Ibrani 2:14 - Abun Scripture

¹⁴ Pa mwa ne tepsu yetu gato da kridek. Sane anato Yefun Yesus dakai ben nggwa tepsu yetu gato da kridek mó dom. An ben nggwa tepsu yetu subere An kwop sa, An ku os wa An nai biris bi yekwesu bi suktinggi gato gwat sukkwop ma wa men yetu ne wé. Yefun Yesus ben biris bi yekwesu ibit it anare, Yefun syat suktinggi ibit ne wé re.

Ibrani 2:14 Referans Kwoze

2 Timotius 1:10

Sane su ré, Yefun Allah bi sukjimnut sye gato kas subot men dakai yi ne bor re. An syogat Yesus Kristus ma mo bur ré subere Kristus kak os ndo wa men kem ndo to kapyo mato kapyo ne it. Yesus Kristus kak os ndo wa men, An ben suktinggi gato gu men yetu kwop ne ibit or re, ete An kak os wa men kem gesyos sor.

Roma 8:3

Sukjimnut gato tik men mit wa ben sukibit ne jom men yetu. Sane anato ye Yahudi bi sukduno-i yo nggiwa ós men nde. Sane Yefun Allah fro bi os-i tara re. Yefun Allah syo An bi Gan ma mo bur ré su kaim ka sa men yetu kaim. Yefun Allah syo An bi Gan ma wa bi nggwa tepsu suktot wa men subere kak sukjimnut ibit ne wé kadit men re.

Kolose 2:15

Yesus Kristus kwop mo kwesukwin ne anato suk gato i-mok mone yo nggiwa jowa bur ré o nde. Biris si bi suktinggi ne yo nggiwa jowa bur ré o nde. Kristus nai biris bi suk gato i-mok mone bi suktinggi ne wé re. Ben sato Kristus gwat suk gato i-mok mó sato yerom e, aboksye e, suk yi e ne ma kadum nai ye mwa ne sino. Sane tepsu yepasye kadum pakwerut gato an but ne wa ye mwa me do, yepasye ne nggi digane, ye mwa ne sino jam do, suk gato Kristus ben mo kwesukwin ne kadum do, Kristus anato nggi wai kadit suk mwa ne o re.

Yohanes 1:14

Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

Ibrani 9:15

Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

1 Korintus 15:50

Ji bi nji, ji bi nyanggon, ji bi sukdu-i sare: Men kaim budat ré, bere yo sok mo Yefun Allah bi de-i nde. Sane dom, men kaim budat bere mbras re, bere yo sok mo pe gato men kaim gesyos sok mone nde.

Wahyu 1:18

Ji anato Ye gato kem gesyos. Ji kwop, sarewo ré ne Ji mbau to kapyo mato kapyo. Ji anato nggiwa Ji sun nje kadit sukkwop. Ji anato nggiwa Ji sun nje kadit Yefun Allah bi gwinggri syo mo bur desnak ne mbau satu.

Roma 14:9

we Yesus Kristus kwop, or o An sun o, subere An gum Yekwesu wa ye gato kwop si ye gato mbau ne sino.

Ibrani 2:18

Biris bi yekwesu meret os wa Yefun Yesus subere Yefun ges mo os ibit mó re. Yefun ku sukye mone, wo An yo ges mo os ibit nde. Sane anato An nggiwa os men yé gato biris bi yekwesu werwa ben kidar ges mo os ibit ne dom. Yefun Yesus sa, nggiwa mewa men kadit sukye gato men ku mone.

Wahyu 2:10

Bere nin ku sukye, wo nin nyuwa nde. Ji ki sare do, bere biris bi yekwesu ben yetu ge bok yo but nin ge bok yo, ete sok nin mo sel. Sane bere biris bi yekwesu gato ben sukibit ne werwa gwat os wa nin subere nin misyar Yefun mone. Mo sel mit ne bere nin ku sukye sor kom mo kam musyu dik rek. Kapre karowa nin kwop rok mone, nin onyar kem mo Ji, nin ben Ji bi suk-i sane sor kom mo pe gato or mó yo, bere Ji bi os wa nin kem ndo to kapyo mato kapyo, tepsu ye gato nggi wai ku hadiah mo koirut.

Ibrani 4:15

Men bi yegweswai gato gum kok wai mo Yefun Allah bi nu ne, An kem mo bur ré sa, An da kridek tepsu men yetu gato yo nggi nde. An kaim rere tepsu men yetu kaim rere. Sane suk yo da ma tik Yefun Yesus mit wa ben sukibit ket kwayo-kwayo tepsu men yetu sino mó re, sarewo An yo ben sukibit yo mo nde.

