इबरानी 11:7 - Korwa Bible

⁷ बिनिसवासते नूह, कहियो तोनोंगीग मेरकू ञेलगातेरा हना कताकून बदीरे भगवान सेतावतिरिया दो हाँय हना कताकूने मनावबाःयान। अरू आँयग अरू आँयगरिकुःआ मइछुवाकू बनसाः लगा भगवानराः अकूस मनाः घड़ीन मरंग दाः जहाजे तुलातेरा। नाःआते हाँय होड़कूराः कसूरे फड़ियावगोतेड अरू नूह भगवान एचेरेय बिसवासतेड अते भगवान हाँय बेगर गारबार होड़ हवे माःआने मनेवातिरिया।

इबरानी 11:7 Referans Kwoze

1 पतरस 3:20

तोलतोकू दोहोना हँकुःआ गोएगतो होड़कू नूहराः जूग परियारे भगवानराः कता मेरकू मनावगान हँकुःआ होड़कू हवे। हनमेला नूह मरंग दाः जहाजे तुलाःआ अरू होड़कू भगवान एचेरे बिसवासगे लगा, भगवान सहाव घड़ीने तंगी ञवना। मनदो आठगोटोंग होड़कू एकला हना दाःतेकू बनसावनेना।

रूमी 4:13

भगवान इबराहीम अरू हाँयरिकुःआ नइड़-बाँस होड़कू एचेरेय जबानतेरा, अपे नाःआ चउंदीसरिकुःआ इताडदारकूपे बड़ाँःता, माःआन। दो इबराहीम भगवानराः नियमकूने मनाः अते कोवान, मनदो हाँय भगवान एचेरे बिसवासतेडखन बेगर गारबाररीग होड़े बड़ाँवनेना, अरू हनानाः अते भगवानराः जबाने पवावकिया।

लूका 17:26

नूहराः परियारे होयानेना हनन इया मनुवारीग बेटात परियारे हों होयाःता।

पिलिपी 3:9

नुँहू ईंग ईंगराः तोनोंगाः नपाय बुता एचे अते सहे नियम मनाः अते भगवानराः ओंगोलरे बेगर गारबार होड़ मेरिंग बड़ाँवगना, मनदो ईंग ईसू मसी एचेरेयिंग बिसवासकेरा, हना अते ईंग भगवानराः ओंगोलरे बेगर गारबार होड़िंग बड़ाँवकिया। हाव, बिनिसवास एकलाते भगवानराः ओंगोलरे बेगर गारबार होड़िंग बड़ाँवकिया।

गलातिया 5:5

मनदो अबू ईसू मसी एचेरे बिसवासकेडखन भगवानराः ओंगोलरे बेगर गारबार होड़कू बड़ाँः लगा सुद बिरुवाराः संघराते मिनी जीवतेबू अनसरागोड ञवनतना।

इबरानी 5:7

ईसू चउंदीसरेय दोनोहोन मेला हाँय मुरुक सटी खिररी घड़ीन अरू मेड दाः जोरो जोरो हाँय गुजुः अते बनसाव अवेयता, हाँयग भगवान एचेरे असे घड़ीने अरजीःआ। अरू हाँय अकूस मनाः घड़ीने अरजीःआ अते भगवान अनायूमबाःकातेरा।

रूमी 3:22

अरू ईसू मसी एचेरेकू बिसवासगेता हँकुःआ जमा होड़कू भगवान बेगर पाचपटीते आँयगराः ओंगोल इया बेगर गारबार होड़कूय बड़ाँवकूता।

रूमी 1:17

भगवानराः कागदरे ओजाःतो इदा, “भगवान बेगर गारबारीग होड़े बनाड़ाँवकिरिया, हाँयग होड़ बिसवासतेय जियावगोड ञवनता।” हनन इया नपाय सरवनरे बुँहड़ीन अते टुटीग वरीय बिनिसवासगोड ञवनता, हनाँयग होड़ भगवान बेगर गारबारीग होड़े बड़ाँवगेयता।

मती ओजाःतेरा भगवानराः नपाय सरवन 3:7

फरीसी होड़कू अरू सदूकी होड़कू बतिसमा गोः लगाकू वेजेडा दो, हाँय हँकू एचेरेय कतातेड, “ने महुरा बींग इया होड़कू, दरवाःआ हना डंडियाव पवाः अते बनसाः लगा इये सेतावकेडपेःआ?

