इपीसी 4:1 - Korwa Bible

¹ परबू ईसू मसीराः सरवन परसार बदीरे जेहेलरे इदानिंगा, अरू ईंग अपे एचेरे गोड़न पइयनकियानखनिंग असेयतना। भगवान अपेय राःकेडपेःआ दो, भगवानरिकुःआ होड़कू करा इया जियाः लगा इदा, हनन इयापे जियाः।

इपीसी 4:1 Referans Kwoze

कुलूसी 1:10

जेमहा अपे परबूराः हिछा इया जियाः घड़ीनपे ननायगोडेय, जमालेःआ नपाय बुतापे एचे अवेय, अरू भगवान अनउर नपायतेपे सुदीगोड ञवन।

पिलिपी 1:27

तोनोंग इया होयाः, अपेराः लूर-नेवन ईसू मसीराः कतत नपाय सरवन इया होनोयाः लगा इदा। दो ईंग अपे एचेरेयिंग सेन सहे मेरिंग सेन, अपे बदीरेयिंग अयुमे, हँकू बिसवासरे बड़ियाड़ इदानकुःआ। ईंग नाःआ होयिंग अयुमे, हँकू मिनी जीवकियानखन मिनी ओंगोलते, ईसू मसीराः नपाय सरवन एटाः होड़कू बिसवासगे लगा, मुरुककू मिहनइतगेतना, माःआन।

1 तिसलूनिका 2:12

जेमहा आँयगरिकुःआ होड़कू सुदा दोहोन लगा अरू आँयग सुदा मान मरजइतते राइजगे लगाय राःपेतना हाँयग भगवानराः ओंगोल इया अपेराः लूर नेवन होया जुवाः।

2 पतरस 1:3

भगवानराः सगरावतो जंगरते, अनँयग ओंगोल इया नपाय जीवबू जियाः लगा जमाकूने एमेवाडबुःआ। अरू अनँयग लगा अबूय राःकेडबुःआ हाँयग ईसू, अगम मरंग अरू नाय नपाय इदानिया माःआनबू सुदीकेड अते नाःआ जमाकूनबू पवावकिया।

2 तिमुतियूस 1:9

हनाँयग भगवान अबूराः तोनोंग नपाय बुता ञेलकेडखन कोवान, मनदो हाँय चउंदीस बुँहड़ीन अते मड़ंगरेय ओंगोल दोहोतेरा हना इया ईसू मसीते मयावाडबूखने सडावकेडबुःआ अरू सुद जीव जियाः लगाय राःकेडबुःआ।

1 कुरिंती 4:16

हनालगा अपे जमालेःआते ईंगरिकुःआ ञेल सिखात होड़कूपे बड़ाँः लगा अपे एचेरेयिंग गोड़न-पइयनतना।

2 तिसलूनिका 1:11

दो भगवान अपेय राःकेडपेःआ हनानाः जीव जुकूरेय बड़ाँवगोडपे लगा अरू अनँयग जंगरतेय अपेराः बिसवासराः जमालेःआ नपाय बुता अरू हिछा एचे पुरावगे लगाले अरजीगोड ञवनतना,

इपीसी 4:17

ने अजी-बोपोहकूतिंग, अयुमेपे! परबू ईंग एचेरेय एमेकेरा, हनानाः हातपातते अपे एचेरेयिंग कतायतना, सताय भगवान मेरकू सुदीयता अरू बेगर लूरराः ओंगोल इयाकू जियाःतना हँकुःआ होड़कू इया अपे अलोपे जियाः।

रूमी 12:1

हनालगा ईंगरिकुःआ अजी बोपोहकूतिंग, भगवान अबूय मयावारा हना कता उहियारकेडपेखन अपे एचेरे गोड़न पइयन घड़ीनिंग असेयतना। अपे अँननपेराः देह भगवान ननायगुःता हना सुद अरू जीयत बलिदान इया जमालेःआपे जिमागोड। नाःआ भगवान सेवाराः सताय लूर हवे।

कुलूसी 2:6

दो अपे ईसू मसी, परबू माःआनपे मनेवाडिया, हनन इया हाँयराः कता मनाः घड़ीनपे सलाव ञवन।

1 पतरस 3:9

अपे बेलूर बदलारे बेलूर अपे अहापे कुदागे, अरू तूडपेताकू हना बदलारे अलोपे तुडकू, मनदो हँकुःआ होड़कूराः जीव-जहन भगवान नपायगे लगापे अरजीगोड ञवन। ननन इयाःआ बुताकून एचेय लगा भगवान अपेय राःकेडपेःआ, जेमहा अपेराः जीव-जहन हों भगवान नपायगे।

2 कुरिंती 6:1

अले भगवानरिकुःआ सेवा देंगवा होड़कू इदानलेःआ अते अपे एचेरेले असेयतना, भगवान अपे मुरुके मयावाडपेःआ, हना अपे जीवरे अहवइर अलोपे होया ओवा।

2 एहुना 1:5

ईंग मेसेयिंग, आम लगा मीटोंग नँवाःआ हुकुम मेरिंग ओजाःगरा। नाःआ हुकुम मनाड़ंगते इदा अरू आम एचेरेयिंग असेयतना, अबू अँननबू अबू दुलार होड़ेंग इदा।

1 पतरस 5:10

अपे तोनोंग बेला वरी कटसियापे सहाव दो, मुरुक मयादार इदानिया हाँयग भगवान, अपेराः जीव जमालेःआतेय नपायगोडता। नाःआते अपेराः जीवरे तोनोंग इयाःआ गारबार ओरो दोहोनेना अरू अपेराः जीव बड़ियाड़कियानखन तोनोंगाः हुडिंग बगरा ओरो होयानेना। हनाँयग भगवान अपे ईसू मसीते कहियो ओरो टुटीगनेना हना मान मरजइतपे पवाः लगाय राःकेडपेःआ।

