गलातिया 1:6 - Korwa Bible

⁶ अपे ईसू मसीराः मयाते नपाय सरवनपे बिसवासगे लगा भगवान अपेय राःकेरा, अरू हना बिसवास अते अपे हनाली कुदाकियानखन एनेटाः एटाः दूरपे साबकेरा। हनालगा अपे बदीरे, ईंग मुरुकिंग बयावयना।

गलातिया 1:6 Referans Kwoze

2 कुरिंती 11:4

तोनोंगीग अपे एचेरे सेनेकियानखन अले परसारकेरा हाँयग ईसू अते एटाः ईसूकू परसार दो, सहे अपे पवावनेना हाँयग सुद बिरुवा अते एटाः इयाःआ बिरुवापे पवाः दो, सहे अपे कबुलावकिया हना नपाय सरवन अते एटाः इयाःआ सरवनपे अयूम दो, अपे हना कताकून ओनोहोनपे मनाव जुवाःता।

1 तिमुतियूस 1:3

ने बेटा, ईंग मकिदुनिया राइज अगीयिंग सेनेन मेला, इपीसी सहररेम दोहोन लगा आमिंग असेतेरा, जेमहा तोनोंग तोनोंग होड़कू लबरा चेड अलोकू चेडकू लगा हँकूम हुकुम अवेवाकू।

1 कुरिंती 4:15

अपे ईसू मसी बदीरेकू चेडपे लगा दस हजार चेडदारकू दोहोन हों, अपेरीग मिनीटोंग अपांग इदा। अपे एचेरे नपाय सरवनिंग कता उदुःतेरा अरू अपे ईसू मसी सुदापे मिनीयान अते ईंग अपेरीग अपांगिंग बड़ाँवयना।

मूक चेलाकू 15:11

दो अबू बिसवासगेतना हँकुःआ होड़कू भगवान सडावकेडकुःआ, हनन इया अबूरीग परबू ईसूराः मयाते भगवान अबू होंय सडावकेरा।”

गलातिया 5:4

मोसेसराः नियमकून मनावकेडखन भगवानराः ओंगोलरे बेगर गारबार होड़ बड़ाँः लगाय ओंगलेतना, हाँयग होड़ ईसू मसी अतेय हिगारयना अरू भगवानराः मयाय आड-बेकारवारा।

रूमी 10:3

भगवान करा उड़ी होड़कू बेगर गारबार होड़कूय बड़ाँवकूता, हना हँकू मेरकू सुदीयतना। अरू हँकू अँननकू अँकूते बेगर गारबार होड़कू बड़ाँः लगाकू कुरनिसगेतना। हनते हों हँकू भगवानराः ओंगोल इया बेगर गारबार होड़कू मेरकू बड़ाँव अवेगना।

1 तिमुतियूस 1:14

परबू ईसू मसी मिनी जीवते ईंगे मयावारा, जेमहा ईंग हाँय एचेरेयिंग बिसवासगे अरू एटाः होड़कूयिंग दुलार अवे।

उदुःतो कताकून 22:21

परबू ईसू भगवानरिकुःआ जमा सुद होड़कूय मयावागोड ञवन। आमीन!

2 तिमुतियूस 2:1

दो ईंग बेटा तिमुतियूस, ईसू मसी आमे मयावारा, हनाते आम जीव बड़ियाड़ इदीनमे।

2 तिमुतियूस 1:9

हनाँयग भगवान अबूराः तोनोंग नपाय बुता ञेलकेडखन कोवान, मनदो हाँय चउंदीस बुँहड़ीन अते मड़ंगरेय ओंगोल दोहोतेरा हना इया ईसू मसीते मयावाडबूखने सडावकेडबुःआ अरू सुद जीव जियाः लगाय राःकेडबुःआ।

2 तिसलूनिका 2:14

अले अपे एचेरे ईसू मसीराः नपाय सरवनले कता उदुःतेरा अरू हना सरवनते भगवान, अपे ईसू मसीराः मान मरजइतरे मेसान लगाय राःकेडपेःआ।

रूमी 5:2

अबू हाँय एचेरेबू बिसवासकेरा हना अते भगवान अबूय मयावातना, जेमहा अबू बड़ियाड़तेबू दोहो ञवन अरू भगवान सुदा मान मरजइतबू पवाः माःआन असरा घड़ीनबू भल-भलायवा।

एहुना 9:30

दो हाँय हँकू एचेरेय कतातेरा, “हाँय ईंगराः मेडे नपायकेरा। अरू अपे हाँय करेयीग होड़ हवे, हना अपे मेरपे सुसुदीतना दो नाःआ बयाव जुवाः इयाःआ कता हवे।

