Filipi 1:21 - Abun Scripture

²¹ Ji dakai bi sukjimnut do, ji mbau yo, ji ben suk wa Yesus Kristus sor, wo ji kwop yo, ji ku suk gato ndo wai it anane.

Filipi 1:21 Referans Kwoze

Galatia 2:20

Ben sato ji si Yesus Kristus kwop sino mo kwesukwin it. Sane ji dakai anato kem ré nde, wo Yesus Kristus anato kem mo ji mit. Ji onyar kem mo Yefun Allah bi Gan gato bi sukjimnut sye kas subot ji ete bi An nggwa kwop wa ji anato ji nggiwa ji kem mo bur ré re.

2 Korintus 5:8

Sane men bi sukjimnut kem pe mo suk gato Yefun fro wa men ne. Men iwa men sombok kadit men da kridek ré, ete men si Yefun sino kem mo nat gato An fro wa men ne.

2 Korintus 5:1

Men kaim ré tepsu nu ti gato men kem mó, mo bur ré. Sane men jam do, nu ti ne ye do rus wé it yo, bere Yefun Allah fro nu be wa men mo gu. Yetu yo nggo nu mo gu nde, wo nu gato Yefun Allah dakai fro wa men mone bere kem krat to kapyo mato kapyo.

Filipi 1:23

Ji nutbot os kwa we ré tó. Ji jam nde os u anato ndo wai ne? Kwa dik yo anato ji iwa ji mu kadit bur ré, ete ji mu kem su Yesus Kristus. Ji nut do, ji do si An kem sino it yo, ndo wai o re anane.

Kolose 3:4

Kristus anato kak os wa nin anato nin kem ndo. Sane An satu ma mo bur ré yo, bere Yefun Allah bes nin si An gum kok sino.

2 Korintus 5:6

Sane men bi sukjimnut kem pe mo suk gato Yefun Yesus fro wa men ne petok sor. Men jam do, men kem mo bur ré tó yo, men kem os syu kadit nu gato Yefun fro mo gu wa men si An kem mone.

Filipi 1:20

Bere su kam gato yepasye ndo ji subot suk gato ji ben ne yo, ji mit iwa do, ji yo damen mo an gwem nde. Ji nut do, sangge bere ji yo nyuwa ji ki sukdu subot Kristus nai an nde. Sane yo, ji kwop o, ji mbau o, mo suk sino gato ji ben ne, ji bes Yesus Kristus gum kok petok sor.

Wahyu 14:13

Orete ji jam sukdu kadit gu ne sare do, ”Nan krom sare do: Kadit kam ré yo, yé gato ben Yesus Kristus bi suk-i, ete kwop mone, yé ne sa, mit at wa, we bere Yefun ben sukndo su án.” Yefun Allah Gen ki do, ”Sangge, yé ne ku suk mwa gato ndo mo suk gato án ben ne. Sane yé ne yo mitwa ben suk mwa o nde, wo án kem not kadit re.”

Galatia 6:14

Wo ji dakai yo bes sukdu daret sane kok mo nde, wo ji bes sukdu subot men bi Yekwesu Yesus Kristus gato kwop mo kwesukwin ne kok sor. Ji bes sukdu subot Yesus Kristus mo kwesukwin ne kok wai, sane anato ben sato ji kwop kadit sukdu daret gato ye ki subot sunat e ne. Sukdu daret gato yé ki mo bur ré, ji misyar or re.

1 Korintus 1:30

Yefun Allah dakai fro os wa men si Yesus Kristus tepsu dik. Yesus Kristus ne kak men bi sukjimnut. Yesus Kristus ne kak os wa men sok mo Yefun Allah bi rus-i. Yesus Kristus kak os wa men ben Yefun Allah bi suk-i sor. Yesus Kristus tot suktot wa men mo sukibit gato men ben ne wé. Men dakai yo ben suk gato ben to Yefun Allah nai men gum sok mo An bi rus-i nde.

Filipi 2:21

Sarewo yé mwa gato kem more meret suk wa án dakai sor re, án yo nutbot Yesus Kristus bi suk-i nde.

1 Korintus 3:22

Yefun Allah fro yetu wa ós nin jam suk gato ndo sato: ji e, Apolos si Petrus. Bur ré, Yefun Allah fro wa men. Suga men kem mo bur ré sor kom mo kam sari ne ma, men kwop o, men mbau o, suk mwa ne sino, Yefun anato fro wa men, tepsu men bi suk.

Filipi 1:22

Ji do kem mo bur ré yo, bere ji ben suk mwa gato ndo tó. Sane ji nutbot or et. Kwa u ana ndo wai ne? Ji kwop bado, ji mbau bado, ji jam nde tó.