Filipi 2:1 - Abun Scripture

¹ Nin sok mo Kristus bi rus-i, sane nin kwabom kam mo An do, bere An mewa nin, sane nin nokwa suk teker nde. Yefun Allah Gen bok nggwa mo nin, sane nin tepsu dik su An, An ós nin subere nin jimnotku yu, nin ben sukndo su yu.

Filipi 2:1 Referans Kwoze

Kolose 3:12

Nin anato sok mo Yefun Allah bi rus-i, An dakai jimnotku nin ndo nde, An bes nin wa nin ben An bi suk-i. Sane anato, nin dakai jimnotku ye yi, nin ben sukndo su ye yi et. Nin bes nin nggwa kok nde, nin ben nin bi suk-i njep su ye yi sor. Kapre nin ku sukye, nin benbot Yefun bi sukdu-i petok sor.

1 Yohanes 4:12

Men yetu yo me Yefun Allah su men gro mo nde, sarewo men do bi sukjimnut sye kas subot yu it yo, bere Yefun Allah si men tepsu dik, ete An ben men nggiwa men bi sukjimnut sye kas subot ye yi sisu sangge tepsu Yefun re.

Kolose 2:2

Suk mwa ré ji ben subere nin si án sino bi sukjimnut nggi, eteyo nin si án bi sukjimnut sye kas subot yu tepsu yedik. Ji ben suk mwa ne subere sukdu gato Yefun Allah gurik kadit men suga nyim tuya ne, nin si án sino jam wa pe kom mo brot marum kai. Sane ji ben suk mwa ne subere án jam do, Kristus gato Yefun Allah yo kadum bor wa men jam suga nyim tuya ne nde, su ré án jam do Kristus bor it.

1 Korintus 12:13

Ben sato men tepsu Kristus kaim, we men sino, kapre men ye Yahudi e, yewis yi e, kapre men pakwerut e, men yé gato dakai ti mo men dakai e, Yefun Allah Gen gato bok nggwa mo men ne anato ben men tepsu Kristus kaim dik ne sor. Men sino men jam Yefun Allah Gen dik ne bok nggwa mo men pe re.

Galatia 5:22

Sarewo men nai sukjimnut dik do, suk gato Yefun Allah Gen kiwa men ben ne yo, bere men ben suk sato ré: Men bi sukjimnut sye kas subot ye yi e; men mit at wa suk gato ndo petok sor e; men si ye yi neya mit ndo su yu e; men yo maskwa kekro nde e; men jimnotku ye gato ku sukye e; men ben sukndo su nje e; suk gato men tom ne men benbot e;

Galatia 4:6

Men anato Yefun Allah bi pá-i, sane anato Yefun Allah syo An bi Gan Gen bok nggwa mo men mit. An bi Gan Gen ben men ki su men mit dik nai Yefun Allah do, ”Ai o, Ji bi Ai o.”

Suk Gato Yerasul Ben Ne 4:32

Ye gato onyar kem mo Yefun Yesus ne sino, án tepsu dik. Kadik-kadik ki do, ji yo bi suk-i are nde, wo men yé mwa ré bi suk-i anare. Án nut do kadik-kadik bi suk o nde, wo yé mwa ne bi suk sino. Sane ye ós yu su suk.

1 Yohanes 3:24

Ye gato benbot Yefun Allah bi sukduno ne yo, bere ye ne si Yefun Allah tepsu dik. Sane dom Yefun Allah si ye ne tepsu dik. Men jam do, Yefun Allah si men tepsu dik, we An syo An Gen bok nggwa mo men it.

Yohanes 17:13

Ji bi Ai, Ji ma mo Nan it anare. Ji mo bur ré tó Ji ki napyo nai án ye gato Nan syo nai Ji ne jam, subere án mit at wa, tepsu Ji dakai mit at wa wai o re.

1 Yohanes 4:16

Men dakai jam do, sangge Yefun Allah bi sukjimnut sye kas subot men. Men kwabom kam mo An do, bere An bi sukjimnut sye kas subot men petok sor. Yefun Allah bi sukjimnut sye kas subot men yetu petok sor. Sane ye to bi sukjimnut sye kas subot ye yi petok ne yo, ye ne si Yefun Allah tepsu dik. Sane dom Yefun Allah si ye ne tepsu dik.

Filipi 3:3

Men ré anato yé gato simo sunat gato sangge, wo án yo simo sunat gato sangge nde re. {Men yo onyar kem mo suk gato án ben sato sunat nde. Ye Israel gato simo sunat, án nut do, án sok mo Yefun Allah bi rus-i it anane. Sarewo sunat ne ye ben mo men kaim de nden ne sor re.} Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

1 Korintus 3:16

Nin dakai anato tepsu Yefun Allah bi nu, nin dakai jam re. Yefun Allah Gen kem mo nin mit it, nin dakai jam re.