1 पतरस 2:11

ने ईंगरिकुःआ सउंगताकू, अपे नाःआ चउंदीसरे दुरीन देसरिकुःआ होड़कू इयापे दोहोनतना। हनालगा अपे एचे कसूरगे लगा लहरावपेता हना बेलूर ललची ओंगोलकून अड़ाः एंडाय लगा गोड़न-पइयनकेडपेखनिंग असेयतना।

इबरानी 13:21

दो हाँयग भगवान अपे आँयगराः हिछापे पुरावगोड लगा जमालेःआ नपाय कताकूनतेय ओसताजगोडपे लगायिंग अरजीतना। अरू भगवान ननायगुःता हना कताकून ईसू मसीते अपे एचे अवेय लगा भगवान अपेय संघरावा लगा होयिंग अरजीतना। सगर सइट होड़कू ईसू मसीकू जागगोड ञवन। आमीन!

पिलिपी 3:14

बतकाः होड़कू इमान पवाः लगा तक-तकावकियानखनकू बतकाःता हनन इया ईसू मसीते सेरमो देसराः इमान पवाः लगा भगवान ईंगे राःकेरा।

इपीसी 5:2

ईसू मसी अबू दुलारकेडखन अनँयग जीव अबू लगा भगवान मड़ंगरे मुरुक नपाय महकराः बलिदान इयाय जिमातेरा। हननलगा अपे अँननपे दुलार होड़ेंगगोड ञवन।

इपीसी 4:4

भगवान अबूय राःकेडबुःआ दो अबू जीवरे मिनीटोंग असरा इदा। हनन इया अबू जमाकू मिनी देहराः दगलीकून इदानबुःआ अरू अबू जमाकू एचेरे भगवानराः सुद बिरुवा मिनीटोंग इदा।

इपीसी 3:1

ईंग पउलूस, अपे बेगर एहूदाकू एचेरे ईसू मसी बदीरे परसारगे अते जेहेलरे सींगतो इदानिंगा।

गलातिया 4:12

ने अजी बोपोहकूतिंग, अपे एचेरेयिंग गोड़न-पइयनतना। अपे मड़ंगरे नियमकून मेरपे मनावगाड, हनन इया ईंग होयिंग होयाकिया। दो नुँहू अपे ईंग इया नाःआ नियमकून मनाः लगापे अड़ाः एंडागोड। ईंग अपे एचेरे मड़ंग मी तुरहा परसारगे लगायिंग सेनेडा दो,

इबरानी 3:1

ने सुद अजी बोपोहकूतिंग, भगवान ईंगे राःकेरा हनन इया अपे होंय राःकेरा। हनालगा भगवानरीग बराहील अरू मूक पुजउरी हवे माःआनबू कबुलाःता हाँयग ईसू एचेरे अपेराः ओंगोलपे टक-टकगोड।

2 कुरिंती 10:1

अदोम होड़कू कतायता, पउलूस दुरहियाते चिठीय ओजाःतान मेला मुरुके डीड़गार जुवाःता मनदो अबू मड़ंगरे पोंकाहा इदानिया, माःआन। दो ईंग इनिंग पउलूस मसी इया सुधा अरू हुडिंग ओंगलुः घड़ीन अपे एचेरेयिंग गोड़न-पइयनतना।

तितूस 2:10

अरू तोनोंगाः जिनिस इनिग गोगे लगा कोवानेःआ, मनदो हँकू हँकुःआ मालिककू एचेरे भरसागेयीग होड़कू दोहोन इदा, जेमहा हँकूराः नपाय लूर-नेवन ञेलकेडखन अबूरीग सडावदार भगवानराः सरवन होड़कू एचेरे अनउर मान मरजइत होयाः।

कुलूसी 4:12

इपापरास, अपे अते मी होड़ इदानिया अरू हाँय ईसू मसीरीग सेवकिया हवे। हाँय अपेय सलामतना। अरू हाँय, अपे भगवानराः ओंगोल इया, अपेराः बिसवास जमालेःआ बड़ियाड़ जुवाः लगा, मुरुक मिहनइततेय अरजीगोड ञवनतना।

2 कुरिंती 5:20

दो अले राजारिकुःआ बराहीलकू इया मसी बदीरेले कतायतना। भगवान अलेतेय असेयतान इयाय कतायतना, अरू मसी लगा अपेले असेतना, जेमहा भगवान सुदापे हेल-मेल जुवाः।

मूक चेलाकू 9:31

हना तयोमरे एहूदिया छतररिकुःआ, गलील छतर अरू समरिया छतरराः कलसियारिकुःआ होड़कू सलसतरेकू दोहोना। अरू भगवानराः सुद बिरुवा हँकुःआ होड़कूराः जीव बड़ियाड़गोतेड अरूय कता बहालगोतेड। हँकू परबूराः अकूस मनाः घड़ीनकू दोहोना अरू मुरुक होड़कू हों बिसवासी होड़कूकू बड़ाँवनेना।

रूमी 11:29

भगवान होड़कू एमेवाकूता हना दहिन हाँय मेरेय गोः कुदागेता अरू भगवान सुनावकेडकुःआ हँकुःआ होड़कू हाँय मेरेय लिड़िंगकूता।

इपीसी 2:10

अबू भगवानरिकुःआ तुलात होड़कू हवे अरू मनाड़ंगते अबू लगाय सपड़ाव दोहोकेरा हनानाः नपाय बुताकून ईसू मसीते एचेय लगाय तुलाकेडबुःआ।