मरकुस 9:1 - बिलासपुरी नौआं नियम

¹ फेरी यीशुये अपणयां चेलेयां जो गलाया, “हऊँ तुहांजो सच बोलां भई तुहां चते किछ लोक सै जे येत्थी खढ़िरे, तदुआं तक नीं मरना, तदुआं तक जे परमेशरा जो सामर्था सौगी राज करदे हुए नीं देक्खी लो।”

मरकुस 9:1 Referans Kwoze

लूका 9:27

कने हऊँ तुहांजो विश्वास दिलां भई येत्थी खढ़ी रयां चते किछ माहणु येढ़े भई तालुआं तक जे सै परमेशरा जो राज करदा हुआ देक्खी नीं लेन्दे तदुआं तक तिन्हाजो मौत नीं औणी।”

इब्रानियों 2:9

पर अहें यीशुये जो देक्खां ये, सै जे स्वर्गदूतां ते किछ इ वगता रे खातर घट कित्या गया था, ताकि परमेशरा रे अनुग्रह रे जरिये सै सब्बीं रे खातर मरी सक्को। कने काँह्भई तिने दुख सैया कने मरया, तां हुण अहें जाणाँ ये भई सै महिमामय आ कने आदर कित्या गईरा।

लूका 22:30

तुहें तिस राज्जा च मेरे मेचा पर खाई पी सक्को, कने तुहां राजयां रे आसणा पर बैट्ठीने इस्राएल रे बारा गोत्राँ रा फैसला करगे।

मरकुस 13:30

हऊँ तुहांजो सच बोलां भई तदुआं तका जे ये सब गल्लां नीं हुई जाणियां, तदुआं तक इसा पीढ़िया रे लोकां नीं मरना।

मत्ती 25:31

“ताहली जे माहणुये रे पुत्रा यनि मांह वापस अपणिया महिमा च औणा कने सारे स्वर्गदूत मेरे सौगी औणे, तां मांह सब्बी लोकां पर राज करने खातर अपणे राजकीय संघासणा पर बैठणा।

लूका 22:18

तदुआं तक जे परमेशरा रा राज नीं आई लैन्दा, तदुआं तक मांज अज्जा ते अंगूरां रा रस कदीं नीं पीणा।”

लूका 2:26

पवित्र आत्मे तिस्सो दर्शण दित्या था भई तालुआं तक जे सै प्रभु रिया तरफा ते भेज्जीरे मसीहे जो देखी नीं लेन्दा, तदुआं तक तिसरी मौत नीं हूणी।

मरकुस 13:26

“तां तिस वगत लोकां माहणुये रे पुत्रा यनि मिन्जो बड्डिया सामर्था कने महिमा सौगी बदल़ां च औन्दे देखणा।

मत्ती 24:30

तिस बगत माहणुये रे पुत्रा रे औणे रा नशाण अम्बरा च परगट हूणा, कने फेरी धरतिया पर सारी जातियां रे लोकां छाती पिट देयां बलाप करना; कने तिन्हां माहणुये रे पुत्रा जो बड्डिया सामर्थ कने महिमा सौगी स्वर्गा रे बद्दल़ा पर औन्दे देखणा।

मत्ती 16:28

हऊँ तुहांजो बोलां भई येत्थी किछ येढ़े तिन्हां तदुआं तक नीं मरना, तदुआं तक जे माहणुये रे पुत्रा जो तिसरे राज्जा च औन्दे हुये नीं देक्खी लो।”

यूहन्ना 21:23

इयां ये गल्लां विश्वासी भाईयां च येत्थी तको फैली गियां भई, तिस चेले नीं मरना। पर यीशुये येढ़ा नीं बोलीरा था भई, तिस चेले नीं मरना। पर ये बोलीरा था, जे, हऊँ चाऊँ भई मेरे औणे तक सै जिऊंदा रौ। तां इसते तिज्जो क्या?