2 पतरस 1:3

भगवानराः सगरावतो जंगरते, अनँयग ओंगोल इया नपाय जीवबू जियाः लगा जमाकूने एमेवाडबुःआ। अरू अनँयग लगा अबूय राःकेडबुःआ हाँयग ईसू, अगम मरंग अरू नाय नपाय इदानिया माःआनबू सुदीकेड अते नाःआ जमाकूनबू पवावकिया।

1 पतरस 1:15

मनदो अपेय राःकेडपेःआ हाँयग सुद भगवानराः लूर-नेवन इया अपे हों जमा बरानाः सुद होनोयाः इदा।

मरकूस 6:6

हँकुःआ होड़कू ईसू एचेरे मेरकू बिसवासगाड, हनालगा हाँय बयावयाने। हनते हाँय एटाः एटाः गाँव सेनेवाडखन होड़कूय चेड उदुःआ।

रूमी 8:28

दो अबू सुनुदीबाःगोतेरा, अबू भगवानबू दुलारता अरू भगवानराः ओंगोल इया राः अगूतो इदानबुःआ। दो अबूराः जीवरे होयाःता हना जमाकून अते अबू जीवरे नफा होनोया जुवाःता।

रूमी 8:30

भगवान मनाड़ंगतेय सुनाव दोहोकेडकुःआ हँकुःआ होड़कू अनँयग एचेरेय राः अगुकेडकुःआ अरू फड़ियावतो होड़कूय बड़ाँवगोतेडकुःआ। हनते हाँय हँकू होंय मान मरजइतकेडकुःआ।

2 कुरिंती 2:17

एटाः होड़कू इया अँननकूराः नफा लगा, अले भगवानराः सरवनरे मेरले मेसायता, मनदो सताय ओंगोलते भगवान अगीते पवावतो सरवन मसीराः संघरातेले कता उदुःगेता।

गलातिया 1:7

सनातायरे, अरू एनेटाः दूर कोनोवानेःआ। मनदो तोनोंग तोनोंग होड़कू अपेराः ओंगोल बार जीव होयाः लगा अरू ईसू मसीराः नपाय सरवन अते अपे एटाः दूर अगी गोःपे लगाकू चहाःतना।

गलातिया 1:11

ईंग अजी बोपोहकूतिंग, अपेयिंग कता उदुःवाडपेःआ, हना नपाय सरवन होड़कूराः तुलात सरवन ना लवे।

गलातिया 1:15

मनदो ईंग जनमावगुः अते मनाड़ंग भगवान अनँयग मयाते ईंग एटाःगिंग लगाय ओंगोल दोहोतेरा।

गलातिया 2:2

भगवान ईंगे कतावातेरा, आम एरुसलेममे सलाव जुवाः, माःआन। हनालगा ईंग हंडा तोरायिंग। हंडाले सोदोरनेनखन, बिसवासी होड़कूरिकुःआ मरंग मरंग मूक होड़कू सुदा, एटाःरेले जुमावनेना। बेगर एहूदाकू एचेरे नपाय सरवन कता उदुःगे लगा ईंगराः मड़ंगःआ अरू नुँहुःआ सेसा-दुरात, सदाःआ अहा होयाः लगा, हना सरवन बदीरे हँकुःआ मूक होड़कू एचेरे एकलायिंग कतातेरा।

गलातिया 2:5

अपे सनातायते नपाय सरवनपे सुदीगे लगाले चहाःतना। हनालगा अले हँकुःआ बराहीलकूराः कता गुनमिन बेला वरी हों मेरले मनावगान।

गलातिया 2:7

मनदो हँकुःआ होड़कू सुदीगोतेड, नपाय सरवन एहूदाकू एचेरे परसार उदुःगे लगा भगवान पतरसे वारकिरिया। हनन इया बेगर एहूदाकू एचेरे भगवान पउलूसे वारकिरिया, माःआन।

गलातिया 2:14

मनदो हँकूराः लूर-नेवन सताय नपाय सरवन इया मेरिंग ञेलगाड। दो ईंग जमाकू मड़ंगरे पतरस मंदराव घड़ीनिंग कतावातेरिया, “ने पतरस, आम एहूदा होड़ हवे, मनदो आम बेगर एहूदा होड़ इयाम जियाःतना। दो चिला लगा आम बेगर एहूदाकू, एहूदाकू इया जियाः लगाम रेनहाकूता?”

गलातिया 5:14

नाःआ मिनीटोंग नियमरे जमा नियमकून पुराव जुवाःता, “अपे अपेरिकुःआ परुसीकू अँननपे इयापे अलार-दुलारकू।”