2 पतरस 3:6

अरू हनानाः ओत दनाः दाःते बुडावनेना अरू हना बेलारिकुःआ जमा कसूर होड़कू लाय एंडायान।

2 पतरस 2:5

अरू ननन इया भगवानराः कता मेरकू मनावगान, हँकुःआ मड़ंग जूगरिकुःआ होड़कू हों, डंडियावकू अते भगवान मेरेय अड़ाःगाडकू। हनमेला भगवानराः सताय कता बदीरेय परसारतेरा हाँयग नूह सुदा एटाः सातगोटोंग होड़कू हों पुरा दाः अते भगवान बनसावतेडकुःआ।

2 पतरस 1:1

ने ईंगरिकुःआ अजी बोपोहकूतिंग, ईसू मसीरीग सेवादार अरू मूक चेला सिमोन पतरस, ईंग नाःआ चिठीयिंग ओजाःगेतना। अबूरीग भगवान अरू सडावदार ईसू मसी, अबू बेगर गारबार होड़कूय बड़ाँवकेड अते, अले पवावकिया हनानाः मुरुक किमइताः बिसवासकू पवावकिया अपे लगा नाःआ चिठीयिंग ओओजाःतना।

इबरानी 11:1

अबूराः बिसवास अबू असराता हना कताकून पका-निकागोडता अरू मेरबू ञेनेलता, हना कताकून सनाताय हवे माःआन एचे सुदीबाःकाता।

रूमी 10:6

अरू बिसवासते भगवानराः ओंगोलरे बेगर गारबार होड़कूकू बड़ाँः लगा अपे अँननपेराः जीवरे अहापे कताय, ईसू चउंदीसरे उतराव अगूगेय लगा इये सेरमो देसरेय देग अवेनता,

रूमी 4:11

इबराहीम खतनानते मनाड़ंग भगवान एचेरेय बिसवासतेरा। हनालगा हाँय भगवानराः ओंगोलरे बेगर गारबार होड़े बड़ाँवनेना अरू अनँयगराः देहरे मीटोंग चिनहा इयाय खतनानेना। बेगर खतनाते हों भगवान एचेरेकू बिसवासकेडखन भगवानराः ओंगोलरे बेगर गारबार होड़कूकू बड़ाँःता हँकुःआ होड़कूरीग खुटिपरिया होड़ इबराहीम बड़ाँवकिया।

मती ओजाःतेरा भगवानराः नपाय सरवन 24:38

नूह मरंग जहाजरे अरीने देग वरी होड़कू जोम ञूःआ अरू बियाहगुःआकू अरू बियाह लगाकू एमे होड़ेंगा।

मती ओजाःतेरा भगवानराः नपाय सरवन 24:25

अयुमेपे! नाःआ जमाकून होयाः अते मड़ंगरे अपे एचेरेयिंग उदुःगेतना।

रूमी 9:30

दो नाःआ बदीरे चेले माःआनबू कताय? बेगर एहूदाकू भगवानराः ओंगोल इया बेगर गारबार होड़कू बड़ाँः लगा मेरकू कुरनिसगेःआ। मनदो हँकू बिसवासकेडखन भगवानराः ओंगोल इया बेगर गारबार होड़कूकू बड़ाँवयना।

मती ओजाःतेरा भगवानराः नपाय सरवन 24:15

नाःआ चेडतोय बछाःता हाँयग होड़ बुझाः लगा इदा। भगवानराः बड़रा कतायीग होड़ दानिएल कतातेरा हन इया मुरुक बेलूर जिनिस मुनुरुक सुद ततेररेपे ञेल दो,

मती ओजाःतेरा भगवानराः नपाय सरवन 2:12

दो सेरमो देसरीग बराहील हँकू एचेरे सपनारे सेतावतेडकूखने कताया, अपे हरदोस राजा एचेरे अलोपे कुदा सेन, माःआन। हनालगा हँकू एटाः दूरते अँकूराः देसकू कुदा सेनेडा।

इबरानी 8:5

चउंदीसरिकुःआ पुजउरीकू सेसेवातना हना टपइर ओड़ाः सेरमो देसराः सताय टपइर ओड़ाःराः उंबूल अरू अउल-तउल इया इदा। हनालगा मोसेस टपइर ओड़ाः भाये तुलागे मेला भगवान हाँये सेतावतेरा, “अयुमेमे! पहाड़रे नकलिंग उदुःवातेडमेःआ, हनन इया जमालेःआ तुतुला लगा इदा।”

इबरानी 12:25

भगवान अपेय कता उदुःवाता हना कता नपायपे अयूम ठुड़ावगे। चउंदीसरे होड़कूय सेतावतेरा हाँयगराः कता मेरकू मनावगान, हँकुःआ होड़कू मेनेरकू बनसावगान। दो सेरमो देस अते अबूय सेतावतना हाँयराः कता मेरबू अयूम ठुड़ावगे दो, अबू बनसाव अवेनता जा?