Ibrani 12:13 - Abun Scripture

¹³ Nin werwa nin ben nin bi suk-i ri-roi et, subere nin kak sukibit gato ut mo nin ne wé et. Sukibit ut mo nin yo, nin tepsu ye gato gwes út. Sane nin werwa nin gwes út krat tok o nde, wo nin ge kadit et.

Ibrani 12:13 Referans Kwoze

Galatia 6:1

Ji bi nji, ji bi nyanggon, men ku yetu ge dik yo gato ben sukibit it yo, men yé gato ben men bi suk-i tepsu Yefun Allah Gen mit ne mu ku an, ete men duno an subere an satu ma mo os gato ndo o et. Wo men duno an it yo, men duno an sisu njep sor. Men mewa men nggwa dom, sawe suk yo tik men mit, ete men waii ges mo os ibit ne dom.

Yakobus 5:16

Sane nin rek sukibit gato nin ben ne nai yu ete nin ki suk su Yefun wa yu subere Yefun ben nin ge kadit suki ne sor. Ye gato ben sukndo tepsu Yefun Allah mit, an do ki suk su Yefun it yo, Yefun Allah bere jam ete benbot suk gato an ndek ne.

Lukas 3:5

Us mwa ne sino Yefun Allah krer bur wa sane sor ya, banbo mwa ne sino Yefun Allah ben ga, subere os ne ndo. Os gato kwek-kwak Yefun Allah ben ri, os gato jok mwa mó, Yefun Allah fre er, subere os ne ndo.

Galatia 2:14

Ji do me suk gato Petrus si ye Yahudi gane ben ne siri kadit Yesus Kristus bi os-i sa, ji ki Petrus mo yé mwa gwem do, ”Nan ye Yahudi, sarewo nan misyar ye Yahudi bi sukduno-i, ete nan ben suk tepsu yewis yi o re. Suk gato nan ben ne da ndo, sarewo suma ben anato nan wergat yewis yi brek ma ete jammo ye Yahudi bi sukduno-i gato nan misyar wé ne?”

1 Petrus 2:24

Sukibit mwa ne sino gato men yetu ben ne tepsu sukde gato Yesus Kristus sam wa men. Ben sato Kristus sam men bi sukde ne mo An kaim mu kom mo kwesukwin. An kwop wa men, An tot suktot mo sukibit mwa gato men ben ne or wé mone, subere men gum pakwerut wa ben sukibit o nde, wo men ben men bi suk-i ndo tepsu Yefun Allah mit sor. Yé sap Kristus wip e, yé mban An mo kwesukwin e, yé ben sukye nai Kristus ket kwayo-kwayo e ne, anato nin ku os wa nin ge kadit nin bi suki mwa ne, orete nin kem ndo mone it.