo su ré ji yo kem su nin nde, sane nin jammo ji bi sukduno pe, tepsu ji kem si nin tó. Mo suk mwa gato nin ben ne, nin jammo Yefun Allah sor, nin bi nin nggwa mo An, nin ben suk tepsu An mit,

Ibrani 1:14

Yefun yo ki sukdu bok ne subot malaikat nde, sane malaikat ne te suma gei ne? Malaikat ne anato suk gato da kridek yo mo nde, wo malaikat da gesyos sor ete mó. Yefun Allah yo bes malaikat tepsu An bi Gan gato Yekwesu si Yefun sino nde, wo Yefun syogat malaikat mu ós nje gato bere kem ndo to kapyo mato kapyo mo Yefun Allah bi nat-i ne sor re.

Ibrani 9:28

Sane dom, Kristus bi nggwa kwop wam dik wa men yetu mwa ne tepsu suktot wa tot sukibit gato men ben or wé re. Or o, bere Kristus ma wam kedowe o. An ma o yo, An kwop wa tot men bi sukibit ne o nde, wo bere An ma wa nai men yé gato eswa An ma ne, ete An gwat men mu sok mo An bi nat-i.