Ibrani 1:3 - Abun Scripture

³ Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.

Ibrani 1:3 Referans Kwoze

Wahyu 4:11

”Men bi Yekwesu ne e, Yefun gato jom men ne e, Nan sa, tep wa men bes Nan gum kok ne o, Men bes Nan gum sye ne o. Men bi Yekwesu ne e, Yefun gato jom men ne e, Nan sa, tep wa men un Nan gum ne o, Nan sa, tep wa ku suktinggi ne o. Men bes Nan gum kok a we, Men un Nan gum a we, Nan ut suk mwa ne sino o, Nan bi mas mo suk mwa ne sino o.”

Yohanes 1:14

Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

2 Korintus 4:4

Yé gato jam nde Yefun yo, bere án yo but sukdu ne ri nde, we biris bi yekwesu gato bes nggwa kok ete werwa jom yetu mo bur ré ne rai yé ne bi sukjimnut-i ne krat mo ndendu bi suk-i re. Sukdu subot os ndo gato Yesus Kristus kak wa men yetu ne bi suktinggi bor mo bur ré tepsu sukru sye wa men, Kristus kadum Yefun Allah rer wa men jam, sarewo biris bi yekwesu ben suk yawa yé gato jam nde Yefun ne anato yé ne yo jambot sukdu ne nde.

Ibrani 12:2

Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.

Yohanes 1:4

Sukdu ne ben suk mwa ne sino mbau. Yetu mbau mo An, anato rer ku nje mo bur ré.

Ibrani 10:12

Suge bok neya dé gato sye yo ós men nde, wo Kristus dakai bi nggwa kwop tepsu suktot wa men sa, tep mó re, sane bere Yefun Allah yo maskwa men o nde, An yo nutbot sukibit gato men ben ne o nde. Kristus bi nggwa ne wam dik sor re, tep wa kapyo mato kapyo. Kristus bi nggwa kwop or wé, ete An kem tak Yefun Allah de syim ge, An si Yefun Allah jom suk mwa neya mo gu ne it.

Yudas 1:25

Yefun wadigan anato gum kok sisu sangge sor. An anato fro os ndo wa men subere men kem ndo to kapyo mato kapyo. An syogat men bi Yekwesu Yesus Kristus ma kak os ne subere men si An kem ndo. An anato gum kok wai o re. An anato gum sye wai o re. An sa, bi suktinggi gato sye wai. An sor anato gum kok wai kadit yekwesu mwa ne sino kadit ketke sor, su ré, to kapyo mato kapyo. Sangge.

Ibrani 9:26

Ben sato Kristus gwat An dé-i sok mo gu ne gat, tahun dik wam dik tepsu yekwesu gwat suge dé-i ne yo, sane tepsu An bi nggwa wa ku sukye tahun dik wam dik petok sor wa men kadit ketke Yefun Allah ut bur ré, sane sor kom mo pe gato or mó. Kristus yo gwat An dé-i sok mo gu gat sane nde, wo An sok mone wam dik sor re, tep wa men yetu mwa ne sino. Su kam gato karowa bur ré kru it yo, An sok mone, An bi An nggwa, An kwop wa men yetu subere An tot sukibit gato men yetu ben ne or wé.

1 Yohanes 1:7

Sarewo men ben men bi suk-i ne ndo, men ben suk tepsu ye gato kem mo pe gato rer, mo Yefun Allah bi de-i yo, men sino kem ndo su yu tepsu yedik mo Yefun bi rus-i it anane. Yefun Yesus kwop wa sukibit gato men ben ne, ben sato Yefun Allah bi Gan dé mus men bi siri or wé kadit men re.

Ibrani 4:14

Men bi Yekwesu gato gum kok wai mo Yefun Allah bi nu, An sa, mu kom mo Yefun Allah dakai gwem mo gu, An ki suk wa men mone. Men bi yegweswai ne gum do, Yesus, Yefun Allah bi Gan. Men ki do, men onyar kem mo An, sane men jom An bi sukdu-i gato men onyar kem mone krat et.

1 Yohanes 3:5

Sarewo sukibit mwa gato men ben ne, Yesus Kristus ma mo bur ré wa tot wé kadit men re, nin dakai jam re. Sane dom, nin jam do, Kristus dakai yo ben sukibit yo mo nde.

2 Petrus 1:16

Yesus Kristus kem mo bur ré sa, men dakai me An bi suktinggi ne bor su men gro re. Men bi Yekwesu gato men me su men gro ré, men ki sukdu subot An nai nin jam mó re. Sane sukdu gato men ki ré ma kadit sukdu suski gato yetu ki wa kidar nje nde, wo men dakai me Yefun Allah bes Yesus Kristus gum kok wai o re, men me su men gro, orete men waii ki subot sukdu ne nai nin jam re.

1 Petrus 3:22

Yesus Kristus sun ete it mu mo gu re. Motu An kem tak Yefun Allah de syim ge, An si Yefun Allah jom suk mwa neya o re. An nggi wai kadit malaikat mwa ne sino e, yerom e, aboksye si suk mwa gato i-mok nggi mone sino o re.

1 Petrus 1:21

Sane Kristus ma ete kak os wa men yetu anato nin onyar kem pe mo Yefun Allah it. Yefun Allah sun Kristus kadit sukkwop ete bes An gum kok sye wai kadit ye yi neya o re. Sane anato nin onyar kem pe mo Yefun Allah, ete nin kwabom kam mo An mone dom.

