Filipi 3:18 - Abun Scripture

¹⁸ Nin simo os ne, we yé mwa werwa ben suk gato Kristus ben ne ibit. Ji ki nai nin wam bok yo mó re. Su ré ji ki nai nin wam dik yo o, ete ji wo su dom do, yé mwa ne ki mo án syokwet do, án ye Kristen, sarewo án ben án bi suk-i tara re. Yesus Kristus kwop mo kwesukwin wa tot suktot mo sukibit gato án ben ne, sarewo án bariwa suk gato Yesus Kristus ben wa án re.

Filipi 3:18 Referans Kwoze

Efesus 4:17

Sane nin jammo sukdu gato ji ki ré et, ji dakai bi sukdu-i anare nde, wo men bi Yekwesu Yefun Yesus anato syogat ji krom sukdu ré wa nin benbot et. Nin ben suk tepsu yé gato jam nde Yefun o nde. Yé gato jam nde Yefun bi sukjimnut yo kom mo pe yo nde.

Galatia 6:12

Yé gato wergat nin subere nin simo sunat anato yé gato iwa dakai bes án gum kok, subere ye yi me suk gato án ben ne ete ki do, ”Yé ne sa, ben bi suk-i ne ndo.” Án iwa wergat nin simo sunat, we án bariwa án ki subot Yesus Kristus gato kwop mo kwesukwin. Án nut do, án ki subot Yesus Kristus yo, bere án ku sukye mone, sane án ki sukdu subot sunat ne kadit.

Galatia 2:14

Ji do me suk gato Petrus si ye Yahudi gane ben ne siri kadit Yesus Kristus bi os-i sa, ji ki Petrus mo yé mwa gwem do, ”Nan ye Yahudi, sarewo nan misyar ye Yahudi bi sukduno-i, ete nan ben suk tepsu yewis yi o re. Suk gato nan ben ne da ndo, sarewo suma ben anato nan wergat yewis yi brek ma ete jammo ye Yahudi bi sukduno-i gato nan misyar wé ne?”

Galatia 1:7

sarewo sukdu ne yo ndo mo nde. Yé bok ne duno nin su án dakai bi sukdu-i gato siri kadit Kristus bi os-i gato Yesus Kristus kak wa men sok mo Yefun Allah bi rus-i. Yé bok ne kidar nin do, án bi sukdu-i ne tepsu Kristus bi sukdu-i, wo yé bok ne bi sukdu-i tara re, sane anato án ben nin nalar o re.

2 Petrus 2:10

Yé gato ku sukye wai anato yé gato sibot sukjimnut gato tik án mit wa ben sukibit bu ne. Yé ne iwa ben sukibit ket kwayo-kwayo petok sor, án bariwa Yefun Allah jom án re. Án bariwa jammo Yefun re. Án bariwa jammo yekwesu mwa neya sino re. Yeguru gato kidar suk gane, án mise. Án bes án nggwa kok. Án bes án nggwa kok anato án kiket suk mwa neya gato gesyos mo gu gato gum kok ne, án yo nyuwa dom nde.

1 Tesalonika 4:6

Sane nin ben siri su nin bi nji mo Kristus bi rus-i ne bi nggon nde. Nin kidar yé ne dom nde. Tomga nyim men ki suknapa wa nin wam bok yo mó re, sare do, bere Yefun Allah syo sukye nai ye gato ben suk siri kadit sukduno ne.

Filipi 1:4

Ji ndek suk mo Yefun Allah wa nin sino yo, ji mit at wa.

Galatia 5:21

án gro sye wa ye yi bi suk-i e; án iwa án yenau bu e; án iwa án kamo noru nombrak, án yenau su, ete án ben siri mwa su e ne. Án ben suk mwa gane si kwa yi neya dom. Suga nyim ji ki subot sukibit bok ne nai nin jam mó re. Ré ne, ji ki suknapa wa nin wam dik yo o sare do, ye to ben bi suk-i sane, bere Yefun Allah yo nai ye ne sok mo An bi rus-i nde.

Galatia 2:21

Ji yo misyar os ndo gato Yefun Allah fro wa men yetu nde. Yefun Allah dakai syogat An bi Gan ma wa men, men yo ben suk yo nyim wa An nde. Sane men nut do, men jammo ye Yahudi bi sukduno-i anato Yefun Allah nut mo men do, men sa, tep wa An nai men sok mo An bi rus-i ne yo, bere siri re. Men do sok mo Yefun Allah bi rus-i mo suk gato men ben tepsu ye Yahudi bi sukduno-i ne yo, Kristus ma kwop wa suma ne? Men yo mitmo An nde fe!

