Filipi 1:27 - Abun Scripture

²⁷ Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Filipi 1:27 Referans Kwoze

Efesus 4:1

Sane, ji gato gum do Paulus ré, gato yé bok mo sel, we ji ben Yefun bi suk-i, ji ki sare do, Yefun Allah nai nin wa nin sok mo An bi rus-i tepsu An bi pá-i. Sane nin ben suk tepsu Yefun bi pá-i ne et. Nin jammo suk gato ji ki ré et.

1 Korintus 1:10

Ji bi nji, ji bi nyanggon, men bi Yekwesu Yesus Kristus bes ji wa ben An bi suk-i, saneyo ji syaugat nin do, nin tepsu dik et. Nin wat yu nde. Nin ben suk tepsu dik. Nin ben suk sino. Nin duwer yu daret o nde. Nin ben suk su nin bi sukjimnut dik, kwa yo gato siri kadit yu mo nde.

2 Petrus 3:14

Sane it yo, ji bi nji ji bi nyanggon gato ji jimnotku, men eswa kam gato Yefun Yesus tom ré it yo, men kamo nde, wo men wergat men nggwa, subere men ben suk mwa ne ndo sor, kwa yo gato ibit mo An gwem mo nde. Sane dom, men werwa men si Yefun Allah kem ndo su yu petok sor.

Kolose 1:10

Men ki suk su Yefun wa nin sane subere nin kem mo bur ré, nin ben nin bi suk-i tepsu Yefun Allah mit, nin ben suk gato An iwa nin ben ne petok sor. Nin ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o re.

Yudas 1:3

Ji bi nji ji bi nyanggon gato ji jimnotku, sangge ji da iwa krom surat wa nin subot os ndo gato Yefun Yesus kak wa men kem ndo to kapyo mato kapyo ne. Ji da iwa krom subot sukdu ne gato men sino jammo mó re, sarewo suk yo ben sato tik ji mit wa ji krom sukduno wa nin subere nin bes sukdu subot Yesus Kristus ne kok o et. Nin jammo suk gato ji krom ré et. Yefun Allah bi sukduno subot Yesus Kristus ne, An grem kem wam dik su men yé gato onyar kem mo Yesus Kristus. Sukdu ne kwa yo gwet mo nde. Sane nin werwa nin bes sukdu ne kok wai kadit sukdu yi neya et. Sane dom nin duwer yé gato ma wa duwer nin mo sukdu ne et. Ji syogat nin ben sane,

1 Tesalonika 4:1

Sane, men bi nji, men bi nyanggon, men duno nin su sukduno gato kadum os wa nin subere nin jam suk gato ndo wa nin ben tepsu Yefun Allah mit it. Nin benbot sukduno ne napyo it. Sarewo su ré men kiwa nin jammo sukduno gato men bi Yekwesu Yefun Yesus tarubot men ne. Nin jammo ete nin werwa nin benbot sukduno mwa ne sino wai kadit nyim neya o re.

Filipi 2:12

Sane yo, nin, ji bi yesyim gato ji jimnotku, nin benbot ji bi sukduno gato ji ki ré et. Yefun Allah anato nai nin sok mo An bi rus-i wé kadit bot gesyos it, sane nin ben nin bi suk-i tepsu yé gato jammo An et. Suga ji kem su nin tó yo, nin benbot ji bi sukdu petok sor. Sarewo su ré ji yo kem su nin nde, sane nin jammo ji bi sukduno pe, tepsu ji kem si nin tó. Mo suk mwa gato nin ben ne, nin jammo Yefun Allah sor, nin bi nin nggwa mo An, nin ben suk tepsu An mit,

Filipi 3:18

Nin simo os ne, we yé mwa werwa ben suk gato Kristus ben ne ibit. Ji ki nai nin wam bok yo mó re. Su ré ji ki nai nin wam dik yo o, ete ji wo su dom do, yé mwa ne ki mo án syokwet do, án ye Kristen, sarewo án ben án bi suk-i tara re. Yesus Kristus kwop mo kwesukwin wa tot suktot mo sukibit gato án ben ne, sarewo án bariwa suk gato Yesus Kristus ben wa án re.

