Ibrani 1:9 - Abun Scripture

⁹ Nan mit iwa yé ben sukndo tepsu Ji mit sor, Nan bariwa yé ben sukibit re, Sane anato Ji gato jom Nan ne, Ji anato bes Nan gum kok wa Nan ben Ji bi suk-i, Ji ben Nan mit at wa Nan ben Ji bi suk-i, Nan mit at wai kadit Nan bi yesyim gato si Nan mone sino o re.”

Ibrani 1:9 Referans Kwoze

Galatia 5:22

Sarewo men nai sukjimnut dik do, suk gato Yefun Allah Gen kiwa men ben ne yo, bere men ben suk sato ré: Men bi sukjimnut sye kas subot ye yi e; men mit at wa suk gato ndo petok sor e; men si ye yi neya mit ndo su yu e; men yo maskwa kekro nde e; men jimnotku ye gato ku sukye e; men ben sukndo su nje e; suk gato men tom ne men benbot e;

Roma 15:13

Sane Yefun Allah fro os wa nin anato nin kwabom kam mo An. Sane Yefun Allah ete ben nin mit at mo suk mwa gato An ben ne. Yefun Allah ete ben nin kem ndo su yé mwa neya sino, we nin onyar kem mo Kristus. Yefun Allah Gen bi suktinggi ete ben nin kwabom kam mo Yefun Allah krat wai kadit nyim ne o re.

Lukas 4:18

”Yefun Allah Gen bok nggwa mo Ji, we Yefun Allah bes Ji wa Ji ki subot An bi suktaru gato ndo nai ye gato yewa suk jam An bi sukdu ne. An syogat Ji ma wa Ji ki nai yé gato ye rai ne do, ’Ji sombok nin wé kadit sukibit gato jom nin ne it!’ An syogat Ji ma wa Ji ós ye gato gro ndu, subere Ji ben án gro ndo satu. An syogat Ji ma wa Ji nai ye gato ku sukye wé kadit sukye ne subere án kem ndo satu.

1 Yohanes 1:3

Suk gato men me si men jam ne, sukdu ne anato men waii ki nai nin jam subere nin si men tepsu yedik mo Yefun bi de-i. Men ki nai nin jam subere nin si men si men bi Ai, Yefun Allah sisu An bi Gan, Yesus Kristus sino tepsu dik.

1 Petrus 1:3

Men bes Yefun Allah, men bi Yekwesu Yesus Kristus bi Ai ne gum kok et. Yefun Allah dakai jimnotku men sye wai o re, sane anato An sun Yesus Kristus kadit sukkwop, ete An fro os mone wa men subere men kem ndo tepsu yetu gato be o re. Sane men kwabom kam mo An do,

Ibrani 7:26

Sane, Yefun Yesus sa, An dakai anato Yekwesu gato gum kok wai o re. Yefun Yesus sa, tep wa ós men mo suk mwa gato men yé mone. An bi An nggwa wa ben Yefun Allah bi suk-i sor. An yo ben sukibit mo nde, kwa dik yo dom nde. An ben suk mwa ne ndo sino. An ben An bi suk-i tara kadit men yetu gato ben sukibit. Yefun Allah bes An gum kok wai kadit suk mwa neya mo gu o re.

Filipi 2:9

Sane anato Yefun Allah bes Yesus Kristus it mo pe gato kok wai kadit suk mwa mo bur ré sino o re. Yefun Allah bes Yesus Kristus gum kok sye wai kadit yé mwa ne sino o re.

Efesus 1:3

Men sok mo Yesus Kristus bi rus-i, sane anato Yefun Allah syo suk mwa gato ndo mo gu, gato men mitmo wa ós men kem ndo tepsu An bi pa-i. Sane men bi Yekwesu Yesus Kristus bi Ai, gato Yefun Allah ne, men bes An gum kok et.

1 Korintus 1:9

Yefun Allah ben An bi suk-i tepsu An tom su men ne. Yefun Allah kendo nin subere nin si An bi Gan gato men bi Yekwesu Yesus Kristus ne tepsu dik.

