इब्रानियों 6:4 - बिलासपुरी नौआं नियम

⁴ सै लोक जे अपणे विश्वासा जो छड्डी दें तिन्हांजो भीं ते मन फिराव रिया तरफा कियां ल्याया जाई सक्कां? तिन्हें इक बार परमेशरा री सच्चाई पैहचाणी थी, स्वर्गा ते बरदान पाये थे कने तिन्हें दुज्यां सौगी इकट्ठा पवित्र आत्मा पाया था,

इब्रानियों 6:4 Referans Kwoze

मत्ती 5:13

“तुहें इस संसारा रे लोकां खातर लूणा साई ये; पर जे लूणा रा स्वाद बिगड़ी जाओ, तां फेरी इसजो किस तरिके ने इस्तेमाल लायक बणाया जाई सक्कां? फेरी सै किसी कम्मां रा निआं, सिर्फ इसरे भई बाहर सट्टया जाओ कने लोकां रे पैराँ हेठ दल़या जाओ।

यूहन्ना 15:6

जे कोई मांहने जुड़ीरा नीं रैंहदा तां सै टुटी रिया डालिया साई सटी दित्या जां कने सै सुकी जां। फेरी तिन्हां डालियां जो कट्ठयां करीने अग्गी च पाईने फुकी दें।

इफिसियां 2:8

काँह्भई परमेशरा रे अनुग्रह रे जरिये तुहांरे विश्वासा रिया वजह ने तुहांरा छुटकारा हुईरा, तिने तुहौं किछ करने रिया वजह ने नीं छुडवाया, पर ये परमेशरा रा दान आ;

यूहन्ना 3:27

यूहन्ने जबाब दित्या, ताहलुआं तक जे किसी माहणुये जो स्वर्गा ते नीं दित्या जाओ, ताहलुआं तक सै किछ नीं पाई सकदा।

इब्रानियों 10:32

पर तिन्हां शुरु रे दिनां जो याद करा ताहली जे खुशखबरिया पर विश्वास करने ते बाद तुहें बौहत दुख सैया, पर विश्वासा च मजबूत रै।

मत्ती 12:45

फेरी बुरीआत्मा जाईने अप्पूँ ते होर सात्त बुरीआत्मां जो अप्पूँ सौगी ली औईं सै जे तिसाते बी बुरियां हुआं इयां, फेरी सै सब आईने तिस माहणुये च रैहणे लगां इयां, कने तिस माहणुये री हालत पैहले ते बी जादा खस्ती हुई जाईं। इस जुगा रे लोकां री हालत बी येढ़ि हूणी।”

गलातियां 3:2

हऊँ तुहांते सिर्फ ये स्वाल पुछणा चाँह भई तुहें पवित्र आत्मा रा बरदान क्या व्यवस्था रा पालन करने ते पाया था या खुशखबरिया रे सुणने कने तिस पर विश्वास करने ते पाया था?

2 तिमुथियुस 2:25

तिस्सो अपणे बरोधियां जो बी इसा आशा ने विनम्रता सौगी समझाणा चाहिन्दा भई परमेशरा तिन्हांरे मना जो बदलने च कने मसीह री सही शिक्षां जो बी जाणने च मदद करनी।

1 यूहन्ना 5:16

जे कोई अपणे साथी विश्वासिये जो येढ़ा पाप करदे देक्खो, तिसरा नतीजा जे मौत नीं हो, तां अपणे साथी विश्वासिये रे खातर प्राथना करा; कने तिन्हां रिया वजह ने परमेशरा तिस्सो जीवन देणा, तिन्हें जे येढ़ा पाप कित्या, जिसरा नतीजा जे मौत नीं हो। पाप येढ़ा बी हुआं तिसरा नतीजा जे मौत आ: हऊँ इसरे बारे च विनती करने खातर नीं बोलां।

इब्रानियों 2:4

परमेशरे बी चिन्ह कने अदभुत काम्म कने कई किस्मा रे सामर्था रे कम्मां रे जरिये कने अपणिया इच्छा रे मुतावक लोकां जो पवित्र आत्मा रे जरिये बरदान देईने ये साबित कित्या।

1 तिमुथियुस 4:14

सै वरदान्न सै जे भविष्यवाणिया रे दवारा तूह पर प्राचीनां रे हाथ रखदे बगता तिज्जो मिलया था, तिस्सो लगातार तिज्जो इस्तेमाल करना चाहिन्दा।

प्रेरितां 11:17

“इस खातर तां जे परमेशरे तिन्हांजो बी सैई दान दित्या, सै जे अहांजो प्रभु यीशु मसीह पर विश्वास करने ते मिलया था; तां हऊँ कुण था सै जे परमेशरा जो रोकी सकुं?”

