Filipi 3:14 - Abun Scripture

¹⁴ Sane anato ji wergat ji nggwa nggi gat petok sor, tepsu ji werwa ji kas nggi wai kadit ye yi neya, subere ji kom mo pe gato or nyim kadit ye yi ne, ete ji ku suk gato ndo mone. Suk gato ji iwa ji ku ne anato ji kem gesyos mo gu sisu Yesus Kristus. Yefun Allah fro os wa men subere men kem gesyos mo suk gato Yesus Kristus ma ben mo bur ré re.

Filipi 3:14 Referans Kwoze

1 Korintus 9:24

Men sino jam do, yé mwa do kas bitanding yu it yo, ye gato kas nggi wai kadit ye yi neya sor ete juara dik, bere ye ne ku hadiah mone. Sane men wergat men nggwa wa men ben suk tepsu Yefun Allah mit, tepsu ye gato kas ne wergat nggwa wa kas nggi subere an ku suk.

1 Petrus 5:10

Nin ku sukye mone bergan sor re, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o re. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

Wahyu 3:21

Yé gato nggi wai kadit bur ré bi suk-i yo, bere Ji bes án gum kok. Bere án gum kok tep wa án si Ji tepsu yekwesu. Bere Ji ki nai yé ne do, ”Nin ma, nin sisu Ji kem kok mo Ji bi nat ré, men anato gum Yekwesu sino.” Ji anato nggi wai kadit bur ré bi suk-i, anato Ji si Ji bi Ai kem kok mo An bi nat-i re.

1 Tesalonika 2:12

Men duno nin, men ós nin ben suk tepsu suk gato men duno nin su ne. Men wergat nin subere nin ben suk tepsu Yefun Allah mit sor, we Yefun Allah nai nin sok mo An bi rus-i, subere nin si An kem mo pe gato ndo wai o re.

2 Petrus 1:3

Yefun Allah dakai ben sukndo su men. Yefun ben An bi suk-i ndo wai o re anato An nai men tepsu An bi pá-i subere men jam An kom mo mit. Men jam An kom mo mit sane anato An ben men nggi su An dakai bi suktinggi, subere men ku suktinggi wa men kem not mo bur ré. Men ku suktinggi wa men ben Yefun bi suk-i mo suk mwa ne sino sor.

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

1 Petrus 1:13

Nin jam sukdu subot os ndo gato Yesus Kristus kak ne, sane anato nin fro nin nggwa wa ben An bi suk-i petok sor. Nin kem su nin fra, nin kwabom kam mo Yefun Allah do, tepsu kam gato Yesus Kristus satu ma ne, bere Yefun Allah ben sukndo su nin re.

Ibrani 6:1

Sane it yo, men yo krom sukdu subot Yesus Kristus mo i-ke ne o nde yei. Sukdu gato ndaf mo i-ke ne tep wa ye gato jam Yefun sim, tepsu pabom da sus rom sim, wo ré ne, men ki subot sukdu gato kru o et. Men krombot sukdu kru gato tep wa yenggras mo Yefun Allah bi sukdu-i ne et. Men krombot sukdu gato ndaf mo i-ke ne o nde yei, sukdu bok gato mo i-ke, men kibot mó re, sato ré do, men kwet kadit sukibit gato men ben ne, ete men ben suk tepsu ye gato onyar kem mo Yefun Allah ne sor.

2 Korintus 4:17

Sukye wokgan gato men ku su ré, su kam sari ne ma bere kak os wa gwat men mu kem mo pe gato gesyos gato ndo wai o re. Sane men kem mo bur ré yo, men nut do, sukye gato men ku ne, suk yo nde, we bere men kem gesyos mone tó.

Lukas 16:16

”Kadit ketke sor kom mo kam gato Yohanes, gato ras nje mo syur ma ne, yé duno nje su Musa si yenabi bi sukduno-i. Wo kadit kam gato Yohanes ma ne, Ji si Ji bi pakon duno nje subot os ndo gato Yefun Allah fro wa Yefun nai nin yetu gum sok mo An bi rus-i, ete An tepsu nin bi Yekwesu mone. Yé mwa jam sukdu ne anato yé mwa wergat nggwa wa án sok mo Yefun Allah bi rus-i.

Roma 11:29

Sane sukndo gato Yefun Allah fro wa An ben ne, An ki kwop mone it. Yefun Allah yo brek kadit suk gato An tom su nje nde.

Filipi 3:3

Men ré anato yé gato simo sunat gato sangge, wo án yo simo sunat gato sangge nde re. {Men yo onyar kem mo suk gato án ben sato sunat nde. Ye Israel gato simo sunat, án nut do, án sok mo Yefun Allah bi rus-i it anane. Sarewo sunat ne ye ben mo men kaim de nden ne sor re.} Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

Kolose 2:18

Ye gato ma ki do, malaikat gato an som ne kadum suk bok yo rer wa an me re, ete an kidar do, an yo bes an nggwa kok mo suk ne nde, sane yo, nin jambot ye ne bi sukdu-i nde, we sukdu ne gwat nin ko kadit sukndo gato bere Yefun Allah syo nai nin ne. Ye gato ki bi sukdu-i sane jam nde Yefun. An dakai bes an nggwa kok mo suk mwa gato an me ne, sarewo sukkidar sye yo ko ré. An ki subot malaikat bi sukdu-i sane sor kom mo mit kai,

2 Timotius 1:9

Yefun Allah fro os ndo wa nai men wé kadit bot gesyos, subere men kem ndo to kapyo mato kapyo. Yefun Allah kiwa men brek ma kadit os ibit gato men muket ne, ete men tepsu An bi rus-i ben An bi suk-i gato ndo petok sor. An yo me mo sukndo gato men ben ne nde, wo An dakai fro An bi os-i, An dakai bi sukjimnut sye kas subot men yi sor, men yo ben suk yo nyim wa An nde. Sane anato An yo ut bur ré nde tó, An fro os ndo ne su Yesus Kristus nyim wé re, subere ri ma Kristus ma wa kak os ne wa men re.