रोमियो 4:11 - बिलासपुरी नौआं नियम

¹¹ तिसरा खतना बाद बिच हुईरा था, कने तिसरा खतना ये दिखाणे रा इक निशाण था भई तिसरे विश्वासा रिया वजह ने परमेशरे तिस्सो धर्मिये रे रुपा च ग्रहण कित्या था जबकि तिसरा खतना नीं हुईरा था। इस खातर परमेशरा पर विश्वास करने औल़े कने तिसरे इ जरिये धर्मिये रे रुपा च ग्रहण कित्तिरे सारयां लोकां रा आत्मिक पिता अब्राहम आ, हलाँकि तिन्हांरा खतना नीं हुईरा।

रोमियो 4:11 Referans Kwoze

रोमियो 3:22

यनिके सारे विश्वासियां खातर यीशु मसीह पर विश्वास करने ते परमेशरा री धार्मिकता बिणा किसी भेदभावा रे परगट हुई;

लूका 19:9

यीशुये तिस्सो गलाया, “आज्ज परमेशरे इस परिवारा रा छुटकारा कित्या, काँह्भई तैं बी परमेशरा पर विश्वास कित्या तियां जे तुहांरे पूर्वज अब्राहमे कित्या था।

इब्रानियों 11:7

विश्वासा रे जरिये नूँह जो ताहली जे तिन्हां गल्लां री चेतावनी दित्ति गई सै जे तिने देक्खी तक नीं थिआं, तां तिने परमेशरा रा आदर करदे हुये तिसरे हुक्मा जो मन्नीने अपणे परिवारा जो बचाणे रे खातर इक जहाज बणाया था। अपणे विश्वासा रे जरिये तिने इस संसारा जो दोषी मन्नया कने इस खातर परमेशरे नूँह जो धर्मी घोषित कित्या, काँह्भई तिने परमेशरा पर विश्वासा कित्या।

फिलिप्पियां 3:9

कने हऊँ तिस सौगी पूरी तरह ते इक हुई सक्कूं; कने ये इस खातर नींआ भई मैं व्यवस्था रा पालन कित्या तां परमेशर मेरे धर्मी हुणे री घोषणा कराँ, पर ये मसीह च विश्वास करने रिया वजह ते आ, कने सिर्फ मेरे मसीह च विश्वास करने रिया वजह नेई परमेशरे ये घोषणा कित्ती भई हऊँ धर्मी आ।

इफिसियां 4:30

परमेशरा रे पवित्र आत्मा जो दुखी मत करा काँह्भई परमेशरे अपणे पवित्र आत्मा ने तुहां पर मोहर लगाईरी भई इक दिन परमेशर तुहांजो पूरे तरिके ने छुड़वांगा।

इफिसियां 1:13

परमेशरे तुहौं बी अपणे लोक बणाया ताहली जे तुहें सच्चाईया रा सन्देश यनि तुहांरे छुटकारे री खुशखबरी सुणी। तां तुहें तिस पर विश्वास कित्या कने मसीह च परमेशरे तुहां पर छाप लाई सै छाप जे वायदा कित्तिरा पवित्र आत्मा।

गलातियां 6:16

कने जितने लोक इस नियमा रा पालन कराँ ये तिन्हां सब्बीं जो परमेशरा शान्ति देणी कने आशीषित करना। सै परमेशरा रे लोक ये।

गलातियां 5:5

पर अहौं पवित्र आत्मा रिया तरफा ते पूरा भरोसा भई परमेशर अहांजो धर्मिये रे रुपा च ग्रहण करगा, काँह्भई अहें यीशु मसीह पर विश्वास कराँ ये।

गलातियां 3:29

कने काँह्भई तुहें मसीह रे, तां फेरी तुहें अब्राहम रे वंश ये, कने परमेशरे सै जे वायदा अब्राहमा ने कित्या था, तिस वायदे रे बारस बी ये।

गलातियां 3:22

पर पवित्रशास्त्र घोषणा कराँ भई सै सारे संसारा रे लोक पापा रिया शक्तिया रे अधीन आ, ताकि परमेशरे सै जे वायदा कित्तिरा तिस्सो तिन्हौं देई सक्को सै जे यीशु मसीह पर विश्वास कराँ ये।

गलातियां 3:7

तां फेरी तुहें ये समझी लेणा चाहिन्दा, भई अब्राहम री असली औलादां सैई हाईयां सै जे परमेशरा पर विश्वास कराँ ये।

रोमियो 10:11

काँह्भई पवित्रशास्त्र ये बोलां, “सै जे कोई तिस पर विश्वास करगा तिस शर्मिन्दा नीं हूणा।”

रोमियो 10:6

पर विश्वासा ते मिलणे औल़ी धार्मिकता रे बारे च, पवित्रशास्त्र ये बोलां, “तू अप्पूँ ते ये मत पुछदा भई स्वर्गा जो किस जाणा?” (यनिके मसीह जो थल्ले लौणे खातर!)

