Ibrani 1:14 - Abun Scripture

¹⁴ Yefun yo ki sukdu bok ne subot malaikat nde, sane malaikat ne te suma gei ne? Malaikat ne anato suk gato da kridek yo mo nde, wo malaikat da gesyos sor ete mó. Yefun Allah yo bes malaikat tepsu An bi Gan gato Yekwesu si Yefun sino nde, wo Yefun syogat malaikat mu ós nje gato bere kem ndo to kapyo mato kapyo mo Yefun Allah bi nat-i ne sor re.

Ibrani 1:14 Referans Kwoze

Matius 18:10

”Sane nin mewa nin nggwa subere nin gwat os ibit wa pa wokgan sato ré nde, we Ji ki sare do, malaikat gato mewa pa ré mu ku Yefun Allah mo gu petok sor. [

Suk Gato Yerasul Ben Ne 27:23

Noru gado, Yefun Allah gato jom ji ne, Yefun Allah gato ji gum kwerut wa ne, An bi malaikat ge dik yo ma ti mo ji de.

Suk Gato Yerasul Ben Ne 5:19

sarewo noru miten, ete Yefun bi malaikat ge dik yo kak penjara bi nusyo. Malaikat ne gwat yerasul ma nden, orete malaikat ki nai yerasul bok ne do,

Suk Gato Yerasul Ben Ne 12:7

Petrus sem mit sa, an gensu Yefun Allah bi malaikat ge dik yo ma. Malaikat ne ben nu mit ne rer. Malaikat ne syimtok Petrus, malaikat ne sun Petrus, or malaikat ki do, ”Nan sun kekro!” Sugane rantai ne sombok wé kadit Petrus syim.

Lukas 1:19

Malaikat ne ki nai Zakaria do, ”Ji gum do Gabriel, ji kem mo Yefun Allah gwem. Yefun Allah anato syogat ji gwat suktaru gato ndo ne wa nan.

Matius 1:20

Yusuf nutbot os yo wa an sombok Maria wé sa, an semda ku Yefun bi malaikat ge dik yo. Malaikat ne ki nai an do, ”Yusuf, nan bi amui mo Daud, nan nyu nde, nan kra su Maria sor, we Pa gato Maria syimfar su ne anato ma kadit Yefun Allah Gen.

Lukas 16:22

Kom mo rut sa, Lazarus kwop re, ete malaikat ma kar an da gesyos mu mo pe gato Abraham kem mone, an we kem mo pe gato ndo ne. Sane yepasye ne waii kwop o, ete yé bi an mo bur.

Suk Gato Yerasul Ben Ne 12:23

Herodes iwa yé un an tepsu an yefun ge dik yo, sarewo Herodes yo bes Yefun Allah gum kok mone nde, sane, sugane it, Yefun Allah syogat malaikat dik yo ben Herodes i. Orge syumbar mwa git Herodes ku, ete ri ma an kwop re.

Lukas 2:9

Su noru ne, án gensu malaikat dik yo ma ku án. Malaikat ne ma sa, tepsu sukru sye gato rer-rik kadit Yefun Allah rer ku bur. Sane yé bok ne sino nyu ndo nde.

Lukas 2:13

Ye gato mewa domba ne gensu malaikat yaino ma ti su malaikat ne. Malaikat mwa ne un Yefun Allah, án ki do,

Matius 2:13

Yepasye gato watbot bí ne mu wé, orete Yusuf semda ku Yefun bi malaikat dik yo. Malaikat ne ki do, ”Bere Herodes meret Pa wa an gu Pa ne kwop wé, sane nan sun, nan gwat Pa si bi im titi mu mo bur Mesir kadit. Nin sino kem mone sane sor ji ki sukdu nai nan o et.”

Titus 3:7

Yefun Yesus dakai ben sukndo su men yi, men yo ben suk yo nyim wa An nde, anato An yo ben sukye nai men tepsu sukibit gato men ben ne nde, wo An ki do, men sa, tep wa sok mo Yefun Allah bi rus-i. Sane anato suk gato men bi sukjimnut kem pe mone do, bere men kem ndo to kapyo mato kapyo ne yo, men jam men ku it.

Wahyu 5:6

Orete ji sokme Domba Gan ge dik yo ti mo yekwesu bi kursi mwa ne miten. Yefun bi pakwerut ge at mo gu gato ka sato suge at si yenggras ge musyu we sop at ne ti wairi wa Domba Gan ne si kursi ne. Domba Gan ka sato suge gato ye gu kwop wa som Yefun su ne. Domba Gan suti mufit mó, An gro gan mufit mó. An gro gan tepsu Yefun Allah Gen mufit gato Yefun Allah syogat mubot bur ré iwedewe.

