Filipi 4:9 - Abun Scripture

⁹ Sukduno gato ji duno nin su ne si suk mwa gato nin me ji ben ne, nin benbot suk mwa ne or sino et. Nin do benbot it yo, Yefun Allah gato ós men bi sukjimnut ne not, bere Yefun Allah ne sisu nin petok sor.

Filipi 4:9 Referans Kwoze

Yakobus 1:22

Men syaretwa Yefun Allah bi sukdu sor nde, wo men benbot dom. Men jam Yefun Allah bi sukdu, ete men yo benbot nde, orete men nut do bere Yefun Allah nai men kadit bot gesyos it yo, men kidar men dakai it anane.

Filipi 3:17

Ji bi nji, ji bi nyanggon, nin me suk gato ji ben ne, ete nin sino waii benbot et. Men kadum os gato ndo nai nin mó re. Sane ye gato sibot os ne, nin watbot suk gato ye ne ben, ete nin waii simo os ne dom.

2 Petrus 1:10

Sane, ji bi nji ji bi nyanggon gato onyar kem mo Yefun Yesus, men wergat men nggwa nggi o et, subere suk gato Yefun Allah iwa men ben ne, men ben pe sor. Sane dom, men yé gato Yefun Allah fro suga nyim wa An nai sok mo An bi rus-i, An jam nyim wé re, sane men werwa men ben men bi suk-i tepsu Yefun Allah bi pá-i petok sor. Men ben sane it yo, bere men yo mu brek kadit Yefun Allah bi os-i nde.

Yohanes 13:17

Nin jam suk mwa ne sino gato Ji duno nin su ne it. Nin do benbot yo, bere nin mit at wa.

Filipi 4:7

Sane bere sukjimnut ndo kadit Yefun Allah ben nin bi sukjimnut not satu. Suk gato Yefun Allah ben su men yetu ne, men yo jam kom mo mit nde. Nin si Yesus Kristus tepsu dik it, sane bere sukjimnut ndo kadit Yefun mewa nin mit si nin onyar subere nin bi sukjimnut waiyu o nde.

Roma 16:20

Yefun Allah gato ós men kem ndo su yu, bere Yefun Allah ne anato ben biris bi yekwesu, sane sor yekwesu ibit ne yo ku os o nde. Men bi Yekwesu Yesus Kristus ete mewa nin petok sor.

2 Korintus 13:11

Ji bi nji ji bi nyanggon ji bi sukdu tut more, ndo mo nin sor. Ji bi sukdu kwa gato wari anare: nin werwa nin ben nin bi suk-i mwa ne ndo sino sor. Nin jambot sukduno mwa gato ji krom mo surat ré tepsu suknapa wa nin pe et. Nin sino mone bi sukjimnut dik tepsu yu et. Nin kem ndo su yu sor. Nin ben suk bok gare sane bere Yefun Allah gato bi sukjimnut sye kas subot men ete uttok men sino ne, bere Yefun sisu nin petok sor.

Lukas 6:46

”Nin ki nai Ji do, ’Yenggras, Nan anato men bi Yekwesu,’ sarewo nin yo benbot suk gato Ji ki ne nde wa suma ne?

Matius 28:20

Nin duno nje ne subere yé ne benbot suk mwa ne sino gato Ji syogat nin ben ne. Nin jammo suk gato Ji ki ré et, nin mu duno nje yo, bere Ji sisu nin petok sor kom mo kapyo mato kapyo.”

Matius 7:21

Mo yé bok ne sino gato kendo án bi Yekwesu mo Ji, ge bok yo bere yo sok mo Yefun Allah bi rus-i nde. Ye gato benbot Ji bi Ai mo gu bi sukdu-i ne sa, bere ye ne sor ete sok mone.

2 Tesalonika 3:4

Men kwabom kam mo Yefun Yesus do, sukduno gato men duno nin su ne, nin benbot su ré, ete bere nin benbot su kam sari ne ma petok sor.

1 Tesalonika 1:6

Nin me suk gato men ben ne, ete nin waii benbot re. Sane dom nin benbot suk gato men bi Yekwesu Yefun Yesus ben ne. Kapre nin ku sukye ndo nde, nin grem Yefun Allah bi sukdu ne kem pe mo nin mit si nin onyar, nin iwa sor. Yefun Allah Gen ben nin mit iwa An bi sukdu ne.

1 Tesalonika 5:23

Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur ré it yo, ye yo ku os wa ki nin gum ibit mo suk yo mo nde.

Roma 15:33

Yefun Allah gato ós men kem ndo su yu ete sisu nin sino. Sangge.

Yohanes 2:5

Sarewo Yefun Yesus bi im ki nai nje gato fro suk mone do, ”Suk gato An ki nai nin, nin benbot sor.”

Lukas 8:21

Sarewo Yefun Yesus ki nai yé mwa mone do, ”Ye to jammo Yefun Allah bi sukdu ete benbot sukdu ne yo, ye ne anato tepsu Ji bi im e, Ji bi nji si Ji bi nyanggon e ne.”

1 Tesalonika 2:14

Sane men bi nji, men bi nyanggon, nin dakai bi yewis-i deyo ben sukye nai nin mo gato nin onyar kem mo Yesus Kristus tepsu Yefun bi rus-i mo bur Yudea ku sukye dom. Nin ku sukye tepsu ye Yahudi deyo ben sukye nai án dakai bi yewis-i gato onyar kem mo Yesus Kristus mo bur Yudea ne.

1 Korintus 10:31

Sane ji bi sukdu-i sare, nin git sugit e, nin da syur e, suk mwa gato nin ben ne sino yo, nin ben wa nin bes Yefun Allah gum kok sor.

Suk Gato Yerasul Ben Ne 9:6

Nan ben suk sane o nde, wo ré yo, nan sun nan mu mo kota Damsyik et. Mone yetu ge dik yo bere ki rer nai nan subot suk gato bere Ji syaugat nan ben ne.”

2 Timotius 4:22

Yefun ete sisu nan sor. Yefun ete mewa nin sino mone sor.

1 Korintus 14:33

we, Yefun Allah bariwa yé mwa ne ki suk mo yu sor men nalar mo koirut, wo Yefun Allah iwa men jammo yu subere suk mwa kas sisu ndo. Sane dom, tepsu men yé gato onyar kem mo Yefun Yesus mo pe bok ne sino ben ne, men sum sino wa ben ari yo, nggon not sor. Nggon ki suk mo yu mo nu ari nde, wo nggon kem not ete jammo bi ya sor, tepsu sukdu gato Musa krom ne.

Yohanes 15:14

Nin benbot suk gato Ji syogat nin ben ne yo, nin tepsu Ji bi yesyim anane.

1 Yohanes 3:22

Men do benbot An bi sukduno, ete men ben suk gato An iwa men ben ne yo, bere An syo suk gato men ndek mo An ne nai men sor.

Matius 1:23

”Nggonnak ge dik yo gato sem su yebris mo nde, bere syimfar, orete nggon ne kem su pa yebris. Pa ne bere ye kendo gum do, Imanuel.” (Imanuel bi sukjimnut do, ”Yefun Allah sisu men kem sino.”)

1 Korintus 4:16

Sane ji kiwa nin ben nin bi suk-i tepsu os gato ji kadum wa nin ne sor.