इपीसी 4:14 - Korwa Bible

¹⁴ नाःआ इया अबू मसीरेबू हरानता दो, अबू लइंकू इया ओरोबू दोहोनेना। डोंगा लहराते तुकड़ाव हड़ाःता हनन इया अडिग बइना चलहू होड़कू अँकूराः एटाः एटाः लबरा चेडतोते ओरोकू बहकाव अवेतेडबुःआ।

इपीसी 4:14 Referans Kwoze

इबरानी 13:9

होड़कू अपे मसीराः चेडतो अते एटाः एटाःकू चेडपे दो, हनारे अलोपे बहकाःआ। जोजोमराः नियमकून मनावकेडखन अपेराः जीवरे तोनोंगाः नफा ओरो होयानेना। मनदो मसीराः मयाते अपेराः जीव बड़ियाड़गुःता।

1 कुरिंती 14:20

ने ईंगरिकुःआ अजी बोपोहकूतिंग, अपे लइंकू इया अहापे ओंगले। मनदो अपे सयाँड़ होड़कू इयापे ओंगले अरू बती लइंकू इया सुझिया होड़कूपे बड़ाँः।

1 एहुना 4:1

ने अजी बोपोहकूतिंग, नाःआ चउंदीसरे भगवानराः बड़रा लबराकेडखन कताय होड़कू मुरुक इदनकुःआ। हँकुःआ होड़कूराः कता अपे ओहेन अहापे बिसवासगे। मनदो अपे हँकुःआ होड़कू सतायते भगवानराः बड़राकू कतायता जा कोवान हना नपायते जासवाडखनपे बिसवासगे।

2 कुरिंती 2:17

एटाः होड़कू इया अँननकूराः नफा लगा, अले भगवानराः सरवनरे मेरले मेसायता, मनदो सताय ओंगोलते भगवान अगीते पवावतो सरवन मसीराः संघरातेले कता उदुःगेता।

एकूब 1:6

तोनोंगीग भगवान एचेरे कनहूने असेय दो हाँय बिसवासते अअसे इदा अरू बार जीवकियानखन अलोय असेय। बार जीवकियानखने असेयता हाँयग होड़ होयते सलाःता अरू तुकड़ाःता हना समुंदरराः लहरा इया इदानिया।

इपीसी 6:11

लड़ाइ लगा भगवान एमेकेरा हना जमा अवजारकूनपे तुसिंग। दो कलउ अडिगपे अते अँननपे अपे बनसाव अवेनता।

मती ओजाःतेरा भगवानराः नपाय सरवन 24:24

हना बेला मुरुक बगरा होड़कू लबरा घड़ीनकू कतायता, ईंग मसी हवे अरू ईंग भगवानराः बड़रा कतायीग होड़ हवे, माःआन। हँकू मुरुक चिनहाकून अरू बयाव जुवाः इयाःआ बुताकून एचेवाडखन भगवानरिकुःआ सुनावतो होड़कू हों बहकावकू लगाकू कुरनिसगेता।

2 तिमुतियूस 4:3

भगवानराः सताय सरवन अयुमे लगा होड़कू ओरोकू पतियावातेरा हना दिन निचकाःतना। मनदो अँननकूराः हिछा इयाःआ बड़रा अयूम लगाकू चहाःता अरू हनन इयाकुःआ चेडदार होड़कूकू ञाम अगुकूता।

जूदा 1:12

अपे बिसवासी होड़कू जोम लगापे जुमाःता हनमेला हँकुःआ लबरा चेडदारकू दाः पेंदारे ओकोत दोहोनता हना दिरिकून इया इदानकुःआ अरू मुरुक डीड़ते अरू बेगर गियुःते अपे सुदाकू जोमता। हँकू अँननकू बदीरेकू ओंगलेता हँकुःआ सरवाहाकू इया इदानकुःआ, अरू भेड़ाकू लगा तोनोंगाः संघरा मेरकू एमेयता। हँकुःआ होड़कू बेगर दाःते दोहोनता अरू होयते सलाःता हना बदरी इयाकू दोहोनता। हँकुःआ होड़कू, बार पुरती गेएगनेना अरू रवीगतो दोहोनता अरू गोसोत जोःओते इदा हना सींग इया इदानकुःआ।

उदुःतो कताकून 19:20

मनदो हँकू हाँयग जानर अरू हाँय सुदा भगवानराः बड़रा लबराते कतायीग होड़ होंकू साबतेरा। भगवानराः बड़रा लबराते कतायीग होड़ जानर मड़ंगरे बयाव जुवाः इयाःआ चिनहाकूने एचेया। मड़ंगरे हाँय हना बयाव जुवाः इयाःआ चिनहाकूनते, हाँयग जानरराः चिनहाकू गोःतेरा अरू हाँयग जानरराः मुरतीकू सेवाःआ हँकुःआ होड़कूय अडिगतेडकुःआ। हँकिनकू साबतेरा हना तयोमरे, हँकिन बनर जिनियत जीयत सेंगेलराः हुडिंग समुंदररेकू रेमगे बोलोगोतेडकिन। हना सेंगेलराः हुडिंग समुंदररे लेटे दिरि हितकाःआ।

गलातिया 3:1

ने गलातियारिकुःआ होड़कू, अपे करा उड़ी नाःआ इयापे बोकोयना? ईसू मसी कुरूसरेय गोएगनेना माःआन अपे सनाताय सतायिंग उदुःवातेडपेःआ। दो अपे करा इया पती ञेडतो इयापे होयायना?