1 Petrus 1:12

Sukdu subot os ndo gato Yefun Allah tarubot yenabi ne, Yefun Allah tarubot yenabi wa ós yenabi dakai nde, wo yenabi ki subot suktaru ne subere ós nin. Suktaru gato yenabi ki nyim ne kom mo nin sare do, Yefun Allah syo An Gen ma kadit gu bok nggwa mo yetu ge bok yo anato yé bok ne nggiwa ki sukdu subot os ndo gato Yesus Kristus kak ne nai nin jam re. Sukdu subot os ndo gato yé bok ne kibot ne, malaikat dom iwa jam.

Matius 25:34

Sugane Ji, gato Yekwesu mone bere Ji ki nai nje gato tak Ji de syim ge do, ’Nin ma, nin yé gato Ji bi Ai ben sukndo su. Nin ma nin nai suk gato Yefun Allah fro wa nin ne. Yefun fro nat wa nin si An gum yekwesu mone sino, An fro nat ne ndek kadit kam gato An ut bur ré re.

Yudas 1:14

Henokh kibot yé bok gane kadit nyim tuya wé re. Henokh anato Adam bi dat. Adam ku bi pa-i, or o bi pa-i ne ku bi pa-i sor kom mo wam mumat anato pe Henokh re. Henokh ki do, ”Bere men bi Yekwesu si malaikat mwa ndo nde gato ben Yefun bi suk-i ne ma. Malaikat ne, men yo ne ndo nde, mwa teker ware. Yefun si malaikat mwa ne ma

1 Petrus 1:4

bere men ku sukndo mwa gato An fro wa An syo nai An bi rus-i ne. Suk mwa gane Yefun Allah grem kem mo gu wa men. Mo gu ne suk mwa ne yo mbras nde, yo ibit nde, yo dum nde.

Ibrani 6:17

Sane dom, Yefun Allah iwa ki rer nai yé gato bere ku suk gato An tom ne, subere yé mwa ne jam do, suk gato Yefun Allah tom kwop mone it, bere Yefun yo brek kadit sukdu ne wokgan yo dom nde. Sane anato Yefun Allah ki suk gato An tom ne sa, An syo An syim su, An ki tok An dakai gum, subere yé jam do, sangge, bere Yefun yo brek kadit suk gato An tom ne nde, wo bere An benbot sor.

2 Tesalonika 1:7

Sane su kam gato men bi Yekwesu Yefun Yesus si malaikat gato nggi is ma kadit gu kadum nggwa nai men yetu, sugane Yefun nai nin si men sino wé kadit sukye gato yé gane ben nai men ne.

Filipi 2:25

Sarewo ji nut do, ndo sa, ji syokom Epafroditus satu ba ku nin. Epafroditus ré, an tepsu ji bi yesyim, ji si an ben suk wa Yefun Yesus sino. Men ka we tepsu Yesus Kristus bi yesukmise gato ben An bi suk-i. Nin dakai syokom Epafroditus ma ku ji more wa ós ji mo suk gato ji yéwa,

2 Korintus 9:12

we sugum gato nin syo ne, yo ós Yefun Allah bi rus-i gato yewa suk sor nde, wo bere ben yé mwa neya un Yefun Allah gum mo sukndo gato nin ben ne. Bere yé mwa ne un Yefun wokgan dom nde, wo mwa ndo nde.

Roma 15:27

Án iwa sum sugum wa yé mwa ne. Suk ne ndo wa án ben dom re, we ye Yahudi ne kak os wa Yefun Allah ós yewis yi kem ndo to kapyo mato kapyo. Sa ndo sa, yewis yi ne waii kak os wa ye Yahudi ku suk gato án yewa mo bur ré dom.

Roma 15:16

Ji anato tepsu Yesus Kristus bi pakwerut gato An syogat mu ki subot An bi sukdu nai yewis yi neya. Ji ben suk tepsu yegweswai gato gwat Yefun Allah bi sukdu subot os ndo gato Yesus Kristus kak ne mu wa ki nai yewis yi jam. Ji mu ki sukdu ne subere yewis yi ne brek kadit os ibit ete jammo Yefun Allah yo, bere án tepsu suksom gato tep wa yé som Yefun Allah su ne, bere Yefun Allah kak Yefun Allah mit wa án.

Roma 13:6

Yekwesu mo bur ré ben suk tepsu Yefun Allah bi pakwerut. Men bi yekwesu ne fro suk mwa neya wa men tepsu Yefun Allah bi pakwerut, sane anato men syo sugum pajak nai án.