Roma 8:26

Sane dom men yo nggi o nde yo, bere Yefun Allah Gen ós men mone. Men jam nde suk gato tep wa men ki su Yefun ne yo, Yefun Allah Gen dakai ós wa ki suk su Yefun Allah tepsu yegweswai wa men, ete men mit ba su sukdu ne, men yo nggiwa ki sukdu ne yo bor sye wa yé jam nde.

Roma 5:5

Men kwabom kam mo Yefun Allah sane bere men damen mone nde, we bere suk gato An tom ne bor mone tó, we men jam do, Yefun Allah Gen gato bok nggwa mo men anato kadum nai men do, Yefun Allah bi sukjimnut sye kas subot men re.

Suk Gato Yerasul Ben Ne 2:46

Kamdik-kamdik án sum sino mo Yefun Allah bi nu de mo ros de mit ne. Án mubot nu, án git sugit sino, án git roti wa napawa Yefun Yesus, án mit iwa, án mit dik wa.

1 Petrus 1:2

Yefun Allah ete mewa nin tep yi sor nde, wo wai o re. Sane dom, Yefun Allah ete uttok nin mo suk mwa ne sino petok sor. Men bi Ai, Yefun Allah nai nin gum sok mo An bi rus-i sagato An fro suga nyim tuya wé re. Yefun Allah Gen bok nggwa mo nin anato nin bi nin nggwa mo Yefun Allah wa nin ben Yefun bi suk-i sor. Sane anato nin jammo Yesus Kristus, ete Yesus Kristus dé gato sye ne ben sato ye dar mo nin mo sukibit gato nin ben ne subere tot sukibit ne or wé kadit nin re.

Ibrani 6:18

Yefun Allah yo kidar subot suk gato An tom su men ne nde. Yefun tom suk su men, or o Yefun syo An syim su sukdu ne dom. Yefun ben suk we ne, anato men jam do, suk gato An tom ne kwop mone it. Sane anato men yé gato brek kadit sukdu yi neya ete kas ma jom suk gato Yefun tom ne, men yo mit we subot sukdu ne nde, wo men mit at wa sukdu ne wai o re.

Filipi 1:8

Yefun Allah jam do, sangge, ji da o ku nin, ji bi sukjimnut sye kas subot nin tepsu Yesus Kristus bi sukjimnut sye kas subot nin ne.

Efesus 4:4

Men yé gato sok mo Yefun bi rus-i ne sino tepsu rus dik, men sino tepsu kaim dik it. Sane dom Yefun Allah Gen ne dik sor. Sane o, men sino kwabom kam mo Yefun do, os dik gato Yefun fro wa men sok mo An bi rus-i ne anato os gato sangge ne it. Os ne dik sor.

2 Korintus 2:14

Men ki ndo mo Yefun Allah, we An gwat men tepsu Kristus bi rus-i gato An but ne ma wa yé mwa neya sokwa ete bes Kristus gum kok mone. Yefun Allah nai men wa men ki sukdu subot Yesus Kristus frekbot peyo-peyo. Men ki sukdu ne frekbot pe mwa ne tepsu nofuf gwat suk gato grik ndo frekbot peyo-peyo.

1 Korintus 15:31

Ji bi nji, ji bi nyanggon, sangge, kamdik-kamdik, bergan ye gu ji kwop rok mo gato ji ben Kristus bi suk-i, wo ji bi ji nggwa mo sukye sane sor, we ji me mo nin do, ji duno nin anato nin onyar kem mo men bi Yekwesu Yesus Kristus ne it, sane ji mit at wa.

Yohanes 14:27

Ji syo suktinggi nai nin subere nin kwabom dek nde, wo nin kem ndo tepsu Ji dakai ré. Ji syo suktinggi nai nin wa nin kem ndo. Ji yo syosuktinggi ne tepsu yetu mo bur ré nde. Sane nin nutbot suk mwa teker nde, nin nyu nde.

Yohanes 14:18

Ji yo misyar nin dakai kem yi nde, Ji yo misyar nin tepsu pa ti nde. Bere Ji satu ma wa nin tó.

Lukas 2:25

Maria si Yusuf gwat Yesus ma kom mo Yerusalem, sugane yetu ge dik yo gato gum do Simeon kem mo kota Yerusalem ne. Simeon ré, an ben sukndo, an ben suk ri tepsu Yefun Allah mit, we an jammo Yefun. An eswa kam gato bere Yefun Allah syogat Yekwesu ma mo bur Israel gato nai ye Israel wé kadit sukye. Yefun Allah Gen sisu Simeon pe.