Filipi 2:12 - Abun Scripture

¹² Sane yo, nin, ji bi yesyim gato ji jimnotku, nin benbot ji bi sukduno gato ji ki ré et. Yefun Allah anato nai nin sok mo An bi rus-i wé kadit bot gesyos it, sane nin ben nin bi suk-i tepsu yé gato jammo An et. Suga ji kem su nin tó yo, nin benbot ji bi sukdu petok sor. Sarewo su ré ji yo kem su nin nde, sane nin jammo ji bi sukduno pe, tepsu ji kem si nin tó. Mo suk mwa gato nin ben ne, nin jammo Yefun Allah sor, nin bi nin nggwa mo An, nin ben suk tepsu An mit,

Filipi 2:12 Referans Kwoze

1 Korintus 15:58

Sane, ji bi nji, ji bi nyanggon gato ji jimnotku, nin misyar Yefun nde, wo nin jom Yefun Yesus bi sukdu ne krat sor. Nin samok wa ben men bi Yekwesu Yesus Kristus bi suk-i sor, we nin jam do, suk mwa ne sino gato nin ben wa An ne yo ges yak yi nde.

Ibrani 4:11

Sane men sino wergat men nggwa sisu men mit dik si men onyar dik, subere men si An kem not mo An bi nat-i, tepsu Yefun Allah tom su men ne. Men werwa, subere men bariket Yefun Allah bi sukdu nde, saga nyim ye deyo ben ne, subere ri ma Yefun Allah do watbot men ne yo, men ge dik yo gwet mo nde, wo men yé mwa ne sino kem not mo Yefun Allah bi nat-i.

1 Petrus 2:11

Ji bi nji ji bi nyanggon gato ji jimnotku, nin tepsu yedamok gato muya-muma mo bur ré. Sane nin jammo suk gato ji krom ré et, nin ben suk ket nin í ne o nde. Suk gato nin ben ket nin i ben sato ben sukndi su nin bi sukjimnut gato ndo mo nin mit ne.

Matius 11:29

Ji ben Ji bi suk-i njep, Ji yo bes Ji nggwa kok nde, sane nin bi nin nggwa mo Ji tepsu nin bi Yekwesu, nin jammo Ji bi sukduno, sane bere Ji ós nin kem not.

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

2 Petrus 3:18

Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su ré sor to kapyo mato kapyo. Sangge.

Ibrani 5:9

Sane An ben suk mwa gato Yefun Allah fro wa An ben ne or sa, An kak os wa men yetu gato jammo An muket, subere An nai men wé kadit bot gesyos, subere men kem ndo to kapyo mato kapyo.

2 Timotius 2:10

Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o re.

Ibrani 4:1

Suk gato Yefun Allah tom su ye Israel subere ye Israel kem not mo Yefun Allah bi nat-i ne kwop mone it. Suktom ne ndo wa men tó. Sane men mewa men nggwa subere Yefun Allah do watbot men it yo, men ge dik yo gwet mo nde, wo men yé mwa ne sino kem not mo An bi nat-i tepsu suk gato Yefun tom ne.

Ibrani 12:1

Sane yo, men jam sukdu mwa yé subot yé gato onyar kem mo Yefun Allah ne. Yé gato onyar kem mo Yefun Allah kam nyim ne, yé mwa ne ben sato án wairi wa men, án sokwa suk gato men ben wa Yefun Allah. Sane it yo, men bare suk gato kwawa men ben Yefun Allah bi suk-i wé kadit men et. Men am sukibit gato ut mo men wé kadit men et. Sane suk mwa gato Yefun Allah fro wa men ben ne, men ben sisu men mit dik si men onyar dik et, tepsu ye kas bitanding yu mo perlombaan, ye wergat ye nggwa sisu ye mit dik si ye onyar dik subere ye kas nggi mone sor kom mo pe gato or mó.

Filipi 4:1

Sane yo, ji bi nji, ji bi nyanggon gato ji jimnotku, ji mit at ndo nde mo suk gato nin ben ne. Ji mit iwa dom, tepsu ye gato ku sukndo wai o re. Sane yo, ji bi yesyim, nin jom men bi Yekwesu Yesus Kristus bi sukdu-i ne pe it yo, bere nin benbot suk mwa gato ji krom gado ne sor.

