Ibrani 12:2 - Abun Scripture

² Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.

Ibrani 12:2 Referans Kwoze

1 Petrus 3:18

Ndo sa, men ku sukye mo sukndo gato men ben ne, we Kristus dom ku sukye mo sukndo gato An ben ne re. Kristus kwop wam dik sor, tep wa tot sukibit mwa gato men ben ne wé re. Kristus yo ben sukibit mo nde. An kwop wa men yé gato ben sukibit, subere An kak os wa men ma sok mo Yefun Allah bi rus-i. An da kridek kwop, wo Yefun Allah Gen sun An kaim gesyos satu kadit sukkwop ne o re.

Ibrani 1:3

Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.

Efesus 5:2

Men kem mo bur ré, men bi sukjimnut sye kas subot ye yi sor, tepsu Kristus bi sukjimnut sye kas subot men, ete An bi An nggwa wa men. An bi An nggwa tepsu suksom gato An som Yefun Allah su, ete mone An tot men bi suktot. Yefun Allah iwa suk gato Kristus ben ne, tepsu ye iwa ni suk gato grik. Sane men waii bi men nggwa wa men ós ye yi su ne sor.

Filipi 1:6

Ji kwabom kam mo Yefun Allah do, Yefun Allah gato ben nin ti nggi wa nin ben An bi suk-i su ketke, bere An ben sukndo su nin gat sor, kom mo pe gato or mó, kom mo kam gato Yesus Kristus satu ma mo bur ré re.

Ibrani 9:28

Sane dom, Kristus bi nggwa kwop wam dik wa men yetu mwa ne tepsu suktot wa tot sukibit gato men ben or wé re. Or o, bere Kristus ma wam kedowe o. An ma o yo, An kwop wa tot men bi sukibit ne o nde, wo bere An ma wa nai men yé gato eswa An ma ne, ete An gwat men mu sok mo An bi nat-i.

Yohanes 6:40

Sane dom, Ji bi Ai mit i do, yé mwa ne sino gato me An bi Gan to Ji ré, ete án onyar kem mo Ji yo, án kem ndo to kapyo mato kapyo. Bere su kam gato bur ré kru yo, Ji sun án mbau satu. Suk gato Ji bi Ai imo anane it.”

1 Petrus 3:22

Yesus Kristus sun ete it mu mo gu re. Motu An kem tak Yefun Allah de syim ge, An si Yefun Allah jom suk mwa neya o re. An nggi wai kadit malaikat mwa ne sino e, yerom e, aboksye si suk mwa gato i-mok nggi mone sino o re.

Suk Gato Yerasul Ben Ne 5:31

Yefun Allah bes Yefun Yesus gum Yekwesu gato nggiwa jowa men yetu. Yefun Allah bes Yefun Yesus gum Yekwesu gato An syogat ma kak os ndo wa men yetu subere men ku os wa men kem ndo to kapyo mato kapyo. Yefun Allah bes Yefun Yesus gum Yekwesu subere men ye Israel ku os wa men kwet kadit sukibit gato men ben ne, ete men jammo Yefun, subere Yefun Allah yo maskwa men mo sukibit gato men ben ne o nde, tepsu An tot sukibit ne wé kadit men re.

Lukas 24:26

Yekwesu gato Yefun Allah syogat ma mo bur ré wa nai yetu kadit sukye ete jowa yetu ne, Yefun Allah fro suk mwa ne nyim re do, Kristus ne ku sukye nyim or wé, ete Yefun Allah bes An gum kok sye wai wa jowa yetu wari.”

Yudas 1:21

Nin eswa men bi Yekwesu Yesus Kristus ma ben bi suk-i ne ndo bor su nin sor. Bere An yo ben suk su nin tepsu sukibit gato nin ben ne nde, wo bere An gwat nin mu mo pe gato ndo wa nin si An kem ndo mone to kapyo mato kapyo. Nin eswa suk ne bor yo, nin ben nin bi suk-i, nin napawa pe do, Yefun Allah bi sukjimnut sye kas subot nin sor.

