कुलूसी 2:12 - Korwa Bible

¹² अरू अपे बतिसमापे गोःतेड मेला, अपे हों मसी सुदापे तीलयना। अरू भगवान अनँयग जंगरते, ईसू मसी गोएगतो होड़कू अतेय जियाव रेमतिरिया माःआनपे बिसवासगेतना। दो नँवा लूर-नेवनते, मसी सुदा अपे होँपे जियाव रेमकिया।

कुलूसी 2:12 Referans Kwoze

1 पतरस 3:21

अरू हना दाः बतिसमाराः अउल-तउल इया इदा। ईसू मसी गोएगतो होड़कू अतेय जियाव रेमकिया अते बतिसमाते अपे बनसाव जुवाःता। नाःआ बतिसमाते अपेराः देहराः मइल बुहाल अमिंगगुः लगा कोवानेःआ। मनदो हन बतिसमा अपेराः इंदरी नपायते दोहो ञवन लगा भगवान एचेरे मीटोंग अरजी इया इदा।

गलातिया 3:27

अरू अपे बतिसमाते ईसू मसी सुदापे मिनीयना अरू नँवा सोनहेपे तुसिंगतान इया अपेराः लूर-नेवन ईसू मसीराः इया होयायना।

मूक चेलाकू 2:24

मनदो हाँय गुनुजुः गुजुःराः आड़रे ओनोरोय दोहो अवेनेना। हनालगा भगवान हाँय गुजुः अते सडावतिरिगखने जियाव रेमकिरिया।

इपीसी 3:17

अपेराः बिसवासते ईसू मसी अपेराः इंदरीरेय डेरान लगायिंग अरजीतना। जेर गहीर सेनेकियानखन सींग बड़ियाड़गेता अरू ओड़ाः खुंटा बड़ियाड़गेता, हनन इया अपेराः जीव अलार दुलारते बड़ियाड़ जुवाः लगा होयिंग अरजीतना।

रूमी 4:24

परबू ईसू गोएगतो होड़कू अते भगवान जियाव रेमकिडिया माःआनबू बिसवासगेता दो, भगवान अबू बेगर गारबार होड़कूय ओंगोल दोहोबाःकाबूता।

इपीसी 4:5

अबू जमाकू लगा मिनीटोंग परबू अरू मिनीटोंग बिसवास इदा अरू मिनीटोंग बतिसमाबू गोःता,

इपीसी 2:8

अपे ईसू मसी एचेरेपे बिसवासकेड मेला भगवान आँयगराः मयाते अपेय सडावकेडपेःआ। अरू अपे अँननपे कुरनिसगे अते मेरपे सडावगना, मनदो भगवानराः दहिन हवे।

1 कुरिंती 15:20

तोनोंगाः सींगरे मड़ंग जोःओबू ञेलतान दो अबू सुदीगोडता नाःआ सींग दूबते अरू बगरा जोःओ जोःता। ननन इया भगवान, ईसू मसी हों गोएगतो अतेय जियाव रेमकिरिया। हनालगा गोएगतो होड़कू हों भगवान जियाव रेमकूता।

इबरानी 12:2

अबूराः बिसवासे बुँहड़ीता अरूय उडु-बुडूगेता, हाँयग ईसू अगी सिरढीटबू ञेलगोड ञवन। हाँय कुरूसराः गुजुः बदीरे एचे बेग-हतान लगा मेरेय ओंगोल एरंगगान, मनदो हाँय दरवाःआ हना बहालराः कताकून लगा हना कटसियाय सहावतेरा। अरू हना तयोमते भगवानराः गदीराः खउना तिःई गतर हाँय दुड़ुःकिया।

इबरानी 6:2

अरू बतिसमा बदीरे अरू तिःई खेपा बदीरे अरू गोएगतो अते जियाव रिमुः बदीरे अरू ओरो टुटीगनेना हना डंड बदीरे चेडतो इया नेव अनउर अहाबू गडाय।

पिलिपी 1:29

अपे ईसू मसी एचेरे बिसवासगे लगा एकला कोवान, मनदो हाँय लगा कटसिया हों सहाव लगाय दहिनवाडपेःआ।

इपीसी 5:14

अरू मरसलरे जमा जिनिसकून नपायतेबू ञेलता। हनालागा नाःआ इयाबू कतायता, “ने अपीगतो होड़कू, बेरेडपे! अरू गोएगतो अतेपे जियाव रिमुः, दो मसी अपेराः जीवरे मरसले एमेवापेता।”

इपीसी 3:7

भगवान अनँयग जंगरते ईंगे मयावारा अरू हना मयाते नपाय सरवन एटाःकू एचेरे कता उदुःगे लगा, ईंग हाँयरीग सेवकिया होड़िंग बड़ाँवयना।

1 कुरिंती 12:13

अबू अते तोनोंग तोनोंग होड़कू एहूदाकू हवे अरू तोनोंग तोनोंग होड़कू बेगर एहूदाकू हवे। अबू अते तोनोंग तोनोंग होड़कू बेगारी होड़कू इदानकुःआ अरू तोनोंग तोनोंग होड़कू बेगारी होड़कू कोवाकुःआ। मनदो भगवान सुद बिरुवाते अबू जमाकू बतिसमाय एमेवाडबुःआ अरू मसीराः देहराः एटाः एटाः दगलीकूने बड़ाँवकेडबुःआ। नुँहू भगवान अबू जमाकू जीवरे हनानाः बिरुवाय एमेकेरा।

रूमी 7:4

ईंगरिकुःआ अजी बोपोहकूतिंग, हनन इया अबू ईसू मसी सुदाबू गोएगनेना। हनालगा नुँहू अपे भगवान ननायगे लगा मोसेस एमेकेरा हना मड़ंगाः नियमकूनराः बोझारे कोवापेःआ। ईसू गोएगतो होड़कू अते भगवान जियाव रेमकिरिया, जेमहा अबू हाँय लगा नपाय बुताबू बुता अवेय। अरू नुँहू अबू नाँयग ईसूरिकुःआ होड़कू हवे।

मूक चेलाकू 14:27

हंडाकिन सोदोरनेन दो हँकिन जमा बिसवासी होड़कूकिन एचे जुमावतेडकुःआ अरू हँकिनते भगवान एचेतेरा अरू भगवान बेगर एहूदाकू ईसू एचेरे करा उड़ीकू बिसवासतेरा हना जमाकूनकिन कता उदुःतेरा।

लूका 17:5

ईसूरिकुःआ मूक चेलाकू परबू एचेरेकू कताया, “अलेराः बिसवासमे बडे।”

मूक चेलाकू 2:32

भगवान ननाँय ईसू गोएगतो होड़कू अतेय जियाव रेमकिरिया अरू अले जमाकू नाःआ सताय कताराः हिदइतदारकू इदानलेःआ।

कुलूसी 1:29

ननानाः लगा ईसू मसी ईंगे एमेवारा हना जंगरते, मुरुक मिहनइत घड़ीनिंग सेवाकूतना।

कुलूसी 2:13

मड़ंगरे अपे कसूरते अरू अपेराः बेलूराः नेवनते, बेगर खतनात होड़कू अरू गोएगतो होड़कू इयापे दोहोना। मनदो भगवान अबूराः कसूर बराव एंडाकेडखन, मसी सुदाय जियाव रेमकेडबुःआ।