Galatia 4:4

Sarewo tepsu kam gato Yefun Allah fro ne, Yefun Allah syo An bi Gan ma mo bur ré. Nggon dik yo kem su An. An kem mo bur ré, An jammo ye Yahudi bi sukduno.

Yohanes 12:24

Suk gato Ji ki ré suksangge anare, men nai fas gro wa men jan, ete fas gro dik sor ye yo jan nde yo, gro dik anane sor re. Sarewo men nai fas gro dik ne, ete men jan, bere sukjan ne kom, ete bere syesyar i-gro mwa.

Wahyu 20:2

Malaikat but naga, gato ben bi suk-i tepsu kwis kadit nyim tuya gato biris bi yekwesu, gato ye kendo gum do Iblis ne. {Naga ne ka sa nggor bin, sarewo kaim ne sye wai o re.} Malaikat but naga ne ete rai su bus sor kom mo tahun ribu dik.

Wahyu 12:9

Mikhael si bi malaikat-i am naga sye ne wé kadit gu re. Naga gane anato tepsu kwis kadit nyim tuya gato gum do biris bi yekwesu. Yé kendo biris bi yekwesu ne gum do Iblis dom. Naga gane ben kidar yetu mwa mo bur ré ges mo os ibit. Orete Mikhael si bi malaikat-i am naga sye ne si bi malaikat-i sino mu is kadit gu ma mo bur ré re.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

Matius 25:41

Sane o, bere Ji ki nai yé gato tak Ji de syim jam ne do, ’Nin mu kadit Ji. Yefun Allah dufo mo nin it. Nin mu ngga mo bot gesyos gato Yefun Allah fro wa biris bi yekwesu si bi rus-i ne et.

Matius 16:17

Yefun Yesus ki do, ”Simon, gato Yona bi gan, yetu yo kadum sukjimnut ne nai nan jam nde, wo Ji bi Ai mo gu ben sukndo su nan anato An kadum sukjimnut ne nai nan jam re.

1 Korintus 1:28

Yé gato ye yi nut do, yé ne tepsu pa wokgan, Yefun Allah nai yé ne gum sok mo An bi rus-i. Yefun Allah nai yé gato ye yi kabor bu dom. Yefun Allah nai yé gato ye yi ki do, jam suk nde. Yefun Allah nai yé ga sane gum sok mo An bi rus-i, subere yé gato yetu mo bur ré bes gum kok ne, Yefun Allah misyar ku sukye sor.

Ibrani 2:17

Sane An ma tepsu yetu gato da kridek. Mo suk mwa ne sino An kaim tepsu men yé gato sok mo Yefun Allah bi rus-i. Sane bere An ku os wa An ben suk tepsu Yekwesu gato gum kok wai kadit yekwesu yi neya mo Yefun Allah bi nu. An sa, tepsu yegweswai gato ben bi suk-i ri-roi wa men si Yefun Allah, subere men si Yefun kem ndo. An dakai jimnotku yetu ndo nde. An kak os wa men yetu, An bi nggwa win men, subere Yefun Allah yo maskwa men mo sukibit gato men ben ne o nde, Yefun yo nutbot sukibit ne o nde.

Ibrani 10:5

Sane anato Kristus ma mo bur ré sa, An ki nai Yefun Allah sare do, ”Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé syo suksom bok yo daret nai Nan wa yé som Nan su nde, wo Nan dakai fro Ji kaim tepsu suktot ne o re.

Ibrani 10:10

Kristus benbot suk gato Yefun Allah mit iwa ne, sane anato Kristus bi An nggwa kwop wa men wam dik sor re, tep wa kapyo mato kapyo. An bi nggwa subere tot sukibit gato men ben ne or wé kadit men sino, men bi sukjimnut waiyu mo sukibit gato men ben ne o nde, wo men onyar kwo it.

1 Petrus 1:20

Yefun Allah ut bur ré nde tó, An fro Yesus Kristus tepsu suktot nyim wé re. Yefun Allah fro Yesus Kristus kadit ketke ne it, wo su ré, karowa bur ré kru sa, Kristus bor mo bur ré. An ma wa tot sukibit gato men ben ne wé, subere nin dom ku os ndo wa nin sok mo Yefun Allah bi rus-i re.