Ibrani 11:25 - Abun Scripture

²⁵ Musa iwa ku sukye sisu Yefun Allah bi rus-i kadit an simo os ibit gato ye Mesir ben nai yewis ye Israel ne nde.

Ibrani 11:25 Referans Kwoze

2 Korintus 5:17

Sane men si Yesus Kristus tepsu dik it yo, men anato ye gato be o re. Men yo simo os ibit saga nyim ne o nde, wo men simo os be mo suk mwa ne sino o re.

Wahyu 18:7

Nin ben sukye nai án sor án dipa, ete án wo án nderku án dakai, nin ben sukye mwa nai án tepsu suk mwa gato án dakai nai wa án dakai, ete án bes án nggwa kok su ne. Yé mo kota ne dakai nut mo án dakai tepsu nggon pasye sare do, ’Ji ré sa, tepsu nggon pasye. Ji nggonna nde. Bere ji yo nderku nggwa wokgan yo dom nde.’

1 Petrus 2:10

Suga nyim nin yo tepsu Yefun Allah bi rus-i nde, wo su ré sa, nin tepsu An bi rus-i it. Suga nyim Yefun Allah dakai jimnotku nin ndo nde, sarewo nin jam nde re. Wo su ré sa, nin jam rer it. Yefun Allah dakai jimnotku nin anato An nai nin sok mo An bi rus-i it.

Yakobus 5:5

Nin yé gato ku suk mwa, nin kem mo bur ré si suk mwa ne not re. Nin ben suk su suk mwa ne ket nin í ne sor. Ben sato nin kon nin nggwa su suk mwa ne tepsu ye kon suksi sane sor suksi ne kaim ndo. Su ré nin tepsu suksi gato kaim sye ndo, tep wa ye gu kwop or re.

Yakobus 1:20

we, sukmaskwa yo ós men ben sukndo tepsu Yefun Allah mit nde.

Ibrani 11:37

Deyo o, ye am su jok sor kwop, deyo o ye kum su gergaji mo mit toko o re, deyo o ye syek su nyom gato ot de we sor kwop. Deyo o muya-muma ete it san kadit domba si kambing da sor re. Án yo ku suk nde, án ku sukye, ye ben sukibit nai án ket kwayo-kwayo ndo nde.

Ibrani 10:32

Nin napawa tomgatu, nin jam sukdu subot Yesus Kristus sim sa, sukdu ne tepsu Yefun Allah bi sukru gato rer ku nin, ete mone nin onyar brek ete kem mo Yefun Yesus it. Tomgane nin ku sukye ndo nde, sarewo nin sa, nin wergat nin nggwa sane sor nin jom Yefun Allah bi sukdu ne pe sor, nin yo misyar nde.

Ibrani 4:9

Sane Yefun Allah tom su An bi rus-i do, An fro bi kam-i gato men kem not ne mó re, tepsu Yefun Allah kem not su kam domufit ne, bere men si Yefun kem not mone tó.

2 Timotius 1:8

Sane nan nyuwa nan ki sukdu subot men bi Yekwesu Yefun Yesus nai nje nde. Nan damen wa ji gato ye grem mo sel ré nde, we ji ki subot os ndo gato Yesus Kristus kak ne anato ye grem ji mo sel more. Nan ki subot os ndo gato Yefun Yesus kak wa men yetu ne, nan nyuwa nde, wo Yefun Allah ete ben nan nggiwa nan waii ku sukye mone sato ji ku re.

Kolose 1:24

Su ré ji mit at mo sukye gato ji ku wa nin, we sukye gato Kristus ku ne anato ji waii ku nap ta ré. Kristus ku sukye nap sye wa bi rus-i or re. Or o ji waii ku sukye ne napta wa yé mwa gato onyar kem mo Kristus, yé mwa ne tepsu Kristus kaim.

Roma 5:3

Men mit at mone sor nde, wo men mit at mo sukye gato men ku ne dom, we men jam do, sukye gato men ku ne, bere ben men nggiwa ben suk gato ndo pe sor, men yo sombok kadit suk gato men ben ne nde.

Lukas 16:25

Sarewo Abraham saiye o do, ”Nan napawa tomgato nan kem mo bur ne, nan ku suk mwa gato ndo, sarewo Lazarus gare yewa suk mwa. Su ré Lazarus kem mo pe gato ndo, wo nan anato kem mo pe gato yé, ete nan ku sukye mone.

Matius 13:21

sarewo sukdu ne yo kem pe mo án mit nde, tepsu mbet gro ne i-brot yo kom mo jok nde, bergan sor, ete án misyar or re. Diksim án jammo sukdu ne, sarewo án do ku sukye mo sukdu ne yo, ye kiket án mone yo, bergan sor, ete án misyar sukdu ne kekro re.

Suk Gato Yerasul Ben Ne 7:34

Ji me sukye gato Ji bi nje ku mo bur Mesir mó re. Ji jam án wo bot sukye gato án ku ne. Sane Ji is ma wa sombok án wé kadit ye Mesir, subere ye Mesir yo jowa án ete ben sukye nai án o nde, subere án dakai ti mo án dakai. Sane Ji syogat nan satu mu mo bur Mesir subere nan sombok ye Israel wé kadit ye Mesir.’