Filipi 4:18 - Abun Scripture

¹⁸ Su ré ji ku suk mwa gato nin syo wa ji more re. Sane su ré ji yo yewa suk o nde, suk gato nin syo ma ne wai mó re. Suk mwa gato nin syo nai Epafroditus ne, an gwat ma, an syo nai ji more re. Suk mwa gato nin syo ré tepsu suksom gato grik mo Yefun Allah gwem, tepsu suksom gato yé gre wa yé som Yefun Allah su ne. Sane Yefun Allah iwa suk gato nin ben ne.

Filipi 4:18 Referans Kwoze

Ibrani 13:16

Men werwa men ben sukndo su yu et, men mbrinket nde. Men ós yu mo suk gato men ben ne et, men mbrinket nde. Men ben sukndo su yu, men ós yu anato tepsu men gwat suksom wa men som Yefun Allah su it anane, bere Yefun Allah iwa re.

Filipi 4:12

Ji yewa suk yo, ji ku suk mwa yo, ji o mó re. Mo suk mwa ne sino, ji ku sukye e, ji yewa suk e, ji kem not sor, ji yo nutbot teker nde, ji o mó re. Ji on ge yo, ji on de yo, ji yewa suk yo, ji ku suk mwa yo, ji iwa sor, ji yo nutbot teker nde.

2 Korintus 9:12

we sugum gato nin syo ne, yo ós Yefun Allah bi rus-i gato yewa suk sor nde, wo bere ben yé mwa neya un Yefun Allah gum mo sukndo gato nin ben ne. Bere yé mwa ne un Yefun wokgan dom nde, wo mwa ndo nde.

Efesus 5:2

Men kem mo bur ré, men bi sukjimnut sye kas subot ye yi sor, tepsu Kristus bi sukjimnut sye kas subot men, ete An bi An nggwa wa men. An bi An nggwa tepsu suksom gato An som Yefun Allah su, ete mone An tot men bi suktot. Yefun Allah iwa suk gato Kristus ben ne, tepsu ye iwa ni suk gato grik. Sane men waii bi men nggwa wa men ós ye yi su ne sor.

1 Petrus 2:5

Nin dom, nin tepsu jok mwa gato mbau. Ben sato yé nggo Yefun Allah bi nu su nin. Sane nin tepsu yesu gato ben Yefun Allah bi suk-i mo An bi nu ne. Yesus Kristus kak os wa nin subere nin syo suksom gato tepsu Yefun Allah mit mo nu ne.

2 Tesalonika 1:3

Men bi nji, men bi nyanggon, men jam sukdu do, nin onyar kem mo Kristus nggi wai kadit nyim neya o re. Sane men ki ndo mo Yefun Allah mone. Sane dom, nin bi sukjimnut sye kas subot yu sye wai kadit nyim ne o re, sane men ki ndo mo Yefun Allah noru nombrak sor.

Roma 12:1

Sane, ji bi nji, ji bi nyanggon, Yefun Allah dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor. Sane nin benbot suk gato ji ki ré et: Tepsu suga nyim yé gu suge kwop wa yé som Yefun su ne, su ré men bi men nggwa su mbau wa men som Yefun su et. Men werwa men bi men nggwa wa men ben Yefun bi suk-i tepsu An mit sor. Men som Yefun Allah su sangge it anane.

Suk Gato Yerasul Ben Ne 10:4

Kornelius sokwa malaikat ne, an nyu, an ki do, ”Yenggras, suma ne?” Malaikat ne ki do, ”Nan ki suk su Yefun Allah sa, Yefun jam suk gato nan ndekwa ne. Yefun Allah me nan ós ye Yahudi gato yewa suk. Suk gato nan ben ne, Yefun Allah jam re, Yefun Allah mit iwa nan re.

2 Korintus 11:8

Ji duno nin su Yefun bi sukdu-i sa, ye gato onyar kem mo Yefun Yesus mo nu ari bok yo mo pe yi anato syo sugum nai ji. Ji yo duno nje mo nu ari bok ne yo mo nde tó, ji yo bi kamba mone nde, sane ben sato ji syimsi suk kadit án anane. Ji ku suk kadit nje mo nu ari bok yo anato ji ku os wa ji ma duno nin mone.