Filipi 1:10 - Abun Scripture

¹⁰ subere nin jam suk mwa gato ndo wai wa nin ben ne, orete nin ben suk gato ndo ne bu sor. Ji ndek mo Yefun subere ye yo ku os wa ki nin gum ibit mo suk yo mo nde kom mo kam gato Yesus Kristus satu ma mo bur ré re.

Filipi 1:10 Referans Kwoze

Roma 12:2

Men ben men bi suk-i tepsu yetu mo bur ré ben bi suk-i ne o nde, wo men bi men nggwa mo Yefun Allah subere Yefun Allah win men bi sukjimnut-i su sukjimnut-i gato be o re. Sane bere men ku os wa men jam suk mwa gato tepsu Yefun Allah mit re, bere men jam suk gato ndo, bere men jam suk gato Yefun Allah iwa men ben ne, kwa yo gwet mo nde.

1 Tesalonika 3:13

Sane bere Yefun ben nin mit kem mo Kristus nggi wai o, subere men bi Yekwesu Yefun Yesus si ye gato sok mo An bi nje-i ne, satu ma mo bur ré yo, bere nin ti mo men bi Ai, Yefun Allah gwem, ete bere nin tepsu ye gato ben nin bi suk-i ndo sor, kwa gato ibit yo mo nde.

1 Tesalonika 5:23

Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur ré it yo, ye yo ku os wa ki nin gum ibit mo suk yo mo nde.

Roma 2:18

Nin jam ye Yahudi bi sukduno ne, sane anato nin jam suk gato ndo wa nin benbot, nin jam suk gato Yefun Allah iwa nin benbot ne, nin jam suk gato ndo kadit suk gato ibit ne re.

Efesus 5:10

Nin werwa nin jam suk gato Yefun Allah iwa nin ben ne et.

1 Yohanes 4:1

Ji bi nji ji bi nyanggon gato ji jimnotku, yé mwa ki do, Yefun Allah Gen bok nggwa mo án, sane sukdu gato án ki ne ma kadit Yefun Gen. Sarewo nin jammo án bi sukdu-i kekro nde, nin watbot sukdu ne kom-kem et, subere nin jam do, án ku án bi sukdu-i kadit Yefun Allah Gen bado, án ku án bi sukdu-i kadit suk yi neya e? Sane nin watbot sisu ndo et, we su ré yenabi mwa gato kidar suk mu ki bi sukdu-i bot peyo-peyo mó re.

Filipi 1:6

Ji kwabom kam mo Yefun Allah do, Yefun Allah gato ben nin ti nggi wa nin ben An bi suk-i su ketke, bere An ben sukndo su nin gat sor, kom mo pe gato or mó, kom mo kam gato Yesus Kristus satu ma mo bur ré re.

1 Tesalonika 5:21

Sukdu mwa gato yé ki nai men yo, men nutbot sisu ndo et, orete kwa gato ndo yo, men jowa pe,

1 Korintus 1:8

Yefun Allah mewa nin sane sor kom mo pe gato or mó, subere tepsu kam gato men bi Yekwesu Yesus Kristus, satu ma mo bur ré yo, sukibit yo ut mo nin mo nde, wokgan yo dom nde.

Wahyu 2:2

Ji jam subot suk mwa gato nin ben ne. Ji jam do, nin ben nin bi suk-i, nin samok. Kapre nin ku sukye, nin misyar Ji nde, wo nin ben Ji bi suk-i pe sor. Ji jam do, nin yo kak nin mit wa ye gato ben sukibit bu ne nde. Ji jam do, nin watbot yé bok yo gato ki do, án sa, Yefun Allah bes án gum yerasul wa ben Yesus Kristus bi suk-i. Nin watbot yé bok gato ki sane sor nin jam do, yé bok ne kidar.

Efesus 5:27

Sane anato Kristus fro men sino gato onyar kem mo An ne kwo ndo mo An dakai gwem. An fro men subere men da ibit nde, men dini bor mo nde, men brot bor mo nde, men wip no mo nde, suk yo gato ibit mo men kaim ne yo mo nde, wo suk mwa mo men kaim ne ndo sino. Yesus Kristus bi sukjimnut sye kas subot men digane.

Yohanes 1:47

Yefun Yesus me Natanael ma ku An sa, An kibot Natanael do, ”Ye Israel gato sangge anato ma ré. Ye ré yo kidar suk yo mo nde.”

Matius 16:23

Yefun Yesus brek ete ki nai Petrus do, ”Nan ki sukdu yawa os wa Ji nde, biris bi yekwesu bi sukjimnut-i kone! Nan bi sukjimnut-i ne ben sukye wa os wa Ji. Nan gwat sukjimnut ne mu ko kadit Ji se! Nan bi sukjimnut-i yo ma kadit Yefun Allah nde, wo nan bi sukjimnut-i ma kadit yetu sor re.”

2 Korintus 1:12

Men dakai un men dakai wokgan, we men dakai jammo men bi sukjimnut gato ndo mo men mit sare do: Men ben men bi suk-i su yé mwa mo bur ré sa, Yefun Allah ben men nggiwa men ben men bi suk-i sisu ri-roi sor, sukibit yo ut mo men nde. Sane dom, men ben men bi suk-i su nin ndo wai kadit ne o re. Men ben men bi suk-i ne, men yo nai men bi sukjimnut-i mo yetu gato jam suk mwa mo bur ré bi sukjimnut-i nde, wo Yefun Allah ben sukndo su men anato An ben men nggiwa men ben suk gato ndo su nin re.

