Filipi 2:7 - Abun Scripture

⁷ An bes An gum kok nde, wo An is An nggwa ga mo bur tepsu pa wokgan ne o re. An ma mo bur ré, An tepsu pakwerut. An ma mo bur ré, An ka sa yetu sor re. An kem mo bur ré tepsu men yetu.

Filipi 2:7 Referans Kwoze

2 Korintus 8:9

Men jam do men bi Yekwesu Yesus Kristus ben An bi suk-i ne ndo dakai yi su men, men yo ben suk yo nyim wa An nde. An tepsu yepasye gato bi suk mwa. An da bi suk mwa, sarewo An ma mo bur ré sa, An bi sukjimnut sye kas subot men yetu anato An ben An nggwa tepsu ye gato yewa suk, subere An kak os ndo wa men, subere ri ma, men ku os wa men ku suk mwa mo Yefun Allah bi de-i o re.

Matius 20:28

we Yetu bi Pa to Ji ré ma mo bur ré wa yé ben suk wa Ji nde, wo Ji ma wa Ji ós nje, ete Ji bi nggwa tepsu suktot mo sukibit gato yé mwa ben ne.”

Yohanes 1:14

Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

Roma 8:3

Sukjimnut gato tik men mit wa ben sukibit ne jom men yetu. Sane anato ye Yahudi bi sukduno-i yo nggiwa ós men nde. Sane Yefun Allah fro bi os-i tara re. Yefun Allah syo An bi Gan ma mo bur ré su kaim ka sa men yetu kaim. Yefun Allah syo An bi Gan ma wa bi nggwa tepsu suktot wa men subere kak sukjimnut ibit ne wé kadit men re.

Galatia 4:4

Sarewo tepsu kam gato Yefun Allah fro ne, Yefun Allah syo An bi Gan ma mo bur ré. Nggon dik yo kem su An. An kem mo bur ré, An jammo ye Yahudi bi sukduno.

Ibrani 4:15

Men bi yegweswai gato gum kok wai mo Yefun Allah bi nu ne, An kem mo bur ré sa, An da kridek tepsu men yetu gato yo nggi nde. An kaim rere tepsu men yetu kaim rere. Sane suk yo da ma tik Yefun Yesus mit wa ben sukibit ket kwayo-kwayo tepsu men yetu sino mó re, sarewo An yo ben sukibit yo mo nde.

Roma 15:3

Men misyar suk gato men dakai iwa men ben ne, ete men ben suk wa men ós ye yi, we Kristus dom misyar suk gato An dakai iwa ben ne, ete ós men re. Tepsu ye krom mo Yefun Allah bi sukdu, Yefun Yesus ki nai bi Ai do, ”Sukkabor gato ye kabor Nan su ne, Ji ku win Nan re.”

Ibrani 12:2

Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.

Lukas 22:27

Ye gato gum kok wai ne anato ye gato kem wa git sugit bado, pa gato ós wa gwat sugit ma ne, e? Men sino jam do, ye gato kem git sugit anato gum kok wai kadit pa gato an syogat gwat sugit ma ne. Sarewo Ji ben Ji bi suk-i su nin ré, Ji syogat nin ós Ji tepsu yepasye nde, wo Ji ós nin, Ji tepsu pakwerut wa nin.

Roma 15:8

Ji ki sare do, Kristus ma kak os ndo wa ye Yahudi sok mo Yefun bi rus-i, subere ye jam do, suk gato Yefun Allah tom su men bi amui, An benbot it, An yo brek kadit nde.

Filipi 2:6

Yesus Kristus ré, An da gum kok tepsu Yefun Allah dakai, sarewo An yo werwa An bes An gum kok tepsu Yefun Allah nde.

Matius 12:18

”Ji bi pakwerut gato Ji bes anare. Ji jimnotku An, Ji mit iwa An Ji Gen bere bok nggwa mo An, bere An ki sukdu subot os ndo gato Ji fro ne nai yewis mwa ne mo bur ré sino jam.

Ibrani 13:3

Men napawa yé gato mo sel mit, men bi sukjimnut kas subot án. Men bi sukjimnut subot yé ne do, ben sato men si án kem mo sel mit ne sino, sane men kwabom dek bot án ndo nde. Sane dom, men nutbot yé gato ye ben sukibit nai ket kwayo-kwayo. Men nutbot yé ne do, ben sato men si yé ne ku sukye sino, sane men kwabom dek bot án ndo nde.

Roma 1:3

Sukdu subot os ndo ne anato bor mo suk gato Yefun Allah bi Gan, men bi Yekwesu Yesus Kristus ben ne. Men nutbot Yefun Allah bi Gan tepsu yetu it yo, men jam do Pa bi amui mo yeraja ge dik yo gato gum do Daud, ye Israel bi yeraja gato gum kok wai o re.

Markus 9:12

Yefun Yesus ki do, ”Sukdu gato yeguru ki ne sangge do, Elia ma nyim, ete an fro os wa Ji re. Sarewo yé krom mo Yefun Allah bi sukdu do, bere yé bariwa Yetu bi Pa, ete yé ben sukye nai Ji ket kwayo-kwayo. Sukdu ne bi sukjimnut-i sa u ne?

2 Korintus 13:4

Ye mban Kristus mo kwesukwin sa, An kaim yo nggi nde, sarewo su ré, Yefun Allah bi suktinggi bor mo Kristus anato Kristus mbau satu anare. Sane dom, men yé gato si Kristus tepsu dik, men kem mo bur ré, men kaim yo nggi nde dom, wo Yefun Allah bi suktinggi bor mo men anato ben men nggiwa men ben Kristus bi suk-i su nin mo bur ré tó.