इपीसी 5:2 - Korwa Bible

² ईसू मसी अबू दुलारकेडखन अनँयग जीव अबू लगा भगवान मड़ंगरे मुरुक नपाय महकराः बलिदान इयाय जिमातेरा। हननलगा अपे अँननपे दुलार होड़ेंगगोड ञवन।

इपीसी 5:2 Referans Kwoze

एहुना 13:34

ईंग अपे लगा मीटोंग नँवा हुकुमिंग एमेयतना। ईंग अपेयिंग अलार-दुलारतना, हनन इया अपे होँपे अलार-दुलार होड़ेंगगोड ञवन।

गलातिया 2:20

अरू नुँहू ईंग मेरिंग जियाःतना, मनदो ईसू मसी ईंग इंदरीरेय जियाःतना। ईंग दुलारकेडखन अनँयग जीव ईंग लगाय एमेकेरा हनाँयग भगवानरीग बेटात ईसू मसी एचेरे बिसवासकेडखन नुँहूयिंग जियाःतना।

कुलूसी 3:14

नाःआ जमाकूनपे एचेगोड ञवन। मनदो नाःआ अते अरू बगरा अपे अलार-दुलार होड़ेंगपे। दो अपे हेनेल-मेलरेपे दोहो अवेनता।

2 कुरिंती 2:15

दो अबू परसारगेता हना नपाय सरवन सडाव जुवाःताकू हँकुःआ होड़कू लगा अरू लाय जुवाःताकू हँकुःआ होड़कू लगा भगवान ननायगुःता मसीराः नपाय मह-महाःता हना सकला इया इदा।

तितूस 2:14

हाँय अनँयग आँयगते गुजुः लगाय जिमायान, जेमहा अबूराः जमा बरानाः बेलूर नेवन अते सडावकेडबूखन नपाय बुता बुता लगा ओसताज इदानकुःआ अनँयगरिकुःआ सुद होड़कूबू बड़ाँव अवेन।

1 कुरिंती 16:14

एटाः होड़कू दुलार घड़ीन जमालेःआपे एचे।

मती ओजाःतेरा भगवानराः नपाय सरवन 20:28

मनुवारीग बेटा अनँयग एचे सेवान लगा मेरेय वेगगना। मनदो हाँय जमा होड़कूय सेवा लगा अरू अनँयग जीव एमे अटूकेडखन होड़कू सडावकू लगाय वेगकिया। हनन इया अपे हों एटाःकूपे सेवाकू।”

1 पतरस 4:8

भगवानराः कागदरे ओजाःतो इदा, “अपे एटाः होड़कूपे दुलार दो, हँकूराः मुरुक कसूरकूनतेपे कता बनसावकूता।” हनालगा अपे नाःआ मनइद कता इया अँननपे अपे इनिंदरी इंदरीते अलार-दुलार होड़ेंग ञवनपे।

2 कुरिंती 8:9

अपे सुसुदीतना अबूरीग परबू ईसू मसी मयावाडबुःआ। हाँय सेरमो देसरे गिरहते दोहोन हों हाँय अपे लगाय गरीबयान, जेमहा हाँय गरीबगुः अते अपे भगवान बदीरेपे गिरहत जुवाः।

1 एहुना 3:16

ईसू मसी अबू लगाय गोएगनेना अरू अबूय एचे उदुःवाडा करा इया होड़कू अलार-दुलाररे दोहोन इदा। हनन इया अबूरिकुःआ बिसवास वपक बोपोहकू लगा अबू हों अबूराः जीव एएमे इदा।

उदुःतो कताकून 1:5

अरू ईसू मसी हों अपे मयावाडपेखन सलसत एमेवापे लगायिंग अरजीतना। हाँय बिसवासगेयीग दोहोकियानखन होड़कू एचेरे सताय भगवाने उदुःवातेडकुःआ। हाँय गोएगनेनखन जियाव रेमतो होड़कू अते मड़ंगीगे दोहोना अरू चउंदीसरिकुःआ जमा राजाकूरीग मनारंग राजा हवे। ईसू अबूय दुलारकेडबुःआ अरू कुरूसरे अनँयग बलंगीय तूतेड अते हाँय अबू कसूरराः बोझातेय अजइतकेडबुःआ।

इबरानी 9:26

ननन इया हाँय घड़ी घड़ी बलिदानगुः लगा दोहोकुः दो चउंदीस रेःएन वरीते घड़ी घड़ी कटसिया हों हाँयके ससहाव परावकुःआ। मनदो मसी, नाःआ टुटीग बेलारे अनँयग बलिदाननेनखन होड़कूराः कसूर बराव एंडागे लगा मिनी तुरहा चउंदीसरेय वेगनेना।

इबरानी 9:14

मसी, सगर सइट जीयत दोहोनता हाँयग सुद बिरुवाते, भगवान मड़ंगरे बेगर गारबारते बलिदानगुः लगा अनँयग आँयगे जिमायान। दो अबूराः ओंगोल गोएगतो इयाःआ बुताकून अते अबू जीयत भगवानबू सेवा अवे लगा हाँयराः बलंगी चिला लगा अरू मेर सुदकेःबुःआ?