Roma 2:7

Ye gato werwa ben bi suk-i ne ndo, we ye ne kwabom kam mo Yefun Allah do, bere Yefun bes án gum kok mone yo, bere Yefun un án gum mone, bere Yefun kak os wa án kem gesyos mone, bere Yefun Allah kak os wa yé ne kem ndo to kapyo mato kapyo.

1 Tesalonika 1:3

Men ki suk su Yefun Allah, men bi Ai sa, men napawa nin, we men jam do, nin sa, nin onyar kem mo Yefun Yesus, sane anato nin ben suk gato ndo. Men jam do, nin bi sukjimnut sye kas subot ye yi neya, sane anato nin samok wa nin ben sukndo. Men jam do, nin kwabom kam mo men bi Yekwesu Yesus Kristus, sane anato nin misyar Yefun mo nde, wo nin ben An bi suk-i petok sor.

Filipi 1:29

Nin jam do, Yefun Allah ós nin kem ndo, we Yefun Allah syo An bi suktinggi nai nin subere ós nin onyar kem mo Yesus Kristus sor nde, wo An syo An bi suktinggi nai nin subere nin nggi wai kadit sukye gato nin ku ne.

2 Korintus 7:15

Su ré, Titus bi sukjimnut sye kas subot nin wai kadit nyim neya o re, we an napakom nin do, nin sino iwa jammo an, ete nin ku an sa, nin nyu si nin tetet mo an.

1 Korintus 2:3

Ji ba ku nin mone sa, ji kaim rere, ji nyu, ji kaim kro ndo nde.

Efesus 6:5

Pakwerut, nin jammo nin bi yenggras mo bur ré et. Nin ben suk gato nin bi yenggras syogat nin ben ne yo, nin nyuwa nin bi yenggras sor. Nin ben suk wa nin bi yenggras su nin mit dik si nin onyar dik tepsu nin ben suk wa Kristus et.

Matius 11:12

Kadit kam gato Yohanes duno nje kom mo kam ré, Ji duno nje subere án onyar kem mo Ji ete sok mo Yefun Allah bi rus-i. Yetu mwa o jammo Ji bi sukduno-i, sarewo yé bok yo ma ben sukye nai ye gato brek ete jammo Ji bi sukduno-i ne. Ye Farisi si yeguru gato duno nje su Musa bi sukduno-i ne anato wergat nje subere án misyar Ji bi sukduno-i ne or re.

Filipi 1:5

Ji mit at wa ji ki suk su Yefun wa nin, we nin ós ji mu frot sukdu subot os ndo gato Yesus Kristus kak wa men yetu ne nai ye yi jam, kadit kam ketke gato nin onyar kem mo Yefun sor kom mo kam ré.

Suk Gato Yerasul Ben Ne 9:6

Nan ben suk sane o nde, wo ré yo, nan sun nan mu mo kota Damsyik et. Mone yetu ge dik yo bere ki rer nai nan subot suk gato bere Ji syaugat nan ben ne.”

Filipi 2:19

Sane yo, ji kwabom kam mo men bi Yekwesu Yesus Kristus do, bere An kak os wa ji subere ji syokom Timotius ba ku nin, subere Timotius gwat sukdu kadit nin satu ma wa ji more. Ji do jam sukdu subot nin ne yo, ji yo kwabom dek subot nin teker o nde.

1 Korintus 4:14

Ji krom sukdu ré, ji yo iwa ji ben nin damen nde, wo ji nut mo nin do, nin tepsu ji bi pa, sane ji duno nin.

Filipi 4:15

Ji bi nji, ji bi nyanggon gato kem mo Filipi, nin dakai jam do, subot os ndo gato Kristus kak wa men yetu ne, ji ba duno nin nyim, orete ji mu kadit nin bi bur-i mo Makedonia sa, nin yé gato onyar kem mo Yefun Yesus mo nu ari mone sor ete ós ji. Nin sor si ji tepsu yedik, ete nin syo suk wa ji, tepsu nin si ji ben suk sino.

Suk Gato Yerasul Ben Ne 16:29

Yekwesu mo penjara ne, an syogat ye gwat sukru ma, an kas ngga mo gumwak mit, an kwabom kro, an bare nggwa mo Paulus si Silas gwem.

Filipi 1:6

Ji kwabom kam mo Yefun Allah do, Yefun Allah gato ben nin ti nggi wa nin ben An bi suk-i su ketke, bere An ben sukndo su nin gat sor, kom mo pe gato or mó, kom mo kam gato Yesus Kristus satu ma mo bur ré re.