Ibrani 8:1

Sukdu subot men bi Yekwesu gato men ki ne, i-ke mó, sare do, men bi Yekwesu gato gum kok wai ne mó re. An kem tak Yefun Allah de syim ge mo gu, An si Yefun Allah gato sye wai mo gu ne jom suk mwa neya sino re.

2 Timotius 4:8

Ré yo, Yefun Allah fro suk gato bere An syo nai ji mo suk gato ji ben ne, Yefun fro ndek. Bere kam gato bur ré kru re, men bi Yekwesu Yefun Yesus ma ndobot men yetu mo bur ré. Bere Yefun ndobot men sisu ri-roi sor. Bere Yefun syo suk gato An fro ne nai ji mo suk gato ji ben tepsu An mit re. Bere An syo suk gato An fro ne nai ji wadigan sor nde, wo An syo nai ye gato eswa Yefun Yesus satu ma mo bur ré su án mit iwa wai ne dom.

Filipi 3:20

Wo men ré yo tepsu án nde. Men gum sok mo Yefun Allah bi rus-i mo gu it. Su ré men eswa men bi Yekwesu satu ma mo bur ré kadit gu ne. Men bi Yekwesu anato Yesus Kristus gato kak os wa men kem ndo to kapyo mato kapyo mo Yefun Allah bi nat-i.

Markus 14:36

Yefun Yesus ki nai An bi Ai o do, ”Ji bi Ai o, Ji jam do, sangge suk mwa ne sino gato Ji ndek mo Nan, Nan bi suktinggi ne wai mó re. Suk gato yé teker wa Nan ben ne yo mo nde. Sane Nan nai Ji kadit sukye gato bere Ji ku ré et. Sarewo Nan jammo suk gato Ji iwa ne nde, wo Nan dakai fro pe ne tepsu Nan dakai imo, bere Ji simo.”

Wahyu 2:8

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Smirna sare do: Ji gato ut suk kadit ketke ete jom suk mwa ne kom mo pe gato or mó, Ji gato kwop, orete sun satu o bi sukdu-i anare:

Ibrani 13:13

Sane it yo, men mu kadit os nyim ete men ut mo os be gato Kristus kak ne et. Men ut mo An yo, men si An sino ku sukye ket kwayo-kwayo mone.

Ibrani 5:9

Sane An ben suk mwa gato Yefun Allah fro wa An ben ne or sa, An kak os wa men yetu gato jammo An muket, subere An nai men wé kadit bot gesyos, subere men kem ndo to kapyo mato kapyo.

Yohanes 13:3

Yefun Yesus jam do, An bi Ai syo suk mwa ne sino nai An wa An jom. Sane dom, Yefun Yesus jam do, An ma kadit Yefun Allah, ete bere An satu mu mo Yefun Allah o.

Lukas 17:5

Yefun Yesus bi pakon ge musyu dik sop we (gato yé kendo do yerasul), án ki nai Yefun Yesus do, ”Yenggras, Nan ós men et! Nan syo suktinggi nai men, subere men onyar kem mo Yefun Allah nggi wai o et!”

Markus 9:24

Yefun Yesus ki sukdu ne sa, sugane it, pa bi ai ne ki do, ”Yenggras, ji da onyar kem mo Nan, sarewo ji yo onyar kem pe mo Nan nde tó. Nan ós ji subere ji onyar kem pe mo Nan o et.”

Ibrani 12:3

Men nutbot sukye gato Yefun Yesus ku ne sisu ndo et. Yé bok neya gato ben bi suk-i ibit ben sukye nai Yefun Yesus ndo nde. Sane, ye do ben sukye nai men it yo, men nutbot sukye ne teker eta sor men kaim rere su nde, men kwabom dek bot sukye ne dom nde, wo men simo sor sukye ne or wé kadit men sagato Kristus ben ne.

