Ibrani 2:9 - Abun Scripture

⁹ Sarewo men me do, Yefun Yesus sa, jom suk mwa ne sino it. Yefun Allah is Yefun Yesus gum-i ga wokgan mo bur kadit malaikat gum-i ne bergan sor re, subere Yefun Allah bi sukjimnut sye dakai kas subot men yetu anato An syogat Yefun Yesus ma ku sukye ete kwop wa men yetu sino. Sane su ré Yefun Allah bes An gum kok tepsu Yekwesu, ete yé mwa un Yefun Yesus or re.

Ibrani 2:9 Referans Kwoze

Wahyu 5:9

Án sino ba sukbadek be yo sare do, ”Domba ga gum kok ne o, Domba ga sye wai ne o, Nan sa, gum kok tep wa Nan nai buku ne o, tep wa Nan kak lilin gum wé ne o. Nan gum kok a we, Nan gum sye wai a we, Ye gu Nan, Nan dé sye wa yetu ne o, Nan bi nggwa tepsu suktot wa ne o. Nan dé sye wa yetu o, Nan tepsu suktot wa yetu o, Nan dé sye wa yeyo-yeyo gato sok mo Yefun bi rus-i ne o, Yetu mwa ne mo buryo-buryo sino o. Nan dé sye wa yetu o, Nan tepsu suktot wa yetu o, Nan dé sye wa yetu wisyo-wisyo sino ne o, Yetu mwa gato ki ayo-ayo sino o.

1 Yohanes 2:2

Yesus Kristus bi nggwa kwop wa tot men bi suktot mo sukibit gato men ben ne wé re. An tepsu suksom gato totwa sukibit gato men ben ne sor nde, wo An totwa sukibit gato men yetu mwa mo bur ré iwedewe ne sino ben ne or re.

Roma 5:18

Sane kadit sukibit gato yetu ge dik ben ne anato Yefun Allah syo sukye nai yetu mwa mo bur ré or sino. Sane dom kadit sukndo gato yetu ge dik yo o ben tepsu Yefun Allah mit ne anato Yefun kak os ndo wa men yetu mwa ne sino. Yefun Allah nai men wé kadit sukye mo sukibit gato men ben ne, orete Yefun Allah ki subot men do, men sa, tep wa men gum sok mo An bi rus-i it. Sane men ku os wa men kem ndo to kapyo mato kapyo.

Suk Gato Yerasul Ben Ne 2:33

Yefun Allah bes Yefun Yesus kem tak Yefun Allah de syim ge. Yefun Yesus si Yefun Allah jom suk mwa neya tepsu Yekwesu sino mone. Yefun Allah syo An Gen bok nggwa mo Yefun Yesus tepsu Yefun Allah tom ne. Sane, Yefun Yesus waii syo Yefun Allah Gen bok nggwa mo men, anato men ki suk su a mwa neya ré, nin dakai jam ete nin me su nin gro re. Yefun Yesus sa, An it su An kaim mu mo gu tepsu Yekwesu,

Yohanes 3:16

Yefun Allah bi sukjimnut sye kas subot men yetu mo bur ré ndo nde anato An syo An bi Gan ge dik ne ma. An bi Gan ne ma wa kwop win men mo sukibit gato men ben ne, subere ye to onyar kem mo An bi Gan yo, bere ye ne yo ges mo bot gesyos nde, wo ye ne si Yefun Allah kem ndo to kapyo mato kapyo.

2 Korintus 5:15

Kristus kwop win men sino anato men yé gato kem mo bur ré, men ben men bi suk-i wa men dakai o nde, wo men ben suk wa Yesus Kristus gato kwop ete sun kadit sukkwop wa men o re.

Ibrani 10:5

Sane anato Kristus ma mo bur ré sa, An ki nai Yefun Allah sare do, ”Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé syo suksom bok yo daret nai Nan wa yé som Nan su nde, wo Nan dakai fro Ji kaim tepsu suktot ne o re.

Roma 5:8

Sarewo men ben men bi suk-i siri kadit Yefun Allah mit tó, sugane Yesus Kristus ma bi nggwa kwop win men. Sane anato men jam mone do, Yefun Allah bi sukjimnut sye kas subot men ndo nde.

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Yohanes 12:32

Sarewo Ji gare, yé bes Ji kok kadit bur ré yo, bere Ji tik yé mwa mit subere án ma mo Ji.”

Ibrani 7:25

Sane anato Yefun Yesus nggiwa ben suk tepsu yegweswai wa ós men yé gato iwa ma mo Yefun Allah bi nat-i sor to kapyo mato kapyo. Yefun Yesus kem gesyos, An ós wa ki suk su Yefun Allah tepsu yegweswai wa men petok sor.

1 Petrus 1:21

Sane Kristus ma ete kak os wa men yetu anato nin onyar kem pe mo Yefun Allah it. Yefun Allah sun Kristus kadit sukkwop ete bes An gum kok sye wai kadit ye yi neya o re. Sane anato nin onyar kem pe mo Yefun Allah, ete nin kwabom kam mo An mone dom.

Ibrani 8:3

Suga nyim tuya, ye Israel bi yekwesu gato gum kok wai mo Yefun Allah bi nu ne sino, Yefun bes yekwesu ne wa som Yefun Allah su suksom bok yo, ete gu suge wa tot suktot mo sukibit gato yé ben ne wé. Sane Yesus Kristus, men dakai bi Yekwesu gato gum kok wai, An dom tot suktot mo sukibit gato men ben ne wé re.