2 Korintus 13:11

Ji bi nji ji bi nyanggon ji bi sukdu tut more, ndo mo nin sor. Ji bi sukdu kwa gato wari anare: nin werwa nin ben nin bi suk-i mwa ne ndo sino sor. Nin jambot sukduno mwa gato ji krom mo surat ré tepsu suknapa wa nin pe et. Nin sino mone bi sukjimnut dik tepsu yu et. Nin kem ndo su yu sor. Nin ben suk bok gare sane bere Yefun Allah gato bi sukjimnut sye kas subot men ete uttok men sino ne, bere Yefun sisu nin petok sor.

Suk Gato Yerasul Ben Ne 4:32

Ye gato onyar kem mo Yefun Yesus ne sino, án tepsu dik. Kadik-kadik ki do, ji yo bi suk-i are nde, wo men yé mwa ré bi suk-i anare. Án nut do kadik-kadik bi suk o nde, wo yé mwa ne bi suk sino. Sane ye ós yu su suk.

2 Petrus 3:11

Bere Yefun Allah ben suk mwa ré ibit or re, sane men yé gato kem mo bur ré yo, men ben men bi suk-i sa u ne? Men ben sare, men ben Yefun Allah bi suk-i su men mit dik si men onyar dik, men bi men nggwa mo Yefun wa men ben An bi suk-i sor.

1 Korintus 15:58

Sane, ji bi nji, ji bi nyanggon gato ji jimnotku, nin misyar Yefun nde, wo nin jom Yefun Yesus bi sukdu ne krat sor. Nin samok wa ben men bi Yekwesu Yesus Kristus bi suk-i sor, we nin jam do, suk mwa ne sino gato nin ben wa An ne yo ges yak yi nde.

Roma 1:16

Ji mit kem pe mo sukdu subot os ndo gato Yesus Kristus kak ne, ji yo damen wa nde, we Yefun Allah bi suktinggi bor mone anato yé mwa gato onyar kem mo Yesus Kristus ne sino, ku os wa án titi fro wé kadit bot gesyos, ete kem ndo to kapyo mato kapyo. Yefun Yesus kak os ne wa ye Yahudi sor nde, wo Yefun Yesus kak os ne wa yewis yi neya dom re.

Yakobus 3:18

An ben an bi suk-i tepsu yegweswai gato iwa yetu mwa ne kem ndo su yu. Tepsu ye jan sukjan gro ete bere sugit bor mone, an werwa os yetu kem ndo su yu anato ri ma suk mwa gato ndo bor mone.

Filemon 1:5

we, ji jam sukdu do, nan sa, onyar kem mo men bi Yekwesu Yefun Yesus sisu nan mit dik. Sane dom, ji jam sukdu o do, nan bi sukjimnut sye kas subot ye gato onyar kem mo Yefun Yesus mone sino.

Titus 2:10

Án syimsi án bi yenggras bi suk nde, wo án ben bi án suk-i ndo sor, subere án bi yenggras mit kem mo án. Án ben suk mwa sane subere ye yi me suk gato án ben tepsu Yefun Allah bi sukduno-i, ete ye mit iwa Yefun Allah bi sukduno-i mone. Yefun Allah anato fro os ndo wa men kem ndo to kapyo mato kapyo.

2 Timotius 4:7

Ji sa, ji wergat ji nggwa sor kom mo pe gato or mó, tepsu ye gato kas bitanding yu kas sor kom mo pe gato or mó. Ji sa, ji onyar kem pe mo Yefun Yesus sor kom mo pe gato or mó, ji yo brek kadit An nde.

