Ibrani 10:21 - Abun Scripture

²¹ Sane su ré Yefun Yesus ben suk tepsu yegweswai wa men si Yefun Allah. Kristus ben suk tepsu yekwesu gato gum kok wai wa men mo Yefun Allah bi nu mo gu.

Ibrani 10:21 Referans Kwoze

Ibrani 2:17

Sane An ma tepsu yetu gato da kridek. Mo suk mwa ne sino An kaim tepsu men yé gato sok mo Yefun Allah bi rus-i. Sane bere An ku os wa An ben suk tepsu Yekwesu gato gum kok wai kadit yekwesu yi neya mo Yefun Allah bi nu. An sa, tepsu yegweswai gato ben bi suk-i ri-roi wa men si Yefun Allah, subere men si Yefun kem ndo. An dakai jimnotku yetu ndo nde. An kak os wa men yetu, An bi nggwa win men, subere Yefun Allah yo maskwa men mo sukibit gato men ben ne o nde, Yefun yo nutbot sukibit ne o nde.

Ibrani 8:1

Sukdu subot men bi Yekwesu gato men ki ne, i-ke mó, sare do, men bi Yekwesu gato gum kok wai ne mó re. An kem tak Yefun Allah de syim ge mo gu, An si Yefun Allah gato sye wai mo gu ne jom suk mwa neya sino re.

Ibrani 6:20

Yefun Yesus duk os mu nyim mo men gwem sok mo gumwak fo ne it. An sok mone tepsu yegweswai wa men si Yefun Allah. Yefun Yesus ben suk tepsu yekwesu gato gum kok wai mo Yefun Allah bi nu wa men sane sor kem to kapyo mato kapyo, tepsu yegweswai gato sok mo Melkisedek bi de-i.

Ibrani 7:26

Sane, Yefun Yesus sa, An dakai anato Yekwesu gato gum kok wai o re. Yefun Yesus sa, tep wa ós men mo suk mwa gato men yé mone. An bi An nggwa wa ben Yefun Allah bi suk-i sor. An yo ben sukibit mo nde, kwa dik yo dom nde. An ben suk mwa ne ndo sino. An ben An bi suk-i tara kadit men yetu gato ben sukibit. Yefun Allah bes An gum kok wai kadit suk mwa neya mo gu o re.

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

1 Timotius 3:15

sawe suk yo kwa yawa ji ba kekro ne yo, bere nan jam suk gato ndo wa Yefun Allah bi rus-i mo nu ari ben ne. Yefun Allah bi rus-i mo nu ari ne anato tepsu yé mwa gato onyar kem mo Yefun Allah, gato gesyos. Yefun Allah bi rus-i ne anato jowa An bi sukduno gato sangge tepsu kwedi si pondasi gato krat jowa nu dik yo nggi.

Matius 16:18

Sane, Ji ki sare do, nan gum do Petrus, gato bi sukjimnut do, jok gato nggi. Sane saga yé nggo nu mo jok gato ye kendo do pondasi, bere Ji nggo Ji bi nu wa Ji bi rus-i kem mone mo nan si nan bi sukdu-i. Yé mwa ku os wa sok mo Ji bi rus-i mo sukdu gato nan ki subot Ji ne. Ji bi rus-i mo nu ne, bere nggi wai kadit os sukkwop o re.