Filipi 4:7 - Abun Scripture

⁷ Sane bere sukjimnut ndo kadit Yefun Allah ben nin bi sukjimnut not satu. Suk gato Yefun Allah ben su men yetu ne, men yo jam kom mo mit nde. Nin si Yesus Kristus tepsu dik it, sane bere sukjimnut ndo kadit Yefun mewa nin mit si nin onyar subere nin bi sukjimnut waiyu o nde.

Filipi 4:7 Referans Kwoze

Yohanes 14:27

Ji syo suktinggi nai nin subere nin kwabom dek nde, wo nin kem ndo tepsu Ji dakai ré. Ji syo suktinggi nai nin wa nin kem ndo. Ji yo syosuktinggi ne tepsu yetu mo bur ré nde. Sane nin nutbot suk mwa teker nde, nin nyu nde.

2 Tesalonika 3:16

Men bi Yekwesu gato ós men kem ndo su yu, An dakai ete ben nin kem ndo su yu mo suk mwa ne sino petok sor. Yefun ete sisu nin sino sor.

Kolose 3:15

Kristus nai nin sok mo An bi rus-i subere nin kem ndo su yu. Sane mo suk mwa gato nin nai sukjimnut wa nin ben ne, sukjimnut ndo kadit Kristus ben nin bi sukjimnut not mo suk ne yo, nin ben sor, ete nin ki ndo mo An.

Galatia 5:22

Sarewo men nai sukjimnut dik do, suk gato Yefun Allah Gen kiwa men ben ne yo, bere men ben suk sato ré: Men bi sukjimnut sye kas subot ye yi e; men mit at wa suk gato ndo petok sor e; men si ye yi neya mit ndo su yu e; men yo maskwa kekro nde e; men jimnotku ye gato ku sukye e; men ben sukndo su nje e; suk gato men tom ne men benbot e;

Roma 15:13

Sane Yefun Allah fro os wa nin anato nin kwabom kam mo An. Sane Yefun Allah ete ben nin mit at mo suk mwa gato An ben ne. Yefun Allah ete ben nin kem ndo su yé mwa neya sino, we nin onyar kem mo Kristus. Yefun Allah Gen bi suktinggi ete ben nin kwabom kam mo Yefun Allah krat wai kadit nyim ne o re.

Yohanes 16:33

Ji ki sukdu mwa ne nai nin jam subere nin kwabom kam mo Ji, ete nin kem not, nin nyuwa suk yo nde. Mo bur ré nin ku sukye mwa. Sarewo Nin nyuwa nde, we Ji sa, Ji nggi wai kadit biris bi rus-i gato ben sukibit mo bur ré re.”

Roma 8:6

Men bi sukjimnut-i kem pe mo sukjimnut ibit ne yo, bere gwat sukkwop wa men. Sarewo men bi sukjimnut-i ne kem pe mo Yefun Allah Gen ne yo, bere Yefun Allah Gen jom men, sane men kem not, ete men si Yefun Allah kem ndo su yu.

Roma 5:1

Sane su ré Yefun Allah ki do, men sa, tep wa men gum sok mo An bi rus-i, we men onyar kem mo Yesus Kristus it. Sane anato men yo ku sukmaskwa kadit Yefun Allah o nde, wo men si Yefun Allah kem ndo su yu sor. Men bi Yekwesu Yesus Kristus anato kak os ne wa men re.

Efesus 3:19

Men yetu sor re, bere men yo jam sukjimnut ne kom mo mit nde. Sane ji ki suk su Yefun Allah wa nin subere nin jam Yesus Kristus bi sukjimnut sye gato kas subot nin kom mo mit kai, subere An bi sukjimnut ne kem pe mo nin, subere nin tepsu Yefun Allah o re, kwa wokgan yo siri kadit dom nde.

Roma 14:17

Yefun Allah tepsu men bi Yekwesu, sane it yo, men nutbot syur gato men da teker o nde, men nutbot sugit gato men git e ne teker o nde, wo men bi sukjimnut sye mo suk gato Yefun Allah Gen ben men nggiwa ben sato ré: men nggiwa ben suk gato Yefun Allah iwa men ben ne e, men ku os wa men si Yefun Allah kem ndo su yu e, men mit at wa Yefun Allah bi suk-i e ne.

Wahyu 1:4

Ji, gato gum do Yohanes, ji krom sukdu ré wa nin, yé gato onyar kem mo Yefun Yesus mo nu ari mufit mo bur Asia. Yefun Allah gato su ré mó, kadit ketke mó, si kam sari ne ma bere mó tó ne, Yefun Allah ete mewa nin. Yefun Allah ete uttok nin petok sor. Yefun Allah Gen ka mufit gato kem mo Yefun Allah bi kursi tak de gwem, Yefun Allah Gen ete mewa nin, Yefun Allah Gen ete uttok nin petok sor.

