इबरानी 4:2 - Korwa Bible

² हँकुःआ होड़कू अयूमतेरा हना नपाय सरवन अबू हों अयूमकेराबू। हँकुःआ होड़कू हना सरवन अयूमतेडखन बिसवास घड़ीन अँनकूराः जीवरे मेरकू दोहोगाड। हनालगा हँकू अयूमतेरा हना सरवनते हँकूके तोनोंगाः नफा मेर होयागान।

इबरानी 4:2 Referans Kwoze

1 तिसलूनिका 2:13

अले अपे एचेरेले परसारतेरा हना नपाय सरवन होड़कूराः सरवन इया मेरपे ओंगोलगाड, मनदो भगवान कतातेरा हना सताय सरवन इयापे ओंगोलतेरा अरूपे मनाःआ। हननलगा अपे लगा अले भगवानले धनियाबादगोड ञवनतना अरू भगवानराः नाःआ सरवनरेकू बिसवासगेता अपेराः इंदरीरे बुतागोड ञवनता।

इबरानी 11:6

बेगर बिसवासते अबू भगवान कहियो ओरोबू एचे ननाय अवेतिरिया। भगवान एचेरेकू सेनता हँकुःआ होड़कू भगवान इनीदानिया अरू हाँय जीवन-जाततेकू ञमेयता, हँकू लगा हाँय इमाने एनेमेयता, माःआन बिसवासगे लगा इदा।

इबरानी 3:12

दो ईंगरिकुःआ अजी बोपोहकूतिंग, जीयत भगवानराः दूर अते बहकावपेता हना बेनेलूर अरू बेगर बिसवासराः जीव अपे अते तोनोंगीग एचेरे अहा होयाः लगा सवासितीपे दोहोन।

1 तिमुतियूस 4:8

देह बड़ियाड़ बड़ाँवगे दो नपाय इदा, मनदो भगवानराः ओंगोल इया जीव बड़ियाड़ बड़ाँः दो हना जमालेःआते ननपाय इदा। नाःआ, चउंदीसराः गुजर मसर लगा अरू गुजुः तयोमराः जीव लगा हों नफा एमेयता।

रूमी 2:25

आम मी होड़ एहूदा होड़ मोसेसराः नियम इयाम सलाः दो, खतनाराः रिती-बिधीते आमके नफा इदा। मनदो आम नियम इया मेरेम सलाः दो, आम मेरेय खतनागना हनाँयग बेगर एहूदा होड़ अते नपाय कोनोवामेःआ।

मूक चेलाकू 13:46

दो पउलूस अरू बरनाबास डिनीड़ते हँकुःआ होड़कू एचेरेकिन कता कुदातेरा, “अलिंग अपे एहूदाकू एचेरे भगवानराः सरवन मड़ंगरे ककता दोहोना, मनदो अपे हना सरवनपे टड़ाव एंडाकेरा अरू नाःआते सुदीगोडतापे ओरो टुटीगनेना हना जीव लगा भगवान अपे मेरेय सुनावगाडपेःआ। नुँहू अलिंग बेगर एहूदाकू एचेरे भगवानराः नपाय सरवनलिंग कता उदुःता।

एकूब 1:21

हनालगा अपेराः जमालेःआ लेटाव-पेटाव अरू बेलूर नेवन अपे जीव अतेपे चलाः एंडागोड अरू अँननपे अपे हुडिंग ओंगोलकियानखन भगवान अपे बनसाव लगा अपे जीवरे हुड़ू इयाय रोपाकेरा हना सरवनपे मनाः।

इबरानी 4:6

दो अदोम होड़कू नाःआ लोड़ोन अटकारगे लगा हन नुँहू वरी सनालाव वेगतना अरू मड़ंगरे नपाय सरवनकू अयूमतेरा हँकुःआ होड़कू हुकुम मेरकू मनावगान अते, हना लोड़ोन मेरकू अटकार अवेगाड।

1 कुरिंती 13:3

ईंग इनिंगराः जमा आन-धान गरीब होड़कूयिंग एमेवा, अरू ईंग ईंगराः देह बाल लो एंडागे लगायिंग जिमा अवेय, मनदो ईंग एटाः होड़कू मेरिंग दुलार दो, ईंग कही कोवायिंगा।

1 पतरस 1:12

हँकू अँननकूराः नफा लगा कोवान, मनदो नपाय सरवनकू अयुमेता हँकुःआ होड़कू लगाकू सेवाःआ, माःआन भगवान हँकूय एचे सुदीवातेडकुःआ। अरू नाःआ बेलारे, भगवान सेरमो देस अतेय वारकेरा हाँयग सुद बिरुवाराः जंगरते पपरसार होड़कू अपे एचेरे, सेरमो देसरिकुःआ बराहीलकू हों बुझाः लगाकू तरसाःतना, हना नपाय सरवनकू परसारकेरा।

1 तिसलूनिका 1:5

ईसू मसीराः नपाय सरवन अले अते अँननलेराः आहराः बड़रा एकला मेरपे अयूमकेरा, मनदो हान सुद बिरुवाराः जंगरते अरू पका-निका बिसवासते दोहोना। अपे नाःआ होँपे सुदीयतना, अले अपे तलारेले दोहोन मेला अपेके नफा होयाः लगाले जियावनेना माःआन।

गलातिया 3:8

मड़ंग जूग वरीते भगवानराः कागदरे नाःआ इया ओजाःतो इदा, बेगर एहूदाकू भगवान एचेरेकू बिसवासगे अते, कसूर अते फड़ियावतो होड़कूय बड़ाँवकूता। अरू भगवान नाःआ सरवन इबराहीम एचेरेय कतातेरा, “आम अते चउंदीसरिकुःआ जमा जइत होड़कू नपाय जीव-जहनतेकू दोहोनता।”

गलातिया 4:13

अपे बेग-हतावाडिंगा जा? अरू अपे ईंग बदीरे अलपाहानाय, माःआनपे सुदीया। हनते हों अपे ईंग नपायतेपे संघरावातिरिंगा।

मूक चेलाकू 3:26

भगवान आँयग बेटात ईसू गोएगतो होड़कू अतेय जियाव रेमकिरिया अरू हाँय अपे अँननपेराः कसूर अते जीव एचे कुदाकेडखन अपेराः जीव ननपायगे लगाय वारतिरिया।”

रूमी 3:3

मनदो अदोम एहूदाकू भगवानराः कता मेरकू बिसवासगाड, दो आम ईंगमे कतावातना, “भगवान आँयगराः जबान इया मेरेय एचेगरा जा?”

गलातिया 3:2

मीटोंग कता ईंगपे उदुःवा। अपे भगवानराः सुद बिरुवा करा इयापे पवावकिया, नियम मनावकेडखन जा, नपाय सरवन बिसवासकेडखन?