इफिसियां 4:14 - बिलासपुरी नौआं नियम

¹⁴ तां हुण ते अहौं बच्चे साई नीं रैहणा चाहिन्दा। अहें तिसा किश्तिया साई नींये सै जे समुद्रा रियां लहराँ सौगी इतखा-उतखा भटकीने रस्ता बदलदी रैईं। इसरा मतलब येआ भई चलाक कने छली लोक अहांजो अपणिया झुट्ठिया शिक्षां ते बैहकाई नीं सक्को।

इफिसियां 4:14 Referans Kwoze

इब्रानियों 13:9

लग-लग किस्मा रे विचित्र उपदेशां ते नीं भरमाये जाओ, काँह्भई तुहांरे मना रे खातर ये बधिया भई सै परमेशरा रे अनुग्रह रे जरिये मजबूत बणे, नां की खाणे रे बारे च नियमां रा पालन करने रे जरिये। काँह्भई जितने लोक इस नियमा रा पालन कराँ ये सै अपणे खातर किछ बधिया नीं करदे।

1 कुरिन्थियों 14:20

अरे साथी विश्वासियो, तुहें अपणिया समझा च बालकां साई नीं बणा। फेरी बी बुराईया च त बालक रौआ, पर समझा च सयाणे बणा।

1 यूहन्ना 4:1

मेरे प्यारे मित्रो, हर किसी आत्मा रा विश्वास मता करदे, पर हमेशा तिन्हारी परख करीने देक्खा भई क्या सै परमेशरा रिया तरफा ते आ कि नीं? ये हऊँ तुहांजो इस खातर गलाईराँ काँह्भई मते सारे झूट्ठे भविष्यवक्ता इस संसारा च फैलीरे।

2 कुरिन्थियों 2:17

परमेशरा रे वचना जो अपणे फायदे खातर, तिसच मिलावट करीने बेचणे औल़े मते सारे दुज्जे लोकां साई अहें नींये। पर अहें त परमेशरा रे सामणे परमेशरा रिया तरफा ते भेज्जीरे माहणुआं रे बराबर मसीह च हुईने सच्चाईया ने बोलां ये।

याकूब 1:6

पर ताहली जे सै मंग्गो, सै विश्वासा ने मंग्गो कने थोड़ा जेआ बी शक नीं करो काँह्भई तिस्सो जे शक हुआं सै समुद्रा रिया तिसा लैहरा साई आ सै जे हवा ने उट्ठां इ कने कम्बां इ।

इफिसियां 6:11

परमेशरा रे सारे हथियाराँ जो पैहनी लो, ताकि तुहें शैतान्ना रिया बुरिया चाला रे सामणे खड़े रैई सक्को।

मत्ती 24:24

“काँह्भई झूट्ठे मसीह कने झूट्ठे भविष्यवक्ते उट्ठीने आई जाणे, कने बड़े हैरान करने औल़े नशाण दसणे, कने अजीब काम्म करने, भई जे हुई सक्को तां चुणी रयां जो बी चकमा देई दो।

2 तिमुथियुस 4:3

काँह्भई येढ़ा बगत औणा, ताहली जे लोकां सही शिक्षां जो नीं सुणना, पर तिन्हां अपणिया इच्छा पर चलना कने तिन्हां बौहत सारे येढ़े शिक्षकां जो कट्ठा करना तिन्हां सैई बोलणा जो किछ ये लोक सुणना चांये।

यहूदा 1:12

ये लोक तुहांरी संगतिया रिया धाम्मां च तुहां सौगी शामिल त हुआं ये; पर ये लोक खतरनाक चट्टाना साई ये सै जे पाणिये च छिपि रियां हुआं इयां कने सै जे तुहांरे डुबणे री वजह बणी सक्कां ये। ये लोक बेशर्म चरवाहे साई ये सै जे सिर्फ अपणी ही रखवाल़ी कराँ ये। ये बिणा बरखा रे बद्दल़ ये, तिन्हौं जे हवा डुआईने लेई जांई; सै येढ़े पेड़ां साई ये तिसच जे फसला रे वगत फल़ नीं लगदे, कने जड़ां ते पटोईगरे यनि सै पूरी तरह मरी चुक्कीरे।

प्रकाशितवाक्य 19:20

सै पशु कने झूट्ठे भविष्यवक्ते जो सै जे तिसरे सामणे येढ़े नशाण दस्से थे, तिन्हांरे जरिये तिने तिन्हांजो भरमाया, तिन्हां पर जे पशुये री छाप थी, कने सै जे तिसरी मूर्तियां री पूजा कराँ थे। इन्हां दुईं जो जीते जी तिसा अग्गी रिया झीला च, सै जे गन्धका ने जल़ां इ, पाये गये।

