प्रेरितां 11:19 - बिलासपुरी नौआं नियम

¹⁹ स्तिफनुस रे मारे जाणे ते बाद बौहत सारे विश्वासी लोक यरूशलेम छड्डिने बिखरी गरे थे कने फिरदे-फिरदे फीनीके प्रदेश कने साइप्रस टापुये कने अन्ताकिया नगरा च पुज्जे; पर यहूदियां जो छड्डिने किसी होरी जो परमेशरा रा वचन नीं सुणांदे थे।

प्रेरितां 11:19 Referans Kwoze

प्रेरितां 21:2

तित्थी ते इक जहाज फीनीके प्रदेशा जो जान्दा मिलया। कने अहें तिस परा चढ़ीने यात्रा शुरु कित्ती।

प्रेरितां 15:35

कने पौलुस कने बरनबास अन्ताकिया नगरा च रईगे : कने होरी मतयां लोकां ने सौगी प्रभु यीशुये रे वचना रा उपदेश देन्दे कने खुशखबरी सुणांदे रये।

प्रेरितां 15:22

फेरी यरूशलेम री सारी कलीसियां रे लोकां समेत प्रेरितां कने प्राचीनां जो ये खरा लगया भई अप्पूँ चते किछ माहणुआं जो चुणीने, मतलब यहूदा तिस्सो जे बरसब्बा बोलां ये, कने सीलासा जो सै जे विश्वासियां च अगुवे; कने तिन्हांजो पौलुस कने बरनबासा सौगी अन्ताकिया नगरा रिया कलीसिया च भेज्या।

प्रेरितां 15:3

कलीसिया रे लोकें रोटी कने पैसा देईने तिन्हांरी यात्रा च जाणे जो मदद कित्ती; कने सै फीनीके कने सामरिया प्रदेशा चियें हुंदे हुये किस तरिके ने अन्यजातियां रे लोक खुशखबरी सुणीने यीशु मसीह पर विश्वास करी राँये ये खबर सुणान्दे रै, कने ये सुणीने सब विश्वासी बौहत खुश हुये।

प्रेरितां 4:36

यूसुफ साइप्रस नौआं रे टापुये च रैहणे औल़ा इक लेवी था तिसरा नौं प्रेरितें बरनबास रखया था; तिसरा मतलब जे दुज्जेयां जो हिम्मत देणे औल़ा माहणु आ।

गलातियां 2:11

पर ताहली जे कैफा अन्ताकिया नगरा च आया, तां मैं तिसरे मुँआ पर बोलित्या काँह्भई सै दोषी था।

प्रेरितां 21:16

कैसरिया नगरा ते बी किछ चेले अहां सौगी गये कने अहें मनासोम नौआं रे साइप्रस वासिये रे इक पुराणे चेले रे घरौ ली आये, भई अहें तित्थी रूको।

प्रेरितां 18:22

कने कैसरिया नगरा च उतरी ने (यरूशलेम नगरा जो) गया कने कलीसिया रे विश्वासियां जो नमस्कार करीने अन्ताकिया नगरा च आया।

प्रेरितां 15:39

मतलब येढ़ि बैहस हुई भई पौलुस कने बरनबास इक्की दूये ते लग हुईगे; कने बरनबास, मरकुसा जो लईने जहाजा पर साइप्रस टापुये जो चलिग्या।

प्रेरितां 13:46

तां पौलुसे कने बरनबासे निडर हुईने गलाया, “जरूरी था भई परमेशरा रा वचन पैहले तुहांजो सुणाया जान्दा; पर ताहली जे तुहें तिसरा इन्कार कराँ ये, कने अप्पूँजो अनन्त जीवना रे लायक नीं ठहराँदे, तां हुण अहें अन्यजाति लोकां ले जाणा।

प्रेरितां 13:4

इस खातर पवित्र आत्मा रे भेजीरे शाऊल कने बरनबास अन्ताकिया नगरा ते सिलूकिया बन्दरगाह जो गये; कने तित्थी जे जहाज़ा पर चढ़ीने साइप्रस टापुये जो चले;

प्रेरितां 13:1

अन्ताकिया नगरा री कलीसिया च कई भविष्यवक्ता कने उपदेशक थे; तियां जे : बरनबास कने शमौन तिसरा दुज्जी नौं जे नीगर था; कने लूकियुस कुरेनी, कने चौथाई देशा रे राजे हेरोदेस रा दुध भाई मनाहेम, कने शाऊल।

प्रेरितां 3:26

परमेशरे अपणे सेवका जो मूईरयां चते जिऊंदा करीने सब्बींते पैहले तुहांले भेज्या, भई तुहां चते हर इक्की माहणु अपणियां बुराईयां जो छड्डिने परमेशरा रिया तरफा जो फिरो ताकि आशीष पाओ।”

यूहन्ना 7:35

फेरी यहूदी अगुवे अप्पूँ बाटियें गलाणे लगे, “इस किति जो जाणा भई तित्थी जे अहें इस्सो टोल़ी नीं पांगे? शायद इस यूनानी नगरा च तितर-बितर हुईने बसीरे यहूदियां ले जाणा, कने यूनानियां जो बी उपदेश देणा?

मत्ती 10:6

पर इस्राएलियां लेई जायों काँह्भई सै तिन्हां भेड्डां साई ये सै जे अपणे चरवाहे ते दूर हुईगरे।

प्रेरितां 6:5

ये गल्ल सारिया मण्डलिया जो खरी लगी, कने तिन्हें स्तिफनुस नौंवां रे इक्की माहणुये जो सै विश्वास कने पवित्र आत्मा ने भरीरा था, कने फिलिप्पुस, कने प्रुखुरुस, कने नीकानोर, कने तिमोन, कने परमिनास, कने अन्ताकिया वासी नीकुलाउस जो सै जे यहूदी मता च आईगरा था, चुणील्या।

प्रेरितां 11:20

पर तिन्हां चते किछ विश्वासी साइप्रसवासी कने कुरेनी वासी थे, सै अन्ताकिया नगरा च आईने यूनानियां जो बी प्रभु यीशुये रिया खुशखबरिया रियां गल्लां प्रचार करने लगे।

प्रेरितां 11:22

ताहली जे तिन्हांरी चर्चा यरूशलेम रे विश्वासियें सुणी, तां तिन्हें बरनबास जो अन्ताकिया नगरा च भेजित्या।

प्रेरितां 14:26

कने तित्थी ते सै जहाजा पर अन्ताकिया नगरा जो वापस गये, ऊत्थी सै तिस कम्मां खातर सै जे तिने पूरा कित्तिरा था परमेशरा रे अनुग्रह च सौंपी ने गये।

प्रेरितां 15:30

फेरी सै विदा हुईने अन्ताकिया नगरा च पुज्जे, कने सभा जो कट्ठी करीने सै पत्री तिन्हांजो दईती।