Ibrani 12:1 - Abun Scripture

¹ Sane yo, men jam sukdu mwa yé subot yé gato onyar kem mo Yefun Allah ne. Yé gato onyar kem mo Yefun Allah kam nyim ne, yé mwa ne ben sato án wairi wa men, án sokwa suk gato men ben wa Yefun Allah. Sane it yo, men bare suk gato kwawa men ben Yefun Allah bi suk-i wé kadit men et. Men am sukibit gato ut mo men wé kadit men et. Sane suk mwa gato Yefun Allah fro wa men ben ne, men ben sisu men mit dik si men onyar dik et, tepsu ye kas bitanding yu mo perlombaan, ye wergat ye nggwa sisu ye mit dik si ye onyar dik subere ye kas nggi mone sor kom mo pe gato or mó.

Ibrani 12:1 Referans Kwoze

2 Timotius 4:7

Ji sa, ji wergat ji nggwa sor kom mo pe gato or mó, tepsu ye gato kas bitanding yu kas sor kom mo pe gato or mó. Ji sa, ji onyar kem pe mo Yefun Yesus sor kom mo pe gato or mó, ji yo brek kadit An nde.

Filipi 2:16

Nin jom Yefun bi sukdu gato kak os wa men kem ndo to kapyo mato kapyo yo, nin tepsu sukru gato ji ki ne. Sane bere su kam gato Kristus satu ma mo bur ré it yo, ji mit at mo suk gato nin ben ne, we ji jam do, suk gato ji werwa ji duno nin su ne, ji yo ben yi nde, wo nin waii benbot suk gato ji duno nin su ne re.

Lukas 21:34

”Nin frawa nin nggwa subere su kam gato Ji satu ma ne, nin fro wa re. Nin mewa nin nggwa subere nin bi sukjimnut kas ri et. Nin yenau nde, nin simo sukibit gato yenau ben ne nde, nin jimnotbot suk mwa gato yetu yémo, sato sugit e, san e, sugum e ne teker nde. Nin bi sukjimnut sye mo suk mwa ne teker nde, sawe nin gensu kam gato Ji satu ma mo bur ré su ne.

Galatia 5:7

Tomgato nyim sa, nin werwa nin sibot os gato sangge ré, wo su ré, je u anato ma duyawa suk gato nin ben, ete werwa brek nin wé kadit Yefun Allah bi os-i gato sangge ne?

1 Petrus 2:1

Men ki Yefun Allah bi sukdu gato kem gesyos nai nin jam it. Sane nin bare sukibit gato nin ben nai ye yi ne or wé kadit nin et. Nin kidar ye yi o nde. Nin ben suk tara kadit suk gato nin ki ne o nde. Nin on sa ket ye yi mo suk mwa gato an ku wai kadit nin ne nde. Nin ki ye yi gum ibit ket kwayo-kwayo o nde.

Roma 12:12

Men kwabom kam mo Yefun Allah, ete men mit at mone. Men ku sukye yo, men misyar Yefun nde, wo men eswa sukye ne or kadit men. Men ki suk su Yefun Allah petok sor.

2 Korintus 7:1

Ji bi nji, ji bi nyanggon gato ji jimnotku, Yefun Allah tom su men mo sukdu ne do, An nai men sok mo An bi rus-i, ete An tepsu men bi Ai. Sane it yo, men werwa men sombok sukibit mwa ne sino or wé kadit men et. Sukibit mwa gato Yefun Allah bariwa men ben ne yo, sukibit gato yé mwa me men ben ne si sukibit gato men gurik ne, men bi sukjimnut ibit dom ne, men wergat men nggwa subere men ben sukibit ne o nde. Men bi sukjimnut sye mo Yefun si suk gato Yefun tom su men, sane yo, men werwa men bi men nggwa mo Yefun, subere men dakai ben An bi suk-i ne ri-roi petok sor, kwa yo gwet mo nde.

2 Timotius 2:4

Yesukmise gato benbot án bi yekwesu bi sukdu it yo, án yo ben suk yi nde, wo án iwa án ben suk tepsu án bi yekwesu mit sor.

Yakobus 1:3

we men jam do, yé ben sukye nai men mo gato men onyar kem mo Yefun Yesus sa, men yo misyar Yefun mone nde, wo men nggiwa men jom An bi sukdu ne krat petok sor, men ó mó it.

Matius 24:13

Wo ye gato onyar kem pe mo Ji sor kom mo pe gato or mó yo, bere an kem ndo to kapyo mato kapyo.

Matius 10:22

Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó, bere ye ne kem ndo to kapyo mato kapyo.

Ibrani 6:15

Sane Abraham kem ete eswa suk gato Yefun Allah tom su an, an eswa sane sane sor, suk gato Yefun tom su an bor mone, Abraham ku it.

Roma 2:7

Ye gato werwa ben bi suk-i ne ndo, we ye ne kwabom kam mo Yefun Allah do, bere Yefun bes án gum kok mone yo, bere Yefun un án gum mone, bere Yefun kak os wa án kem gesyos mone, bere Yefun Allah kak os wa yé ne kem ndo to kapyo mato kapyo.

Wahyu 3:10

Kapre nin ku sukye, nin misyar Ji nde, wo nin benbot Ji bi sukdu-i petok sor tepsu Ji ki ne. Sane bere kam gato yetu mwa ne sino mo bur ré iwedewe ku sukye ndo nde, bere Ji mewa nin kadit re. Bere yetu mwa ne sino ku sukye subere yé gato misyar Ji, bere bor mone.