गलातियां 3:1

अरे गलातिया रे विश्वासियो तुहें निरे मूर्ख ये! तुहांजो किने धोखा दित्या? तुहांजो त इसा गल्ला रा पूरा ब्योरा देईतरा था भई किसा वजह ने यीशु मसीह जो सब्बीं रे सामणे क्रूसा पर चढ़ाया था।

मत्ती 24:11

बौहत सारे झूट्ठे भविष्यवक्तयां औणा, कने तिन्हां बौहत सारे लोकां जो धोखा देणा।

1 यूहन्ना 2:26

हऊँ तुहांजो तिन्हां लोकां रे बारे च खबरदार करया राँ, सै जे तुहांजो झुट्ठिया शिक्षा ते भरमाणे रा जतन करी राँये।

2 तिमुथियुस 3:13

पर बुरे लोक कने बैहकाणे औल़यां होर जादा बुरा काम्म करना, तिन्हां लोकां जो धोखा देणा कने खुद तिन्हां दुज्यां रे जरिये धोखा खाणा।

2 कुरिन्थियों 4:2

पर अहें त शर्मनाक काम्म करने छड्डी तरे, अहें छल-कपट नीं करदे कने नांई परमेशरा रे बचनां च मिलावट कराँ ये। परमेशर अहांरा गवाह भई अहें सच्चाई बोलां ये, कने सै जे कोई ईमानदार आ तिन्हांजो ये पता।

मत्ती 11:7

ताहली जे यूहन्ने रे चेले तित्थी ते दूर जाया रां थे, तां यीशु यूहन्ने रे बारे च लोकां रिया भीड़ा ने बोलणे लगया, “तुहें इस सुनसान जगह च क्या देखणे गै थे? तुहें तित्थी हवा च हिलदे किसी लम्बे घा जो देखणे तनी गये थे!

1 कुरिन्थियों 12:2

तुहें जाणाँ ये भई ताहली जे तुहें अन्यजाति थे, तां तुहें गुंगियां मूर्तियां रे पिच्छे तियां चलां थे तियां जे तुहांजो चलां थे।

प्रेरितां 23:21

पर तिन्हांरी देखां सुणदा काँह्भई तिन्हां चते चाल़ी माहणु पौलुसा जो मारने खातर त्यार बैठिरे, तिन्हें ये कसम खाद्दीरी भई तदुआं तका जे तिन्हां पौलुसा जो मारी नीं देणा तदुआं तका नां किछ खाणा नां पीणा। कने हुण सै त्यार ये कने तेरे बायदे रा इन्तजार करया रायें।”

1 यूहन्ना 2:19

सै मसीह रा बरोध करने औल़े अहांरा साथ छड्डी ने चली गरे, पर सै अहांरे अपणे नीं थे। जे सै अहांरे अपणे हुन्दे, तां अहांने सौगी रैहन्दे। पर सै अहांजो छड्डी गरे ताकि परमेशर अहांजो ये दस्सी सक्को भई तिन्हां चते कोई बी अहांरा निआं।

2 पतरस 2:18

ये तिन्हांजो सै जे भटकीरेयां लोकां चाते बचीने निकल़णे री शुरुआत इ करीराँ थे, अपणी बेकारा री घमण्डी गल्लां ते तिन्हां लोकां जो शारीरिक इच्छां च फसाई लें।

याकूब 3:4

यनि पाणिये रे जहाजां रा उदाहरण बी लेई सक्कां ये, देक्खा, चाये सै कितणे इ बड्डे हो ताकतवर हवां तिन्हांजो चलाईंयां, पर इक छोट्टी जेई पतवारा ने तिन्हारा मांझी तिन्हांजो अपणिया इच्छा रे मुतावक घुमान्दा रैयां।

1 तिमुथियुस 3:6

फेरी येआ भई सै अगवा नया विश्वासी नीं हूणा चाहिन्दा, काँह्भई सै घमण्ड करी सक्कां कने शैतान्ना साई सजा पांगा।

2 तिमुथियुस 1:15

तू जाणाँ भई आसिया प्रदेशा च रैहणे औल़े कई विश्वासी मिन्जो छड्डी चुक्कीरे, फुगिलुस कने हिरमुगिनेस बी मिन्जो छड्डी चुक्कीरे।

1 कुरिन्थियों 3:19

काँह्भई इस संसारा रा ज्ञान परमेशरा रिया नज़राँ च मूर्खता इ, तियां जे पवित्रशास्त्रा च लिखिरा, “सै ज्ञानियां जो तिन्हांरी चतुराईया च फसाई देआं,”