रोमियो 10:4

काँह्भई मसीह तिस मकसदा जो पूरा करी चुक्कीरा, जिस मकसदा खातर जे व्यवस्था दित्ति गई थी, ताकि सै जे कोई तिस पर विश्वास करो सै परमेशरा रिया नज़राँ च धर्मी हुई सक्को।

यूहन्ना 6:35

यीशुये तिन्हांने गलाया, “जीवना री रोटी हऊँ इ : सै जे मेरले औंगा तिस कदीं भूखे नीं रैहणा कने सै जे माह पर विश्वास करगा, तिस कदीं प्यासे नीं हूणा।

प्रकाशितवाक्य 9:4

तिन्हौं ये हुक्म बी दित्या गया भई सै नां धरतिया रे घा, नां किसी पेड़-पौधे रा नुक्शान करयां, पर सिर्फ तिन्हां माहणुआं रा नुक्शान करयां तिन्हांरे मत्थे पर जे परमेशरा री सील नीं।

2 पतरस 1:1

हऊँ शमौन पतरस, यीशु मसीह रा सेबक कने प्रेरित आ। हऊँ ये चिट्ठी तुहां सब्बीं जो लिखया राँ तिन्हें जे अहांरे परमेशर कने छुटकारा करने औल़े यीशु मसीह रिया धार्मिकता रे जरिये अहां साई बौहत कीमती विश्वास पाईरा।

रोमियो 9:30

तां फेरी अहें क्या बोलिये? अहें इस नतीजे पर पुज्जे भई अन्यजातियां रे लोक सै जे धार्मिकता रिया खोज्जा च नीं थे, तिन्हे धार्मिकता पाई ली यनिके सै जे विश्वासा रिया वजह ने धर्मी बणाये गये,

रोमियो 9:6

पर येढ़ा निआं भई परमेशरे अपणा वायदा पूरा नीं कित्या, काँह्भई सै जे इस्राएल रे बंशज ये, हकीकत च सै सारे इस्राएली नींये;

यूहन्ना 8:33

इस पर तिन्हे यीशुये जो जबाब दित्या, “अहें त अब्राहमा रे बंशा ते, कने कदीं किसी रे दास नीं हुये। फेरी तू कियां बोलां भई तुहां अजाद हुई जाणा?”

यूहन्ना 6:47

हऊँ तुहांजो सच्च बोलां भई सै जे विश्वास कराँ अनन्त जीवन तिसरा इ हाया।

यूहन्ना 6:40

काँह्भई मेरे पिता री इच्छा येई, भई तिस जे पुत्रा जो देखीने तिस पर विश्वास करना तिस अनन्त जीवन पाणा; कने माह सै न्याय रे दिन भीं ते जिऊंदा करी देणा।”

यूहन्ना 3:36

इस खातर सै जे कोई परमेशरा रे पुत्रा पर विश्वास करां, तिसजो इ अनन्त जीवन मिलणा; पर सै माहणु जे परमेशरा रे पुत्रा री गल्ल नीं मनदा, तिस्सो अनन्त जीवन नीं मिलणा, पर परमेशरा तिसजो अनन्त काल री सजा देणी।”

मत्ती 16:16

शमौन पतरसे जबाब दित्या, “तू मसीह आ, साक्षात परमेशरा रा पुत्र।”

मत्ती 8:11

कने हऊँ तुहांजो बोलां, भई मते सारे अन्यजातियां रे लोकां पूर्वा ते कने पश्चिमा ते आईने अब्राहम, इसहाक कने याकूब ने सौगी स्वर्गा रे राज्जा च खाणा खाणे बैठणा।

रोमियो 9:33

तियां जे पवित्रशास्त्रा च लिखिरा, “ध्याना ने सुणा, हऊँ यरूशलेम च इक पत्थर रखां तिसते जे लोकां जो ठोकर लगणी कने सै गिरने, पर सै जे कोई तिस पर विश्वास कराँ सै कदीं शर्मिन्दा नीं हूणा।”

यूहन्ना 3:33

पर तिने माहणुये जे तिसरे सन्देशा पर विश्वास कित्या, सै इस पर सैहमत हुईग्या भई परमेशर सच्चा।

रोमियो 3:30

काँह्भई इक इ परमेशर आ, सै जे खतना औल़यां जो विश्वासा ने कने बिणा खतना औल़यां जो बी विश्वासा रे जरिये धर्मी बणां।

रोमियो 4:10

पर ये कदीं हुया? ताहली जे तिसरा खतना हुई चुक्कीरा था या ताहली जे सै बिणा खतने ते था? खतना हुणे ते बाद नीं, पर खतना हुणे ते पैहले।