गलातिया 3:1 - Korwa Bible

¹ ने गलातियारिकुःआ होड़कू, अपे करा उड़ी नाःआ इयापे बोकोयना? ईसू मसी कुरूसरेय गोएगनेना माःआन अपे सनाताय सतायिंग उदुःवातेडपेःआ। दो अपे करा इया पती ञेडतो इयापे होयायना?

गलातिया 3:1 Referans Kwoze

2 कुरिंती 11:3

अपे सुधिया अरू सुद जीवते मसीपे दुलारतना। दो बींग, हववा अडिगतेडखने बहकावतिरिया, हनन इया मसीराः हना दुलार अते लबरा चेडदार होड़कू अपेकू बहकावगोडता माःआनतिंग बोरतना।

उदुःतो कताकून 2:20

हनते हों अपे बदीरे ईंगके मीटोंग बड़रा ककता लगा इदा; इजबील ञावीग अइमी मेरपे हिगार एंडायतना। हाँय ईंगरिकुःआ सेवकिया होड़कू अडिगकेडकूखने कतायता, ईंग भगवानराः बड़रा कतायीग अइमी हवे, माःआन। हाँयराः चेडतोते, मुरतीकून मड़ंगरे मंडावतो जिनिसकून जोम लगा अरू सनहा-सनहीपे एचेय लगा होड़कूय बहकावतना।

गलातिया 1:6

अपे ईसू मसीराः मयाते नपाय सरवनपे बिसवासगे लगा भगवान अपेय राःकेरा, अरू हना बिसवास अते अपे हनाली कुदाकियानखन एनेटाः एटाः दूरपे साबकेरा। हनालगा अपे बदीरे, ईंग मुरुकिंग बयावयना।

1 पतरस 4:17

भगवानरिकुःआ होड़कू भगवान फड़ियावकूराः बेला सोदोरकिया। अरू फड़ियावगे लगा अँननबू अतेय बुँहड़ीगेता दो, भगवानराः नपाय सरवन मेरकू बिसवासगेता हँकुःआ होड़कूराः जीव करा इया होयाःता?

2 पतरस 2:18

हँकू बेगर लूरराः बड़वार कताकूनकू कतायता। अरू हँकूराः सनहा-सनहिःआ बुताते, कसूर होड़कू अते निःईमिन लगाकू बनसावयना हँकुःआ होड़कू, देह दगलीकूनराः चाहाःतेकू एचे बझावगोडकूता।

इबरानी 11:8

बिनिसवासते इबराहीम भगवानराः कताय मनावनेना। हनालगा भगवान हाँय इताडगेय लगाय ओंगोल दोहोतेरा हनानाः देसरे सेन लगाय हुकुमवातेरिया दो इबराहीम, ईंग करा होरिंग सलाःतना, माःआन मेनेरेय सुसुदीःआ। हनारे हों हाँय भगवानराः कता मनावनेनखन सेन लगाय उडुंगयान।

इपीसी 4:14

नाःआ इया अबू मसीरेबू हरानता दो, अबू लइंकू इया ओरोबू दोहोनेना। डोंगा लहराते तुकड़ाव हड़ाःता हनन इया अडिग बइना चलहू होड़कू अँकूराः एटाः एटाः लबरा चेडतोते ओरोकू बहकाव अवेतेडबुःआ।

गलातिया 4:9

मनदो नुँहू अपे भगवानपे सुदीकेरा, बलकि भगवान अपेय सुदीकेडपेःआ। दो अपे हनानाः बेगर लूर अरू सदाःआ नियमकून, मनाः लगा चिला लगापे बहुराःतना? दो हना नियमकूनपे मनाः अते अपे हना नियमकूनराः आड़रे अरूपे दोहो जुवाःता।

गलातिया 3:3

अपे नाःआ इया करा इयापे बोको-डोंडोयना? सुद बिरुवा अपे जीवरेय बुँहड़ीकेरा, हना बुता अपे अँननपेराः ओंगोलते पुरावगे लगापे कुरनिसगेतना जा?

1 पतरस 1:22

अपे सताय कता मनावकेडखन अपेराः जीवपे सुदकेरा, जेमहा अपे अँननपे सतायते अपेराः इनिंदरी इंदरीते अरूपे अलार-दुलार होड़ेंग।

इबरानी 5:9

अरू हाँय उडु-बुडूत होड़ बड़ाँवकियानखन हुकुमकू मनाःता हँकुःआ होड़कू सगर सइट लगाय सडाव अवेकूता,

इपीसी 5:15

अपे बोको होड़कू इया अहापे होयाः। मनदो कनहूनदारकू इया, जमा कताकून अउल-तउलकेडखनपे जियाः।

1 तिमुतियूस 6:4

हाँय बड़वार होड़ हवे अरू तोनोंगाः मेरेय सुदीयता। हाँयग होड़ भगवानराः सरवनराः मेमेडटोंग लबदरे बेलूर ओंगोलते कता होड़ेंग लगाय मंजूरवाता। नाःआते होड़कू इरा होड़ेंगता, कड़ी होड़ेंगता, तूड होड़ेंगता अरू बेलूर बेलूरकू जाः होड़ेंगता।

गलातिया 2:14

मनदो हँकूराः लूर-नेवन सताय नपाय सरवन इया मेरिंग ञेलगाड। दो ईंग जमाकू मड़ंगरे पतरस मंदराव घड़ीनिंग कतावातेरिया, “ने पतरस, आम एहूदा होड़ हवे, मनदो आम बेगर एहूदा होड़ इयाम जियाःतना। दो चिला लगा आम बेगर एहूदाकू, एहूदाकू इया जियाः लगाम रेनहाकूता?”