1 तिमुतियूस 2:6

जमा होड़कू कसूर अते सडावकू लगा हाँय किमइत एमेकेडखन कुरूसरे गुजुः लगा अनँयग आँयग जिमायान। नाःआ सरवन भगवान तोल दोहोतेरा हना बेला चउंदीसरिकुःआ होड़कू एचेरेय उदुःतेरा।

इपीसी 4:15

मनदो सताय कता इया जियाः घड़ीन अँननबू अबू अलार-दुलारकेडखन जमा बरानाःरे, कलसियाराः बोः, ईसू मसी इया, अबू हनारागोड ञवन लगा इदा।

1 एहुना 3:23

भगवानराः हुकुम ननानाः हवे। भगवानरीग बेटात ईसू मसी एचेरे अबू बिसवासगे लगा इदा। अरू ईसू मसी अबू एचेरेय हुकुमकेरा हनन इया एटाः होड़कू सुदा अलार-दुलारते दोहोन लगा इदा।

1 तिमुतियूस 4:12

ने तिमुतियूस, डिंघा इदानमेःआते तोनोंगीग आम हुडिंग अलोकू ओंगोल अवेमे। मनदो आम सुद लूर-नेवनते अरू बड़राते, बिसवासरे अरू अलार-दुलारतेम दोहोन अते, बिसवासी होड़कूके मीटोंग चिनहा इयाम दोहोन।

1 तिसलूनिका 4:9

अरू अलार-दुलार होड़ेंग लगा भनगवान अतेपे चेडकिया। हनालगा अपे अलार-दुलार होड़ेंग बदीरे ईंगके ओओजाः लगा कोवानेःआ।

इपीसी 4:2

अपे जमा बेला अनँयग आँयग हुडिंग ओंगोलकियानखनपे दोहोन अरू कटराहा होड़कू अहापे होयाः। मनदो जमा बरानाः सहाव घड़ीन अलार दुलारतेपे दोहोन।

इपीसी 3:17

अपेराः बिसवासते ईसू मसी अपेराः इंदरीरेय डेरान लगायिंग अरजीतना। जेर गहीर सेनेकियानखन सींग बड़ियाड़गेता अरू ओड़ाः खुंटा बड़ियाड़गेता, हनन इया अपेराः जीव अलार दुलारते बड़ियाड़ जुवाः लगा होयिंग अरजीतना।

गलातिया 1:4

नाःआ बेलूर चउंदीसराः जंगरते अबू सडावबू लगा, ईसू मसी अबूरीग अपांग भगवानराः ओंगोल इया, अबूराः कसूर लगा अनँयग आँयग गुजुः लगाय जिमायान।

उदुःतो कताकून 5:9

हनते हँकुःआ चूबीसगोटोंग जीव-जंतूकू अरू मी कुड़ी चइरगोटोंग मूक होड़कू, नाःआ नँवा सेरेंगकू सेरेंगा; “ने परबू, आमकू ञेड गोएगतेरा, अरू आमराः बलंगीते जमा देसरिकुःआ होड़कू, अरू एटाः एटाः भासीरिकुःआ होड़कू, अरू जमा जइत होड़कू अरू जमा खमदानरिकुःआ होड़कू, हँकुःआ जमा होड़कू भगवान लगाम सडावगोतेडकुःआ। हनालगा आम नाःआ कोंडोड़तो कागद अरू मोहर लड़ा जुकूर इदानमेःआ।

इबरानी 9:23

चउंदीसरे होड़कू भगवान जाग लगाकू उपयोतगेता हना जिनिसकून सेरमो देसराः सताय जिनिसकूनराः उंबूल इया इदा। हनालगा चउंदीसराः जिनिसकून नाःआ इयाःआ बलिदानकूनते सुनुदगे लगा इदा। मनदो सेरमो देसराः जिनिसकून नाःआ अते मुरुक नाय नपाय बलिदानते सुद जुवाःता।

