2 कुरिन्थियों 4:14 - बिलासपुरी नौआं नियम

¹⁴ काँह्भई अहें जाणाँ ये भई तिने जे प्रभु यीशुये जो मूईरयां चते जिऊंदा कित्या, परमेशरा अहांजो बी यीशुये सौगी रैहणे खातर जिऊंदा करना कने तुहां सौगी अपणे सामणे खड़ा करना।

2 कुरिन्थियों 4:14 Referans Kwoze

1 थिस्सलुनीकियां 4:14

काँह्भई जे अहें विश्वास कराँ ये भई यीशु मरया कने जी बी उट्ठया, तां तियां इ परमेशर तिन्हौं बी सै जे यीशुये च मरी चुक्कीरे, यीशुये सौगी स्वर्गा च नेणे।

रोमियो 8:11

कने जे परमेशरा रा आत्मा तिने जे यीशु मसीह जो मूईरेयां चते जिऊंदा कित्या, तुहांरे अन्दर वास कराँ। तां सै परमेशर तिने जे यीशु मसीह जो मूईरयां चते जिऊंदा कित्या था, तुहांरे नाशवान शरीरा जो अपणी आत्मा ते सै जे तुहांरे अन्दर बसीरा, जिऊंदा करना।

यहूदा 1:24

परमेशर तुहांजो रुढ़णे ते बचाणे च सक्षम आ, सै तुहांजो निर्दोष कने आनन्द दायक बनाणे च सक्षम आ, ताहली जे सै तुहांजो अपणिया महिमा च तिसरे सामणे खड़ा हुणे खातर ल्यौआं। तिने अहांरे प्रभु यीशु मसीह रे जरिये अहांरा छुटकारा कित्तिरा। महिमा, गौरव, प्राक्रम कने अधिकार वगता रे शुरु ते तिसरा इ हाया कने हुण बी तिसरा इ हाया कने जुगां-जुगां तक तिसरा इ रैहणा। आमीन।

1 कुरिन्थियों 6:14

परमेशरे अपणिया सामर्था ने प्रभुये जो जिऊंदा कित्या, कने तिसा इ सामर्था ने तिस अहें बी जिऊंदा करने,

इफिसियां 5:27

इस तरिके ने सै कलीसिया जो इक येढ़ि चमचमाती दुलहना रे रुपा च अपणे खातर प्रस्तुत करी सक्कां सै जे निष्कलंक हो, झुरियां ते बगैर हो, या तिसच येढ़ि होर कोई कमी नीं हो, बल्कि सै पवित्र कने निर्दोष हो।

2 कुरिन्थियों 11:2

काँह्भई हऊँ तुहांरे बारे च चिन्तित आ तियां जे परमेशर चिन्ता कराँ। इस खातर मैं तुहांजो अपणे इकलौते पितिये रे रुपा च मसीह जो देणे रा वायदा कित्या था, हऊँ तुहांजो तिसरी पवित्र दुल्हना रे रुपा च देखणा चाँह।

कुलुस्सियां 1:28

तिसरा प्रचार करीने अहें हर इक माहणुये जो मसीह जो ग्रहण करने रे बारे सावधान कराँ ये कने सारे ज्ञाना ते हरेक माहणुये जो सखां ये, भई अहें हरेक माहणुये जो मसीह च सिद्ध करीने परमेशरा रे सामणे हाजर करिये।

कुलुस्सियां 1:22

पर तां जे मसीह अपणे संसारिक शरीरा च था, तां मसीह रिया मौती रे जरिये हुण परमेशरे तुहांरा बी मेल करी लरा, ताकि तुहांजो अपणे सामणे पवित्र, निष्कलंक, कने निर्दोष बणाईने हाजर करो।

प्रेरितां 2:24

पर तिस्सो इ परमेशरे मौता रे बन्धना ते छुड़ाईने ज्यूंदा कित्या; काँह्भई ये कदीं मनी हुई सकदा था भई सै तिसरे बशा च रैहंदा।

लूका 21:36

इस खातर हर पल चुश्त रौआ कने प्राथना करदे रौआ भई तुहें इन्हां सारियां गल्लां ते, सै जे हुणे औल़ियां, बचणे री ताकत पाई सक्को, कने अपणे आत्म विश्वासा सौगी माहणुये रे पुत्रा रे सामणे खड़े हुणे लायक बणी सक्को।”

प्रेरितां 2:32

इस इ यीशुये जो परमेशरे जिऊंदा कित्या, तिसरे जे अहें सारे गवाह ये।

याकूब 5:15

विश्वासा ने कित्तिरी तिन्हां रिया प्राथना ते बीमार ठीक हुई जाणे, कने प्रभुये तिसजो खड़ा करना कने जे तिने गुनाह बी कित्तिरे ओ, परमेशरा तिसरे पाप माफ करने।