Yohanes 20:17

Yefun Yesus ki nai Maria do, ”Nan jom Ji nde, we Ji yo satu mu mo Ji bi Ai nde tó. Nan mu mo Ji bi nji, ete nan ki nai án do, ’Ji satu mu mo Ji bi Ai, gato nin bi Ai dom it anare. Ji satu mu mo Yefun Allah gato jom Ji si nin sino it anare.’ ”

Yohanes 1:41

Andreas mu kamas wa meret an bi nji Simon. An ku Simon, ete an ki nai Simon do, ”Men ku Mesias it.” (Mesias, a Ibrani anane, wo ye brek su a Yunani bi sukjimnut do, ’Kristus,’ gato bi sukjimnut do, Ye gato Yefun Allah syogat ma mo bur ré wa nai men yetu kadit sukye, ete jowa men.)

Wahyu 2:15

Sane mo nin bi nu ari dom, ge bok yo jom Nikolaus bi pakon bi sukdu-i.

2 Korintus 11:31

Ji yo kidar nde, Yefun Allah, men bi Yekwesu gato Yesus Kristus bi Ai ne, men bes An gum kok petok sor to kapyo mato kapyo. Yefun Allah ne sa, jam ji kom mo mit re. An jam do, ji yo kidar nde.

Roma 12:9

Men ben kidar do, men bi sukjimnut sye kas subot nje, wo men mit-i tara re, bere siri re, wo men bi sukjimnut sye kas subot nje sisu sangge. Men bariket suk gato ibit. Men jom suk gato ndo ne pe sor.

Suk Gato Yerasul Ben Ne 10:38

Nin dakai jam do, Yefun Allah bes Yesus, ye Nazaret ne, orete Yefun Allah Gen bok nggwa mo Yefun Yesus, syo suktinggi nai Yefun Yesus. Nin jam do, Yefun Yesus mubot peyo-peyo, An ben sukndo, An ben ye gato i ne ge. Yé mwa gato biris bi yekwesu jom ne, An nai wé kadit biris bi yekwesu, ete ben yé mwa ne ge re. Yefun Allah sisu Yefun Yesus anato An nggiwa ben suk ne.

Suk Gato Yerasul Ben Ne 4:27

Suk gato Daud krom ne sangge, we yeraja Herodes si Gubernur Pontius Pilatus si yewis gato ye Yahudi nde si ye Yahudi mo kota ré sum sino. Yé bok ne fro os wa gu Yefun Yesus kwop wé. Yé bok ne fro os wa gu Nan bi pakwerut gato Nan bes wa ben Nan bi suk-i sor. Yé bok ne fro os wa gu Yefun Yesus gato Nan syogat ma mo bur ré wa nai men yetu kadit sukye ete jowa men.

Yohanes 3:34

We, Ye gato Yefun Allah syogat ma mo bur ré, Yefun Allah syo Yefun Gen bok nggwa mo An, Yefun Gen bi suktinggi ne pe gato or mó yo mo nde. Sane Yefun Allah bi Gan ki Yefun Allah dakai bi sukdu-i ne rer wa men jam sor.

Ibrani 2:11

Yefun Yesus gato tot sukibit gato men yetu ben ne or wé kadit men, An si men yé gato onyar kwo ne sino bi Ai dik sor. Sane anato Yefun Yesus nut mo men do, men tepsu An bi nji, An bi nyanggon, An yo damen wa men nde.

Yohanes 10:17

Ji bi Ji nggwa kwop wa Ji bi suksi ne, orete bere Ji mbau satu anato Ji bi Ai bi sukjimnut sye kas subot Ji.

Suk Gato Yerasul Ben Ne 4:26

Yepasye yeraja mo bur ré sisu yekwesu bok ne sino sum wa gu men bi Yekwesu. Án sum wa gu men bi Yekwesu gato Yefun Allah syogat ma mo bur ré wa nai men yetu kadit sukye ete jowa men.’

Ibrani 2:9

Sarewo men me do, Yefun Yesus sa, jom suk mwa ne sino it. Yefun Allah is Yefun Yesus gum-i ga wokgan mo bur kadit malaikat gum-i ne bergan sor re, subere Yefun Allah bi sukjimnut sye dakai kas subot men yetu anato An syogat Yefun Yesus ma ku sukye ete kwop wa men yetu sino. Sane su ré Yefun Allah bes An gum kok tepsu Yekwesu, ete yé mwa un Yefun Yesus or re.