Filipi 1:20 - Abun Scripture

²⁰ Bere su kam gato yepasye ndo ji subot suk gato ji ben ne yo, ji mit iwa do, ji yo damen mo an gwem nde. Ji nut do, sangge bere ji yo nyuwa ji ki sukdu subot Kristus nai an nde. Sane yo, ji kwop o, ji mbau o, mo suk sino gato ji ben ne, ji bes Yesus Kristus gum kok petok sor.

Filipi 1:20 Referans Kwoze

1 Petrus 4:16

wo nin ku sukye mo sukndo gato nin ben tepsu ye Kristen ne yo, nin damen wa nde, wo nin un Yefun Allah gum, we yé jam do, nin anato sok mo Kristus bi yetuge-i.

1 Korintus 6:20

we Yefun Allah bi Gan bi nggwa wa nai nin re. Yefun Allah syogat Yefun Yesus ma kwop wa tot suktot mo sukibit gato nin ben ne. An bi An bi Gan kaim wa so nin su it anane. Nin sok mo An it. Sane nin bi nin nggwa wa nin ben Yefun Allah bi suk-i, nin ben suk su nin kaim subere yé bes Yefun Allah gum kok mone sor.

1 Tesalonika 5:23

Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur ré it yo, ye yo ku os wa ki nin gum ibit mo suk yo mo nde.

1 Yohanes 2:28

Sane ji kiwa nin, ji bi pá nin do, nin si Kristus tepsu dik petok sor, subere su kam gato An satu ma ne yo, bere nin ku An tepsu nin bi yesyim, bere nin damen wa An nde.

Filipi 2:17

Nin onyar kem mo Yefun Allah it. Nin bi nin nggwa mo An, nin samok wa nin ben An bi suk-i. Suk mwa gato nin ben ne anato tepsu suksom gato nin gwat wa som Yefun Allah su ne. Sane ji mit at mo suk mwa gato nin ben ne. Yé bok ji mo sel ré mo gato ji ki subot Kristus. Sarewo yé do gu ji kwop it yo, ji mit at tó, we ji do kwop it yo, ben sato ji waii grem suk yo tó suk mwa gato nin gwat wa som Yefun Allah su ne.

Roma 8:19

Suk bok ne sino gato Yefun ut ne eswa kam gato Yefun Allah ma kadum An bi rus-i nai suk bok ne sino jam. Suk bok gato Yefun ut ne sino mit iwa jam nje gato sok mo Yefun Allah bi rus-i.

2 Korintus 10:8

Ji dakai un ji dakai mo suktinggi gato Yefun syo nai ji dom, ji yo damen nde, we Yefun yo syo suktinggi wa ji ben nin ibit su nde, wo Yefun syo suktinggi nai ji subere ji nggiwa ji ós nin onyar kem mo Yefun nggi wai o kadit nyim ne re.

2 Korintus 4:10

Sukye gato Yesus Kristus ku ne sor kom mo An kaim-i kwop ne, men waii ku sukye sane mo men kaim-i petok sor. Men ku sukye mo men kaim budat tepsu Yesus Kristus ku ne subere men ben men bi suk-i mo bur ré tepsu Kristus ben An bi suk-i bor wa yé mwa me.

1 Korintus 7:34

Sane yekra ne iwa ben suk tepsu an bi nggon mit. An iwa ben suk tepsu Yefun Allah mit dom anato ben an bi sukjimnut we mone. Nggon gato kra nde, mom bi sukjimnut sye mo Yefun bi suk-i. Mom iwa mom bi nggwa mo Yefun Allah wa ben Yefun bi suk-i sisu mom mit dik si mom onyar dik sor. Sarewo nggon gato kra it yo, mom bi sukjimnut sye mo suk mwa mo bur ré, we mom iwa mom ben bi suk-i tepsu mom bi ya mit.

Roma 5:5

Men kwabom kam mo Yefun Allah sane bere men damen mone nde, we bere suk gato An tom ne bor mone tó, we men jam do, Yefun Allah Gen gato bok nggwa mo men anato kadum nai men do, Yefun Allah bi sukjimnut sye kas subot men re.

Kolose 1:24

Su ré ji mit at mo sukye gato ji ku wa nin, we sukye gato Kristus ku ne anato ji waii ku nap ta ré. Kristus ku sukye nap sye wa bi rus-i or re. Or o ji waii ku sukye ne napta wa yé mwa gato onyar kem mo Kristus, yé mwa ne tepsu Kristus kaim.

Roma 12:1

Sane, ji bi nji, ji bi nyanggon, Yefun Allah dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor. Sane nin benbot suk gato ji ki ré et: Tepsu suga nyim yé gu suge kwop wa yé som Yefun su ne, su ré men bi men nggwa su mbau wa men som Yefun su et. Men werwa men bi men nggwa wa men ben Yefun bi suk-i tepsu An mit sor. Men som Yefun Allah su sangge it anane.

Filipi 1:14

Yé rai ji mo sel ré sane anato Yefun ós ye gato onyar kem mo Yefun Yesus mo kota ré, bergan yé mwa ne sino, án yo nyuwa ki Yefun Allah bi sukdu saga nyim ne o nde. Án yo nokwa nje gato ben sukye nai án o nde.

