मरकुस 9:12 - बिलासपुरी नौआं नियम

^12-13 यीशुये जवाब दित्या, “ये सच्च आ, भई परमेशरे एलिय्याह जो पैहले भेजणे रा वायदा कित्तिरा, ताकि लोक मेरे औणे रे वगत त्यार रैहन्गे। पर हऊँ तुहांजो बोलां भई एलिय्याह त आई चुक्कीरा, कने लोकें तिसने जो किछ करना चाहया सै करी चुक्कीरे, तियां जे पवित्रशास्त्रा च तिसरे बारे च लिखिरा। पर माहणुये रे पुत्रा यनि मेरे बारे च काँह येढ़ा लिखिरा भई मिन्जो बौहत दुख सैहणे पौणा, कने लोकां मेरा त्याग करना?”

मरकुस 9:12 Referans Kwoze

लूका 23:11

हेरोदेस बी अपणे सपाईयां समेत तिसने बुरा बरताव कित्या कने तिसरा मजाक चक्कया। फेरी तिन्हे तिस्सो इक शाही बस्त्र पैहनाईने वापस पिलातुस ले भेजित्या।

लूका 1:76

कने बालक, तू परमप्रधान परमेशरा री भविष्यवाणी करने औल़ा माहणु पुकारया जाणा, काँह्भई तू प्रभुरे अग्गे-अग्गे चलना कने तिसरे औणे खातर लोकां जो त्यार करना।

लूका 23:39

सै अपराधी जे तिसरे अखा बखा रे क्रूसां पर लटकाई रे थे, तिन्हां चा ते इक्की यीशुये री निंध्या करदे हुये गलाया, “तां तूई मसीह आ, हाया नां? तां अप्पूँजो बी बचा कने सौगी अहांजो बी बचा!”

मत्ती 26:24

माहणुये रे पुत्रा त मरना इ हाया, तियां जे भई पवित्र शास्त्रा च तिसरे बारे च लिखिरा, पर तिसजो भयानक सजा भुगतणे पौणी सै जे माहणुये रे पुत्रा जो पकड़वां : तिस माहणुये रे खातर भला था भई तिसरा जन्म इ नीं हुईरा हुन्दा।”

मत्ती 16:21

तिस बगत यीशु अपणे चेलयां जो दसणे लगया, भई “मिन्जो यरूशलेम जाणा चाहिन्दा कने तित्थी यहूदी शास्त्रियां, बजुर्ग यहूदी नेतयां, कने मुखियायाजकां रे जरिये बड़ा दुख सहीने; मारया जाऊँ; फेरी तिज्जे दिन मूईरयां चा ते माह जिऊंदे हुई जाणा।”

मरकुस 9:31

काँह्भई सै अपणयां चेलयां सौगी जादा वगत बिताणा कने तिन्हांजो सखाणा चाँह था। यीशुये तिन्हांजो बोल्या, “माहणुये रे पुत्रा यनि मिन्जो माहणुआं रे हात्था च पकड़वाया जाणा, कने तिन्हां मिन्जो मारी देणा; कने मांह मरने ते बाद तिज्जे दिन जी उठणा।”

मरकुस 10:33

“देक्खा, अहें यरूशलेम जो जाया रायें, कने माहणुये रा पुत्र यनि हऊँ मुखियायाजकां कने यहूदी शास्त्रियां रे हत्थां पकड़वाया जाणा, कने तिन्हां तिस्सो मारने लायक ठैहराणा, कने अन्यजातियां रे हात्था च देणा।

प्रेरितां 1:6

इस खातर ताहली जे सै फेरी भीं कट्ठे हुये, तिन्हें यीशुये ते ये स्वाल कित्या, “प्रभु, क्या सै वगत आईगरा ताहली जे तुहां इस्राएल रा राजा बणीने सब्बीं लोकां पर राज करना?”

प्रेरितां 4:11

मसीह यीशु इ सै पत्थर आ तिस्सो जे तुहें राजमिस्त्रियें नकम्मा जाणया कने सै कुणे रे सिरे रा पत्थर हुईग्या।