1 कुरिंती 11:26

तोनोंग मेला अपे नाःआ रुटीपे जोम अरू नाःआ अंगूर रसपे ञूय, दो परबू अरीने कुदा वेग वरी हाँयराः गुजुः बदीरेपे उदुःगेता।

1 कुरिंती 2:2

दो हनमेला ईंग ईसू मसी बदीरे अरू कुरूसरे हाँयराः गुजुः बदीरे एकला अपे एचेरे कताय लगायिंग ओंगोल दोहोबाःकातेरा।

रूमी 6:17

अपे मड़ंगरे कनासूर कसूररेपे दोहोना। मनदो नुँहू अपेकू चेडतेरा हनन इया अपे मिनी जीवकियानखनपे मनाःतना। हनालगा ईंग भगवानिंग धनियाबादगेयतना।

रूमी 2:8

मनदो अदोम होड़कू अँननकूराः नफा लगाकू ञामता। हँकू सताय कता अड़ाःकेडखन बेलूर कताकू मनाःता। अरू हँकुःआ होड़कू एचेरे भगवानराः रीस रंजाव जुवाःता।

मूक चेलाकू 6:7

दो हनन इया भगवानराः सरवन मुरुक होड़कू एचेरे सितराव ञवना। चेलाकू एरुसलेम सहररे मुरुककू बगरायान अरू मुरुक बगरा पुजउरी होड़कू हों ईसू एचेरेकू बिसवासतेरा।

उदुःतो कताकून 18:3

जमा जइत होड़कू गोड़ावयान, हँकू नाःआ सहररिकुःआ होड़कूराः सनहा बुतातेकू गोड़ावयान। चउंदीसरिकुःआ राजाकू हँकू सुदाकू सनहानेना, अरू चउंदीसरिकुःआ फेरवइत होड़कू हँकूराः बेलूर बुताराः ओंगोलतेकू गिरहतनेना।”

2 तिसलूनिका 1:8

अरू भगवान मेरकू सुदीयतना अरू परबू ईसूराः नपाय सरवन मेरकू मनाःतना, हँकुःआ होड़कू भगवान डंडियावकूताय।

इपीसी 3:8

भगवानरिकुःआ जमा सुद होड़कू अते ईंग हुडिंगीग हवे। हनते हों बेगर एहूदाकू एचेरे मसीराः अगामाः आन-धान बदीरे कता उदुःगे लगा भगवान ईंगे मयावारा।

2 कुरिंती 10:5

अरू अले होड़कू भगवानकू सुदी अते रोंकावकूता हना जमा ओंगोलकून अरू बड़वार कताकून हँकूराः दूर अते चलाः एंडाकेडखन होड़कूराः जमा ओंगोलकून मसीराः आड़रेले एचे कबीगगोडता।

रूमी 10:16

मनदो मुरुक होड़कू नपाय सरवन मेरकू मनेवागाड। भगवानराः बड़रा कतायीग होड़ एसयाह कतातेरा, ने परबू, इये अलेराः सरवनकू बिसवासकेरा?

लूका 24:25

दो ईसू हँकिन एचेरेय कताया, “ने बोको होड़किन, भगवानराः बड़रा कता होड़कू कताया हना जमा बड़रा अबा गते-गातबा बिसवासगेतना जा?

मती ओजाःतेरा भगवानराः नपाय सरवन 24:24

हना बेला मुरुक बगरा होड़कू लबरा घड़ीनकू कतायता, ईंग मसी हवे अरू ईंग भगवानराः बड़रा कतायीग होड़ हवे, माःआन। हँकू मुरुक चिनहाकून अरू बयाव जुवाः इयाःआ बुताकून एचेवाडखन भगवानरिकुःआ सुनावतो होड़कू हों बहकावकू लगाकू कुरनिसगेता।

मती ओजाःतेरा भगवानराः नपाय सरवन 7:26

अरू ईंग बड़रा मेरेय मनाःता हाँयग होड़ बुयांग होड़ इदानिया। हाँय बेगर नेवते बितीलरे ओड़ाःय तुलातेरा हाँयग होड़ इया इदानिया।

मूक चेलाकू 16:6

भगवानराः सुद बिरुवा आसिया राइज सेन अते रोंकावतेडकुःआ। हनालगा पउलूस अरू आँयगरिकुःआ सउंगताकू पिरगिया अरू गलातिया छतरतेकू सेनेडा।

गलातिया 1:2

ईंग सुदा इदानकुःआ, हँकुःआ जमा बिसवासी होड़कू सुदा, गलातिया राइजराः कलसियारिकुःआ बिसवासी होड़कू, अपे लगा, नाःआ चिठीयिंग ओजाःगेतना।

गलातिया 5:11

ईंगरिकुःआ अजी बोपोहकूतिंग, नुँहू वरी होड़कू खतनान लगायिंग परसारगेता दो एहूदाकूराः संताव बे अहियावते ईंग चिला लगायिंग सहावकेःआ? ईंग ईसूराः कुरूस बदीरे परसारगे अते, होड़कू खतनान लगायिंग परसारगे दो एहूदाकू ईंग एचेरे तोनोंग इयाःआ गारबार ओरोकू ञाम अवेकेःआ।