2 Korintus 7:14

Suga nyim ji un nin gum mo Titus gwem, sane Titus ba ku nin sa, nin ben nin bi suk-i sisu ndo tepsu ji un nin gum mone, anato ji yo damen mo sukdu gato ji ki nai Titus nde. Tomgato men si nin mone, sukdu mwa gato men ki nai nin ne sino sangge re. Sane sukdu mwa gato men un nin gum mone, gato men ki nai Titus ne, sukdu bok ne sino sangge dom.

2 Korintus 5:15

Kristus kwop win men sino anato men yé gato kem mo bur ré, men ben men bi suk-i wa men dakai o nde, wo men ben suk wa Yesus Kristus gato kwop ete sun kadit sukkwop wa men o re.

1 Korintus 15:31

Ji bi nji, ji bi nyanggon, sangge, kamdik-kamdik, bergan ye gu ji kwop rok mo gato ji ben Kristus bi suk-i, wo ji bi ji nggwa mo sukye sane sor, we ji me mo nin do, ji duno nin anato nin onyar kem mo men bi Yekwesu Yesus Kristus ne it, sane ji mit at wa.

Roma 9:33

Yenabi dik yo krom sukdu gato Yefun Allah ki subot Kristus tepsu jok ne sare do, ”Nin me more et, Ji grem jok dik yo mo nat gato gum do Sion. Yé gato gwes ti mó jok, bere án ges. Sarewo ye gato kwabom kam mo jok ne yo, bere ye ne damen nde, wo ye ne jam do, suk gato jok ne fro bere bor mone sor.”

Roma 6:19

Nin bi sukjimnut yo nggiwa but sukdu gato ji ki ré sisu ndo nde, sane anato ji gwat sukamno subot suk gato nin dakai jam re, subere nin but sukdu ré ndaf re. Suga nyim ne nin bi nin nggwa tepsu pakwerut wa nin ben suksiri si sukdaret ket nin í, ben sato sukibit jom nin re. Nin bi nin gro e, nin syim e, nin gwes e ne wa ben suksiri si sukibit ne su sane sane sor, kom mo rut sa, nin ben sukibit mwa wai o re. Sane su ré yo, nin bi nin gro e, nin syim e, nin gwes e ne, nin bi nin nggwa ne sino tepsu pakwerut wa benbot suk gato tepsu Yefun Allah mit ne sor. Sane bere kom mo rut, nin ben suk gato Yefun Allah dakai fro wa nin ben ne sor re.

Roma 6:13

Men bi men gro e, men syim e, men gwes e ne wa benbot sukjimnut ibit ne o nde. Men bi men nggwa wa ben sukdaret o nde, wo men bi men nggwa sino mo Yefun Allah sor. Men anato tepsu ye gato Yefun Allah nai wé kadit os sukkwop wa kem ndo satu. Sane men bi men nggwa sino mo Yefun Allah sor. Men bi men nggwa sino wa men ben suk gato tepsu Yefun Allah mit sor.

Suk Gato Yerasul Ben Ne 21:13

Sarewo Paulus ki do, ”Nin wo, nin wergat ji, nin ben ji kwabom kro sare nde. Ji ben ji bi Yekwesu Yefun Yesus bi suk-i, sane ji fro wa ji ku sukye mone sor nde, wo ji fro wa ji kwop wa Yefun Yesus mo Yerusalem dom.”

Suk Gato Yerasul Ben Ne 20:24

Sarewo ji yo bi sukjimnut subot ji dakai teker eta nde, wo ji nut mo suk gato Yefun Yesus syogat ji ben anato sye. Ji werwa ji ben suk gato men bi Yekwesu Yesus Kristus syogat ji ben ne, ji werwa ji ben wa pe sane sor, dakai or su. Yesus Kristus syogat ji mu ki sukdu subot os ndo gato Yesus Kristus kak wa men yetu nai nje jam. Kapre men yetu yo ben suk yo nyim wa An nde, Yefun Allah dakai bi sukjimnut sye kas subot men anato An fro os ndo wa men yi sor.

Yohanes 21:19

(Yefun Yesus ki sukdu ne subot suk gato bere bor mo Petrus su kam sari ne ma. Yefun Yesus ki rer subot os gato bere ye gu Petrus kwop su ne, ete ri ma yé bes Yefun Allah gum kok mone.) Yefun Yesus ki sukdu ne or sa, An ki nai Petrus o do, ”Nan ma simo Ji et!”

Suk Gato Yerasul Ben Ne 4:31

Án sino ki suk su Yefun Allah, orge nat gato án sum mone gwi. Yefun Allah Gen bok nggwa mo án sino. Án sino mu, án ki Yefun Allah bi sukdu subot Yefun Yesus, án yo nyuwa nde.

2 Korintus 3:12

Men bi sukjimnut kem pe mo os be ne it, sane anato men werwa men ki subot os ne sor. Men yo nyuwa men ki subot os ne mo nde, wokgan yo dom nde.

2 Korintus 7:4

Ji kwabom kam mo nin sare do, bere nin benbot sukdu gato ji duno nin su ne tó. Ji nut subot nin sa, ji mit at wa nin ndo nde. Kapre ji ku sukye mwa, ji napakom nin anato ji yo nutbot sukye ne teker eta o nde, ji kem not kadit sukye ne sor. Ji mit at wa nin ndo nde.