Ibrani 3:5 - Abun Scripture

⁵ Musa ré, an ben suk mo Yefun Allah bi nu-i sisu ri-roi sor, tepsu Yefun Allah imo ne. Musa tepsu Yefun Allah bi pakwerut mo nu ne. Musa ki sukdu nai nje mone subot sukdu gato bere Yefun Allah dakai ki bor wa yé mwa jam su kam sari ne ma.

Ibrani 3:5 Referans Kwoze

Ibrani 3:2

Yefun Allah bes Yesus Kristus wa ben Yefun Allah bi suk-i ne sino. Yesus Kristus ben suk mwa ne sisu ri-roi sor, tepsu suga nyim tuya Musa dom ben bi suk-i ri-roi sor. Yefun Allah bes Musa wa an fro suk mwa ne sino gato yesu ben mo Yefun Allah bi nu. Yesus Kristus si Musa, an we ka we ne sino jammo Yefun Allah.

Suk Gato Yerasul Ben Ne 28:23

Sane án si Paulus tom yu su kam gato bere án ku yu o wa kibot sukdu ne. Su kam ne, án si yetu ge bok yo o ma mo nat gato Paulus kem mone. Kadit nyotkwo sor kom mo noru Paulus nuk sukdu subot os gato Yefun Yesus kak wa men yetu gum sok mo Yefun Allah bi rus-i, ete bere Yefun Allah tepsu men bi yekwesu mone or re. Paulus nukbot Musa si yenabi bok ne bi sukdu-i, subere yé jam rer do, Musa si yenabi ne krom bi sukdu-i subot Yefun Yesus anato bor re. Paulus ki bi sukdu-i, Paulus werwa ye Yahudi gato ma ne jammo an bi sukdu-i, ete brek ma onyar kem mo Yefun Yesus.

Ibrani 8:5

Yekwesu mwa ne ben suk mo Yefun Allah bi nu-i mo bur ré konembot suk gato Yefun ben mo bi nu-i mo gu. Suk gato yekwesu mwa ne ben yo tepsu suk gato Yefun Allah ben mo bi nu-i mo gu ne sino nde, wo karowa. Musa ós yekwesu mwa ne konembot suk gato Yefun Allah ben mo bi nu-i mo gu, we Musa fro wa nggo Yefun Allah bi nu mo bur ré sa, Yefun Allah ki suknapa wa an sare do, ”Nan nggo nu si bi suk mwa ne tepsu sukdu gato Ji ki nai nan mo banbo ne et.”

1 Timotius 1:12

Ji ki ndo mo men bi Yekwesu Yesus Kristus. An syo suktinggi nai ji wa ji ben An bi suk-i re. An nut mo ji do, ji sa, bere ben An bi suk-i ri tepsu An mit anato An bes ji wa ji ben An bi suk-i re,

Ibrani 9:24

Kristus dé anato win suge dé mo nu mo gu ne re. Sane anato Kristus yo sok mo nu kemah gato yetu nggo mo bur ré nde. Nu mo bur ré tepsu sukkran subot nu gato sangge mo gu ne sor re. Sane Kristus yo sok mo nu mo bur ré nde, wo Kristus dakai sok mo nu mo gu ne, anato su ré, An ki suk tepsu yegweswai su Yefun Allah wa men yetu mone.

Roma 3:21

Su ré Yefun Allah fro os subere men yetu ku os wa men sok mo An bi rus-i. Ye Yahudi bi sukduno-i ne, yo tep nde, wo Yefun Allah fro os be wa men re. Musa bi sukduno-i si yenabi bi sukdu-i sino kadum do, os ri anato os gato Yefun Allah fro ré,

Yohanes 5:39

Nin samok wa nin baca Yefun Allah bi sukdu petok sor, we nin gendo nin baca yi sor re, bere nin kem ndo to kapyo mato kapyo. Mo sukdu ne Yefun Allah dakai anato ki sukdu rer subot Ji.

Lukas 24:44

Orete Yefun Yesus ki nai pakon ne do, ”Ji kem sisu nin tó, Ji ki nai nin nyim wé do, suk mwa gato yé krom subot Ji mo Musa bi sukdu-i, yenabi bi sukdu-i si Mazmur ne sino, bere bor mo Ji re.”

Lukas 24:27

Orge Yefun Yesus ki rer nai pakon ne subot suk gato yé krom mo Yefun Allah bi sukdu subot An dakai. Ketke Yefun Yesus ki subot suk gato Musa krom subot An dakai, ete Yefun Yesus ki subot suk gato yenabi bok ne waii krom subot An ne o.

1 Korintus 4:2

Ye bes yetu ge dik yo gum wa ben suk yo, ye ne bere jammo ye gato bes an ne sor, an yo brek kadit wokgan yo dom nde.

Suk Gato Yerasul Ben Ne 7:37

Musa gato ben suk mwa ne anato Musa gato ki nai ye Israel ne do, ’Yefun Allah bes ji tepsu yenabi gato ma ki An bi sukdu-i nai nin jam. Sane dom, kam sari ne ma, bere Yefun Allah waii bes nin ge dik yo gum yenabi wa ki Yefun Allah bi suktaru nai nin jam.’

Lukas 12:42

Yefun Yesus ki do, ”Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bi suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut ne sino. Pa ne mewa pakwerut bok neya sisu ndo, pa syo sugit tep wa pakwerut mwa ne git sino.

Matius 25:21

Yenggras ki do, ’Nan sa, pakwerut gato ben sukndo, nan ben nan bi suk-i ri tepsu ji mit. Nan ben nan bi suk-i ri su sukwokgan gato ji syo nai nan, sane ré yo, ji bes nan wa mewa suk mwa. Nan ma men konwa sino et.’

Matius 24:45

Yefun Yesus ki o do, ”Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bi suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut sino. Pa ne mewa pakwerut bok neya sisu ndo, pa syo sugit tep wa pakwerut git ne sino.

Ibrani 1:1

Suga nyim tuya Yefun Allah tarubot yenabi wa men bi amui. An yo bi suktaru ne dik nde, wo An bi suktaru ne mwa. Yenabi mwa ne gwat sukamno subot Yefun Allah bi suktaru ket kwayo-kwayo.

Ibrani 3:4

Men un ye gato nggo nu ne gum anato ndo, we yé gato nggo nu mwa ne sino mó re. Wo men nutbot sisu ndo sa, bere men jam do, Yefun Allah ut suk mwa mo bur ré sino, sane Yefun Allah gum kok sye wai kadit yé gato nggo nu mwa ne mo bur ré sor.

Wahyu 15:3

Án kamo kecapi ete án ba sukbadek dik yo. Yé mwa ne sino badekbot Musa gato Yefun Allah bi pakwerut ne, si Domba Gan bi sukbadek-i sare do, ”Yefun ga nggi wai ne e, Yefun ga sye wai ne e, Nan gum kok wai ’dit men ne o, Nan yesu ga nggi wai ne o. Yefun ga nggi wai ne e, Yefun ga sye wai ne e, Nan ben suk ga ndo yé, Nan man suk ga ndo wai. Yefun ga yesu wa men yetu ne e, Yefun ga yesu mo bur ré e, Nan ben Nan bi suk-i ri-roi ne o, Nan ben Nan bi suk-i sangge ne o.