Efesus 2:16

Yesus Kristus kwop mo kwesukwin ne anato kak os wa yewis bok ne sino kem ndo su yu, ben sato án sino ku os wa jom syim su yu. Sane sor nde, wo Yesus Kristus kwop kak os wa yewis mwa ne sino si Yefun Allah kem ndo su yu, sukmaskwa mo mit ne, Kristus tot or wé kadit re.

Suk Gato Yerasul Ben Ne 5:41

Yerasul ne mu kadit yepasye mwa ne, án mit at, we án jam do, Yefun Allah nut do, án sa, gum kok tep wa án ku sukye kadit yepasye ne mo sukdu gato án ki subot Yefun Yesus.

Yohanes 12:32

Sarewo Ji gare, yé bes Ji kok kadit bur ré yo, bere Ji tik yé mwa mit subere án ma mo Ji.”

1 Petrus 1:11

Yenabi bok ne jam sukdu subot sukye gato bere Kristus ku ne. Kristus Gen bok nggwa mo yenabi, ete ki sukdu napyo nai yenabi bok ne jam re. Yenabi jam do, bere ye bes Kristus gum kok mo os ndo gato An kak ne. Sane yenabi werwa án jam kom mo mit o et, án ndobot do, ”Os ne bere Yefun kak sa u ne? Kam ot ete bere Yefun kak os ne?” Yenabi ne ndobot, sarewo án yo jam sukdu mwa ne or sino nde.

Ibrani 10:14

Sane Kristus kwop wam dik wa men anato An kak os wa men. An kwop wam dik ne tep wa men to kapyo mato kapyo it. Kristus tot sukibit gato men ben ne or wé kadit men, sane anato men bi sukjimnut yo waiyu mo sukibit ne o nde, sukibit ne yo ut mo men o nde it.

Yohanes 12:24

Suk gato Ji ki ré suksangge anare, men nai fas gro wa men jan, ete fas gro dik sor ye yo jan nde yo, gro dik anane sor re. Sarewo men nai fas gro dik ne, ete men jan, bere sukjan ne kom, ete bere syesyar i-gro mwa.

Yohanes 8:56

Nin bi ai Abraham nutbot kam gato Ji ma kem mo bur ré sa, an mit iwa wai o re. Ben sato an me Ji ma mo bur ré, sane an mit iwa wai o re.”

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Lukas 23:11

Orete Herodes si an bi yesukmise siker Yefun Yesus ete kamo su An dom. Yesukmise ne it yepasye bi san mo Yefun Yesus, orge Herodes syogat yé gwat Yefun Yesus satu mu mo Pilatus.

Matius 20:28

we Yetu bi Pa to Ji ré ma mo bur ré wa yé ben suk wa Ji nde, wo Ji ma wa Ji ós nje, ete Ji bi nggwa tepsu suktot mo sukibit gato yé mwa ben ne.”

Matius 16:21

Kadit kam ne Yefun Yesus ki rer nai bi pakon ne do, ”Ji mu mo kota Yerusalem et. Mone ye Yahudi bi yepasye e, yekwesú mo Yefun Allah bi nu si ye Yahudi bi yeguru agama bere ben sukye nai Ji ket kwayo-kwayo. Bere yé gu Ji kwop, sarewo kom mo kam we rek, bere Yefun Allah sun Ji kadit sukkwop o re.”

Wahyu 1:17

Ji sokme An sa, ji bare ji nggwa mo An gwem tepsu ji kwop re. Orete An ak An syim ge mo ji, ete An ki do, ”Nan nyu nde! Ji anato ut suk kadit ketke ete jom suk mwa ne sane sor kom mo pe gato or mó.

Wahyu 1:11

Ji jam ye ne ki sukdu sare do, ”Suk gato bere nan sokme ne yo, nan krombot mo buku. Orete nan syo buku ne nai yé gato onyar kem mo Yefun Yesus mo nu ari mo kota Efesus e, Smirna e, Pergamus e, Tiatira e, Sardis e, Filadelfia si Laodikia ne et.”