इफिसियां 4:7

पर अहां चते हर इक्की जो मसीह रे दान्ना रे हिसाबा ने अनुग्रह मिलीरा।

इफिसियां 3:7

परमेशरा रा अनुग्रह कने महान सामर्था रे जरिये मिन्जो खुशखबरिया रा प्रचार करने रे जरिये तिसरी सेवा करने रा मौका दित्या गया।

प्रेरितां 10:45

कने जितने यहूदी विश्वासी पतरसा ने सौगी आईरे थे, सै सब हैरान हुये भई अन्यजातियां परा बी पवित्र आत्मा रा दान मिलया राँ।

प्रेरितां 8:20

पतरसे तिसजो गलाया, “तू कने तेरे पैसे नाश हुईजो, काँह्भई तैं परमेशरा रा दान पैसयां च खरीदणे रा बचार कित्या।

यूहन्ना 6:32

यीशुये तिन्हाजो गलाया, “हऊँ तुहां ते सच्च बोलां भई मूसे सै रोटी तुहांजो स्वर्गा ते नीं दित्ति, पर मेरा पिता तुहांजो सच्ची रोटी स्वर्गा ते देआं।

गलातियां 3:5

परमेशर सै पवित्र आत्मा जे तुहांजो देआं कने सै जे तुहांरे बिच चमत्कारा रे काम्म कराँ, क्या सै येढ़ा इस खातर कराँ भई तुहें व्यवस्था रा पालन कराँ ये या इस खातर भई तुहें खुशखबरिया जो सुणां ये कने तिस पर विश्वास कराँ ये?

प्रेरितां 15:8

मना रे जाँचणे औल़े परमेशरे तिन्हांजो बी अहां साई पवित्र आत्मा देईने ये साबित कित्या भई तिने तिन्हांजो अपणयां लोकां साई ग्रहण कित्या;

यूहन्ना 4:10

यीशुये जबाब दित्या, “तू नीं जाणदी भई परमेशर तिज्जो क्या देणा चांह, कने तू नीं जाणदी भई कुण तेरते पाणी मंगया रां। जे तू जाणदी, तां तू माहते इस्सो मंगदी कने हऊँ तिज्जो जीवन देणे औल़ा पाणी देन्दा।”

2 तिमुथियुस 4:14

सिकन्दर सै जे ठठेरा तिने कई तरीकयां ने मेरा बड़ा नुक्शान कित्तिरा। प्रभुये तिस्सो तिसरे बुरे कम्मा रे मुतावक सजा देणी।

रोमियो 1:11

काँह्भई मेरी बौहत इच्छा इ भई हऊँ तुहांजो मिलीने तुहांजो आशीषां बंडी सक्कूँ सै जे परमेशरा रे आत्मे मिन्जो दित्ति रियां, ताकि तुहें विश्वासा च मजबूत हुई सक्को;

2 कुरिन्थियों 4:4

इस संसारा रे इश्वरे (शैताने) तिन्हां अविश्वासी लोकां री बुद्धि अन्ही करी तरी, इसी खातर सै मसीह रे बारे री उत्तम खुशखबरिया कने तिसरी महिमा समझदे नींये। मसीह परमेशरा रा स्वरूप आ।

2 कुरिन्थियों 4:6

काँह्भई पवित्रशास्त्र बोलां, “परमेशरे जोतिया जो अन्धकारा च चमकणे रा हुक्म दित्या।” हुण परमेशर अहांरे दिलां च चमकीरा, ताकि परमेशरा री महिमा यीशु मसीह च दिखीरी, ये अहें तुहौं दस्सी सक्को।

इफिसियां 1:18

हऊँ परमेशरा ने ये बी प्राथना कराँ भई सै तुहौं सच्चाईया जो समझणे च तुहांरी मदद करगा, भई तुहें तिसा आस्सा जो जाणी लो तिसरे खातर जे तिने तुहांजो सद्दीरा; कने तुहें इसा गल्ला जो जाणो भई सै आशीषां जे परमेशर अपणयां लोकां जो देणे रा वायदा कराँ सै कितणियां महान इ।