Filipi 2:6 - Abun Scripture

⁶ Yesus Kristus ré, An da gum kok tepsu Yefun Allah dakai, sarewo An yo werwa An bes An gum kok tepsu Yefun Allah nde.

Filipi 2:6 Referans Kwoze

Yohanes 5:18

Yefun Yesus ki bi sukdu-i ne anato ye Yahudi wergat án nggwa nggi wai o subere án meret os wa án gu Yefun Yesus wé. Yepasye meret os nggi wai o, mo suk gato Yefun Yesus ben siri kadit ye Yahudi bi sukduno subot kam sye ne sor nde, wo yepasye ne maskwa mo gato Yefun Yesus ki do, Yefun Allah anato An bi Ai re. Yefun Yesus ki do, Yefun Allah anato An bi Ai bi sukjimnut do, Yefun Yesus dakai anato tepsu Yefun Allah.

2 Korintus 4:4

Yé gato jam nde Yefun yo, bere án yo but sukdu ne ri nde, we biris bi yekwesu gato bes nggwa kok ete werwa jom yetu mo bur ré ne rai yé ne bi sukjimnut-i ne krat mo ndendu bi suk-i re. Sukdu subot os ndo gato Yesus Kristus kak wa men yetu ne bi suktinggi bor mo bur ré tepsu sukru sye wa men, Kristus kadum Yefun Allah rer wa men jam, sarewo biris bi yekwesu ben suk yawa yé gato jam nde Yefun ne anato yé ne yo jambot sukdu ne nde.

Ibrani 1:3

Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.

Yohanes 17:5

Ji bi Ai, Nan yo ut bur ré nde tó, Ji si Nan, ete Nan bes Ji gum kok mone re. Sane su ré, Nan bes Ji gum kok sye wai satu o et.

Wahyu 21:6

Yefun ki o do, ”Suk mwa ne Ji ben or it! Ji anato Yefun gato ut suk kadit ketke ete jom sane sor kom mo pe gato or mó. Bere Ji syo syur nai ye gato sosa kadit syur nggrup gato ben yetu mbau. Bere Ji syo syur ne ma wa án da, án yo bi suk yo wa nde.

Yohanes 10:30

Ji si Ji bi Ai tepsu dik.”

Ibrani 13:8

Kadit kam nyim, su ré, sor kom mo kapyo mato kapyo, Yesus Kristus ben An bi suk-i ne tepsu yu sor, An ben An bi suk-i tara mo nde.

Yohanes 10:33

Ye Yahudi ki nai Yefun Yesus do, ”Men am Nan su jok mo sukndo mwa gato Nan ben ne nde, wo Nan kiket Yefun Allah gum ibit anato men am Nan su jok ré. Nan yetu sor re, ete Nan bes Nan nggwa kok teker, Nan ki do, Nan anato tepsu Yefun Allah, sane anato men am Nan su jok it anare.”

Roma 9:5

Men ye Israel anato bi amui mo yepasye sato Abraham e, Isak si Yakub. Men bi amui ne anato pe Kristus. Kristus anato Yefun gato jom suk mwa ne sino, men sino un An to kapyo mato kapyo. Sangge.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

Yohanes 20:28

Tomas ki nai Yefun Yesus do, ”Nan anato Ji bi Yekwesu, Nan anato Yefun gato jom Ji it.”

Yohanes 10:38

Sarewo Ji ben suk tepsu Ji bi Ai syogat Ji ben ne, sane nin onyar kem mo Ji mo suk gato Ji ben gato ben nje yeket ne. Kapre nin bariwa nin jammo Ji bi sukdu-i, nin onyar kem mo Ji mo suk gato Ji ben ne sor. Sane bere nin jam kom mo mit do, Ji bi Ai si Ji tepsu dik. Ji dom, Ji si Ji bi Ai tepsu dik.”

Ibrani 1:6

Sarewo Yefun Allah syogat An bi Gan gato gum kok wai o re ma mo bur ré sa, Yefun Allah ki do, ”Ji bi malaikat mwa ne sino som Pa ne et!”

Titus 2:13

men eswa Kam gato Yesus Kristus satu ma mo bur ré. Men kwabom kam mo Kristus do, bere An ma sor, sane men eswa. Su kam gato An ma su ne yo, bere yetu mo bur ré sokme Yefun kaim rer-rik su bi suktinggi ndo yé re. Yesus Kristus gato bere ma ne, An anato tepsu Yefun Allah gato gum sye kok wai o re. Yesus Kristus anato men bi Yekwesu gato kak os wa men kem ndo to kapyo mato kapyo.

Matius 1:23

”Nggonnak ge dik yo gato sem su yebris mo nde, bere syimfar, orete nggon ne kem su pa yebris. Pa ne bere ye kendo gum do, Imanuel.” (Imanuel bi sukjimnut do, ”Yefun Allah sisu men kem sino.”)

Yohanes 14:9

Yefun Yesus ki nai Filipus do, ”Ji sisu nin nam it. Filipus, nan jam Ji yo ri nde tó bado? Ye to me Ji it yo, ye ne me Ji bi Ai dom anane it. Sane suma ben anato nan ki do, Ji kadum Ji bi Ai wa nan me ne?

Ibrani 1:8

Sarewo Yefun Allah ki sukdu subot An bi Gan sare do, ”Pa, Nan anato tepsu Ji, Yefun Allah, Nan kem mo yekwesu bi kursi, we Nan gum Yekwesu to kapyo mato kapyo. Nan jom Nan bi rus-i sa, Nan ben Nan bi suk-i mu nai Nan bi rus-i mone ri-roi pe sor.

Yohanes 5:23

Ji bi Ai bes Ji gum wa Ji ndobot yetu subere yé mwa ne sino jammo An bi Gan tepsu yé jammo An. Ye gato yo jammo Ji nde yo, ye ne yo jammo Ji bi Ai gato syogat Ji ma mo bur ré dom nde.

Yohanes 14:28

Nin jam Ji ki do, ’Ji mu kadit nin, sarewo bere Ji satu ma o re.’ Nin bi sukjimnut sye kas subot Ji it yo, bere nin mit iwa Ji mu mo Ji bi Ai. Ji bi Ai anato gum kok sye wai kadit Ji.

Yohanes 1:18

Yetu yo ku Yefun Allah yo mo nde, wo Yefun Allah dakai bi Gan ge dik ne sor ete sisu Yefun Allah. Yesus Kristus si An bi Ai ben suk tepsu dik. Yesus Kristus anato kadum An bi Ai nai men yetu jam re.

1 Timotius 1:17

Sane men un Yefun Allah gato men bi Yekwesu kadit kapyo sor kom mo kapyo. Men bes Yefun Allah gato gesyos ne gum petok sor. Yefun Allah gato men me su men gro nde, men un An sor. Men un Yefun Allah dik ne sor, men bes An gum kok su ré to kapyo mato kapyo. Sangge.

2 Korintus 8:9

Men jam do men bi Yekwesu Yesus Kristus ben An bi suk-i ne ndo dakai yi su men, men yo ben suk yo nyim wa An nde. An tepsu yepasye gato bi suk mwa. An da bi suk mwa, sarewo An ma mo bur ré sa, An bi sukjimnut sye kas subot men yetu anato An ben An nggwa tepsu ye gato yewa suk, subere An kak os ndo wa men, subere ri ma, men ku os wa men ku suk mwa mo Yefun Allah bi de-i o re.