Ibrani 8:1

Sukdu subot men bi Yekwesu gato men ki ne, i-ke mó, sare do, men bi Yekwesu gato gum kok wai ne mó re. An kem tak Yefun Allah de syim ge mo gu, An si Yefun Allah gato sye wai mo gu ne jom suk mwa neya sino re.

Markus 16:19

Yefun Yesus ki An bi sukdu nai An bi pakon, or Yefun Yesus it mu mo gu, ete Yefun Yesus kem tak Yefun Allah de syim ge subere Yefun Yesus si Yefun Allah, An we jowa suk mwa ne sino.

Wahyu 3:21

Yé gato nggi wai kadit bur ré bi suk-i yo, bere Ji bes án gum kok. Bere án gum kok tep wa án si Ji tepsu yekwesu. Bere Ji ki nai yé ne do, ”Nin ma, nin sisu Ji kem kok mo Ji bi nat ré, men anato gum Yekwesu sino.” Ji anato nggi wai kadit bur ré bi suk-i, anato Ji si Ji bi Ai kem kok mo An bi nat-i re.

Ibrani 7:27

An yo ben bi suk-i tepsu yekwesu gato gum kok wai mo Yefun Allah bi nu dogato nyim neya nde, An bi An nggwa wam dik wa tot sukibit gato men yetu ben ne sor re. Sarewo suga nyim tuya, kamdik-kamdik yekwesu mo Yefun Allah bi nu ne gu suge, suge ne dé sye wa tot sukibit gato án dakai ben ne mu nai Yefun Allah ne or wé, ete án waii gu suge yo o wa tot sukibit gato ye Israel yi neya ben ne o. Yekwesu ne ben suk sane gat sor. Sarewo Yefun Yesus dakai bi An nggwa, An kwop, An dé sye tepsu suktot wa tot sukibit gato men yetu mwa ne sino ben ne mu nai Yefun Allah wam dik sor re, tep wa kapyo mato kapyo.

Suk Gato Yerasul Ben Ne 2:33

Yefun Allah bes Yefun Yesus kem tak Yefun Allah de syim ge. Yefun Yesus si Yefun Allah jom suk mwa neya tepsu Yekwesu sino mone. Yefun Allah syo An Gen bok nggwa mo Yefun Yesus tepsu Yefun Allah tom ne. Sane, Yefun Yesus waii syo Yefun Allah Gen bok nggwa mo men, anato men ki suk su a mwa neya ré, nin dakai jam ete nin me su nin gro re. Yefun Yesus sa, An it su An kaim mu mo gu tepsu Yekwesu,

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Kolose 3:1

Yefun Allah sun Kristus kadit sukkwop, sane dom, ben sato nin si Kristus sun mone sino. Sane nin bi sukjimnut sye mo suk gato ndo mo gu nim ne sor. Mone Kristus kem tak Yefun Allah de syim ge. An si Yefun Allah jom suk mwa ne sino.

Roma 8:34

Ye yo ku os wa ki men gum ibit ne mó e? Yo mo nde, we Yesus Kristus gato kwop wa men ete mbau satu o, Yesus Kristus ne kem tak Yefun Allah de syim ge, anato Kristus gwa yawa men gum mo sukdu gato ye kiket men daret re.

Suk Gato Yerasul Ben Ne 7:56

Sane Stefanus ki do, ”Nin me suk gato ji me ré et. Ji me gu kak, ete ji me Yesus gato ye kendo do Yetu bi Pa, An ti tak Yefun Allah de syim ge, An bi suktinggi tepsu Yefun Allah mone.”

Roma 1:16

Ji mit kem pe mo sukdu subot os ndo gato Yesus Kristus kak ne, ji yo damen wa nde, we Yefun Allah bi suktinggi bor mone anato yé mwa gato onyar kem mo Yesus Kristus ne sino, ku os wa án titi fro wé kadit bot gesyos, ete kem ndo to kapyo mato kapyo. Yefun Yesus kak os ne wa ye Yahudi sor nde, wo Yefun Yesus kak os ne wa yewis yi neya dom re.

Ibrani 9:16

Sato yetu ge dik yo, an kwop nde tó, an duno pa dik yo su an bi sukrok do, ri ma an do kwop it yo, bere pa ne wat an bi sukrok subot yé gato an tom su ne tepsu sukdu gato an ki ne. Sane yé jam do, an kwop it yo, sukdu ne kem su nje wa yé benbot it anane.

Matius 22:24

”Yeguru, Musa ki do, ye gato yo ku pa nde do kwop it yo, bere an bi nji waii kra su nggonna ne subere ku pa win an bi nji gato kwop ne.

Titus 2:14

Yesus Kristus bi An nggwa wa tot suktot mo sukibit mwa ne sino gato men ben ne wé, subere men tepsu nje gato ben sukibit o nde, ete men sok mo An dakai bi rus-i gato mit iwa ben suk gato ndo sor.

Ibrani 1:13

Yefun Allah yo ki sukdu tepsu sukdu ré nai malaikat ge dik yo dom nde, wo Yefun ki sukdu ré nai An bi Gan sor re, sare do, ”Nan kem tak Ji de syim ge, Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.”

2 Petrus 1:17

Su kam gato men bi Ai, Yefun Allah un Yesus Kristus ete bes An gum kok wai o re, men tiwa nden dom. Men jam Yefun Allah gato gum kok wai ne, ki sukdu kadit gu nai Yesus Kristus do, ”Ji bi Gan gato Ji jimnotku anare. Suk gato An ben ne Ji mit iwa.”