Ibrani 7:19

Sukduno ne yo ós ben suk yo ndo mo nde. Sane su ré Yefun Allah fro os gato ndo wai wa men o re. Men kwabom kam mo Yefun Allah do, sukduno be gato An fro ne anato kak os wa men subere men karowa Yefun Allah it.

Ibrani 1:13

Yefun Allah yo ki sukdu tepsu sukdu ré nai malaikat ge dik yo dom nde, wo Yefun ki sukdu ré nai An bi Gan sor re, sare do, ”Nan kem tak Ji de syim ge, Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.”

Suk Gato Yerasul Ben Ne 2:36

Petrus ki o do, ”Sa ndo sa, nin ye Israel ne sino jam do, Yefun Yesus gato nin gu kwop mo kwesukwin ne, Yefun Allah bes tepsu men bi Yekwesu. Yefun Allah anato bes Yefun Yesus gum Kristus, Ye gato Yefun Allah syogat ma mo bur ré wa nai men yetu kadit sukye ete jowa men ne.”

Markus 9:12

Yefun Yesus ki do, ”Sukdu gato yeguru ki ne sangge do, Elia ma nyim, ete an fro os wa Ji re. Sarewo yé krom mo Yefun Allah bi sukdu do, bere yé bariwa Yetu bi Pa, ete yé ben sukye nai Ji ket kwayo-kwayo. Sukdu ne bi sukjimnut-i sa u ne?

Wahyu 1:8

Yefun Allah ki do, ”Ji anato Yefun gato ut suk kadit ketke ete Ji jom suk mwa ne sane sor kom mo pe gato or mó. Ji anato Yefun gato su ré mó, kadit ketke mó, si kam sari ne ma bere mó tó ne. Ji anato Yefun Allah gato nggi wai kadit suk mwa ne sino o re.”

Ibrani 11:36

Ye deyo o, ye kabor ete ye kwam. Deyo o, ye rai su rantai ete ye sok mo sel.

Ibrani 10:33

Yé kabor nin, yé ben nin damen mo yé mwa gwem mo sukdu ne mó re. Wam bok yo nin sok to yé gato ku sukye ete nin si yé bok ne ku sukye sino.

Markus 16:19

Yefun Yesus ki An bi sukdu nai An bi pakon, or Yefun Yesus it mu mo gu, ete Yefun Yesus kem tak Yefun Allah de syim ge subere Yefun Yesus si Yefun Allah, An we jowa suk mwa ne sino.

Suk Gato Yerasul Ben Ne 3:15

Sane nin dom si nje tepsu dik wa gu Yefun Yesus kwop wé anane. Nin gu Yefun Yesus gato ós men yetu kem ndo ne. Sarewo Yefun Allah sun Yefun Yesus kadit sukkwop o re. Men dakai me su men gro it.

1 Korintus 1:18

Ye gato bere ges mo bot gesyos ne nut do, sukdu subot Yefun Yesus mo kwesukwin ne, yé ki daret kaii. Wo men yé gato Yefun nai kadit sukye mo bot ne, subere men kem ndo to kapyo mato kapyo, men jam do, sukdu subot Yefun Yesus mo kwesukwin anato kadum Yefun Allah bi suktinggi ne bor wa men jam re.

1 Korintus 1:23

Sarewo men ki sukdu subot Yesus Kristus gato yé gu kwop mo kwesukwin ne. Ye Yahudi bariwa jambot sukdu ne, we án nut do, Yefun Allah bi suktinggi yo bor mone nde. Wo yewis yi ne nut do sukdu ne men dakai ki daret kaii.

Yakobus 2:1

Ji bi nji, ji bi nyanggon, nin onyar kem mo men bi Yekwesu Yesus Kristus gato gum kok sye wai o re. Sane nin ben suk su yetu mwa ne sino tepsu yu et, nin bes deyo gum kok wai kadit deyo daret nde, wo nin ben suk su yé mwa ne sino tepsu yu et.

Markus 15:28

Sane sukdu gato yenabi Yesaya krom nyim mo Yefun bi sukdu bor mone do, ”Yetu nutbot An tepsu ye gato ben sukibit.”]