2 Korintus 11:29

Yetu ge dik yo mone do, kaim rere yo, bere ji nutbot ye ne sane sor ji kaim rere dom. Suk yo tik yetu ge dik yo o ges mo os siri ete an ku sukye mone it yo, bere ji bi sukjimnut kas bot ye ne mo sukye gato an ku ne ndo nde.

2 Korintus 11:13

Yé bok gane, Yefun Allah yo syogat án ma kibot Yesus Kristus bi sukdu-i nde, án tepsu yerasul gato sangge nde, wo án dakai ben án nggwa tepsu ye gato Yefun Allah syogat ma ki subot Kristus bi sukdu-i ne sor re, án werwa án ben kidar nin sor.

2 Korintus 2:4

Ji krom surat gato nyim wa nin ne, ji nutbot nin ndo nde, ji baoku nin, ji wo, ji gro rom sye wa nin, ji nutbot nin ware, ji kaim rere mone. Sane ji krom surat gato nyim ne wa ben nin bi sukjimnut ibit nde, wo ji krom surat ne wa kak nin bi sukjimnut subere nin jam do, ji bi sukjimnut sye kas subot nin ndo nde.

1 Korintus 6:9

Ye gato ben sukibit ne gum yo sok mo Yefun Allah bi rus-i nde, nin jam sukdu ne bado, nde tó e? Nin jam sukdu ne, sane nin dakai kidar nin dakai nde, Yefun Allah bariwa nai ye gato ben bi suk-i ibit sok mo An bi rus-i, sato ré: yebris si nggon gato ben siri su yu daret e, ye gato som sukdaret e, yekra gato ben siri su nggon daret si nggonkra gato ben siri su ye daret e, yebris gato iwa ben siri wa meret sugum e, yebris gato ben siri su yu e,

1 Korintus 1:18

Ye gato bere ges mo bot gesyos ne nut do, sukdu subot Yefun Yesus mo kwesukwin ne, yé ki daret kaii. Wo men yé gato Yefun nai kadit sukye mo bot ne, subere men kem ndo to kapyo mato kapyo, men jam do, sukdu subot Yefun Yesus mo kwesukwin anato kadum Yefun Allah bi suktinggi ne bor wa men jam re.

Roma 9:2

Ji nutbot ji dakai bi yewis-i, ye Israel, ji nutbot ndo nde ware, ji ku sukye mo ji mit, ji yo ndo o nde, we ji bi wis-i ko kadit Yesus Kristus tó.

Lukas 19:41

Yefun Yesus mu karowa Yerusalem anane. Yefun Yesus sokme kota ne sa, An wo wa nje mone.

Yudas 1:13

Án tepsu sem nap sye wai gato sam sukkwik si i-bre mu bare mo nden. Sukkwik ne tepsu sukibit gato án ben ne, án nutbot sisu ndo yo, bere án damen mone, wo án yo nutbot sukibit gato án ben ne nde. Án tepsu bí gato waiyu muya-muma mo gu nim ne, sarewo án mu siri kadit pe gato Yefun Allah fro wa án muket ne. Sane anato bere Yefun Allah fro nat gato ndendu yut wa án kem mó to kapyo mato kapyo.

2 Tesalonika 3:11

Men jam sukdu do, nin deyo bambrai wa ben suk mone. Kapre sukwokgan án yo ben dom nde, wo án iwa mu ki sukdaret bot nu sor re.

Suk Gato Yerasul Ben Ne 20:19

Nin jam do, ji ben ji bi Yekwesu bi suk-i sor, ji yo bes ji nggwa kok nde, ji wo wa nin sor. Ye Yahudi ben sukye wa ji ndo nde, ye Yahudi mone da meret os wa gu ji kwop wé wam bok yo, sarewo ji ben suk gato ji bi Yekwesu ki ne sor.

Galatia 6:14

Wo ji dakai yo bes sukdu daret sane kok mo nde, wo ji bes sukdu subot men bi Yekwesu Yesus Kristus gato kwop mo kwesukwin ne kok sor. Ji bes sukdu subot Yesus Kristus mo kwesukwin ne kok wai, sane anato ben sato ji kwop kadit sukdu daret gato ye ki subot sunat e ne. Sukdu daret gato yé ki mo bur ré, ji misyar or re.