Ibrani 1:6 - Abun Scripture

⁶ Sarewo Yefun Allah syogat An bi Gan gato gum kok wai o re ma mo bur ré sa, Yefun Allah ki do, ”Ji bi malaikat mwa ne sino som Pa ne et!”

Ibrani 1:6 Referans Kwoze

Kolose 1:18

Men sino gato onyar kem mo Yefun Yesus mo nu ari mwa ne anato tepsu Kristus kaim ne. Kristus anato tepsu su mo men kaim ne. Sane Kristus anato tepsu i-ke wa men yé gato onyar kem mo An re. An anato tepsu Pa doketke gato Yefun Allah sun kadit sukkwop, subere An wadigan sor ete gum kok wai kadit suk mwa neya.

Kolose 1:15

Men yo me Yefun Allah su men gro nde, sarewo Kristus gato men ku ne, An tepsu Yefun Allah dakai. Kristus ré, An gum kok wai kadit suk mwa gato Yefun Allah ut ne sino, sane anato ye kendo An gum do, Yefun Allah bi Pa doketke.

1 Petrus 3:22

Yesus Kristus sun ete it mu mo gu re. Motu An kem tak Yefun Allah de syim ge, An si Yefun Allah jom suk mwa neya o re. An nggi wai kadit malaikat mwa ne sino e, yerom e, aboksye si suk mwa gato i-mok nggi mone sino o re.

Yohanes 1:14

Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

Wahyu 1:5

Yesus Kristus gato jam Yefun Allah sisu ndo, An ki bi sukdu-i subot Yefun Allah ri-roi petok sor. Yesus Kristus anato ye doketke gato Yefun Allah sun kadit sukkwop. Yesus Kristus anato jowa yeraja mwa ne sino mo bur ré. Yesus Kristus ete mewa nin. Yesus Kristus ete uttok nin petok sor. Yesus Kristus anato bi sukjimnut sye kas subot men ndo nde petok sor. Yesus Kristus anato kwop, An dé sye wa tot men bi suktot mo sukibit gato men ben ne wé.

Roma 8:29

Yefun ben An bi suk-i ndo su men, we men tepsu yé gato Yefun Allah jam suga nyim tuya do, bere men onyar kem mo An ne, sane Yefun Allah fro men subere An nai men tepsu An bi rus-i suga nyim ne it. An fro men subere men ben men bi suk-i ne tepsu An bi Pa, Yesus Kristus. Sane bere Yesus Kristus tepsu pa doketke mo Yefun Allah bi pá mwa ne sino.

1 Yohanes 4:9

Yefun Allah bi sukjimnut sye kas subot men yetu, An kadum nai men sare do, An syogat An bi Gan ka dik ne ma mo bur ré, subere men yetu ku os wa men kem ndo.

Yohanes 1:18

Yetu yo ku Yefun Allah yo mo nde, wo Yefun Allah dakai bi Gan ge dik ne sor ete sisu Yefun Allah. Yesus Kristus si An bi Ai ben suk tepsu dik. Yesus Kristus anato kadum An bi Ai nai men yetu jam re.

Ibrani 10:5

Sane anato Kristus ma mo bur ré sa, An ki nai Yefun Allah sare do, ”Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé syo suksom bok yo daret nai Nan wa yé som Nan su nde, wo Nan dakai fro Ji kaim tepsu suktot ne o re.

Yohanes 3:16

Yefun Allah bi sukjimnut sye kas subot men yetu mo bur ré ndo nde anato An syo An bi Gan ge dik ne ma. An bi Gan ne ma wa kwop win men mo sukibit gato men ben ne, subere ye to onyar kem mo An bi Gan yo, bere ye ne yo ges mo bot gesyos nde, wo ye ne si Yefun Allah kem ndo to kapyo mato kapyo.

Ibrani 1:5

we, Yefun Allah ki sukdu ré nai malaikat dik yo dom nde, wo An ki nai An bi Gan sor re, sare do, ”Nan anato Ji bi Gan. Su kam ré it, Ji anato tepsu Nan bi Ai it.” Sane dom, Yefun Allah ki sukdu ré subot malaikat dik yo mo nde, wo An ki subot An bi Gan sor re, sare do, ”Ji anato Pa ne bi Ai, Pa ne anato tepsu Ji bi Pa-i,” Yefun Allah yo ki sukdu kwa we ne subot malaikat yo mo nde.

Matius 24:14

Bere ye ki sukdu subot os ndo gato Yefun Allah fro wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Sukdu gato ndo ne, bere yé ki frek subot yewis mwa mo bur ré or sino, eteyo bere bur ré kru it anane.”