इपीसी 3:19

अबूराः कनहूनते ओरोबू ओंगोल तजाः अवेतेरा, हना दुलारबू सुदी अवेय लगा होयिंग अरजीतना, जेमहा भगवानराः जमालेःआते अपेराः जीव उडु-बुडू जुवाः।

रूमी 8:3

दो अबू मोसेसराः नियमकून जमालेःआ मनाः लगाबू कुरनिसगे। हनते हों अबूराः कसूर लूर-नेवन मेर टुटीगगुःता। मनदो भगवान अबूय सडाव अवेता। हनालगा जमा होड़कूराः कसूर बराव एंडागे लगा, हाँय अनँयगरीग मिनी होड़ बेटात ईसू मसी, कसूरतो मनुवाराः सुरइत मुरइतरे, नाःआ चउंदीसरेय वारगोतेडीग। हनते हाँय जमाकूराः कसूर लगा डंडियावतेडखन ईसूय एचे बलिदानगोतेडीग।

इपीसी 5:25

ने हेपेरेलकू, मसी अनँयग आँयगते गुजुः लगा जिमानेनखन कलसियाय अलार-दुलारकेरा, हनन इया अपे अँननपेरिकुःआ एपेराकूपे अलार-दुलार।

1 कुरिंती 5:7

अबूरीग ईसू मसी पसहा परोबराः भेड़ा होन इया अबू लगाय बलिदानयना। अरू अपे बेगर सेबेल सोड़ा सोलोंगतो गोहोम गुंडा इया इदानपेःआ। दो हना गोहोम गुंडा नपाय दोहोन लगा, हना जुना सेबेल सोड़ा रेमगे एंडागोडपे।

रूमी 4:25

ईसू मसी अबूराः कसूर बदलारे गुजुः लगा अनँयग आँयग जिमायान अरू भगवान अबू एचे मनावबू लगा ईसू मसी गोएगतो होड़कू अतेय जियाव रेमकिडिया।

एहुना 6:51

सेरमो देस अते उतरावकिया, हना जीवराः रुटी इनिंग हवे। तोनोंगीग नाःआ रुटीय जोम दो, हाँय कहियो ओरोय गोएगनेना। अरू चउंदीसरिकुःआ होड़कू जियाः लगायिंग एमेयता, हना रुटी ईंगराः मास हवे।”

रूमी 8:37

मनदो नाःआ इयाःआ जमा कताकूनरे, अबूय दुलारकेरा हाँयग ईसू मसीते, अबू जिनितावबाः जुवाःता।

रूमी 15:16

बेगर एहूदाकू लगा ईसू मसीरीग मूक चेलाय बड़ाँवकिडिंगा अरू ईंग मी होड़ पुजउरी होड़ इया भगवानराः नपाय सरवनिंग परसार उदुःगेतना, जेमहा हँकू भगवान ननायगुः लगा सुद बिरुवाते सुदकेडकूखन बलिदान इयायिंग जिमा अवेकू।

2 कुरिंती 2:14

भगवान ईसू मसीते जमा बेला अबू बहालतेय एचे जितावबूता। अरू हाँय नपाय महकता हना सुनुम इयाःआ मसीराः कनहून, अबूते होड़कूय एचे सुदीगोडकूता। हनालगा भगवानिंग धनियाबादता।

इपीसी 1:4

अबू हाँय मड़ंगरे सुद अरू बेगर गारबारतेबू दोहोन लगा चउंदीसराः बुँहड़ीन अते मनाड़ंग ईसू मसीतेय सुनावकेडबुःआ।

इपीसी 5:15

अपे बोको होड़कू इया अहापे होयाः। मनदो कनहूनदारकू इया, जमा कताकून अउल-तउलकेडखनपे जियाः।

पिलिपी 4:18

अपे इपापुरूदितूसते ईंग लगापे वारतेरा हना संघरा, ईंग पवावकियानखनिंग संतोकयना। नुँहू ईंग एचेरे तोनोंग इयाःआ हुडिंग बगरा कोवानेःआ अरू जनामालेःआ इनिदा। अपेराः संघरा भगवान लगा नपाय महक एमेयता हना बलिदान इया इदा अरू हनाते हाँय ननाययना।

इबरानी 8:3

जमा मूक पुजउरीकू दान अरू बलिदान देग लगा सुनावतोकू दोहोनता। हनालगा नाँयग मूक पुजउरी ईसू एचेरे हों दान अरू बलिदान एएमे लगा तोनोंगाः होनोयाः इदा।