Filipi 4:19 - Abun Scripture

¹⁹ Sane yo, Yefun Allah gato jom ji ne, An sa, bi suk mwa wai o re, yo or mo nde, sane bere An ós nin mo suk mwa gato nin yewa ne.

Filipi 4:19 Referans Kwoze

1 Petrus 5:10

Nin ku sukye mone bergan sor re, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o re. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

1 Timotius 6:17

Nan syaugat ye gato ku suk mwa mo bur ré, subere án yo bes án nggwa kok mone nde. Suk mwa ne bergan mó, or o bergan or kadit men re. Nan duno án subere án kwabom kam mo suk mwa gato án ku mo bur ré dom nde. Suk mwa ne yo ós án kem ndo to kapyo mato kapyo nde. Nan duno án subere án kwabom kam mo Yefun Allah gato syo suk mwa ne sino gato men mitmo, Yefun Allah syo suk mwa ne wai o re, subere men ben suk tepsu pe gato men imo.

Kolose 1:27

Yefun Allah iwa An bi rus-i gato ma kadit yewis yi neya jam sukdu gato ndo ré, gato nyim tuya An gurik ne. Yefun Allah iwa yetu mwa ne sino jam An bi sukdu ré gato bi sukjimnut kru ete ndo wai ne. Sukdu gato suga nyim An gurik ne anato sukdu subot Yesus Kristus gato ma ete si nin tepsu yedik sino. Men kwabom kam mo Yesus Kristus gato kak os ndo wa men kem mo Yefun Allah bi nat-i gato ndo wai o re.

Efesus 3:16

Ji ndek mo Yefun Allah gato gum kok wai subere An syo An Gen ma ben nin bi sukjimnut mo nin mit nggi o et,

Kolose 3:16

Kristus bi sukduno-i gato ndo wai ne, nin nai ma nin grem pe mo nin mit si nin onyar et. Nin grem Kristus bi sukduno-i ne pe mo nin mit or wé ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos, ete nin mit at wa Yefun Allah dom et.

Roma 8:18

Ji dakai nut do, men kem mo bur ré, men ku sukye, sarewo sukye gato men ku ré yo sye teker eta nde, wo su kam sari ne ma men ku suk gato ndo mwa wai kadit sukye gato men ku mo bur ré o re. Sukye gato men ku mo bur ré wokgan yi, wo bere sukndo gato men ku mo gu mwa wai kadit ne o re.

Efesus 1:7

Yefun Allah syo An bi Gan, Yesus Kristus ne ma kwop. Yefun Yesus dé sye wa men, An bi An nggwa wa tot suktot mo sukibit gato men ben ne wé. Sane anato Yefun Allah yo maskwa ket men mo sukibit ne o nde, An yo nutbot o nde. Sane men me mone do, Yefun Allah bi sukjimnut sye kas subot men ndo nde, men yo ben suk yo nyim wa An nde, wo

2 Korintus 4:17

Sukye wokgan gato men ku su ré, su kam sari ne ma bere kak os wa gwat men mu kem mo pe gato gesyos gato ndo wai o re. Sane men kem mo bur ré yo, men nut do, sukye gato men ku ne, suk yo nde, we bere men kem gesyos mone tó.

Roma 9:23

Yefun Allah iwa kadum suk gato ndo yé, An iwa kadum nai men yé gato An dakai jimnotku. Yefun Allah fro men wa men ku suk gato ndo yé ne, An fro men suga nyim ne wé re.

Efesus 3:8

Kadit yé mwa gato sok mo Yefun Allah bi rus-i ne sino, ji ré anato gum wok teker mu bur, sarewo Yefun Allah dakai bes ji wa ji mu ki sukdu subot os ndo ne. Ji mu frot sukdu subot Kristus gato ndo wai o re nai yewis yi jam.

Efesus 1:18

Ji ki suk su Yefun, ji ndek mo Yefun Allah subere Yefun kak nin bi sukjimnut-i ne rer, subere nin kwabom kam mo Yefun Allah gato nai nin sok mo An bi rus-i ne. Ji ki suk su Yefun subere Yefun Allah kak nin bi sukjimnut subere nin jam subot suk mwa gato ndo wai, si suk mwa gato Yefun Allah fro wa An syo nai yé gato onyar kem mo Yefun Yesus ne.