Suk Gato Yerasul Ben Ne 13:2

Ye gato onyar kem mo Yefun Yesus mo kota Antiokhia sum wa som Yefun Allah. Án mewa án nggwa kadit sugit yei subere án ki suk su Yefun. Án ki suk su Yefun saresa, Yefun Allah Gen ki nai án do, ”Nin bes Barnabas si Saulus wa an we ben suk gato Ji iwa an we ben ne et.”

Suk Gato Yerasul Ben Ne 11:22

Ye gato onyar kem mo Yefun Yesus mo Yerusalem ne jam sukdu subot suk gato bor mo kota Antiokhia, sane anato yé syogat Barnabas mu mo kota Antiokhia ne.

Lukas 1:23

Zakaria ben an bi suk mo Yefun Allah bi nu gato an bi yesu syogat an ben ne or sa, an satu mo an bi nu re.

Matius 24:31

Malaikat dik yo fuf trompet ba sye yo, bere Ji syogat Ji bi malaikat mubot bur ré iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne.”

Matius 13:41

Bere Yetu bi Pa syogat An bi malaikat mubot Yefun Allah bi rus-i subere malaikat ne nai yé mwa gato ben ye yi ges mo os ibit si yé mwa ne sino gato ben bi suk-i ibit.

1 Petrus 3:7

Sane dom, nin yebris gato kra ne, nin nutbot nin bi nggon sisu ndo et. Nin bi nggon yo ben bi suk-i nggi saga nin yebris nde. Sane nin nutbot suk gato nin ben su nin bi nggon sisu ndo et. Nin mewa nin bi nggon sisu ndo sor, we Yefun Allah dakai kak os wa nin si nin bi nggon ne sino sok mo An bi rus-i, ete nin sino kem ndo to kapyo mato kapyo. Nin mewa nin bi nggon ne sisu ndo et, subere nin do ki suk su Yefun Allah yo, nin ki suk sisu ndo sor, suk yo yawa suk gato nin ki su Yefun ne nde, wo bere Yefun iwa jam sukdu gato nin ki ne.

Yakobus 2:5

Ji bi nji, ji bi nyanggon gato ji jimnotku, nin jammo suk gato ji krom ré sisu ndo et, Yefun Allah bes ye gato yewa suk mo bur ré subere an bi sukjimnut kem pe mo Yefun nggi wai kadit ye gato bi suk mwa mo bur ré. Sane dom, Yefun nai ye gato yewa suk ne sok mo Yefun Allah bi rus-i tepsu Yefun Allah tom su ye gato bi sukjimnut sye kas subot An ne.

Ibrani 10:11

Suga nyim tuya, kamdik-kamdik ye Yahudi bi yesu gato ben suk mo Yefun Allah bi nu bok ne sino ben suk tepsu yegweswai wa Yefun Allah si ye Yahudi. Yesu ge bok ne gu suge ete dar i-dé, si suk bok yo o tepsu Musa bi sukduno-i. Yesu ben suk sane sane sor, yé gu suge wam dik sor nde, wo yé gu suge deyo-deyo gat petok sor, sarewo suge bok gato yé gu ne yo tep wa tot sukibit gato men yetu ben ne nde, yo karowa wokgan dom nde.

Ibrani 8:6

Sarewo su ré, Yefun Allah bes Yefun Yesus tepsu yegweswai wa men yetu si Yefun Allah. Yefun Yesus ben An bi suk-i tepsu Yekwesu ne ndo wai kadit yekwesu mwa gato nyim neya o re, we os be gato Yefun Yesus gwat ma ne ndo wai kadit os nyim ne. Os be ne ndo wai, we os be ne i-ke mo suk gato Yefun tom su men gato ndo wai kadit suk gato Yefun tom mo os nyim ne o re.

Ibrani 6:12

Men bariwa nin bambrai, wo men mit iwa nin nutbot yé gato onyar kem mo Yefun Allah, yé ne eswa suk gato Yefun Allah tom su án ne sane sor suk ne bor mó re. Nin nutbot yé gane ete nin waii ben nin bi suk-i tepsu án et.

Ibrani 5:9

Sane An ben suk mwa gato Yefun Allah fro wa An ben ne or sa, An kak os wa men yetu gato jammo An muket, subere An nai men wé kadit bot gesyos, subere men kem ndo to kapyo mato kapyo.

Filipi 2:17

Nin onyar kem mo Yefun Allah it. Nin bi nin nggwa mo An, nin samok wa nin ben An bi suk-i. Suk mwa gato nin ben ne anato tepsu suksom gato nin gwat wa som Yefun Allah su ne. Sane ji mit at mo suk mwa gato nin ben ne. Yé bok ji mo sel ré mo gato ji ki subot Kristus. Sarewo yé do gu ji kwop it yo, ji mit at tó, we ji do kwop it yo, ben sato ji waii grem suk yo tó suk mwa gato nin gwat wa som Yefun Allah su ne.

