रोमियो 4:25 - बिलासपुरी नौआं नियम

²⁵ यीशु मसीह तिस्सो जे अहांरे पापां रे खातर मारने जो सौंपया गया था, कने भीं ते परमेशरे तिस्सो जिऊंदा कित्या, ताकि परमेशर अहांजो धर्मिये रे रुपा च ग्रहण करी सक्को।

रोमियो 4:25 Referans Kwoze

1 पतरस 3:18

हऊँ इस खातर सै बोलां भई, मसीहे बी दुख सैहण कित्या कने अहांरे पापां रे खातर इक इ बार मरया। सै धर्मी माहणु था सै जे पापी लोकां रे खातर मरया, ताकि सै तुहांजो परमेशरा रे नजदीक ल्याई सक्को। तिसरी शारीरिक मौत त हुईगी, पर सै परमेशरा रिया आत्मा रे जरिये जिऊंदा कित्या गया।

गलातियां 1:4

अहांरे परमेशर कने पिता रिया इच्छा रे मुतावक मसीह यीशुये खुद अप्पूँजो अहांरे पापां रे खातर बलिदान करित्या ताकि सै अहांजो अजकला रे इस बुरे संसारा ते छडवाये।

2 कुरिन्थियों 5:21

परमेशरे मसीह जो अहांरे पापां रे खातर पाप बल़ि बणाया तिने जे कदीं पाप नीं कित्या, ताकि अहें तिसरे जरिये परमेशरा रे सामणे धर्मी समझे जायें।

1 यूहन्ना 2:2

कने सैई अहांरे पापां रे प्रायश्चिता खातर इक बलिदान बणया, कने न सिर्फ अहांरे पापां रा बल्कि सारे संसारा रे पापां रा बी।

1 पतरस 2:24

सै खुद अहांरे पापां जो अपणे शरीरा पर लेईने क्रूसा पर चढ़ीग्या, ताकि अहें पापां रे खातर मरी सक्को कने धार्मिकता रे खातर जी सक्को; तिसरे जख्मां रे जरिये तुहें चंगे हुईरे।

इफिसियां 5:2

जिस तरिके ने मसीहे अहांने प्यार कित्या कने खुद अप्पूँजो खुशबुदार तेला साई परमेशरा खातर इक भेन्ट कने बलिदान्ना रे रुपा च चढ़ाईत्या, तियां इ प्यार रा जीवन जीओ।

प्रकाशितवाक्य 1:5

कने यीशु मसीह रिया तरफा ते सै जे बफादार गवाह कने मूईरेयां चते जी उठणे औल़यां च पैहला कने धरतिया रे सारे राजयां रा प्रधान आ, तुहांजो अनुग्रह कने शान्ति मिलदी रौ। सै अहांने प्यार कराँ, कने तिने अपणे खून्ना ने अहांजो पापां ते छडवाईरा।

1 पतरस 1:21

तिसरे जरिये तुहें परमेशरा पर विश्वास करदे रै तिने जे तिस्सो मूईरेयां चते जिऊंदा कित्या कने तिस्सो महिमा दित्ति, इस खातर तुहांरी आस कने तुहांरा विश्वास परमेशरा पर हुण मजबूत आ।

1 कुरिन्थियों 15:17

कने जे मसीह नीं जिऊंदा हुया, तां तुहांरा विश्वास बेकार आ; कने तुहें हूणा तक अपणयां पापां ची जीया राँये।

रोमियो 8:3

काँह्भई सै काम्म जे मूसा री व्यवस्था हमारे पापी स्वभावा रिया वजह ने कमजोर हुईने नीं करी सक्की, तिसजो परमेशरे कित्या, यनिके अपणे इ पुत्रा जो अहां पापियां साई हुणे रे खातर कने अहांरे पापा रा बलिदान हुणे रे खातर भेज्जीने, मसीह रे शरीरा रे जरिये परमेशरे पापा रिया सामर्था जो तोड़या।