Lukas 1:79

Ye gato ma ne tepsu sukru sye, An ben pe gato rer ku yé gato kem mo ndendu. Yé gato kem mo ndendu ne ben sato kwop, we án jam nde Yefun, wo Ye gato ma ne tepsu sukru sye gato kadum os gato ndo wa men subere men si Yefun Allah kem ndo su yu.”

2 Korintus 13:11

Ji bi nji ji bi nyanggon ji bi sukdu tut more, ndo mo nin sor. Ji bi sukdu kwa gato wari anare: nin werwa nin ben nin bi suk-i mwa ne ndo sino sor. Nin jambot sukduno mwa gato ji krom mo surat ré tepsu suknapa wa nin pe et. Nin sino mone bi sukjimnut dik tepsu yu et. Nin kem ndo su yu sor. Nin ben suk bok gare sane bere Yefun Allah gato bi sukjimnut sye kas subot men ete uttok men sino ne, bere Yefun sisu nin petok sor.

Lukas 2:14

”Men bes Yefun Allah gato kem mo pe gato kok mo gu ne gum kok sye wai o et. Yefun Allah, Nan ben nje gato Nan dakai jimnotku ne kem not mo bur ré et.”

Filipi 4:9

Sukduno gato ji duno nin su ne si suk mwa gato nin me ji ben ne, nin benbot suk mwa ne or sino et. Nin do benbot it yo, Yefun Allah gato ós men bi sukjimnut ne not, bere Yefun Allah ne sisu nin petok sor.

Roma 1:7

Sane anato ji krom surat ré wa nin yé gato onyar kem mo Yefun Yesus gato kem mo kota Roma ne sino. Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor.

Ibrani 13:20

Yefun Yesus kwop, An dé sye anato An kak os be gato gesyos, os be ne kem su men kadit kam ne sor to kapyo mato kapyo. Sane Yefun Allah sun men bi Yekwesu Yesus Kristus satu kadit sukkwop, ete An bes Yesus Kristus gum kok wai wa mewa men yé gato sibot os be ne. Kristus mewa men tepsu yetu mewa bi suksi sato domba ne sisu ndo.

Wahyu 2:17

Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur ré bi suk-i yo, bere Ji syo sugit gato ye kendo gum do, ’manna’ ne napyo nai án git. Sugit ne yo bor wa yé mwa jam nde, wo tepsu suga nyim tuya Yefun syo manna nai ye Israel wa án kem mo bur ré, bere Ji syo manna nai yé gato nggi wai kadit bur ré bi suk-i subere yé ne nggiwa simo Yefun bi os-i pe sor. Sane dom, bere Ji syo jok kwo dik yo nai án. Mo jok ne ye krom gum be mó, wo yé gato ku jok ne sor ete jam gum gato ye krom mone.”

Yudas 1:1

Ji gato gum do Yudas, gato Yesus Kristus bi pakwerut, gato bi nji mo Yakobus, ji anato krom surat ré wa nin yé gato men bi Ai, Yefun Allah nai sok mo An bi rus-i. Yefun Allah bi sukjimnut sye kas subot nin. Yesus Kristus mewa nin.

Filipi 1:2

Men bi Ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.

2 Korintus 10:5

Sukdu gato ye bes kok e, sukduno gato ye ki e ne duyawa Yefun Allah bi sukjimnut-i ne yo, men syat wé su Yefun bi sukmise-i ne. Men gwat Yefun Allah bi sukmise-i tepsu suktinggi wa men ki Yefun bi sukdu-i nai nje, subere yé ne win bi sukjimnut-i gato nyim ne wé, ete yé ne brek ma ete jammo Kristus et.

Filipi 1:1

Ji gato gum do Paulus, ji si Timotius, men ka we gato Yesus Kristus bi pakwerut anato krom surat ré wa nin. Men ka we krom sukdu ré wa nin yé gato onyar kem mo Yesus Kristus gato sum mo nu ari mo kota Filipi. Men ka we krom surat ré wa nin yé gato gum yekwesú mo nu ari si yé gato ós yekwesú mo nu ari ne sino.

Filipi 4:19

Sane yo, Yefun Allah gato jom ji ne, An sa, bi suk mwa wai o re, yo or mo nde, sane bere An ós nin mo suk mwa gato nin yewa ne.

Filipi 4:21

Ji ki ndo mo nin yé gato onyar kem mo Yesus Kristus mone sino. Nin bi nji, nin bi nyanggon gato onyar kem mo Yesus Kristus gato si ji kem more, án sino ki ndo mo nin dom.