Filipi 4:1 - Abun Scripture

¹ Sane yo, ji bi nji, ji bi nyanggon gato ji jimnotku, ji mit at ndo nde mo suk gato nin ben ne. Ji mit iwa dom, tepsu ye gato ku sukndo wai o re. Sane yo, ji bi yesyim, nin jom men bi Yekwesu Yesus Kristus bi sukdu-i ne pe it yo, bere nin benbot suk mwa gato ji krom gado ne sor.

Filipi 4:1 Referans Kwoze

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

1 Korintus 16:13

Nin mewa nin nggwa, nin onyar kem mo Yefun Yesus, nin misyar Yefun nde, wo nin jom An bi sukdu ne krat sor. Nin ben suk su nin nok nde, nin ti krat sor.

Filipi 2:16

Nin jom Yefun bi sukdu gato kak os wa men kem ndo to kapyo mato kapyo yo, nin tepsu sukru gato ji ki ne. Sane bere su kam gato Kristus satu ma mo bur ré it yo, ji mit at mo suk gato nin ben ne, we ji jam do, suk gato ji werwa ji duno nin su ne, ji yo ben yi nde, wo nin waii benbot suk gato ji duno nin su ne re.

1 Korintus 15:58

Sane, ji bi nji, ji bi nyanggon gato ji jimnotku, nin misyar Yefun nde, wo nin jom Yefun Yesus bi sukdu ne krat sor. Nin samok wa ben men bi Yekwesu Yesus Kristus bi suk-i sor, we nin jam do, suk mwa ne sino gato nin ben wa An ne yo ges yak yi nde.

Filipi 1:8

Yefun Allah jam do, sangge, ji da o ku nin, ji bi sukjimnut sye kas subot nin tepsu Yesus Kristus bi sukjimnut sye kas subot nin ne.

Ibrani 10:23

Sane men jom suk gato Yefun tom su men subot os be ne pe et. Men mit brek mo suk yi yo kadit suk gato Yefun tom ne wokgan dom nde, we suk gato Yefun Allah tom subot os be su men, sangge bere An benbot sor, An yo kidar nde.

Roma 2:7

Ye gato werwa ben bi suk-i ne ndo, we ye ne kwabom kam mo Yefun Allah do, bere Yefun bes án gum kok mone yo, bere Yefun un án gum mone, bere Yefun kak os wa án kem gesyos mone, bere Yefun Allah kak os wa yé ne kem ndo to kapyo mato kapyo.

Yohanes 8:31

Orete Yefun Yesus ki nai ye Yahudi gato onyar kem mo An do, ”Nin benbot Ji bi sukduno-i petok it yo, nin anato tepsu Ji bi pakon gato sangge it anane.

2 Timotius 2:1

Timotius, ji bi pa, Yesus Kristus dakai bi sukjimnut sye kas subot men yi, men yo ben suk yo nyim wa An nde, sane nan jom sukdu ne pe subere nan bi sukjimnut nggi mone.

Filipi 2:26

wo su ré an da o wa an ba ku nin it. An jimnotbot sukdu gato nin jam subot an do, an ku suki more re. An jimnotbot teker, sawe nin nut do an i tó.

Suk Gato Yerasul Ben Ne 11:23

Barnabas mu kom motu sa, an me sukndo gato Yefun Allah dakai ben su yewis yi gato onyar kem mo Yefun Yesus mone. An me do, Yefun Allah ós yé ne ben suk tepsu Yefun Allah mit. Barnabas mit iwa suk gato an me ne. Barnabas ki do, ”Nin mit dik wa Yefun Yesus sor, nin brek kadit Yefun Yesus bi os gato ndo ne nde.”

Suk Gato Yerasul Ben Ne 2:42

Sane ye gato onyar kem mo Yefun Yesus ne werwa án jam yerasul bi sukduno-i si án mit dik án onyar dik, subere án sino jamwa pe. Kamdik-kamdik án mit iwa án sum sino petok sor, án git sino, án git roti wa napawa Yefun Yesus, án ki suk su Yefun sino.

2 Petrus 3:17

Sarewo ji bi nji ji bi nyanggon gato ji jimnotku, nin dakai jam do, yé bok ne ki subot Yefun Allah bi sukdu siri mó re. Sane it yo, nin mewa nin nggwa subere yé gato ki bi sukdu-i daret ne yo ku os wa gwat nin mu mo án bi os-i gato siri kadit Yefun Allah bi sukdu-i ne nde. Nin mewa nin nggwa kadit yé gato ki bi sukdu-i daret sane, subere nin jom Yefun Allah bi sukdu-i gato sangge ne pe sor.

Ibrani 4:14

Men bi Yekwesu gato gum kok wai mo Yefun Allah bi nu, An sa, mu kom mo Yefun Allah dakai gwem mo gu, An ki suk wa men mone. Men bi yegweswai ne gum do, Yesus, Yefun Allah bi Gan. Men ki do, men onyar kem mo An, sane men jom An bi sukdu-i gato men onyar kem mone krat et.

Ibrani 3:14

Tepsu men onyar kem pe mo Yefun Yesus su ketke ne, men waii werwa men onyar kem pe mo Yefun sane sor kom mo pe gato or mó. Sane bere men sino si Yesus Kristus tepsu dik mo suk mwa gato An ben ne.

2 Tesalonika 2:15

Sane men bi nji, men bi nyanggon, nin misyar Yefun bi sukduno nde, wo nin grem sukduno gato men duno nin su ne pe mo nin mit sor. Sukduno ne, deyo men ki su men syokwet, deyo men krom, sane sukduno mwa ne sino, nin jom krat sor.

Kolose 4:12

Epafras ki ndo mo nin. An ré, nin dakai bi ye-i. An ré tepsu Yesus Kristus bi pakwerut. An ki suk su Yefun sisu an mit dik si an onyar dik sisu sangge wa nin petok sor. An ndek mo Yefun Allah wa nin subere nin bi sukjimnut kem pe mo Yefun, tepsu yenggras gato bi sukjimnut kak, subere nin bi sukjimnut brek wokgan kadit Yefun Allah dom nde, ete nin benbot suk mwa ne sino gato Yefun iwa ne.

Galatia 5:1

Men tepsu pakwerut wa ye Yahudi bi sukduno-i o nde, we Yesus Kristus sombok men wé kadit re. Sane men jom Yesus Kristus bi sukduno-i krat sor, men bi men nggwa wa benbot ye Yahudi bi sukduno-i ne o nde. Men brek satu tepsu pakwerut wa ye Yahudi bi sukduno-i o nde.

1 Tesalonika 3:13

Sane bere Yefun ben nin mit kem mo Kristus nggi wai o, subere men bi Yekwesu Yefun Yesus si ye gato sok mo An bi nje-i ne, satu ma mo bur ré yo, bere nin ti mo men bi Ai, Yefun Allah gwem, ete bere nin tepsu ye gato ben nin bi suk-i ndo sor, kwa gato ibit yo mo nde.

Matius 10:22

Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó, bere ye ne kem ndo to kapyo mato kapyo.