Ibrani 5:12 - Abun Scripture

¹² Nin da jam Yefun Allah bi sukdu nam it. Men nut do, ye gato jam sukdu nam bere nggiwa duno ye yi su sukdu ne o, sarewo men me do, nin yo nggiwa duno ye yi su sukduno ne nde tó. Nin jam suk kom mo pe yo nde tó. Sa ndo sa, ye ba duno nin su Yefun Allah bi sukdu mo i-ke ne satu o et. Nin bi sukjimnut kak tep wa nin jam sukduno gato kru nde tó. Nin tepsu pabom gato da sus rom sor, nin yo tep wa nin git sugit krat nde tó.

Ibrani 5:12 Referans Kwoze

Ibrani 6:1

Sane it yo, men yo krom sukdu subot Yesus Kristus mo i-ke ne o nde yei. Sukdu gato ndaf mo i-ke ne tep wa ye gato jam Yefun sim, tepsu pabom da sus rom sim, wo ré ne, men ki subot sukdu gato kru o et. Men krombot sukdu kru gato tep wa yenggras mo Yefun Allah bi sukdu-i ne et. Men krombot sukdu gato ndaf mo i-ke ne o nde yei, sukdu bok gato mo i-ke, men kibot mó re, sato ré do, men kwet kadit sukibit gato men ben ne, ete men ben suk tepsu ye gato onyar kem mo Yefun Allah ne sor.

1 Petrus 2:2

Sarewo nin mit iwa Yefun Allah bi sukdu ne tepsu pabom er sosa wa da bi im sus et. Sane bere nin nggiwa nin ben nin bi suk-i tepsu Yefun Allah mit nggi wai kadit nyim ne, ete Yefun nai nin sok mo An bi rus-i.

Ibrani 5:13

Pa gato da bi im sus rom tó yo, pa ne tepsu pabom tó. Suk gato pabom ben ne pa jam nde os koirut ware, ndo bado, ibit bado, pa jam nde wa.

Kolose 3:16

Kristus bi sukduno-i gato ndo wai ne, nin nai ma nin grem pe mo nin mit si nin onyar et. Nin grem Kristus bi sukduno-i ne pe mo nin mit or wé ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos, ete nin mit at wa Yefun Allah dom et.

Matius 17:17

Yefun Yesus ki do, ”Mban! Nin gare, nin yo onyar kem ri mo Yefun nde, nin su krat teker ware! Ji bambrai wa Ji ben Ji bi suk-i njep si nin o it! Kam ot, ete bere Yefun Allah nai Ji wé kadit nin ne? Nin gwat pa ne ma mo Ji et.”

1 Petrus 4:11

Ye gato ku suktinggi wa ki subot Yefun bi suktaru it yo, ye ne nutbot suktaru ne do, suktaru ne ma kadit Yefun Allah dakai, orete án ki suktaru ne sisu suktinggi ne sor. Ye gato ós ye yi yo, án ós ye yi su suktinggi ne et. Nin ben suk sane subere yé bes Yefun Allah gum kok mo suk mwa gato nin ben tepsu Yesus Kristus bi yetuge-i ne. Yefun Allah sa, bi suktinggi nggi wai o re. Yefun anato gum kok wai su ré sor to kapyo mato kapyo. Sangge.

1 Korintus 14:19

sarewo men sum wa men ben ari yo, ji iwa ji duno nje su kwa mumek gato nje jam rer anato ndo wai kadit ji duno nje su kwa ribu musyu dik su a yi gato nje jam nde.

Roma 3:2

Men tepsu ye Yahudi gato simo sunat sa, men ku suk mwa o re. Su ketke, Yefun Allah grem An dakai bi sukdu-i ne kem su ye Yahudi re.

Suk Gato Yerasul Ben Ne 7:38

Musa anato si men bi amui sino mo pe gato kwe yo kom mo nde. Tomgane malaikat dik yo ki suk nai Musa mo banbo Sinai. Or o Musa waii ki sukdu gato Yefun tarubot malaikat ne nai men bi amui jam. Musa jam Yefun Allah bi sukduno gato ós men kem ndo. Orge Musa waii ki sukduno ne nai men jam re.

Markus 9:19

Yefun Yesus ki nai yé mwa mone do, ”Mban! Nin gare, nin yo onyar kem ri mo Yefun nde, nin su krat teker ware! Ji bambrai wa Ji ben Ji bi suk-i njep si nin o it! Kam ot ete bere Yefun Allah nai Ji wé kadit nin ne? Nin gwat pa ne ma mo Ji et.”

Filipi 3:1

Ji yo krom sukdu mwa o nde. Ji bi nji, ji bi nyanggon, nin yé gato onyar kem mo Yefun Yesus, Yefun nai nin gum sok mo An bi rus-i, sane nin mit at wa et! Sukdu gato ji krom ré, ji krom wam bok yo wa nin mó re. Kapre ji krom wam bok yo o, suk yo o nde, we ji bi sukdu ne ós nin subere nin kem ndo.

1 Korintus 14:20

Ji bi nji, ji bi nyanggon, nin nutbot suk tepsu pa wokgan nde. Mo suk gato ibit sa, nin bi sukjimnut tepsu pabom anato ndo, sarewo mo suk gato ndo yo, nin bi sukjimnut kak tepsu yenggras et.

Galatia 4:3

Men dom digane, men jam Yefun yo ri nde tó, ben sato men tepsu pa wokgan, sane suk gato mo gu nim ne si bur ré sino ben sato jom men tepsu pakwerut.

Ibrani 5:11

Ji bi sukdu mwa gato ji iwa ji ki subot Yekwesu gato gum kok wai, Yesus Kristus ne, sarewo ji werwa ji ki rer nai nin jam, bere sukye, we nin yo nggiwa nin but sukdu ne kekro nde, nin bi sukjimnut yo kak ndo nde tó.

Ibrani 10:32

Nin napawa tomgatu, nin jam sukdu subot Yesus Kristus sim sa, sukdu ne tepsu Yefun Allah bi sukru gato rer ku nin, ete mone nin onyar brek ete kem mo Yefun Yesus it. Tomgane nin ku sukye ndo nde, sarewo nin sa, nin wergat nin nggwa sane sor nin jom Yefun Allah bi sukdu ne pe sor, nin yo misyar nde.