1 Timotius 2:6

An bi An nggwa wa tot suktot mo sukibit gato men yetu sino ben ne wé re. Sane tepsu bi kam gato Yefun Allah fro ne, Yefun Yesus kak os ndo ne wa yé mwa ne sino ku os wa kem ndo to kapyo mato kapyo re.

2 Korintus 5:21

Kristus yo ben sukibit mo nde, wo Yefun Allah dakai fro Kristus sam kwede win men yetu mo sukibit mwa gato men ben ne, subere Yefun Allah me mo men do, men sa, bi sukibit ut mo men yo mo nde. Sane Yefun Allah nut mo men sa, men tep wa An nai men sok mo An bi rus-i mo suk gato Kristus ben ne.

Roma 8:32

Yefun Allah yo nai An dakai bi Gan wé kadit sukye nde, wo Yefun Allah syo An bi Gan ma kwop win men yetu sino. Yefun Allah dakai syo An bi Gan ma wa men yi, sane bere An dakai syo suk mwa neya yi nai men dom, fe!

Galatia 4:4

Sarewo tepsu kam gato Yefun Allah fro ne, Yefun Allah syo An bi Gan ma mo bur ré. Nggon dik yo kem su An. An kem mo bur ré, An jammo ye Yahudi bi sukduno.

Suk Gato Yerasul Ben Ne 3:13

Yefun Allah gato jom Abraham, Isak si Yakub, Yefun Allah gato jom men bi amui, Yefun Allah ne bes Yefun Yesus gato An bi pakwerut ne gum kok sye wai o re. Yefun Yesus nin syo mo ye gato ben sukibit syim wa ye gu An kwop wé. Kapre Pilatus iwa sombok An, nin misyar An re.

Roma 8:3

Sukjimnut gato tik men mit wa ben sukibit ne jom men yetu. Sane anato ye Yahudi bi sukduno-i yo nggiwa ós men nde. Sane Yefun Allah fro bi os-i tara re. Yefun Allah syo An bi Gan ma mo bur ré su kaim ka sa men yetu kaim. Yefun Allah syo An bi Gan ma wa bi nggwa tepsu suktot wa men subere kak sukjimnut ibit ne wé kadit men re.

Yohanes 10:17

Ji bi Ji nggwa kwop wa Ji bi suksi ne, orete bere Ji mbau satu anato Ji bi Ai bi sukjimnut sye kas subot Ji.

Yohanes 8:52

Orete ye Yahudi mone ki nai Yefun Yesus do, ”Su ré sa, men jam Nan it. Sangge, semda ben Nan anare it. Abraham kwop re, yenabi bok ne sino kwop or re. Sarewo Nan ki do, ye to jammo Nan bi sukduno-i yo, yo kwop nde.

Matius 16:28

Suk gato Ji ki ré suksangge anare, yetu ge bok yo gato ti more yo kwop nde tó, bere án kem mo bur ré sane sor án me Yetu bi Pa ma, ete Ji bi suktinggi tepsu Yekwesu gato nggi wai bor mone.”

Wahyu 19:12

Ye ne gro gan tepsu bot ru. An bom yekwesu bi topi mwa mo An su. Ye krom gum dik yo mo An kaim. Ye yi ne jam nde re, wo An dakai sa, jam gum ne re.

Ibrani 2:7

Nan is yetu mwa ne gum ga wokgan mo bur kadit malaikat, bergan sor re, orete Nan bes yetu gum yekwesu gato gum kok sye wai o re. Suk mwa neya sino un yetu gum ne or re.

Lukas 9:27

Suk gato Ji ki ré suksangge anare, yetu ge bok yo gato ti more yo kwop nde tó, bere án kem mo bur ré kom mo kam gato án me Yefun Allah bi suktinggi tepsu Yekwesu gato nggi wai ne bor re.”

Markus 9:1

Yefun Yesus ki nai An bi pakon o do, ”Suk gato Ji ki ré suksangge anare, yetu ge bok yo gato ti more yo kwop nde tó, bere án kem mo bur ré kom mo kam gato án me Yefun Allah bi suktinggi tepsu Yekwesu gato nggi wai bor re.”

Matius 6:28

Nin nutbot nin bi san gato nin it ne teker eta wa suma ne? Nin me es u gato dakai kom. Es ne yo werwa fro án bi san wa án it nde.

Yohanes 8:51

Suk gato Ji ki ré suksangge anare, ye to jammo Ji bi sukduno-i ete benbot yo, ye ne yo kwop nde, wo bere an mbau to kapyo mato kapyo.”

Ibrani 1:9

Nan mit iwa yé ben sukndo tepsu Ji mit sor, Nan bariwa yé ben sukibit re, Sane anato Ji gato jom Nan ne, Ji anato bes Nan gum kok wa Nan ben Ji bi suk-i, Ji ben Nan mit at wa Nan ben Ji bi suk-i, Nan mit at wai kadit Nan bi yesyim gato si Nan mone sino o re.”

Ibrani 11:5

Henokh onyar kem mo Yefun Allah, sane anato Henokh yo kwop nde, wo Yefun dakai gwat an it mu mo gu re. Ye yo ku an mukri mo nde, we Yefun dakai gwat an su gro mbau it mu mo gu re. Ye krom mo Yefun Allah bi sukdu do, Yefun yo gwat Henokh it mu mo gu nde tó, Henokh sa, an ben an bi suk-i tepsu Yefun Allah mit sor.

Ibrani 12:2

Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.