मती ओजाःतेरा भगवानराः नपाय सरवन 24:11

भगवानराः बड़रा लबराकेडखनकू कतायता हँकुःआ मुरुक बगरा होड़कू रेम चड़ाँनता अरू मुरुक बगरा होड़कूकू बहकावगोडकूता।

1 एहुना 2:26

तोनोंग तोनोंग होड़कू अपे अडिग लगाकू ओंगलेता। हनालगा ईंग अपे सेताव घड़ीनिंग ओजाःगेतना।

2 तिमुतियूस 3:13

मनदो बेलूर होड़कू अरू लबरा चेडदार होड़कू एटाः होड़कूकू अडिगता अरू अँननकू अडिग जोमकेडखनकू अनाड इदीनता।

2 कुरिंती 4:2

मनदो ओनोक दनंगकू एचेयता हना गियुः इयाःआ बुताकूनले अड़ाः एंडागोतेरा। अले चलहू होड़कू इया मेरले सलाःता अरू भगवानराः सरवनरे एटाः तोनोंगाः सरवन मेरले मेसायता। मनदो अले बदीरे भगवान सुनुदीबाःगोडता, हँकू जमा होड़कू एचेरे ईंगराः सताय सरवनकू कता उदुःगेता, माःआन। नाःआते अले बदीरे जमा होड़कू अँननकूराः इंदरीरेकू सुदीबाःगोडता, हँकू भगवान ननायगुः जुकूर इदानकुःआ, माःआन।

मती ओजाःतेरा भगवानराः नपाय सरवन 11:7

एहुनारिकुःआ चेलाकू हंडा अतेकू सेनेडा दो, ईसू एहुनाराः बदीरे होड़कू एचेरेय कताया, “अपे चिला ञेल लगा टयंगाब ततेररेपे सेनेडा? होयते डोलाःता हना सरपी इया होड़ ञेल लगापे सेनेडा जा?

1 कुरिंती 12:2

अपे सुसुदीतना, अपे बेगर बिसवासी होड़कूपे दोहोन मेला, मेर अयुमेता हना मुरतीकूनपे सेवा लगा अपेके आँच परावनेना अरू हनानाःपे सेवागोड ञवना।

मूक चेलाकू 23:21

मनदो चालीसगोटोंग अते बगरा होड़कू ओकोकियानखन हाँय ञेड एंडाय लगाकू ततंगीतना। हनालगा आम हँकूराः कता इया अहम एचेय। हँकू किरिया कसट जोमकेडखनकू कताकेरा, हाँय अरीनबू ञेड एंडाय वरी तोनोंगाः ओरोबू जोम ञूतेरा, माःआन। अरू हँकू असरातना, हाँय अबूराः ओंगोल इयाय एचेयता, माःआन।”

1 एहुना 2:19

नँकुःआ मसी मुदइ होड़कू मड़ंग अँननबू सुदाकू दोहोना, मनदो हँकू सनातायते अबूरिकुःआ होड़कू मेरकू दोहोगान। हँकू अबूरिकुःआ होड़कू दोहोकुःआ होले, अँननबू सुदाकू दोनोहो ञवनकुःआ। मनदो हँकू अबू अते हिगारयनाकू अरू ननानाः अते सुदीगोतेडकुःआबू हँकू अबूरिकुःआ होड़कू मेरकू दोहोगान।

2 पतरस 2:18

हँकू बेगर लूरराः बड़वार कताकूनकू कतायता। अरू हँकूराः सनहा-सनहिःआ बुताते, कसूर होड़कू अते निःईमिन लगाकू बनसावयना हँकुःआ होड़कू, देह दगलीकूनराः चाहाःतेकू एचे बझावगोडकूता।

एकूब 3:4

समुंदराः जहाज बदीरेपे ओंगले। हना जहाज मरंग इदा अरू होयते सलाःता। मनदो हना जहाजरीग सलावदार हुडिंगाः पोतवारते जहाज गोः लगाय ओंगलेता हना अगीय किंदराव गोः अवेयता।

1 तिमुतियूस 3:6

हाँय नँवा बिसवासी होड़ अलोय दोहोन, जेमहा हाँय बड़वारकियानखन कलउ पवावकिया हना इया डंड भगवान अगीते अलोय पवाः।

2 तिमुतियूस 1:15

आम सुदीयतना आसियारिकुःआ अदोम बिसवासी होड़कू ईंगकू अड़ाःगोतेडा। पुगलूस अरू हिरमुगनेस, हँकिन हों ईंगकिन अड़ाःगोतेडा।

1 कुरिंती 3:19

नाःआ चउंदीसरिकुःआ होड़कूराः कनहून भगवान मड़ंगरे बुयांगतो इया इदा। अरू हनानाः बदीरे भगवानराः कागदरे ओजाःतो इदा, “अँननकू कनहूनदारकू ओंगलुःता, हँकुःआ होड़कू अँननकूराः बुइदकूनते भगवान दाःकूता।”