Efesus 3:6

Sukdu gato Yefun Allah Gen ki ne bor it anare. Suga nyim tuya Yefun Allah fro os gato ndo wa yewis ye Yahudi sor re, wo su ré An syogat Yesus Kristus kak os ndo ne wa nin yewis yi gato jammo sukdu ne dom. Sane anato nin si ye Yahudi ne sino ku suk gato ndo kadit Yefun Allah. Nin yewis yi si ye Yahudi ne tepsu yedik mo Yefun Allah bi rus-i, ete suk gato Yefun Allah tom su ye Yahudi ré, An benbot su nin yewis yi ne dom. Suk mwa gato Yefun Allah fro wa ye Yahudi ne, Yesus Kristus anato kak os wa yewis yi ne waii ku dom.

Galatia 3:29

Men do sok mo Yesus Kristus bi rus-i it yo, sane men ré tepsu Abraham bi pá dom, ete men ku os ndo gato Yefun Allah tom su men ne, Yefun nut mo men do, men sa, tep wa sok mo An bi rus-i it.

Galatia 3:9

Sane ye gato onyar kem mo Yefun tepsu Abraham onyar kem mo Yefun ne, bere Yefun ben sukndo su an, tepsu Yefun ben sukndo su Abraham ne.

Galatia 3:7

Sane ye gato onyar kem mo Yefun anato tepsu Abraham bi pa gato sangge, nin jam it bado?

Roma 8:17

Men tepsu Yefun Allah bi pa it yo, bere men ku Yefun Allah bi sukrok gato An fro wa syo nai An bi pa-i. Men si Kristus sino bere ku suk gato Yefun Allah fro wa men, we men ku sukye tepsu Yesus Kristus ku ne. Sane yo, bere men ku suk gato ndo wai ne tepsu Kristus ku suk gato ndo wai mone dom.

Suk Gato Yerasul Ben Ne 16:26

Sugane yé bok mo penjara mit ne gensu bur ram nggi, sui juwai bur sane sor pondasi mo penjara dus re. Nusyo bok gato mo penjara ne kak or re. Sane dom bus gato ye rai yé bok gato mone gwes su ne sombok or re.

Matius 4:11

Kom mo rut, biris bi yekwesu ne mu kadit Yefun Yesus, ete malaikat bok yo ma mewa An.

Markus 10:17

Yefun Yesus do mu o kadit nat ne sa, yetu ge dik yo kas ma. An tu an umsu mo Yefun Yesus gwem, ete an ndo mo Yefun Yesus do, ”Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?”

Roma 11:14

Ji mit iwa ji ós yewis yi sok mo Yefun Allah bi rus-i, subere kak ji dakai bi yewis-i bi sukjimnut sane sor án nut subot sukndo gato yewis yi ku mone. Ji mit iwa án nut subot sukndo gato yewis yi ku ne sane sor án waii mit wa án sok mo Yefun bi rus-i ne dom.

1 Korintus 1:21

Yefun Allah gato bi sukjimnut ne ko wai o re anato fro os subere men jam An sisu ndo. Men jam An kadit men yetu bi sukjimnut mwa gato kru nde, wo men jam An kadit sukdu gato men kibot Yesus Kristus. Sukdu ne, ye yi ki do, men dakai ki daret kaii, sarewo kadit sukdu gato ndaf ne, Yefun Allah fro os wa nai men yé gato onyar kem mo sukdu ne kadit sukye mo bot gesyos, subere men kem ndo to kapyo mato kapyo.

Ibrani 2:3

Sane men misyar suktaru be gato ndo wai ne te, bere men titi fro kadit sukye mo bot gesyos sa u ne? Bere men yo ku os nde go! Ketke Yefun Yesus dakai ma kom mo bur ré sa, An kibot suktaru ne nai nje jam. Or o ye gato jam sukdu gato Yefun Yesus ki ne, yé ne waii ki nai men jam o, ete men jam rer do, sukdu ne sangge it.

Ibrani 9:28

Sane dom, Kristus bi nggwa kwop wam dik wa men yetu mwa ne tepsu suktot wa tot sukibit gato men ben or wé re. Or o, bere Kristus ma wam kedowe o. An ma o yo, An kwop wa tot men bi sukibit ne o nde, wo bere An ma wa nai men yé gato eswa An ma ne, ete An gwat men mu sok mo An bi nat-i.