Efesus 2:7

Yefun Allah bes men gum subere su kam sari ne ma men jam subot sukndo mwa yé gato Yefun Allah ben su men ne rer re. Sukndo mwa ne bor mo gato Yefun Allah syo Yesus Kristus ma mo bur ré wa kwop win men.

Roma 2:4

Nin nut do, Yefun Allah dakai jimnotku nin, An yo syo sukye nai nin kekro nde, wo An eswa nin kwet kadit sukibit gato nin ben ne bado? Sangge, Yefun Allah da ben sukndo su nin sane, sarewo nin kamo su Yefun nde. Yefun Allah ben sukndo su nin, subere tik nin mit wa nin kwet kadit sukibit gato nin ben ne, nin dakai jam re.

Roma 11:33

Yefun Allah jam suk mwa wai o re, men yetu yo karowa dom nde. Yefun Allah bi sukjimnut-i ne ko wai o re, men yetu bi sukjimnut-i yo kom mone nde. Suk gato Yefun Allah ki do, kwop mone it, je u anato nggiwa duwer Yefun mo ne? Yefun Allah fro suk mwa ne, je u anato nggiwa jam kom mo ne?

1 Petrus 5:1

Ji ré anato tepsu yekwesu mo nu ari dik yo. Ji dakai me sukye gato Kristus ku su ji gro re. Bere mo Yefun Allah bi nat-i ji sisu Kristus ku suk gato ndo wai o mone. Sane ji kiwa nin, yekwesu mo nu ari, nin jammo suk gato ji ki ré et, sare,

1 Tesalonika 2:12

Men duno nin, men ós nin ben suk tepsu suk gato men duno nin su ne. Men wergat nin subere nin ben suk tepsu Yefun Allah mit sor, we Yefun Allah nai nin sok mo An bi rus-i, subere nin si An kem mo pe gato ndo wai o re.

Roma 1:8

Ji ki suk su Yefun Allah sa, ketke, ji ki suk nai Yesus Kristus tepsu yemiten, subere Kristus waii ki ndo mo Yefun Allah, ji bi yenggras gato jom ji ne. Ji ki ndo mo Yefun Allah, we yé ki sukdu subot nin onyar kem mo Kristus ne frekbot yetu mo bur ré iwedewe jam o re.

Yohanes 20:27

Orete Yefun Yesus ki nai Tomas do, ”Nan me Ji syim wip no anare. Nan bok nan sopkwa mo Ji syim wip et. Nan syo nan syim ma, nan bok nan syim mo Ji syak wip ré et. Nan bi sukjimnut we subot Ji o nde, wo nan nai sukjimnut dik do, nan onyar kem mo Ji et!”

Yohanes 20:17

Yefun Yesus ki nai Maria do, ”Nan jom Ji nde, we Ji yo satu mu mo Ji bi Ai nde tó. Nan mu mo Ji bi nji, ete nan ki nai án do, ’Ji satu mu mo Ji bi Ai, gato nin bi Ai dom it anare. Ji satu mu mo Yefun Allah gato jom Ji si nin sino it anare.’ ”

Filemon 1:4

Ji ki suk su Yefun Allah saresa, ji ki kom mo nan gum yo, ji ki ndo mo Yefun Allah wa nan,

2 Korintus 12:21

Ji nokwa sawe, ji do ba ku nin yo, bere Yefun Allah ben ji damen mone. Ji nokwa sawe, ji do ba ku nin yo, bere ji wo subot nin yé mwa gato nyim ne ben sukibit, wo su ré, án yo kwet kadit sukibit ne mo nde tó, wo sukibit ne kas tó sato ré: án da bro wa án ben sukdaret ket án i e, yebris si nggon iwa ben siri su yu daret e, án ben suk siri dakai daret bu e ne sor.

Matius 6:32

Ye gato jam nde Yefun bi sukjimnut sye mo suk mwa ne petok sor, wo nin bi Ai mo gu jam do nin mitmo suk ne.

Filipi 4:7

Sane bere sukjimnut ndo kadit Yefun Allah ben nin bi sukjimnut not satu. Suk gato Yefun Allah ben su men yetu ne, men yo jam kom mo mit nde. Nin si Yesus Kristus tepsu dik it, sane bere sukjimnut ndo kadit Yefun mewa nin mit si nin onyar subere nin bi sukjimnut waiyu o nde.