1 Petrus 4:2

Sane nin kem mo bur ré yo, nin benbot suk gato Yefun Allah mit iwa ne kadit suk gato yetu iwa ne nde.

Lukas 12:15

Orge Yefun Yesus ki nai yé mwa gato mone do, ”Nin frawa nin nggwa et! Nin mewa nin nggwa subere nin gro sye wa suk mwa neya mo bur ré nde, we men do ku suk mwa ne yo, suk mwa ne yo ós men kem ndo nde.”

2 Petrus 1:6

Men jam suk mwa sor nde, wo men werwa men mewa men nggwa kadit men ben sukdaret nde. Men mewa men nggwa sor nde, wo men do ku sukye yo, men misyar Yefun nde, wo men werwa men jom An bi sukdu ne krat dom et. Men werwa men jom An bi sukdu krat mo sukye gato men ku ne sor nde, wo men werwa men ben Yefun Allah bi suk-i dom et.

Wahyu 22:16

”Ji, gato gum do Yesus, Ji anato syogat Ji bi malaikat ma wa kibot sukdu mwa mo buku ré wa ye gato onyar kem mo Ji mo nu ari mo bur ré jam re. Ji anato yeraja Daud bi dat. Ji anato kak os ndo wa yetu tepsu bí ik gato it ben sato kak os wa nombrak ne ma.”

1 Petrus 5:12

Silas anato ós ji krom surat wokgan ré wa nin. Ji nut do, an sa, ye Kristen gato ben an bi suk-i ri-roi tepsu Kristus mit. Ji iwa ji frot sukdu bok ré subere nin jam do, sangge, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Ji krom sukdu subot sukndo gato Yefun Allah ben dakai yi su nin subere nin bi sukjimnut kem pe mo An. Sane nin bi sukjimnut ut krat mo sukdu ne {tepsu jam biro kom krat mo kweguk et.}

Wahyu 1:9

Ji, gato gum do Yohanes anato tepsu nin bi nji mo Yefun Allah bi rus-i. Ji simo Yesus Kristus tepsu nin. Men sino bi Yekwesu mo Yesus Kristus. Men sino ku sukye tepsu yu. Kapre men ku sukye o, men yo misyar Yefun nde, men simo An pe sor. Ji ki sukdu subot os ndo gato Yefun Allah fro ne. Ji ki subot suk gato Yesus Kristus ben wa kak os ne, sane anato yé but ji, ete yé gwat ji mu yé grem kem mo ef Patmos.

Yohanes 3:32

An ki rer subot suk gato An me mo gu nim ne re. An ki rer subot suk gato an jam re, wo yé yo onyar kem mo suk gato An ki ne nde.

Wahyu 13:10

”Yé gato Yefun Allah fro wa ye but yo, bere ye but yé ne re. Yé gato Yefun Allah fro wa ye gu su nyom kwop wé yo, bere ye gu yé ne su nyom kwop wé re. Sane men yé gato onyar kem mo Yefun Yesus mo bur ré, men ku sukye it yo, men misyar Yefun nde, wo men simo An pe sor, men werwa men jom Yefun Allah bi sukdu-i sane sor kom mo pe gato or mó et!”

Lukas 16:28

we ji bi nji ge mumek mone. Sane, nan syogat Lazarus mu wa ki suknapa wa án, subere ji bi nji yo sok mo pe gato yé more nde.”

Yohanes 4:39

Sane ye Samaria mwa, gato kem mo kota ne, án nai sukjimnut dik do, án onyar kem mo Yefun Yesus mo sukdu gato nggon ne ki sare do, ”Ye gane kibot suk mwa ne sino gato ji ben ne re.”

Yohanes 4:44

Yefun Yesus dakai ki do, ”Yenabi gato ki Yefun Allah bi suktaru satu mu mo an dakai bi nat-i yo, bere yé mone bariwa jammo an re.”

Galatia 2:2

Yefun Allah kadum rer nai ji do, An syogat ji mu mone anato ji mu ne. Ji si yé bok gato gum yekwesu ne sum dor kadit ye yi neya, ete ji ki rer subot os ndo gato Yesus Kristus kak ne. Ji ki rer subot sukdu gato ji duno yewis yi neya su ne. Ji ki rer wa yekwesu bok ne jam, sawe ji bi sukdu-i napyo siri kadit yekwesu bok ne bi sukjimnut-i, wo sukdu ne tepsu án mit re, yekwesu ne yo duwer ji mo nde.

Efesus 4:25

Sane yo, nin sino kidar yu o nde, wo nin ki nin bi sukdu-i ri-roi nai yu sor, we nin sino tepsu yedik mo Kristus bi rus-i it.

Filipi 1:30

Su ré yé gato bariwa Yesus Kristus, án ben sukye nai nin tepsu wam ga nyim nin me do yé ne ben sukye nai ji dom. Su ré dom, nin jam do, ye gato bariwa Yesus Kristus ne ben sukye nai ji tó.

1 Petrus 5:1

Ji ré anato tepsu yekwesu mo nu ari dik yo. Ji dakai me sukye gato Kristus ku su ji gro re. Bere mo Yefun Allah bi nat-i ji sisu Kristus ku suk gato ndo wai o mone. Sane ji kiwa nin, yekwesu mo nu ari, nin jammo suk gato ji ki ré et, sare,

Markus 10:50

Bartimeus jam sukdu ne sa, an am an bi san syu gato an it ne kem, ete an ti an mu ku Yefun Yesus.