मत्ती 20:28

तियां जे भई माहणुये रा पुत्र, यनि हऊँ इस खातर नीं आया भई अपणी सेवा करवाऊँ, पर हऊँ इस खातर आया भई अप्पूँ सेवा करूँ कने बौहत सारे लोकां जो पापां ते छुड़ाणे खातर अपणा प्राण देऊँ।”

इब्रानियों 9:28

इस खातर तियां इ मसीह इक इ बार कई माहणुआं रे पापां जो दूर करने खातर बलिदान हुया था। कने सै पापां जो दूर करने रे खातर नीं, पर तिन्हां लोकां रा छुटकारा करने रे खातर मसीहे दोवारा औणा, सै जे तिसरा बेसब्रिया ने इन्तजार करया राँये।

रोमियो 5:18

इस खातर तियां जे इक माहणुये रा पाप सारयां लोकां रे खातर सजा लेईने आया, तियां इ मसीह रे धर्मा रा काम्म बी सारयां लोकां रे खातर धर्मी बणने री बजह बणया सै जे जीवन देआं।

रोमियो 3:25

परमेशरे यीशु मसीह जो अहांरे पापां रे खातर बलिदान हुणे जो भेज्या कने मसीहे अपणा खून्न बहाया ताकि तिस पर विश्वास करने रे जरिये अहें परमेशरा ले आई सक्को। परमेशरे ये दसणे खातर येढ़ा कित्या भई पैहले सै सहनशील कने पापियां जो माफ करने च सही था। यह ये बी दस्सां भई परमेशर सही आ ताहली जे सै मसीह पर विश्वास करने औल़यां जो ग्रहण कराँ।

प्रकाशितवाक्य 5:9

कने सै ये नया गीत गाणे लगे भई, “तू इसा कताबा जो लेणे, कने इस रियां सीलां खोलणे लायक आ; काँह्भई तैं बध हुईने अपणे खून्ना ने हरेक कुल़, भाषा, लोक कने जातियां चते परमेशरा खातर लोकां जो खरीदी लरा,

तीतुस 2:14

तिने अप्पूँजो अहांरे खातर बलिदान करित्या ताकि अहांजो हरेक पापा ते छडवाई लो कने शुद्ध करीने अपणे खास लोक बणाई लो, सै जे भले काम्म करने च पूरे समर्पित ये।

गलातियां 3:13

मसीह अहांरे खातर शरापित हुणे रे जरिये तिने अहांजो व्यवस्था रे शरापा ते छडवाया, तियां जे पवित्रशास्त्र बोला: “हर कोई सै जे लकड़ा पर टंगाया जां, शापित आ।”

प्रकाशितवाक्य 7:14

मैं तिसजो जबाब दित्या, “हे स्वामी, हऊँ नीं जाणदा, पर तूई जाणाँ।” तिने मेरने गलाया, ये सै लोक ये, सै जे तिस बड़े दुखा ते निकल़ीने आईरे; इन्हें अपणे कपड़े मेमने रे खून्ना ने धोईने चिट्टे कित्तिरे।

2 कुरिन्थियों 5:15

कने सै सारयां लोकां खातर मरया काँह्भई सै लोक जे ज्यून्दे, सै अपणे खातर नीं जीओ, बल्कि तिसरे खातर जीओ सै जे मरने ते बाद भीं ते जिऊंदा हुईग्या।

गलातियां 2:20

हऊँ मसीह सौगी क्रूसा पर चढ़ाया गईरा, हुण हऊँ जिऊंदा निआं, पर मसीह माह च जिऊंदा; कने इस शरीरा च हुण हऊँ सै जिन्दगी जे जी कराँ, सै सिर्फ तिस विश्वासा ने जीवित आ सै जे परमेशरा रे पुत्रा पर आ, तिने जे माहने प्यार कित्या कने खुद अप्पूँजो मेरे खातर अर्पण कित्या।

इब्रानियों 8:3

काँह्भई हरेक महायाजक पापां रिया माफिया खातर भेंट कने बलिदान चढ़ाणे जो नियुक्त कित्या जां, इस वजह ते जरूरी आ, भई अहांरे महांयाजक (यीशुये) ले बी चढ़ाणे रे खातर किछ हो।