1 Timotius 1:19

Nan jom sukdu subot Yefun Yesus gato sangge, ete nan duwer yé gane sor. Sane dom nan kidar nan dakai nde, wo nan jammo sukjimnut gato ndo mo nan mit petok sor. Yé bok yo jammo án bi sukjimnut gato ndo mo án mit o nde anato án ges mo os siri, án yo onyar kem mo Yefun Yesus o nde,

1 Timotius 1:11

Sukduno gato sangge ne anato sukdu gato ndo wai subot os ndo gato Yesus Kristus kak wa men yetu ne. Yefun Allah gato gum kok wai anato fro sukdu ne, ete An tarubot ji, subere ji ki frekbot nje mo peyo-peyo.

Suk Gato Yerasul Ben Ne 2:46

Kamdik-kamdik án sum sino mo Yefun Allah bi nu de mo ros de mit ne. Án mubot nu, án git sugit sino, án git roti wa napawa Yefun Yesus, án mit iwa, án mit dik wa.

Matius 12:25

Yefun Yesus jam ye Farisi bi sukjimnut ne sa, An ki nai ye Farisi ne do, ”Yé gato kem mo bur dik yo, maskwa ket yu, ete gu yu yo, bere án yo kem ndo su yu o nde, bere án ibit or re. Sane dom, yetu mo kota dik yo si yé mo rus dik yo do maskwa ket yu, ete duwer yu yo, bere yé mo kota si rus ne yo kem ndo su yu o nde, bere án ibit or re.

1 Tesalonika 3:6

Su ré Timotius satu ma more re. An ma ki nai men do, nin onyar kem mo Yesus Kristus tó, nin bi sukjimnut sye kas subot yu tó, sane men mit iwa sukdu ne. An ki o do, nin jimnotbot men ndo nde. An ki do, nin mit iwa ku men, tepsu men dom, men mit iwa ku nin.

Filipi 2:24

Ji kwabom kam mo Yefun do, bere An kak os wa yepasye sombok ji kadit sel ré. Yé do sombok ji it yo, bere ji ba ku nin mone dom.

Efesus 1:15

Sane, kadit kam gato ji jam do, nin yé Efesus onyar kem mo men bi Yekwesu Yefun Yesus, ete nin bi sukjimnut sye kas subot ye gato onyar kem mo Yefun Yesus ne sino sa,

Efesus 1:13

Nin ye Efesus dom jam Yefun Allah bi sukdu subot os ndo gato Yesus Kristus kak ne. Sukdu ne ós nin kem ndo to kapyo mato kapyo. Nin jam, orete nin onyar kem mo Yesus Kristus, sane anato nin sok mo Yefun Allah bi rus-i ne it. Nin onyar kem mo Kristus, sane Yefun Allah bok An Gen mo nin tepsu An tom ne, subere yé jam do, nin anato Yefun Allah bi pá-i it.

Galatia 1:7

sarewo sukdu ne yo ndo mo nde. Yé bok ne duno nin su án dakai bi sukdu-i gato siri kadit Kristus bi os-i gato Yesus Kristus kak wa men sok mo Yefun Allah bi rus-i. Yé bok ne kidar nin do, án bi sukdu-i ne tepsu Kristus bi sukdu-i, wo yé bok ne bi sukdu-i tara re, sane anato án ben nin nalar o re.

2 Korintus 9:13

Nin do syo sugum ne mu kom motu it yo, bere Yefun Allah bi rus-i mwa mo bur Yudea bes Yefun Allah gum kok o re, we án me do, nin sa, nin sibot os ndo gato Yesus Kristus kak ne sisu ri-roi. Sane dom, bere án bes Yefun Allah gum kok, we nin syo suk mwa kadit suk gato nin ku ne dakai yi nai án si ye yi neya.

2 Korintus 4:4

Yé gato jam nde Yefun yo, bere án yo but sukdu ne ri nde, we biris bi yekwesu gato bes nggwa kok ete werwa jom yetu mo bur ré ne rai yé ne bi sukjimnut-i ne krat mo ndendu bi suk-i re. Sukdu subot os ndo gato Yesus Kristus kak wa men yetu ne bi suktinggi bor mo bur ré tepsu sukru sye wa men, Kristus kadum Yefun Allah rer wa men jam, sarewo biris bi yekwesu ben suk yawa yé gato jam nde Yefun ne anato yé ne yo jambot sukdu ne nde.