Roma 12:9

Men ben kidar do, men bi sukjimnut sye kas subot nje, wo men mit-i tara re, bere siri re, wo men bi sukjimnut sye kas subot nje sisu sangge. Men bariket suk gato ibit. Men jom suk gato ndo ne pe sor.

Roma 8:7

Ye gato bi sukjimnut-i kem pe mo yetu bi sukjimnut ibit ne, ye ne tepsu yeko wa Yefun Allah. Ye gane yo iwa jammo Yefun Allah bi sukduno-i nde, ye ne yo nggiwa benbot dom nde.

Matius 26:33

Petrus ki nai Yefun Yesus do, ”Kapre pa ge bok ré misyar Nan, ji ré yo misyar Nan nde, wokgan yo dom nde.”

Filipi 1:16

Ye gato mit kwo ne, án ki sukdu subot Yesus Kristus, we án bi sukjimnut sye kas subot ji si Yefun Allah sino. Án ki sukdu subot Yesus Kristus, we án jam do, Yefun Allah bes ji wa ji ki rer subot os ndo ne sare do, os ne sangge.

Efesus 6:24

Nin yé gato bi sukjimnut sye kas subot men bi Yekwesu Yesus Kristus sane sor yo or mo nde yo, Yefun Allah ete mewa nin sino sor.

Efesus 4:15

Men yo kidar suk sane nde, wo men ki men bi sukdu-i ri-roi sor. Men bi sukjimnut sye kas subot ye yi anato men kidar suk wokgan yo dom nde, wo men ki men bi sukdu-i ri-roi, subere men ben men bi suk-i tepsu Kristus ben An bi suk-i mwa ne sino. Kristus anato tepsu yetu su mo kaim.

Galatia 5:11

Ji bi nji, ji bi nyanggon, yé bok yo ki do, ji anato duno nje do, men simo sunat yo, bere Yefun Allah nai men sok mo An bi rus-i. Ji yo ki sane nde, wo yé ki do, ji duno nje su sukduno sane mó tó. Ji do duno nje su sukduno sane yo, suma ben anato yé maskwa ji tó ré ne? Ji do duno nje su sukduno sane yo, yé maskwa mo sukdu gato ji ki subot Yesus Kristus gato kwop mo kwesukwin ne wa suma ne?

2 Korintus 8:8

Ji yo ki sukdu ré tepsu ji syaugat nin nde, wo ji bes sukndo gato nje mo Makedonia ben su ye yi ne, subere ji jam do, nin bi sukjimnut sye kas subot ye yi digane sisu sangge dom bado, nde e?

2 Korintus 6:3

Men bariwa ye kiket men gum mo suk gato Yefun syogat men ben ne. Sane men wergat men nggwa subere men ben suk gato ibit yo mo nde, kwa dik yo dom nde, sawe sukibit ne kak os wa ye ki men gum ibit ket kwayo-kwayo mone.

2 Korintus 2:17

Men ki subot Yefun Allah bi sukdu-i yo, men meret sugum su dom nde, tepsu yé mwa neya ben ne. Men ben sane nde, wo men sok mo Kristus bi rus-i anato men ki subot Yefun Allah bi sukdu-i ri-roi sor, Yefun dakai jam re. Men anato ye gato Yefun Allah bes wa ki Yefun bi suktaru nai nje jam re.

1 Korintus 10:32

Nin ben nin bi suk-i mo bur ré yo, nin mewa nin nggwa subere nin ben ye yi ges mo os ibit nde. Nin ben suk sane su ye mwa ne sino, ye Yahudi e, yewis yi, si ye gato sok mo Yefun Allah bi rus-i ne sino.

1 Korintus 8:13

Ji do git sugit gato kak os wa ben ji bi nji brek satu mu mo os ibit it yo, sane bere ji yo git suge ku gane o nde, sawe ji ben kidar ji bi nji ne ges mo os ibit or re.

Roma 16:17

Ji bi nji, ji bi nyanggon, nin mewa nin nggwa kadit ye gato ma wa wat nin ko kadit yu et. Nin mewa nin nggwa kadit ye gato ben nin bi sukjimnut waiyu mo sukduno gato ye ne kibot siri kadit sukduno gato yeguru duno nin suga nyim ne. Nin mu karowa ye ga sane nde.

Roma 7:22

Mo ji mit si ji onyar ré, ji da mit iwa ji benbot Yefun Allah bi sukduno-i,

Roma 7:16

Sane, ji ben sukibit gato ji bariwa ji ben ne yo, bi sukjimnut do, ji nut do, sangge, ye Yahudi bi sukduno-i ne da ndo, sarewo ji dakai yo nggiwa benbot nde.

Suk Gato Yerasul Ben Ne 24:16

Sane, kamdik-kamdik ji wergat ji dakai wa ji benbot sukdu gato ji onyar kem mone, subere mo suk mwa gato ji ben mo Yefun Allah si yetu gwem ne ndo sino, kwa gato ibit yo mo nde, kwa yo gato siri kadit ji bi sukjimnut gato ndo mo ji mit ne yo mo nde.

Yohanes 3:20

Ye to ben sukibit bariwa rer ku an. An bariwa an simo rer bi suk-i ne, we rer ku an it yo, sukibit gato an ben ne bere bor wa yé mwa jam.

Filipi 2:16

Nin jom Yefun bi sukdu gato kak os wa men kem ndo to kapyo mato kapyo yo, nin tepsu sukru gato ji ki ne. Sane bere su kam gato Kristus satu ma mo bur ré it yo, ji mit at mo suk gato nin ben ne, we ji jam do, suk gato ji werwa ji duno nin su ne, ji yo ben yi nde, wo nin waii benbot suk gato ji duno nin su ne re.