Roma 15:29

Ji do ba ku nin it yo, bere ji ben sukndo su nin tepsu Kristus ben sukndo su men mo suk mwa ne sino.

Roma 15:16

Ji anato tepsu Yesus Kristus bi pakwerut gato An syogat mu ki subot An bi sukdu nai yewis yi neya. Ji ben suk tepsu yegweswai gato gwat Yefun Allah bi sukdu subot os ndo gato Yesus Kristus kak ne mu wa ki nai yewis yi jam. Ji mu ki sukdu ne subere yewis yi ne brek kadit os ibit ete jammo Yefun Allah yo, bere án tepsu suksom gato tep wa yé som Yefun Allah su ne, bere Yefun Allah kak Yefun Allah mit wa án.

Roma 10:8

Sarewo men yé gato simo os ndo gato Kristus kak ne, men ki sare do, ”Sukdu subot Kristus ne ma kom mo nin it, nin ki subot sukdu ne petok sor, nin grem sukdu ne pe mo nin mit mó re.” Sukdu gato men ki frekbot nin anato nin onyar kem mo sukdu subot Yesus Kristus sor.

Roma 1:9

Ji ki suk su Yefun Allah yo, ji napawa nin petok sor. Sangge, ji yo kidar nde, Yefun Allah gato ji ben suk wa ne, An dakai jam sukdu gato ji ki ré sangge, ji yo kidar nde. Ji ben Yefun Allah bi suk-i su ji mit dik si ji onyar dik, ji mu ji ki sukdu subot os ndo gato An bi Gan kak wa men yetu ne. Yefun Allah gato ji ben suk wa ne jam do, ji sa, napawa nin pe re.

Roma 1:5

Yefun Allah syogat Yesus Kristus ma mo bur ré anato ji ku suktinggi wa ji ben suk tepsu yerasul. Sane ji iwa bes Yesus Kristus gum kok mone. Ji iwa bes Yesus Kristus gum kok, sane anato ji mu ben Kristus bi suk-i. Ji mu duno yewis ye Yahudi nde, wo ji mu duno yewis yi mwa ne sino mo bur ré, subere án onyar brek ete kem pe mo Yesus Kristus, orete án benbot sukdu gato Yesus Kristus ki ne.

Suk Gato Yerasul Ben Ne 24:24

Kam bok yo o, Feliks si bi nggon gato gum do Drusila, mom ye Yahudi, an we ma mo kota ne o. Feliks kiwa ye mu kar Paulus ma. Paulus ma, orge Feliks syaretwa Paulus ki sukdu subot os ndo gato Yesus Kristus kak wa men yetu ne. Paulus ki do, ye gato onyar kem mo Yefun Yesus, bere Yefun Allah nai ye ne gum sok mo An bi rus-i.

Filipi 1:5

Ji mit at wa ji ki suk su Yefun wa nin, we nin ós ji mu frot sukdu subot os ndo gato Yesus Kristus kak wa men yetu ne nai ye yi jam, kadit kam ketke gato nin onyar kem mo Yefun sor kom mo kam ré.

Filipi 3:20

Wo men ré yo tepsu án nde. Men gum sok mo Yefun Allah bi rus-i mo gu it. Su ré men eswa men bi Yekwesu satu ma mo bur ré kadit gu ne. Men bi Yekwesu anato Yesus Kristus gato kak os wa men kem ndo to kapyo mato kapyo mo Yefun Allah bi nat-i.

Filipi 4:1

Sane yo, ji bi nji, ji bi nyanggon gato ji jimnotku, ji mit at ndo nde mo suk gato nin ben ne. Ji mit iwa dom, tepsu ye gato ku sukndo wai o re. Sane yo, ji bi yesyim, nin jom men bi Yekwesu Yesus Kristus bi sukdu-i ne pe it yo, bere nin benbot suk mwa gato ji krom gado ne sor.